Gjyqtari kosovar Genc Nuza është deleguar nga UEFA për të drejtuar ndeshjen ndërmjet Twentes dhe Thunit, në kuadër të fazës së ligës në UEFA Conference League.

Takimi do të zhvillohet më 15 tetor, në Enschede të Holandës, ndërsa Nuza do të jetë gjyqtari kryesor i kësaj përballjeje.

Atij do t’i asistojnë Granit Hyseni dhe Fatmir Sekiraqa, ndërsa gjyqtar i katërt do të jetë Mentor Ajeti. Rolin e ndihmësit të gjyqtarit në VAR (AVAR) do ta ketë Alban Shala.

Lajmin e ka bërë të ditur Federata e Futbollit e Kosovës, e cila e ka vlerësuar këtë delegim si një tjetër sukses për gjyqtarët kosovarë në arenën ndërkombëtare.

Sipas FFK-së, angazhimi i Nuzës dhe ekipit të tij në garat evropiane dëshmon profesionalizmin dhe përparimin e gjyqtarëve të Kosovës në futbollin ndërkombëtar.

D.L

Klubi spanjoll Getafe ka njoftuar arritjen e marrëveshjes me mbrojtësin me përvojë, Dani Carvajal, i cili ka nënshkruar kontratë deri më 30 qershor 2027.

Ish-kapiteni i Real Madridit i bashkohet skuadrës së re pas një karriere të suksesshme me klubin madrilen, ku regjistroi 451 paraqitje, 14 gola dhe 66 asistime.

Gjatë periudhës së tij te Real Madridi, Carvajal fitoi gjithsej 27 trofe, përfshirë gjashtë tituj të Ligës së Kampionëve dhe katër të La Ligës.

Sipas raportimeve, transferimi ishte vonuar për shkak të mosmarrëveshjeve financiare, pasi oferta fillestare prej 400 mijë eurosh ishte konsideruar e ulët në krahasim me pagën e tij të mëparshme te Real Madridi, që arrinte deri në 10 milionë euro në vit.

Me këtë transferim, Getafe synon të përforcojë repartin defensiv dhe të përfitojë nga përvoja e madhe e mbrojtësit spanjoll.

D.L

Barcelona do të përballet sonte me Galatasarayn në Stamboll, në kuadër të raundit të dytë të fazës së ligës në Ligën e Kampionëve.

Megjithatë, nata para ndeshjes nuk ka qenë e qetë për skuadrën katalunase, pasi tifozët vendas kanë organizuar një spektakël me fishekzjarrë pranë hotelit ku po qëndronin futbollistët e Barcelonës.

Një numër i madh tifozësh të Galatasarayt u mblodhën gjatë natës para hotelit, duke ndezur fishekzjarrë dhe mjete të tjera piroteknike pas orës 02:00, me synimin për t’ua prishur gjumin lojtarëve kundërshtarë.

Atmosfera e zjarrtë në Stamboll është e njohur për skuadrat evropiane, ndërsa tifozët turq shpesh krijojnë presion të madh ndaj kundërshtarëve.

Mbetet të shihet nëse kjo situatë do të ndikojë në paraqitjen e Barcelonës, në përballjen që pritet të zhvillohet sonte nga ora 21:00, në stadiumin “Rams Park”.

D.L

Përfaqësuesja e Kosovës në futboll për femra synon përmbysjen e rezultatit ndaj Austrisë, në ndeshjen kthyese të raundit të parë të plejofit kualifikues për Kupën e Botës 2027.

“Dardanet” do të zbresin në fushë të martën në Vjenë, nga ora 18:00, pas humbjes 2:1 në përballjen e parë të zhvilluar në Prishtinë.

Përzgjedhësja Sanije Krasniqi është shprehur optimiste para kësaj sfide, duke theksuar se skuadra është e kompletuar, e përgatitur dhe e motivuar për të arritur rezultat pozitiv.

“Jemi përgatitur maksimalisht për ndeshjen e nesërme. Besojmë se vajzat do ta japin maksimumin nga ajo që bashkërisht e kemi ndërtuar për këtë ndeshje”, ka deklaruar Krasniqi.

Ajo ka vlerësuar cilësinë e përfaqësueses austriake, duke pranuar se Kosovën e pret një përballje e vështirë, veçanërisht në fushën kundërshtare.

Për dallim nga ndeshja e parë, ku munguan disa futbolliste për shkak të problemeve shëndetësore, këtë herë Kosova do të ketë në dispozicion skuadrën e kompletuar.

Edhe Federata e Futbollit e Kosovës ka konfirmuar atmosferën pozitive dhe motivimin e lartë brenda ekipit, ndërsa përgatitjet e fundit janë përqendruar në aspektin taktik.

Kjo është pjesëmarrja e parë historike e Kosovës në plejofin kualifikues për një Kampionat Botëror. Fituesja e duelit Kosovë–Austri do të përballet në raundin tjetër me fituesen e çiftit Zvicër–Izrael.

D.L