Lajmet

Në kufijtë e lirisë: Kërcënimi i Lirisë së Shtypit në Gaza

Published

on

Ndërsa Dita Botërore e Lirisë së Shtypit përkujtohet më 3 maj, konflikti në Gaza nxit shqetësimet për sigurinë e gazetarëve, siç dëshmon edhe vdekja e kameramanit të Al Jazeera, Samer Abu Daqa, gjatë bombardimeve izraelite. Funerali i tij u mbajt në Khan Yunis, duke sjellë një moment të trishtueshëm për kolegët dhe familjen e tij.

Situata në Gaza është alarmante për median dhe gazetarët, veçanërisht pas raportimeve të Komitetit për Mbrojtjen e Gazetarëve (CPJ) dhe Federatës Ndërkombëtare të Gazetarëve (IFJ) që tregojnë se kjo është periudha më vdekjeprurëse për gazetarët në këtë zonë. Mbi 100 gazetarë dhe punonjës të medias janë vrarë në shtatë muajt e parë të luftës në Gaza, shumica prej tyre palestinezë. Sipas zyrës së medias në Gaza, mbi 140 gazetarë janë të vrarë, që mesatarisht është pesë gazetarë çdo javë që nga fillimi i tetorit. Këto statistika shprehin një realitet të tmerrshëm për gazetarët që punojnë në këtë zonë të konfliktit.

Volker Turk, Komisioneri i Lartë i OKB-së për të Drejtat e Njeriut, në një deklaratë u shpreh se humbja e një gazetari është humbja e një zë për të vërtetën. Dita Botërore e Lirisë së Shtypit ka për qëllim të mbrojë lirinë e shtypit dhe të festojë vlerat e së vërtetës, por në këtë kontekst ajo rrit nevojën për mbrojtjen e gazetarëve që punojnë në mjediset më të vështira.

Gazetarët e Al Jazeera-s janë ndër viktimat e fundit të këtij konflikti. Hamza Dahdouh dhe Mustafa Thuraya u vranë nga raketat izraelite në Khan Younis. Një tjetër ngjarje tragjike ishte vdekja e kameramanit Samer Abudaqa, i cili u plagos rëndë në një sulm me dron izraelit dhe u vdiq pas disa orësh nga plagët. Rrjeti Mediatik Al Jazeera ka reaguar ashpër ndaj sulmeve, duke kërkuar masa të menjëhershme ligjore kundër forcave okupuese për të siguruar drejtësi për viktimat e tyre.

Kjo rritje në numrin e viktimave dhe sulmet ndaj gazetarëve thekson rëndësinë e mbrojtjes së lirisë së shtypit në zonat e konfliktit dhe nevojën për veprime urgjente për të garantuar sigurinë e gazetarëve që punojnë në kushte të vështira. Më shumë se 100 gazetarë dhe punonjës të medias, shumica dërrmuese palestinezë, janë vrarë në shtatë muajt e parë të luftës në Gaza, sipas Komitetit për Mbrojtjen e Gazetarëve (CPJ) dhe Federatës Ndërkombëtare të Gazetarëve (IFJ). Zyra e medias e Gazës ka numrin në më shumë se 140 të vrarë, që mesatarisht është pesë gazetarë të vrarë çdo javë që nga 7 tetori.

Që nga fillimi i luftës, të paktën 34 mijë e 596 palestinezë janë vrarë dhe 77 mijë e 816 të tjerë janë plagosur në Gaza. Më shumë se 8 mijë të tjerë janë të zhdukur, të zhytur nën rrënoja.

Jonathan Dagher, Shefi i tavolinës së RSF-së për Lindjen e Mesme tha në një deklaratë në prill, se gazetarët e Gazës duhet të mbrohen, ata që dëshirojnë duhet të evakuohen dhe portat e Gazës duhet të hapen për mediat ndërkombëtare.

“Të paktët gazetarë që kanë mundur të largohen dëshmojnë për të njëjtin realitet të tmerrshëm të sulmimit, plagosjes dhe vrasjes së gazetarëve… Gazetaria palestineze duhet të mbrohet urgjentisht”, tha ai./UBTNews/

Përktheu nga Al Jazeera: Dionesa Ebibi

Aktualitet

UBT përgatit liderët e së ardhmes në energji: Edhe pak vende të lira për regjistrim

Published

on

UBT njofton se kanë mbetur edhe pak vende të lira për regjistrim në programin Inxhinieri e Energjisë, një ndër drejtimet më inovative dhe më me perspektivë për të ardhmen.

Ky program synon të përgatisë profesionistë të aftë të kombinojnë energjitë tradicionale dhe burimet e rinovueshme, të përdorin teknologjitë më të fundit dhe të menaxhojnë në mënyrë efikase resurset energjetike, duke kontribuar në ndërtimin e një të ardhmeje të gjelbër dhe të qëndrueshme.

Të gjithë të interesuarit që regjistrohen përfitojnë nga bursa 20%, një lehtësim i rëndësishëm për të rinjtë që duan të jenë pjesë e gjeneratës së re që transformon industrinë energjetike.

Falë qasjes moderne të mësimdhënies, laboratorëve të pajisur me teknologjitë më të reja dhe stafit akademik me përvojë, studentët e UBT-së jo vetëm që fitojnë njohuri teorike, por edhe aftësi praktike që i bëjnë të kërkuar në tregun vendor dhe ndërkombëtar të punës.

Regjistrimi bëhet thjeshtë dhe shpejt përmes linkut: APLIKO TANI ONLINE!

Continue Reading

Aktualitet

​Nora Gjakova nis rrugëtimin si trajnere e xhudos

Published

on

Federata e Xhudos së Kosovës ka nisur një kapitull të ri me përfshirjen e kampiones olimpike, Nora Gjakova, në rolin e trajnere asistente të ekipit të meshkujve. Ajo tashmë i është bashkuar stafit teknik dhe po punon me plot energji e përkushtim në stërvitjet që po mbahen në Bordeaux të Francës.

Në këtë grumbullim, ekipi i meshkujve po përgatitet intensivisht për garat e rëndësishme që i presin në muajt e ardhshëm. Nën drejtimin e trajnerëve dhe me mbështetjen e Norës, xhudistët Akil Gjakova, Shpati Zekaj, Dardan Cena dhe Anes Veseli po zhvillojnë seanca të forta stërvitore, duke dhënë maksimumin në çdo hap të përgatitjeve.

Përfshirja e Nora Gjakovës në stafin e trajnerëve shihet si një vlerë e madhe për ekipin, duke sjellë përvojën e saj të pasur ndërkombëtare dhe frymën e suksesit që ka shoqëruar karrierën e saj si sportiste.

Kosova shpreson se ky kombinim i përvojës dhe energjisë së re do të sjellë rezultate të reja pozitive për xhudon kosovare në arenën ndërkombëtare.

Continue Reading

Bota

Presidenti serb Vuçiq do të jetë pjesëmarrës në paradën ushtarake në Kinë

Published

on

Presidenti i Serbisë Aleksandar Vuçiq do të jetë pjesë e paradës ushtarake në Kinë, duke dëshmuar kështu lidhjet e ngushta të Beogradit zyrtar me regjimin komunist në Pekin.

Me ftesë të presidentit kinez Xi Jinping, 26 liderë të huaj do të marrin pjesë në përkujtimet e Ditës së Fitores në Pekin, njoftoi të enjten ndihmës ministri i Jashtëm Hong Lei.

Kina do të organizojë një paradë masive ushtarake më 3 shtator për të përkujtuar 80-vjetorin e fitores ndaj Japonisë dhe përfundimin zyrtar të Luftës së Dytë Botërore.

Në mesin e shumë liderëve që do të marrin pjesë janë edhe lideri rus Vladimir Putin, me të cilin regjimi në Beograd mban lidhje të ngushta, lideri veri-korean Kim Jong-Un dhe përfaqësues nga Vietnami, Laosi Mongolia, Nepali, Kazakistani, Uzbekistani, Irani, Kongo, Zimbabveja, Sllovakia, Kuba etj.

Continue Reading

Aktualitet

Gjykata Supreme refuzon ankesën e Korab Mushkolajt për certifikim në zgjedhjet lokale

Published

on

Gjykata Supreme e ka hedhur poshtë ankesën e kandidatit të Partisë Demokratike të Kosovës për kryetar të Deçanit, Korab Mushkolaj, paraqitur kundër vendimit të PZAP-së pasi iu refuzua certifikimi për zgjedhjet e 12 tetorit.

“Ankesa është e pa themeltë”, ka vendosur Supremja.

Zyra për Regjistrim, Certifikim dhe Kontrollin Financiar të Subjekteve Politike pas vërtetimit se Mushkolaj është i angazhuar me aktemërim të përhershëm të Ministrisë së Jashtme si zyrtar i lartë, i pati kërkuar PDK-së që ta zëvendësojë atë, por partia pati refuzuar ta bëjë këtë gjë. Zyra më pas ka rekomanduar certifikimin e të gjithë kandidatëve të tjerë të PDK-së, përveç Mushkolajt. PZAP po ashtu ia ka refuzuar ankesën Mushkolajt, siç parashihet me Ligjin për Shërbimin e Jashtëm, i cili nuk lejon kandidimin e një anëtari të shërbimit të jashtëm.

Gjykata Supreme e ka pranuar konstatimin e PZAP-së, teksa ka theksuar se moscertifikimi i Mushkolajt nuk është i kundërligjshëm.

“Prandaj, nga këtu, kjo Gjykatë, konsideron se në rastin konkret juridik, është marrë vendim i drejtë, me të cilin nuk është bërë diskriminim dhe lidhur me rastin konkret nuk është cenuar e drejta zgjedhore dhe ndonjë e drejtë themelore e paraparë me Ligj dhe me Kushtetutën e Republikës së Kosovës, nuk janë shkelur parimet themelore të procesit zgjedhor të parapara shprehimisht me dispozitat e nenit 4 të Ligjit Për Zgjedhjet e Përgjithshme në Republikën e Kosovës dhe me dispozitat përkatëse të Konventës Evropiane të Drejtave të Njeriut”, thuhet në vendim.

Continue Reading

Të kërkuara