Shkencëtarët thanë se kanë zbuluar koralin më të madh në botë afër Ishujve Solomon në Paqësor, duke thënë se ai është “plot jetë dhe me ngjyra”.

Korali i zbuluar është aq i madh saqë hulumtuesit, që po bënin kërkime në ujërat e kristalta të arkipelagut të Solomonit, fillimisht menduan se hasën në një anije të fundosur.

“Kur ne menduam se nuk ka mbetur asgjë tjetër për t’u zbuluar në planetin Tokë, ne gjetëm një koral masiv të bërë nga gati 1 miliard polipe të vogla, që pulson me jetë dhe ngjyra”, tha ekologu detar, Enriv Sala.

Struktura besohet se është rritur për rreth 300 vjet, thanë shkencëtarët, dhe është krijuar nga një “rrjet i ndërlikuar” i polipeve të vogla koralesh.

Ky koral dallon nga një koral shkëmbor, i cili përbëhet nga koloni të dallueshme koralesh, shpjeguan shkencëtarët.

I gjerë 34 ketra dhe 32 metra i gjatë, ky “mega-koral”, thanë hulumtuesit, është tri herë më i madh sesa korali më i madh i zbuluar paraprakisht në Samoan amerikane, i quajtur “Big Momma”.

“Përderisa ‘Big Momma’ duket si një lugë e madhe me akullore e vendosur poshtë një shkëmbi, ky koral i sapozbuluar është sikurse akullorja kur fillon të shkrihet, dhe shtrihet përgjatë shtratit të detit”, tha shkencëtarja kryesore e ekipit që e zbuloi koralin, Molly Timmers.

Korali është më i gjatë sesa një balenë blu dhe besohet se është “aq kolosal” sa mund “të shihet nga hapësira”.

Korali u zbulua në cepin juglindor të Ishujve Solomon, në një zonë që njihet si Tri Motrat.

Ai u pikas nga një ekip i National Geographic, që po kryente një ekspeditë shkencore në rajon.

Oqeanet më të nxehta dhe acidet kanë shkatërruar jetën e koraleve në shumë zona të ujërave tropikale. Por, zbulimi i fundit ofron shpresë, tha ekipi që e zbuloi koralin.

“Përderisa shkëmbinjtë e cekët që gjenden afër u degraduan për shkak të deteve të ngrohta, të gjesh një koral kaq të shëndetshëm në ujëra pak më të thella është një fije shprese”, tha shkencëtari i koraleve, Eric Brown.

Ujërat e pastër të Ishujve Solomon njihen prej kohësh për diversitetin e tyre ekologjik.

“Ka shumë ende për të mësuar për pasuritë e jetës detare dhe të ekosistemit të oqeanit, por ky zbulim hap dyert për dije”, tha zyrtari kryesor i Ishujve Solomon, Collin Beck.

“Duhen kërkime të tjera për të kuptuar më mirë biodiversitetin tonë të pasur dhe të planetit tonë”, shtoi ai./REL/

Më shumë njerëz se kurrë më parë emigruan nga vendet e tyre drejt shteteve anëtare të Organizatës për Bashkëpunim Ekonomik dhe Zhvillim (OECD) gjatë vitit 2023, duke shënuar një nivel rekord të migracionit.

Sipas raportit vjetor OECD Migration Outlook 2024, i cili u publikua sot nga organizata me qendër në Paris, 6,5 milionë njerëz mbërritën në shtetet anëtare të OECD si emigrantë gjatë vitit të kaluar. Ky fluks emigrantësh ka theksuar një trend të rritjes së migracionit të përkohshëm dhe kërkesave për azil, që u regjistruan në nivele rekord, sidomos në Shtetet e Bashkuara të Amerikës.

Raporti vë në dukje se një pjesë e konsiderueshme e migracionit është lidhur me punësimin. Emigrantët që kanë migruar për arsye punësimi janë rritur ndjeshëm, dhe një tjetër faktor i rëndësishëm ka qenë bashkimi familjar, i cili përbën ende rreth një të tretën e migracionit të përgjithshëm.

Rritje e kërkesave për azil
Një tjetër tendencë e dukshme është rritja e kërkesave për azil. Shtetet si Shtetet e Bashkuara dhe Gjermania kanë parë një numër rekord aplikimesh. Në vitin 2023, Gjermania regjistroi 329,000 kërkesa për azil, një rritje prej 51% krahasuar me vitin e kaluar. Këto kërkesa erdhën kryesisht nga shtetas të Sirisë, Turqisë dhe Afganistanit.

Pjesa më e madhe e aplikimeve, rreth 62%, janë pranuar, duke theksuar angazhimin e këtyre shteteve për të ofruar mbrojtje për refugjatët dhe azilkërkuesit.

Liria e lëvizjes në Bashkimin Evropian
Megjithatë, një pjesë e konsiderueshme e migracionit, rreth gjysma e tij, ka ardhur si pasojë e lirisë së lëvizjes brenda Bashkimit Evropian. Kjo ka mundësuar që shumë qytetarë të shteteve anëtare të BE-së të zhvendosen në shtete të tjera të BE-së për arsye punësimi dhe mundësish më të mira jetese.

OECD dhe anëtarësia
OECD është një organizatë ndërkombëtare që përfshin 38 shtete anëtare, përfshirë shumicën e vendeve të industrializuara të Evropës, Amerikës së Veriut, Japoni, Korenë e Jugut, Australi dhe Zelandë të Re. Migrimi ka qenë një prej çështjeve më të diskutuar në nivel global dhe ky raport i OECD-së thekson se fluksi i emigrantëve nuk ka treguar shenja ngadalësimi, duke pasqyruar gjithashtu mundësitë dhe sfidat që shtetet anëtare të OECD-së po hasin në menaxhimin e këtij fenomeni.

Raporti vjen në një kohë kur OECD po kërkon mënyra të reja për të mbështetur menaxhimin e migracionit në një mënyrë që të balancojë nevojat ekonomike dhe sociale të shteteve anëtare, me sfidat që lidhen me integrimin dhe sigurinë.

Metodat e luftës së Izraelit në Gazë konsistojë me karakteristikat e gjenocidit, tha një komitet i posaçëm i Kombeve të Bashkuara, duke e akuzuar Izraelin se po përdor “urinë si metodë lufte”.

Komiteti i posaçëm i Kombeve të Bashkuara vuri në pah “numrin e madh të viktimave në mesin e civilëve dhe kushtet e rrezikshme për jetë të imponuara qëllimisht ndaj palestinezëve” në raportin e ri që mbulon periudhën që nga nisja e luftës më 7 tetor 2023, deri në korrik të këtij viti.

Lufta në Gazë nisi pasi Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – sulmoi Izraelin duke vrarë afër 1.200 persona dhe duke rrëmbyer afër 250 të tjerë. Si pasojë e ofensivës izraelite, në Gazë janë vrarë më shumë se 43.000 palestinezë.

“Përgjatë rrethimit të tij të Gazës, pengimit të ndihmës humanitare, sulmeve të shënjestruara dhe vrasjes së civilëve dhe punëtorëve të ndihmës, pavarësisht thirrjeve të vazhdueshme të OKB-së, urdhrave obligative nga Gjykata Ndërkombëtare e Drejtësisë dhe rezolutave të Këshillit të Sigurimit, Izraeli qëllimshëm po shkakton vdekje, uri dhe lëndime serioze”, u tha në njoftimin e Komitetit.

Praktikat e luftës të Izraelit në Gazës “përkojnë me karakteristikat e gjenocidit”, tha Komiteti, i cili për dekada të tëra ka hetuar praktikat izraelite që prekin të drejtat e njeriut në territoret palestineze.

Izraeli, tha Komiteti, “po përdor urinë si metodë të luftës dhe po shkakton ndëshkim kolektiv ndaj popullsisë palestineze”.

Gjatë fundjavës që shkoi, OKB-ja tha se uria ka kapluar veriun e Gazës.

Në raportin e publikuar më 14 nëntor është dokumentuar se si fushata ajrore e Izraelit në Gazë ka shkatërruar shërbimet thelbësore dhe ka shkaktuar katastrofë mjedisore që do të ketë pasoja afatgjata në shëndet.

Deri në shkurtin e këtij viti, forcat izraelite kishin përdorur më shumë se 25.000 tonë mjete shpërthyese në mbarë Rripin e Gazës, sasi që është e barasvlershme “me dy bomba bërthamore”, tha raporti.

“Duke shkatërruar sistemet jetike të ujit, kanalizimeve dhe ushqimit dhe duke ndotur mjedisin, Izraeli ka krijuar një përzierje vdekjeprurëse krizash që do të shkaktojnë dëme të mëdha për brezat e ardhshëm”, tha Komiteti.

Komiteti tha po ashtu se është i shqetësuar nga “shkatërrimi i paprecedent i infrastrukturës civile dhe numri i lartë i viktimave në Gazë”. Numri i lartë i viktimave, sipas Komitetit, ka ngritur shqetësime lidhur me përdorimin e inteligjencës artificiale nga Izraeli për të avancuar sistemet e tij të shënjestrimit gjatë operacioneve ushtarake.

Komiteti i posaçëm i OKB-së kujtoi se edhe shtetet e tjera kanë obligime për të reaguar në mënyrë urgjente që të ndalet lufta, duke theksuar se “shtetet e tjera nuk kanë vullnet që ta mbajnë përgjegjës Izraelin dhe po vazhdojnë t’i ofrojnë mbështetje ushtarake dhe mbështetje tjetër”.