Kulturë

Netflix paditet me 5 milionë dollarë për ‘Queen’s Gambit’

Nona Gaprindashvili, gruaja e parë që u emërua mjeshtre e shahut, paditi Netflix në shtator.

Published

4 years ago

on

Netflix do të përballet me një padi prej 5 milionë dollarësh për shpifje nga një mjeshtre shahu, e cila pretendon se për të u shpif në serialin hit “The Queen’s Gambit”.

Nona Gaprindashvili, gruaja e parë që u emërua mjeshtre e shahut, paditi Netflix në shtator. Gaprindashvili pretendon se një pjesë nga “The Queen’s Gambit”, ku një personazh thotë gabimisht se ajo “nuk është përballur kurrë me burra”, është “seksiste dhe nënçmuese”.

Gaprindashvili ka luajtur kundër 59 konkurrentëve meshkuj deri në vitin 1968, viti kur ndodhin ngjarjet në serial.

Kërkohet dëmshpërblim sepse pretendohet se është një “gënjeshtër shkatërruese, që zvogëlon dhe degradon arritjet e saj para një auditori prej miliona njerëz”. Netflix ka kërkuar më parë që padia për shpifje të hidhej poshtë, duke argumentuar se seriali është i trilluar. Netflix gjithashtu shtoi se përdori dy ekspertë shahu për të vërtetuar detajet në serial, duke vënë në dukje se referimi ndaj Gaprindashvili kishte për qëllim “ta njihte atë, jo ta nënçmonte”, sipas avokatëve të platformës.

Por vendimi i fundit i gjykatës zbuloi se argumenti i Gaprindashvilit ishte i arsyeshëm, duke vënë në dukje se shfaqjet e trilluara nuk mbrohen nga shpifja nëse jepen informacione të rreme për njerëzit e vërtetë. Padia gjithashtu vuri në dukje se filmi e portretizonte atë si ruse, megjithëse ajo është gjeorgjiane.

Gaprindashvili tani është 80 vjeç dhe jeton në Tbilisi, Gjeorgji. “Ata po përpiqeshin të bënin një personazh imagjinar që po hapte rrugën për gratë e tjera, kur në realitet unë kisha hapur rrugët dhe frymëzova brezat” tha Gaprindashvili në një intervistë për New York Times. “Kjo është ironia”.

Ajo është gruaja e parë që iu dha titulli Mjeshtre e Madhe nga Federata Ndërkombëtare e Shahut./lapsi.al/

Related Topics:
Continue Reading

Lajmet

Filmi “Dua” i Blerta Bashollit prezantohet sonte në festival ndërkombëtar

Published

9 hours ago

on

June 29, 2026

By

Filmi artistik me metrazh të gjatë “Dua”, me skenar dhe regji të regjisores kosovare Blerta Basholli, do të prezantohet sonte në orën 20:30 në kuadër të një festivali ndërkombëtar të filmit, ku marrin pjesë produksione nga e gjithë bota.

Filmi ka tërhequr vëmendjen e skenës ndërkombëtare pasi është vlerësuar me Çmimin SACD Semaine de la Critique – Cannes 2026.

Sipas njoftimit zyrtar, pas prezantimit në festival, “Dua” pritet të nisë së shpejti edhe shfaqjet në kinema.

I vendosur në Kosovën e viteve ’90, filmi trajton sfidat me të cilat u përball populli shqiptar gjatë asaj periudhe, përmes rrëfimit të protagonistes kryesore, Dua, e interpretuar nga aktorja Pinea Matoshi./A.K/

Continue Reading

Lajmet

Baleti Kombëtar i Kosovës performon për herë të parë në Romë me “Carmina Burana”

Published

14 hours ago

on

June 29, 2026

By

Baleti Kombëtar i Kosovës do të prezantojë shfaqjen “Carmina Burana” në Romë, Itali, në bashkëpunim me Ambasadën e Republikës së Kosovës në Itali dhe Accademia Nazionale di Danza di Roma.

Shfaqja, me koreografi nga Toni Candeloro, do të mbahet më 18 korrik në Teatro Grande të Accademia Nazionale di Danza.

Kjo shënon performancën e parë të Baletit Kombëtar të Kosovës në kryeqytetin italian, ku publikut do t’i prezantohet një nga veprat më të njohura të repertorit ndërkombëtar./A.K/

Continue Reading

Lajmet

Kori “Okarina” përmbyll me sukses “Javën e Kulturës së Kosovës” në Berlin

Published

16 hours ago

on

June 29, 2026

By

Ambasadori i Kosovës në Gjermani, Faruk Ajeti, ka vlerësuar koncertin e Korit të Fëmijëve “Okarina” në Filarmoninë e Berlinit si një nga momentet më të veçanta të “Javës së Kulturës sëKosovës në Berlin 2026”.

Sipas tij, interpretimi i veprës “Baresha”, i shoqëruar me tingujt e çiftelisë, emocionoi publikun dhe dëshmoi vlerat artistike të muzikës shqiptare në një nga skenat më prestigjioze në botë.

Ajeti theksoi se koncerti përmbylli me sukses aktivitetet e “Javës së Kulturës së Kosovës në Berlin 2026”, duke e cilësuar si një hap të rëndësishëm në promovimin e kulturës kosovare dhe forcimin e prezencës së saj në Gjermani dhe në arenën ndërkombëtare. /A.K/

Continue Reading

Lajmet

Arapi Krasniqi ndau certifikatat për gjeneratën e re të udhërrëfyesve turistikë

Published

4 days ago

on

June 26, 2026

By

Në ambientet e Muzeut të Hidroelektranës, zëvendësministrja e Kulturës dhe Turizmit, Nora Arapi Krasniqi, ndau certifikatat për gjeneratën e re të udhërrëfyesve turistikë të trajnuar në kuadër të programit GUIDEKS.

Programi, i realizuar në bashkëpunim ndërmjet GUIDEKS, Ministrisë së Kulturës dhe Turizmit dhe Ministrisë së Industrisë, Ndërmarrësisë dhe Tregtisë, synon krijimin e një rrjeti profesionistësh që do të promovojnë kulturën, trashëgiminë dhe potencialin turistik të Kosovës.

Sipas Ministrisë së Kulturës dhe Turizmit, udhërrëfyesit e certifikuar do të kenë rol të rëndësishëm në prezantimin e vlerave kulturore dhe historike të vendit, duke u ofruar vizitorëve përvoja më cilësore dhe më profesionale.

Me këtë rast, ministria ka njoftuar edhe hapjen e thirrjes për regjistrimin e udhërrëfyesve turistikë, si hap drejt krijimit të regjistrit zyrtar të udhërrëfyesve në Republikën e Kosovës.

Regjistrimi është i obligueshëm për të gjithë ata që dëshirojnë të ushtrojnë veprimtarinë e udhërrëfyesit turistik në Kosovë./A.K/

Continue Reading

Të kërkuara