Misioni i Bashkimit Evropian për Sundim të Ligjit në Kosovë (EULEX), në bashkëpunim me partnerin implementues OJQ Assist Kosova, ka organizuar diskutim të nivelit të lartë në formë të tryezës së rrumbullakët me temë “Lufta kundër dhunës ndaj grave dhe vajzave: Politikat dhe avokimi. Zbatimi dhe rruga përpara”.

Emily Rakhorts nga EULEX ka folur për luftën kundër dhunës ndaj grave dhe vajzave, si dhe  për rëndësinë e zbatimit të Konventës së Stambollit.

Ministrja e Drejtësisë Albulena Haxhiu ka thënë se dhuna ndaj grave duhet të jetë temë që na për bashkon si shoqëri dhe institucione. “ Kemi dhënë kontribut, kjo nuk është vetëm një çështje që prek individë por dhe shoqërinë tonë në tërësi”, tha Haxhiu

Ajo ka thënë se dhuna ndaj grave është një pengesë e madhe për barazinë gjinore, për drejtësinë dhe për zhvillimin shoqëror.

Haxhiu tha se për parandalimin e dhunës ndaj grave janë miratuar sërë masash, si dhe në këtë drejtim ka theksuar se është plotësuar protokolli për trajtimin e dhunës seksuale.

Haxhiu theksoi se viktimat mbrohen nga shteti.

Ndërsa, Arbnesh Ajvazi nga Policia e Kosovës tha se dhuna në familje është bërë tashmë dukuri që kërkon vëmendjen e të gjithëve si dhe një qasje shumë profesionale.

Ministri i Financave, Punës dhe Transfereve, Hekuran Murati ka njoftuar se sot kanë nënshkruar Marrëveshjen për Bashkëpunim Doganor me Ministrin e Financave të Arabisë Saudite, Mohammed Al Jadaan.

“Marrëveshjen e nënshkruam në ceremoninë hapëse të Konferencës Ndërkombëtare për Zekatin, Tatimin dhe Doganat 2024, ku po marrim pjesë bashkë me Drejtorin e Doganave Agron Llugaliu dhe atasheun doganor Bekim Mehmetaj”, ka shkruar Murati.

Sipas tij, kjo marrëveshje, që adreson çështjet doganore dhe është në përputhje me standardet më të larta ndërkombëtare, përfaqëson një hap të madh përpara në forcimin e bashkëpunimit ndërmjet dy vendeve.

“Duke përafruar bashkëpunimin tonë shumë dimensional në fushën e Doganave, marrëveshja do të kontribuojë në lehtësimin e tregtisë, përmirësimin e sigurisë dhe rritjen e bashkëpunimit ekonomik. Republika e Kosovës vazhdon të ndërtojë partneritete që sjellin përfitime të prekshme për ekonominë dhe qytetarët tanë, dhe njëkohësisht forcojnë lidhjet tona me shtetet mike”, ka shkruar Murati në Facebook.

Kryeministrja italiane Giorgia Meloni ishte e ftuar në “Quarta Repubblica” ku ka sjellë në vëmendje dhe njëherë çështjen e trajtimit të azilkërkuesve në kampin e Gjadrit.

Kryeministrja e Italisë tha se ka zgjidhje dhe po punon për këtë.

“Qendrat në Shqipëri do të punojnë. Nuk bëj premtime që nuk mendoj se mund t’i mbaj”, tha kryeministrja për Quarta Repubblica në Rete 4.

Sipas Melonit, projekti është inovativ dhe “nuk është rastësi që i kushtohet vëmendje pothuajse nga të gjitha vendet e Bashkimit Evropian”.

“Është një ndryshim total në menaxhimin e flukseve migratore. Prandaj pritet vendimi nga Gjykata Supreme dhe Gjykata e Drejtësisë e BE-së. Në çdo rast jam duke punuar edhe për zgjidhje të tjera dhe në fund do të funksionojë”, tha ajo.

Plani i Qeverisë Italiane për trajtimin e azilantëve në kampin e Gjadrit ka hasur disa momente të komplikuara, pasi në dy raste Gjykata e Romës ka urdhëruar kthimin mbrapsht të emigrantëve që u sollën me anije në portin e Shëngjinit.