Lajmet

Nagavci u kërkon mësimdhënësve të ndërprejnë grevën

Ajo ka bërë të ditur se janë bërë të gjitha përgatitjet për fillimin e vitit të ri shkollor.

Published

4 years ago

on

Ministrja e Arsimit, Arbërie Nagavci ka kërkuar nga të gjithë punëtorët e arsimit që të mos ketë grevë në çerdhe e shkolla. Ajo ka theksuar se i janë përgjigjur të gjitha kërkesave të Sindikatës së Bashkuar të Arsimit, Shkencës dhe Kulturës, për çka i ka lutur punëtorët e arsimit që në vendimet e tyre të mos ndikohen nga presioni i të tjerëve. Madje sipas saj, në 90 për qind të institucioneve nuk është duke u mbajtur greva. Ajo në konferencë për media ka bërë të ditur se janë bërë të gjitha përgatitjet për fillimin e vitit të ri shkollor dhe se janë shpërndarë të gjitha tekstet.

Ministrja Arbërie Nagavci deklaroi se vetëm tekstet e klasës së pestë janë në proces dhe se shpejt do të jenë në duart e nxënësve.


“Tashmë është bërë shpërndarja e teksteve mësimore dhe këtë vit shkollor të gjithë nxënësit do të pajisen komplet me tekste të reja. Për herë të parë tekstet shkollore janë shpërndarë pa vonesë, tashmë janë të ndara në të gjitha komunat. Kemi tekste të përzgjedhura nga vet mësimdhënësit, e të përcjellura në ministri si kërkesa nga Drejtoritë Komunale të Arsimit. Duhet të potencojë se vetëm tekstet e klasës së pestë janë në proces dhe besoj që shumë shpejt edhe ato do të jenë në duart e nxënësve”, ka thënë Nagavci në konferencë për media.

Po ashtu, ajo ka njoftuar se nga ky vit shkollor, Kosova dhe Shqipëria do të mësojnë në një abetare. Ajo bëri të ditur se nesër në Gjakovë do të lansohet Abetarja bashkë me ministren e Arsimit të Shqipërisë.

“Pas një përkushtimi të madh të Qeverisë së Kosovës dhe Qeverisë së Shqipërisë, nga ky vit shkollor të gjithë vogëlushët shqiptarë do të mësojnë me të njëjtën Abetare. Bashkë me ministren e Shqipërisë, zonjën Evis Kushi ne sot do të lansojmë Abetaren e parë të përbashkët, e cila do të jetë në duart e vogëlushëve tanë”, tha Nagavci.

Më tej, ajo para gazetarëve ka bërë të ditur se të gjitha shkollat janë të gatshme për fillimin e procesit mësimor dhe se janë mbi 90 për qind e institucioneve të cilat nuk janë përfshirë në grevën e BSPK-së.

“Nga takimet e zhvilluara me drejtoritë komunale së fundmi edhe dje, jemi informuar se të gjitha shkollat janë të gatshme dhe janë bërë përgatitjet për fillimin e procesit mësimor. Të gjithë janë deklaruar njëzëri për rëndësinë e fillimit të mësimit të vitit të ri shkollor me datën 1 shtator. Natyrisht në këto rrethana nuk mund të rrimë pa e përmendur grevën tashmë të shpallur nga ana e BSPK-së. Ashtu siç besoj jeni në njohuri të gjithë, edhe pse kjo grevë është shpallur nga ana e BSPK-së dhe është deklaruar për gjithë shërbyesit dhe zyrtarët publikë, e njëjta nuk është duke u mbajtur në shumicën e institucioneve. Me aq sa ne kemi të dhëna, janë diku mbi 90 për qind e institucioneve të nivelit qendror, të agjencive, institucioneve në Administratën Publike, në shëndetësi, e në sektor të tjerë ku është duke u zhvilluar aktiviteti i punës njëjtë sikurse edhe në çdo institucion tjetër”, ka shtuar ajo.

Ajo shtoi se respektojnë organizimin sindikal dhe kërkesat për kushtet më të mira, por që kërkon që fëmijët të nisin nesër mësimin.

“Unë pres dhe kërkoj që të mos ketë grevë as në sektorin e arsimit, e sidomos në sektorin e arsimit, në çerdhe e në shkolla ku fëmijët e presin 1 shtatorin që të fillojë mësimi. Me përgjegjësinë më të lartë ju njoftoj se gjatë mandatit tim si ministre, janë përfshirë të gjitha kërkesat që kanë qenë për sigurinë dhe mirëqenien e stafit arsimor. Si ministri jemi përgjigjur në çdo kërkesë të SBAShK-ut për takime, sa herë që ata kanë kërkuar, anëtarë të SBAShK-ut janë takuar me mua, me zëvendësministrin apo me zyrtarë të tjerë në ministri dhe kemi diskutuar të gjitha kërkesat e tyre. Për më shumë, përfaqësuesit e SBAShK-ut janë pjesë e këshillave dhe grupeve punuese në ministri, duke qenë kështu deri më tani edhe pjesë e vendimmarrjes dhe politikave që kemi miratuar në ministri”, ka deklaruar ajo.

E pyetur për “kërcënimin” në paga për të gjitha ata që janë në grevë, Nagavci tha se nuk është presion. Sipas saj, komunat dhe punëdhënësit janë të obliguar të raportojnë për ata që marrin pjesë në grevë.

“Ftoj dhe lus të gjithë punëtorët e arsimit që vendimet t’i marrin me kujdes dhe pa asnjë presion nga askush. Ju lus të dashur mësimdhënës e punëtorë të tjerë të arsimit që të analizoni me vëmendjen të gjithë legjislacionin, të drejtat dhe pushimet e këtyre të drejtave, obligimeve gjatë kohës së punës ose të grevës. Jam e bindur se këtë mund ta bëni vet dhe të pa ndikuar. Si mësues ju e dini më së miri se të gjithë të tjerët, se sa është e rëndësishme të kuptuarit dhe interpretimi i drejtë e vendimmarrja e bazuar në argumente e fakte”, ka thënë ajo.

E pyetur se si do të veprojnë në rast se nesër do të vazhdohet greva në sektorin e arsimit, ajo tha se kjo është e drejtë e mësimdhënësve dhe se nuk mund të pretendon t’i bind.

Në bazë të informatave të ministrisë, Arbërie Nagavci deklaroi se janë rreth pesë shkolla në Prishtinë që nuk e kanë shpallur grevën.

Ajo u zotua se me Projektligjin për Pagat kanë tejkaluar edhe kërkesat e sindikatës dhe me këtë kanë bërë një pozicionim më të mirë për mësuesit. E pyetur se kur do të finalizohet ky ligj, ajo theksoi se i njëjti është në shqyrtim paraprak.

Related Topics:
Continue Reading

lajme

30 për qind bursë për ish-studentët e UBT-së në programet më inovative Master – regjistrohu sot!

Published

2 hours ago

on

August 12, 2026

By

UBT po u ofron të gjithë të diplomuarve të tij një mundësi të veçantë për të vazhduar rrugëtimin akademik dhe profesional, duke përfituar 30% bursë për studimet Master në UBT.

Në një treg pune që po ndryshon me shpejtësi, avancimi i vazhdueshëm profesional po bëhet gjithnjë e më i rëndësishëm. Për këtë arsye, ish-studentët e UBT-së kanë mundësinë të rikthehen në universitet për të thelluar njohuritë, fituar specializime të reja dhe zhvilluar kompetenca të avancuara, tashmë me një përfitim të veçantë prej 30% bursë.

Kjo mundësi vlen për programet Master të UBT-së, të cilat përfshijnë disa nga fushat më të kërkuara dhe inovative të tregut bashkëkohor, duke u dhënë të diplomuarve mundësinë të zgjedhin një program që përputhet me profesionin, interesat dhe objektivat e tyre të karrierës.

Programet Master në UBT përfshijnë:

  • Menaxhment, Biznes dhe Ekonomi
  • FinTech dhe Menaxhimi i Inovacionit
  • Shkenca Kompjuterike dhe Inxhinieri
  • Sistemet e Informacionit dhe Menaxhment
  • Inxhinieri e Mekatronikës
  • Inxhinieri e Ndërtimit dhe Infrastrukturë
  • Inxhinieri e Trafikut dhe Transportit
  • Inxhinieri e Energjisë dhe Mjedisi
  • Arkitekturë dhe Planifikim Hapësinor
  • E Drejta Penale
  • E Drejta Civile dhe Pronës
  • E Drejta Komerciale
  • Gjuhë, Media dhe Komunikim
  • Politika Publike dhe Menaxhim
  • Shkenca Politike
  • Studime të Sigurisë
  • Psikologji
  • Shkencat dhe Teknologjia e Ushqimit
  • Shëndet Publik dhe Menaxhim
  • Biokimi
  • Shkencat Paramjekësore
  • Agrikulturë dhe Mjedis
  • Shëndet dhe Aktivitet Fizik

Përmes programeve të orientuara drejt inovacionit dhe nevojave të tregut, UBT synon që studentët Master të fitojnë jo vetëm njohuri të avancuara akademike, por edhe kompetenca profesionale të aplikueshme në praktikë.

Për ish-studentët e UBT-së, kjo është mundësia për ta vazhduar aty ku e nisën – duke e kthyer përvojën universitare në një nivel të ri profesional.

Regjistrohu sot dhe përfito 30% bursë!

Continue Reading

Vendi

PDK paralajmëron veprime jashtë Kuvendit pas refuzimit të kërkesës për seancë

Published

3 hours ago

on

August 12, 2026

By

Sekretarja e Përgjithshme e Partisë Demokratike të Kosovës ka deklaruar se refuzimi për thirrjen e seancës më 12 gusht është një model i sjelljes politike nga Lëvizja Vetëvendosje dhe kryesuesi Avni Dehari, e jo thjesht një incident procedural. Sipas saj, shkelja e afatit 30-ditor dhe shpërfillja e rregullit për vazhdimin e seancës çdo 48 orë përbëjnë zbatim selektiv të Kushtetutës dhe bllokim të mandatit të deputetëve të zgjedhur më 7 qershor.

Ajo i bëri thirrje Albin Kurtit që ta kthejë vendin në binarë kushtetues, duke theksuar se PDK-ja nuk kërkon pushtet apo marrëveshje partiake, por funksionalizimin e shtetit. Gjithashtu, ajo bëri me dije se PDK-ja do të dorëzojë sërish kërkesë zyrtare për seancë pas 48 orësh dhe do të jetë çdo ditë në Kuvend.

Paralelisht me punën në Kuvend, ajo paralajmëroi zhvendosjen e aktivitetit politik edhe jashtë tij, përmes bashkëbisedimeve me qytetarë dhe grupe të ndryshme shoqërore. Në fund, ajo denoncoi edhe cënimin e integritetit fizik të disa deputetëve të PDK-së nga mbrojtja e afërt, duke njoftuar se për këtë rast do t’i drejtohen Inspektoratit Policor të Kosovës. /E.A/

 

Continue Reading

Vendi

Prokuroria Speciale ngre aktakuzë për krime lufte në Vushtrri

Published

4 hours ago

on

August 12, 2026

By

Prokuroria Speciale e Republikës së Kosovës ka ngritur aktakuzë ndaj të pandehurit me inicialet S.S., i cili akuzohet për veprën penale “Krime lufte kundër popullsisë civile”.

Sipas aktakuzës, i pandehuri S.S., më 6 prill 1999 në fshatin Reznik të Vushtrrisë, në bashkëpunim me pjesëtarë të tjerë të forcave serbe, mori pjesë në vrasjen e nëntë civilëve shqiptarë. Në këtë ngjarje përfshihet edhe S.T., i cili tashmë është i dënuar nga Gjykata Themelore në Prishtinë.

Lidhur me këtë rast, Prokuroria Speciale bën me dije se dërgimi i lëndës në gjykatë është hap i rëndësishëm drejt drejtësisë: “Sjellja e përgjegjësve para drejtësisë mbetet prioritet yni kryesor për të vendosur të vërtetën dhe për të sjellë lehtësim për familjarët e viktimave.”

Rasti tanimë i është kaluar Organeve të Drejtësisë për shqyrtim të mëtejshëm gjyqësor. /E.A/

Continue Reading

Lajmet

Etnofest përmbyll edicionin e 16-të me ndarjen e 21 çmimeve artistike

Published

5 hours ago

on

August 12, 2026

By

Mbrëmë është mbyllur edicioni i 16-të i EtnoFest-it, ku janë ndarë çmimet për 21 performanca dhe kategori të ndryshme artistike.

Para ceremonisë së ndarjes së çmimeve, publiku pati mundësinë të ndiqte performancën artistike “Echoes of Origin”, me Flaka Gorancën, e cila solli këngë të njohura shqiptare në një ndërthurje mes traditës dhe muzikës klasike.

Juria profesionale e përbërë nga Bislim Muçaj (kryetar), Artan Arifi (anëtar) dhe Agron Gerguri (anëtar), ndau çmimet në kategoritë e mëposhtme:Etnoperformanca më e mirë: “Echoes of Origin” – Flaka Goranci, për trajtimin artistik të rrënjëve, ku zëri unik dhe ndërthurja e traditës me modernen krijuan një lidhje të veçantë me kujtesën kulturore.

Etnoansambli më i mirë: “Vullkani i Istogut” – Istog, për energjinë, autenticitetin dhe ruajtjen e traditës së Istogut përmes një interpretimi të fuqishëm skenik.

Instrumentisti më i mirë: Blerim Grubi, për mjeshtërinë e lartë në interpretim dhe stilin e veçantë që i jep muzikës tradicionale.

Instrumentistja më e mirë: Lule Elezi, për teknikën e sigurt në piano dhe interpretimin e përpunuar, duke përcjellë melodinë me qartësi, finesë dhe emocion.

Kostumografia më e mirë: Ansambli “Devolli” – Korçë, për kostumet tradicionale të Korçës, të pasura me ngjyra, ornamente dhe të punuara me kujdes.

Koreografia më e mirë: Gjergj Prevazi me “Void”, për kombinimin e lëvizjes, ritmit dhe hapësirës në një koreografi të saktë dhe të fuqishme skenikisht.

Valltaret më të mira: Katerina Gogadhe dhe Chiara Xoxi, për harmoninë e rrallë skenike, sinkronizimin dhe komunikimin e natyrshëm përmes lëvizjes.

Valltari më i mirë: Vasjar Hysa me ansamblin “Afërdita” – Belsh, për ritmin e sigurt, lëvizjet e fuqishme dhe prezencën e spikatur skenike.

Këngëtarja më e mirë: Arta Jashari, për zërin me ngjyra unike, interpretimin dhe ndjeshmërinë e veçantë që përcjell këngën me origjinalitet.

Këngëtari më i mirë: Mustafë Ramaj, për vokalin e fuqishëm dhe interpretimin emocionues, të realizuar me mjeshtëri skenike.

Orkestra më e mirë: Ansambli “Dardanus” nga Tetova, për harmoninë instrumentale dhe interpretimin elegant të trashëgimisë muzikore.

Koncerti artistik më i mirë: Grupi “Tavera” – Izrael, për koncertin që solli në skenë tingujt e traditës së tyre muzikore, duke krijuar një atmosferë të veçantë për publikun.

Shfaqja më e mirë: “Pylli”, produksion i Teatrit “Bekim Fehmiu” në Prizren, për realizimin mbresëlënës skenik dhe trajtimin e thellë të emocioneve njerëzore.

Regjia më e mirë: Ilir Bokshi, me shfaqjen “Pesë fytyrat e heshtjes”, produksion i Teatrit “Migjeni” në Shkodër, për vizionin e ndërtuar me mjeshtëri dhe ndjeshmëri të thellë regjisoriale.

Aktori më i mirë: Adrian Morina, me shfaqjen “Pesë fytyrat e heshtjes”, për interpretimin bindës, emocionet e fuqishme dhe thellësinë psikologjike të rolit.

Aktorja më e mirë: Hajat Toçilla, me shfaqjen “Pylli”, për interpretimin plot emocione dhe vërtetësi që i dha personazhit.

Skenografia më e mirë: Bekim Korça, me shfaqjen “Pylli”, për konceptin pamor origjinal dhe krijimin e një universi skenik funksional e domethënës.

Çmimi për inovacion artistik: “Soloist of GOB” nga Bolonja, Itali, për trajtimin artistik dhe inovativ të motiveve të frymëzuara nga okarina e Runikut, një prej instrumenteve më të hershme të gjetura në trojet shqiptare.

Çmimi special i EtnoFest-it: Armend Baloku me performancën “Lahuta e Malcís”, për një performancë të jashtëzakonshme që përcolli fuqinë e trashëgimisë epike shqiptare dhe mbajti publikun të përfshirë.

Çmimi i karrierës: Selman Jusufi, për një karrierë mbi katër dekada, më shumë se 200 role dhe një kontribut të çmuar në skenën artistike, duke lënë gjurmë të veçanta në teatrin dhe kinematografinë shqiptare.

Me këtë ceremoni, edicioni i 16-të i EtnoFest-it u përmbyll duke vlerësuar artistë, ansamble dhe krijues nga Kosova, Shqipëria e vende të tjera, të cilët përmes artit dhe performancës kontribuojnë në ruajtjen e trashëgimisë kulturore. /A.M/

 

Continue Reading

Të kërkuara