Zëdhënësi i Kremlinit, Dmitry Peskov, tha se raundi i tretë i negociatave midis Rusisë dhe Ukrainës do të bëhet i qartë këtë javë.

Peskov diskutoi mundësinë e një raundi të ri bisedimesh midis Rusisë dhe Ukrainës me gazetarët në kryeqytetin Moskë dhe deklaroi se ata vazhdojnë të punojnë me Ukrainën në nivel ekspertësh.

“Procesi i zbatimit të marrëveshjeve të arritura në Stamboll vazhdon. Procesi i shkëmbimit të të burgosurve dhe kufomave vazhdon“, tha Peskov.

Peskov u shpreh se besojnë se raundi i tretë i negociatave do të bëhet i qartë këtë javë, duke shtuar: “Prandaj, ne po vazhdojmë punën tonë”.

Duke vënë në dukje se takimi midis presidentit rus, Vladimir Putin dhe homologut të tij amerikan, Donald Trump, do të zhvillohet vetëm pasi të përfundojë procesi i negociatave, Peskov tha se ata po punojnë për të arritur qëllimet që kanë vendosur në lidhje me Ukrainën.

Irani nuk e ka përjashtuar mundësinë e një reagimi ushtarak të drejtpërdrejtë ndaj bazave amerikane në Lindjen e Mesme, si kundërpërgjigje ndaj sulmeve ajrore që Shtetet e Bashkuara ndërmorën ndaj objekteve të tij bërthamore. Kështu deklaroi zëvendësministri i Jashtëm për Arsim dhe Kërkim, Saeed Khatibzadeh, në një intervistë për rrjetin televiziv Al Jazeera.

“Irani do të vendosë se si, kur dhe në çfarë niveli t’u përgjigjet amerikanëve,” u shpreh Khatibzadeh, duke shtuar se vendi i tij e konsideron të drejtë legjitime mbrojtjen e sovranitetit dhe kapaciteteve strategjike përballë agresionit të jashtëm.

Ai e cilësoi sulmin e forcave amerikane ndaj impianteve bërthamore si Fordoë si një “gabim të rëndë”, duke theksuar se kjo përbën një shkelje të qartë të së drejtës ndërkombëtare.

Hakmarrjen Irani e nisi fillimisht ndaj Izraelit, ku edhe këtë të hënë ndërmori një sulm masiv me raketa.

Ndërkohë, Izraeli ka vijuar sulme ajrore rreth Teheranit, duke synuar qendrat e komandës së Gardës Revolucionare Islamike.

Shefi i Agjencisë Ndërkombëtare për Energjinë Atomike (IAEA), Rafael Grossi, u bëri sërish thirrje të gjitha palëve të shmangin çdo formë sulmi ndaj objekteve bërthamore, duke paralajmëruar për rreziqe të mëdha nga rrezatimi.

Komisioni Evropian ka ndarë një total prej 202 milionë eurosh  për Autoritetin Palestinez (PNA) dhe Agjencinë e Kombeve të Bashkuara për Refugjatët Palestinezë (UNRWA) për të siguruar shërbime thelbësore në Rripin e Gazës.

Këto janë shpërndarjet e para të paketës prej 1,6 miliardë eurosh për vitet 2025-2027 të shpallura në prill.

Shuma përfshin një kontribut prej 150 milionë eurosh në PNA për të mbështetur arsimin, kujdesin shëndetësor dhe pagesën e pagave të stafit të sektorit publik në këmbim të vazhdimit të reformave të dakorduara.

Pjesa e mbetur prej 52 milionë eurosh është caktuar për UNRWA për të ofruar ndihmë humanitare, arsimore dhe shëndetësore për refugjatët palestinezë në Rrip, Bregun Perëndimor dhe vendet pritëse, përfshirë Jordaninë, Libanin dhe Sirinë.

“Mbështetja jonë për popullin palestinez mbetet konstante. Me këtë ndarje, ne riafirmojmë angazhimin tonë të fortë politik dhe financiar. BE-ja është thellësisht e shqetësuar nga situata katastrofike humanitare në Gaza dhe kushtet e përkeqësuara në Bregun Perëndimor”, theksoi Komisionerja Evropiane për Mesdheun, Dubravka Suica, duke përsëritur nevojën për “një paqe të drejtë dhe të qëndrueshme, bazuar në një zgjidhje të negociuar me dy shtete”./atsh

Presidenti rus, Vladimir Putin, e dënoi të hënën sulmin ndaj Iranit si “të paarsyeshëm” dhe “të paprovokuar” gjatë një takimi me ministrin e Jashtëm iranian, Abbas Araghchi, por nuk shpalli asnjë mbështetje konkrete për aleatin kyç të Moskës në Lindjen e Mesme.

Moska është një aleate e rëndësishme e Iranit, por nuk ka dalë fuqishëm në mbështetje të Teheranit, ndonëse Shtetet e Bashkuara goditën fundjavën që lamë pas objektet bërthamore iraniane.

“Ky agresion i paprovokuar ndaj Iranit është i pajustifikueshëm”, tha Putin në fillim të takimit.

Putin nuk i përmendi drejtpërdrejt sulmet amerikane, duke folur në mënyrë të përgjithshme për “goditje” ndaj Iranit, megjithëse Kremlini kishte deklaruar më herët të hënën se i dënonte dhe i vinte keq për sulmet e SHBA-së.

“Ka një përshkallëzim të ri të tensioneve në rajon, dhe ne sigurisht e dënojmë këtë dhe shprehim keqardhje të thellë në këtë drejtim”, tha zëdhënësi i Kremlinit, Dmitry Peskov, para se Putin të takonte Araghchin në Kremlin.

Putin është përpjekur të paraqitet si ndërmjetës mes Iranit dhe Izraelit – një ide që u hodh poshtë javën e kaluar nga presidenti amerikan, Donald Trump.

Araghchi i tha Putinit se Rusia ka qenë një “partnere dhe bashkudhëtare” e Iranit dhe vlerësoi marrëdhëniet mes Teheranit dhe Moskës si “shumë të ngushta dhe afatgjata”.

“Irani po ushtron të drejtën legjitime për vetëmbrojtje ndaj këtyre agresioneve”, shtoi ai.

Serhiy Danylov, zëvendësdrejtor i Qendrës për Studime të Lindjes së Mesme, tha për projektin e Radios Evropa e Lirë, Current Time, se në Iran po rritet zhgënjimi dhe pakënaqësia ndaj Rusisë – si brenda elitës politike, ashtu edhe në mesin e qytetarëve të zakonshëm.

Sipas tij, Rusia perceptohet si një vend që tregton interesat e Iranit, dhe ky perceptim është i saktë. Rusia shihet si tradhtare – një vend që bëri premtime, por nuk i përmbushi ato.

“Tani, qartazi, iranianët do të kërkojnë, për shembull, municion për sistemin mbrojtës ajror Pantsir-S1, që e përdorin në mënyrë aktive, dhe që është një nga të paktat kapacitete që u kanë mbetur. Do të kërkojnë raketa për mbrojtje ajrore, apo pajisje të përgjithshme për mbrojtje nga ajri – por nuk do të marrin asgjë. Ndoshta ndonjë sasi municioni mund të mbërrijë përmes detit, por në përgjithësi, Rusia nuk mund të bëjë asgjë për Iranin tani. Në fakt, nuk besoj se ka ndonjë dëshirë të bëjë – sepse për Rusinë, marrëdhënia me Donald Trumpin është shumë më e rëndësishme sesa ajo me Iranin”, tha Danylov.

Që prej sulmeve izraelite më 13 qershor, të cilat nxitën një kundërpërgjigje iraniane me raketa dhe dronë, Rusia nuk ka ofruar publikisht ndihmë ushtarake për Teheranin.

Putin dhe zyrtarë të tjerë rusë kanë minimizuar, gjithashtu, rëndësinë e marrëveshjes së gjerë për partneritet strategjik, të nënshkruar muaj më parë me Iranin, duke theksuar se nuk është një pakt për mbrojtje të ndërsjellë.

“Rusia po bën përpjekje për të ndihmuar popullin iranian”, tha Putin gjatë takimit, pa dhënë hollësi të mëtejshme.

I pyetur se çfarë mbështetjeje specifike mund të ofronte Rusia, Peskov tha për gazetarët: “Gjithçka varet nga nevojat e Iranit. Ne kemi ofruar shërbimet tona si ndërmjetës”.

Ai shtoi gjithashtu se sulmet e SHBA-së ndaj Iranit nuk do të ndikojnë në marrëdhëniet dypalëshe mes Moskës dhe Uashingtonit, duke i quajtur ato “çështje të ndryshme”.

Putin tha javën e kaluar se Irani nuk ka kërkuar ndihmë nga Rusia./REL/