Protestat në Turqi kanë vazhduar për natën e gjashtë me radhë, me mijëra njerëz që janë grumbulluar nëpër qytete të ndryshme të vendit për të protestuar kundër arrestimit të kryebashkiakut të Stambollit, Ekrem Imamoglu. Demonstruesit janë mbledhur në qytete si Stamboll, Ankara, dhe Izmir, ku kanë kërkuar dorëheqjen e qeverisë dhe kanë bërë thirrje për ndryshime politike të menjëhershme.

Në Stamboll, mijëra studentë marshuan drejt administratës së qytetit, duke u mbështetur nga banorët që godisnin tenxheret dhe brohorisnin në shenjë mbështetjeje. Po ashtu, në Ankara, u shfaqën imazhe të mijëra protestuesve që hodhën parulla të tilla si “Qeveri, dorëhiqu!” si reagim ndaj zhvillimeve politike të fundit.

Protestat shpërthyen pas arrestimit dhe shkarkimit të Ekrem Imamoglu, i cili është një kundërshtar i fortë i presidentit Recep Tayyip Erdogan dhe një kandidat i mundshëm për zgjedhjet presidenciale. Imamoglu, i cili është nën akuza për korrupsion dhe terrorizëm, i ka quajtur akuzat ndaj tij “imorale dhe të pabaza”. Megjithë arrestimin, partia e tij, CHP, e ka emëruar atë kandidatin e saj për president.

Në Stamboll, shefi i CHP-së, Özgür Özel, i bëri thirrje qytetarëve për bojkot të disa markave që janë të lidhura me qeverinë, përfshirë një zinxhir të njohur kafenesh dhe operatorë karburanti.

Ndërkohë, presidenti Erdogan iu drejtua protestuesve në një fjalim të fortë televiziv, ku i quajti demonstratat “lëvizje të dhunshme”. Ai paralajmëroi opozitën dhe protestuesit, duke thënë: “Mos prishni qetësinë e bashkëqytetarëve tanë me provokimet tuaja. Mos luani me nervat e kombit. Mos lëshoni grupe të krahut të majtë kundër policisë sonë.”

Erdogan kërcënoi se opozita do të mbajë përgjegjësi për thirrjet e saj për protestë dhe i akuzoi protestuesit për nxitje të dhunës. Demonstratat, megjithëse kanë qenë kryesisht paqësore, janë përshkruar nga Erdogan si një akt dhune.

Sipas të dhënave të Ministrisë së Brendshme të Turqisë, që nga fillimi i protestave, janë arrestuar më shumë se 1000 persona, ndërsa tensionet vazhdojnë të rriten në qytetet kryesore të vendit./UBTNews/

Presidenti i Turqisë, Rexhep Tajip Erdogan, ka dënuar protestat e opozitës që pasuan arrestimin e kryebashkiakut të Stambollit, Ekrem Imamoglu. Ai i ka cilësuar protestat e qytetarëve si të jashtëligjshme dhe ka theksuar se opozita është e paaftë për të qeverisur vendin, duke shtuar se e vetmja gjë që mund të menaxhojë është administrimi i bashkive dhe komunave.

Erdogan theksoi se pamjet e dhunës dhe incidenteve që ndodhën gjatë protestave janë të papranueshme dhe denoi veprimet e partisë kryesore opozitare për nxitjen e qytetarëve në dhunë ndaj policisë, duke përdorur gurë, topa dhe kokteje molotov. Ai shtoi se opozita nuk ka aftësinë për të qeverisur shtetin, përveç menaxhimit të nivelit lokal./UBTNews/

Të dy aeroportet kryesore të Brukselit – Aeroporti i Brukselit dhe Aeroporti i Charleroit – kanë shpallur një grevë njëditore për 31 mars, duke anuluar të gjitha fluturimet dalëse. Kjo është pjesë e një greve mbarëkombëtare, e cila është e dyta për shkak të reformave të qeverisë së re të Belgjikës në tregun e punës.

Greva ka përfshirë gjithashtu stafin e sigurisë dhe ekuipazhin tokësor, të cilët do të protestojnë kundër propozimeve të qeverisë për reformën e pensioneve dhe të punës. Aeroporti i Brukselit ka njoftuar se mbërritjet gjithashtu do të preken nga kjo grevë.

Protestat e mëparshme ndaj këtyre reformave, përfshirë ndryshimet që ndihmojnë ata që punojnë pas pensionimit dhe penalizojnë pensionistët që nuk kanë arritur 35 vjet shërbimi, kishin sjellë anulimin e 430 fluturimeve gjatë një greve të mëparshme. Reformat janë kritikuar për faktin se ato favorizojnë më pak ata me të ardhura të ulëta.

Qeveria flamande e Bart De Wever, pas muajsh negociatash, ka miratuar këto reforma, që janë bërë shkak për kundërshtimin e gjerë në vend./UBTNews/