Interi është rikthyer seriozisht në pistën Marco Asensio. Spanjolli i PSG-së, i cili ka qenë dy herë në radarët zikaltër në të kaluarën, shihet si profili ideal për të forcuar mesfushën sulmuese të trajnerit Cristian Chivu.

Asensio, i cili nuk bën pjesë në planet e klubit francez pas huazimit te Aston Villa, është në dispozicion në merkato dhe agjenti i tij, Jorge Mendes, po kërkon një destinacion të ri në Evropë. Kontrata e tij me PSG-në skadon në vitin 2026, ndaj çmimi i transferimit mund të lëvizë mes 10 dhe 12 milionë euro.

Megjithatë, pengesa kryesore mbetet paga. Asensio fiton 8 milionë euro në sezon, një shifër që nuk përputhet me politikat e reja financiare të Interit. Për të realizuar transferimin, lojtari duhet të pranojë një ulje të ndjeshme page.

Zikaltërit po e studiojnë me kujdes mundësinë, ndërsa marrëdhënia me Mendes mbetet e hapur edhe për çështjen e Dumfries. Tashmë mbetet për t’u parë nëse hera e tretë do të jetë fat për të sjellë Asension në Milano.

36 ekipe nga 24 shtete të Evropës do të marrin pjesë në Kampionatin Evropian të Esports që ka nisur sot në Prishtinë, ndeshjet e së cilit do të zhvillohen në Palestrën e Sporteve “1 Tetori” Kosova jo vetëm që do të jetë mikpritëse e kësaj gare madhore, por edhe do të përfaqësohet me ekipin e saj kombëtar.

Në ceremoninë e hapjes zyrtare, kryeministri në detyrë i Republikës së Kosovës, Albin Kurti, i cili të pranishmëve iu drejtua në gjuhën angleze, theksoi se megjithëse në botë ky njihet si sport i ri, Kosova ka një storie të gjatë në këtë aktivitet pasi që të rinjtë kosovarë shumë vite më parë filluan angazhimin e tyre në lojërat elektronike nëpër internetcaffe, duke bërë kështu hapat e parë drejtë rritjes profesionale në këtë sport.

Kurti gjithashtu bëri thirrje që nga sot e deri më 13 korrik, ekipi përfaqësues i Kosovës në këtë garë të mbështetet me zemër nga të gjithë adhuruesit dhe praktikuesit e lojërave elektronike-Esports.

“Sigurisht, fitorja ka rëndësi. Çdo atlet këtu ka ndjekur shkëlqesinë me pasion dhe angazhim. Por, fuqia e vërtetë e këtij kampionatit jeton përtej tabelave të rezultateve, në lidhjet që kemi ndërtuar, në historitë që kemi ndarë dhe komuniteteve që kemi krijuar së bashku. Kosova është vend ku talenti rritet shpejtë, ndërsa ambicia rritet edhe më shpejtë. Nga atletët në fushë deri te zhvilluesit prapa ekranit, njerëzit tanë të ri mishërojnë fuqinë e vizionit dhe dedikimit”, theksoi Kurti.

Ai tha se ngjarje të tilla duhet të shërbejnë si ide për ndërtimin e ura e jo mure.

“Kampionati Evropian Kosova 2025 qëndron si një etapë jo vetëm për esportin por çfarë përfaqëson për rajonin tonë dhe më tej. Këtu, në këtë skenë ne dëshmojmë si lojtarë nga vende dhe prejardhje të ndryshme bashkohen këtu të unifikuar nga një qëllim i përbashkët, të shtyrë nga respekti dhe puna në ekip. Kjo është pikërisht se çfarë ka nevojë bota sot, mundi i përbashkët që rritet përtej kufijve individuale dhe ide që ndërtojnë ura në vend të mureve”, tha Kurti.

Altin Preniqi, Kryetar i Federatës së Esports në Kosovë, tha se organizimi i këtij evropiani është moment historik për Kosovën sepse ky sport sjellë energji të madhe, e mbi të gjitha, miliarda shikues online nga e gjithë bota, duke u bërë kështu mundësi e rrallë për promovimin e imazhit të Republikës së Kosovës në mbarë rruzullin tokësorë.

“Në këtë kampionat kemi përfaqësues nga vende të ndryshme, kultura të ndryshme, histori të ndryshme, por kemi një gjë të përbashkët, pasionin për lojën dhe respektin. Të gjithë jeni pjesë e momentit historik sepse ky evropian nuk është thjeshtë vetëm një turne, është një e vërtetë që sporti po evoluon”, theksoi Preniqi

Ky kampionat organizohet nga Federata Esports Kosova me mbështetjen e Ministrisë së Kulturës, Rinisë dhe Sportit. Ndeshja e parë do të zhvillohet sot ndërmjet Republikës së Kosovës dhe Republikës së Çekisë.

Prishtina e Re ka vazhduar me prezantimin e futbollistëve pas inkuadrimit në Albi Mall Superligë.

Klubi kryeqytetas ka bërë një goditje të madhe, duke blinduar portën me transferimin e Florjan Smakiqit nga Drita.

Portieri shtatlartë ka nënshkruar kontratë një vjeçare me Prishtinën e Re, derisa bëhet përforcimi i tretë pas Drilon Fazliut dhe Ergyn Ahmetit.

Njoftimi i plotë nga Prishtina e Re:

Florjan Smakiqi bashkohet me KF Prishtina e Re

KF Prishtina e Re zyrtarizon afrimin e portierit Florjan Smakiqi, i cili do të jetë gardiani i portës në edicionin debutues në Superligë.

26-vjeçari sjell me vete një përvojë të rëndësishme në futbollin vendor, duke qenë pjesë e klubeve si Feronikeli dhe së fundmi Drita, me të cilat ka fituar dy tituj kampioni të Superligës së Kosovës, në edicionin 2018/19 dhe në edicionin 2024/25.

Transferimi i Smakiqit përbën një vlerë të shtuar për grupin tonë, si në aspektin e cilësisë në portë, ashtu edhe në atë të stabilitetit dhe përvojës që nevojitet për të garuar në Superligë!

Mirë se erdhe, Florjan Smakiqi.

Prindi i një futbollisti të ri me prejardhje nga Kosova që u bë lajm në fund të muajit maj pasi goditi një gjyqtar të futbollit në Zvicër, është dënuar për sulmin e bërë.

Incidenti kishte ndodhur në Schoftland të Zvicrës, ndërsa ndeshja ishte ndaj Villmergen. Ishte raportuar se burri kishte humbur durimin se djali i tij ishte fauluar padrejtësisht. Autori i dyshuar është babai i një lojtari të ri nga Villmergen.

Një rrëmujë shpërtheu gjatë një ndeshjeje futbolli të ekipit C-Juniors në Schöftland kundër ekipit FC Villmergen më 31 maj. Një baba e goditi gjyqtarin me grusht. Burri thuhet se humbi durimin sepse djali i tij ishte fauluar padrejtësisht. Autori i dyshuar i krimit është babai i një lojtari të ri nga ekipi Villmergen.

Incidenti u filmua dhe shkaktoi zemërim në të gjithë Zvicrën. Shoqata e Futbollit të Aargaut (AFV) tani ka reaguar.

Sipas mediumit 20min.ch, burrit i është ndaluar të hyjë në të gjitha stadiumet deri më 3 korrik 2028. Klubi i përfshirë, FC Villmergen, duhet të paguajë gjithashtu një gjobë prej 3,500 frangash.

Sipas AFV-së, Komiteti i Kontrollit dhe Disiplinës e sanksionoi babanë e lojtarit nga Kosova për hyrje të paautorizuar në fushë dhe sulm fizik ndaj gjyqtarit. Shoqata deklaroi se sjellja e burrit ishte “masivisht dhe haptazi josportive” dhe binte ndesh me vlerat themelore të futbollit.

Në deklaratën e saj, AFV vlerësoi bashkëpunimin me FC Villmergen, duke thënë se klubi kishte “bashkëpunuar në mënyrë shembullore”. Pavarësisht bashkëpunimit të tyre, klubi është gjobitur.

Në anën tjetër, sulmi ndaj gjyqtarit mbetet ende një çështje që u takon gjykatave, pavarësisht procedurave ligjore sipas ligjit sportiv. Procedurat penale dhe civile mbeten ende për t’u shqyrtuar.