Presidenti i SHBA-së, Donald Trump deklaroi nga Samiti i NATO-s se do të shqyrtonte mundësinë e furnizimit të Kievit me më shumë raketa ”Patriot”, për të cilat Ukraina ka nevojë për t’u mbrojtur nga sulmet ruse.

”Presidenti rus Vladimir Putin duhet t’i japë fund kësaj lufte”, shtoi Trump.

Komentet e Trump erdhën pas një takimi 50-minutësh me presidentin ukrainas, Volodymyr Zelensky në kuadër të një samiti të NATO-s në Hagë.

Të dy udhëheqësit e përshkruan atë si një hap pozitiv në një konflikt që presidenti i SHBA-së e quajti “më të vështirë se luftërat e tjera”.

Trump tha në një konferencë për shtyp se raketat ”Patriot” ishin shumë të vështira për t’u siguruar, por do të shohim nëse mund t’i vëmë disa në dispozicion.

Presidenti i SHBA-së la gjithashtu të hapur mundësinë e ofrimit të më shumë ndihme ushtarake për Kievin.

I pyetur nëse Uashingtoni do të kontribuonte me më shumë para’ për mbrojtjen e Ukrainës këtë vit, Trump tha se “sa i përket financimit, do të shohim se çfarë ndodh”.

Zelensky tha para takimit se Ukraina ishte e gatshme të blinte më shumë raketa ”Patriot”, edhe nëse SHBA-të ishin të gatshme t’i dhuronin ato.

Ai i quajti bisedimet me dyer të mbyllura me Trump “të gjata dhe thelbësore”, ndërsa presidenti i SHBA-së tha se takimi “nuk mund të kishte qenë më i këndshëm”./atsh

Forcat izraelite kanë kryer një bastisje në fshatin al-Arooj në Bregun Perëndimor të pushtuar dhe kanë arrestuar më shumë se 20 palestinezë.

Fshati ndodhet në juglindje të Betlehemit në territorin e pushtuar palestinez.

Më parë, raportuam gjithashtu se forcat izraelite kryen një bastisje të veçantë në Nablus dhe arrestuan 14 persona. Disa zona në qytetin e Hebronit u shënjestruan gjithashtu herët të enjten.

Forcat izraelite kanë kryer bastisje të përditshme në Bregun Perëndimor të pushtuar që nga sulmi i Hamasit në tetor 2023.

Presidenti i Ukrainës, Volodymyr Zelensky, e nënshkroi të mërkurën vonë një marrëveshje me Këshillin e Evropës për themelimin e një tribunali të posaçëm që do t’i gjykonte zyrtarë të lartë përgjegjës për pushtimin e Ukrainës nga Rusia.

Tribunali do t’i ndjekë penalisht “krimet e agresionit” në lidhje me pushtimin dhe mund të gjykojë politikanë të lartë rusë, përfshirë presidentin Vladimir Putin.

“Çdo kriminel lufte duhet ta dijë se do të ketë drejtësi dhe kjo vlen edhe për Rusinë”, tha Zelensky pas nënshkrimit të marrëveshjes në Strasburg me sekretarin e përgjithshëm të Këshillit të Evropës, Alain Berset.

“Do të nevojitet guxim i madh politik dhe ligjor për t’u siguruar se çdo kriminel rus i luftës do të përballet me drejtësinë, përfshirë Putinin”, tha Zelensky në Asamblenë Parlamentare të Këshillit të Evropës pas nënshkrimit të marrëveshjes.

“Duhet ta dërgojmë një mesazh të qartë: agresioni çon në ndëshkim. Dhe, këtë duhet ta bëjmë së bashku, si Evropë”, shtoi ai më vonë në X.

Mandati i tribunalit do të jetë ndjekja penale e drejtuesve të lartë politikë dhe ushtarakë për krimin e agresionit kundër Ukrainës, tha Këshilli i Evropës.

“Kjo vepër penale i referohet vendimit për të përdorur forcën e armatosur kundër një shteti tjetër duke e shkelur Kartën e OKB-së”, tha këshilli.

Shtetas të Bjellorusisë apo Koresë së Veriut mund të ndiqen gjithashtu penalisht nëse provohet se kanë luajtur rol të rëndësishëm në krimin e agresionit kundër Ukrainës, shtoi ai.

Berset theksoi se e drejta ndërkombëtare “duhet të zbatohet për të gjithë, pa përjashtime dhe pa standarde të dyfishta”.

Ai tha se Këshilli i Evropës shpreson se tribunali do ta nisë punën vitin e ardhshëm. Nuk është vendosur ende se ku do ta ketë selinë tribunali.

Kjo është hera e parë që një tribunal i tillë themelohet nën mbikëqyrjen e Këshillit të Evropës, organit më të lartë për të drejtat e njeriut në kontinent.

Këshilli i Evropës, me 46 anëtarë, nuk është pjesë e BE-së, dhe përfshin shtete evropiane të rëndësishme jashtë BE-së si, Turqia, Mbretëria e Bashkuar dhe Ukraina.

Rusia u përjashtua pas pushtimit të Ukrainës./REL/

Zvicra do të pranojë refugjatë ukrainas pa procedura të gjata administrative, vetëm nëse ata janë në rrezik të vërtetë në vendin e tyre.

”Të gjithë të tjerët do të duhet të kalojnë nëpër një procedurë azili”, njoftoi qeveria.

Megjithatë, Zvicra synon të koordinohet me Bashkimin Evropian dhe ende po pret konsultime me rajonet e vendit.

Sipas planeve aktuale, masa pritet të zbatohet në vjeshtë.

Sekretariati Shtetëror për Migracionin (SEM) tani do të bëjë dallimin midis rajoneve të përcaktuara si “të sigurta” dhe “të pasigurta” kur përpunon aplikime të reja.

“Sipas vlerësimit aktual të SEM, aktualisht nuk ka luftime intensive në disa rajone të kontrolluara nga Ukraina në perëndim të vendit”, tha qeveria zvicerane.

Ukrainasit që tashmë kanë ikur në Zvicër nuk preken nga kjo masë.

Megjithatë, kërkesat për ta do të shtrëngohen dhe kushdo që qëndron në Ukrainë për më shumë se 15 ditë në semestër do të humbasë statusin e tij të veçantë të refugjatit.

Më parë, lejoheshin 15 ditë në tremujor.

Ende ka pak më pak se 69 000 njerëz nga Ukraina me status të veçantë të refugjatit që jetojnë në Zvicër./atsh