Aktualitet

Mungesa e llogaridhënies së gjyqtarëve dhe prokurorëve, pengesë për avancimin e sistemit të drejtësisë

Raportin e ka prezantuar Gëzim Shala nga IKD.

Published

4 years ago

on

Mungesa e llogaridhënies së gjyqtarëve dhe prokurorëve është pengesa kryesore e avancimit të sistemit kosovar të drejtësisë drejt një sistemi llogaridhënës, me integritet dhe profesional.

Kjo është e gjetur e raportit “Llogaridhënia pa progres- Analizë e (mos) zbatimit të Ligjit për përgjegjësinë disiplinore të gjyqtarëve dhe prokurorëve”, që Instituti i Kosovës për Drejtësi ka publikuar sot.

Raportin e ka prezantuar Gëzim Shala, nga IKD, i cili tha se ky raport është rezultat i monitorimit të drejtpërdrejtë që i është bërë zbatimit në praktikë të Ligjit për përgjegjësinë disiplinore të gjyqtarëve dhe prokurorëve.

Ai tha se nga 276 ankesa disiplinore ndaj gjyqtarëve dhe prokurorëve, kryetarët e gjykatave dhe kryeprokurorët gjatë viti 2020 dhe gjysmës së parë të vitit 2021 kanë hedhur poshtë gjithsej 233 ankesa disiplinore.

“Ajo që vije në pah nga monitorimi i IKD-së është mungesa e vullnetit për ngritjen e llogaridhënies së gjyqtarëve dhe prokurorëve, e cila mungesë e vullnetit ka bërë që as sistemi i ri i llogaridhënies së gjyqtarëve dhe prokurorëve mos të jep efektet e dëshiruara […] Njëra nga gjetjet e këtij raporti është trajtimi i ankesave disiplinore nga autoritetet kompetente, përkatësisht nga kryetarët e gjykatave dhe kryeprokurorët. Mbi 80 përqind të ankesave disiplinore ndaj gjyqtarëve dhe prokurorëve janë hedhur nga autoritetet kompetente, përkatësisht nga kryetarët e gjykatave dhe kryeprokurorët, ajo çfarë bie në sy në këtë rast është mungesa e arsyetimeve meritore ndaj aktvendimeve me të cilat edhe hedhen ankesat disiplinore. Në anën tjetër në ato pak raste të cilat kanë shkuar në KGJK apo në KPK për hetim të mëtutjeshëm të rasteve disiplinore KGJK dhe KPK në shumicën dërrmuese të rasteve i kanë liruar gjyqtarët dhe prokurorët nga përgjegjësia disiplinore”, tha ai.

Ai tha se IKD ka gjetur se masa më e rëndë e shqiptuar nga Këshilli Gjyqësor i Kosovës dhe nga Këshilli Prokurorial i Kosovës në rastet disiplinore ka qenë zvogëlimi i pagës.

Shala ka pasur kritika edhe sa i përket Institucionit te Avokatit të Popullit, siç tha ai, për mos veprim në rastet e hedhjeve të ankesave disiplinore nga ana e autoriteteve kompetente.

“Aspekt tjetër jashtëzakonisht problematik në këtë drejtim është qasja që Avokati i Popullit ka pasur në sistemin e llogaridhënies së gjyqtarëve dhe prokurorëve. IAP vazhdimisht ka thënë se të njëjtit nuk kanë kompetencë për të trajtuar ankesat ndaj rasteve disiplinore, përjashtimisht nëse vet autoritetet kompetente nuk vendosin në këto raste. IKD ka avokuar vazhdimisht se bazuar në Ligjin për përgjegjësinë disiplinore të gjyqtarëve dhe prokurorëve, Avokati i Popullit ka të drejtë që nëse një rast është hedhur dhe Avokati i Popullit gjen arsye se nuk është dashur të hedhet ta procedojë në Këshillin Gjyqësor të Kosovës përkatësisht në Këshillin Prokurorial, mirëpo qasja e tyre ka qenë ndryshe dhe për këtë arsye IKD në një rast e ka iniciuar rastin në Gjykatën Supreme të Republikës së Kosovës, e cila gjykatë ka konfirmuar qëndrimet e IKD-së mbi rolin e Avokatit të Popullit që ka në procesin e llogaridhënies së prokurorëve dhe gjyqtarëve”, u shpreh ai.

Kritika ka pasur edhe sa i përket Ministrisë së Drejtësisë, për të cilën tha se ka injoruar nevojat reale për plotësim/ndryshimin e Ligjit për përgjegjësinë disiplinore të gjyqtarëve dhe prokurorëve dhe se ka injoruar komentet e shoqërisë civile.

Anesa Hoxha nga IKD, ka prezantuar rekomandimet që dalin nga ky raport, e që tha se rekomandojnë që autoritetet kompetente mos të kalojnë nivelin e kompetencës së tyre për të vlerësuar meritat e ankesës disiplinore.

“IKD ka rekomanduar që autoritetet kompetente mos të kalojnë nivelin e kompetencës së tyre për të vlerësuar meritat e ankesës disiplinore, por të kufizohen në vlerësimin nëse një ankesë disiplinore përbën çështje disiplinore. Këto autoritete të japin arsyetime meritore në vendimet e tyre lidhur me ankesat disiplinore[…], si dhe të vendosin brenda afateve ligjore. Autoritetet kompetente që nuk vendosin brenda afateve ligjore të mos amnistohen na KPK. Me rastin e shqyrtimit të gjendjes faktike të një rasti disiplinor, KGJK të trajtojë gjendjen faktike sipas gjithë dokumentacionit dhe mos të fokusohet vetëm në dokumentet apo provat e tjera të cilat shkojnë në favor të vetëm njërës palë. IKD rekomandon që KGJK përmes lirimit të gjyqtarëve nga përgjegjësia disiplinore mos të lejojë normalizimin e praktikave të cilat cenojnë dinjitetin dhe profesionalizimin e sistemit gjyqësor”, tha ajo.

IKD ka rekomanduar që Institucioni i Avokatit të Popullit të ushtrojë ankesa në Gjykatën Supreme ndaj vendimeve të KPK-së, në rastet kur IAK është parashtrues i kërkesës për fillimin e hetimeve disiplinore. 

Related Topics:
Continue Reading

Lajmet

Stafi i Fakultetit të Stomatologjisë në UBT merr pjesë në kongresin e OEGAO në Austri

Published

2 days ago

on

October 14, 2025

By

Me ftesë të presidentit të Shoqatës së Aligner të Austrisë – OEGAO, Dr. Saif Al-Zahrooni, dekani i Fakultetit të Stomatologjisë në UBT, Prof. Dr. Agim Prokshaj, dhe Prof. Miranda Sejdiu Abazi morën pjesë në një kongres shkencor të mbajtur në Vjenë, më 10 dhe 11 tetor.

Ky kongres mblodhi së bashku ekspertë, akademikë dhe profesionistë të fushës së stomatologjisë nga vende të ndryshme të botës, me qëllim shkëmbimin e njohurive dhe përvojave më të fundit mbi teknologjinë e aparateve të tejdukshme (alignerëve) – një ndër inovacionet më moderne në ortodonci.

Prania e përfaqësuesve të UBT-së në këtë ngjarje prestigjioze dëshmoi angazhim, përgjegjësi dhe përkushtim ndaj zhvillimit të vazhdueshëm të fushës së stomatologjisë, duke pasuruar diskutimet profesionale dhe duke ngritur nivelin e bashkëpunimit shkencor ndërkombëtar.

Në kuadër të kongresit, u prezantuan risitë më të fundit në trajtimin ortodontik me teknologji digjitale, zhvillimet në dizajnin e alignerëve dhe aplikimet inovative që po transformojnë mënyrën e trajtimit të pacientëve.

Continue Reading

Lajmet

Rektori Hajrizi në vizitë zyrtare në Portugali

Published

2 days ago

on

October 14, 2025

By

Rektori i UBT-së, Prof. Dr. Edmond Hajrizi, po qëndron për vizitë zyrtare në Portugali, ku do të zhvillojë takime të rëndësishme me drejtues të institucioneve dhe kompanive, për të zgjeruar bashkëpunimin në fusha të ndryshme shkencore e teknologjike.

Rektori Hajrizi do të marr pjesë edhe në një sërë aktivitetesh akademike dhe kërkimore në kuadër të International Week në Polytechnic Institute of Beja (IPBeja), program i cili përfshin punëtori, ligjërata shkencore dhe trajnime.

UBT vazhdon të ndërtojë ura bashkëpunimi ndërkombëtar dhe për të fuqizuar rrjetin global të universiteteve partnere, duke kontribuar në zhvillimin e arsimit, shkencës dhe inovacionit.

Continue Reading

Aktualitet

14 tetori – Dita Botërore e Zogjve Shtegtarë

Published

2 days ago

on

October 14, 2025

By

Më 14 tetor, njerëzit dhe organizatat në mbarë botën do të bashkohen për të rritur ndërgjegjësimin dhe për të ndërmarrë veprime konkrete.

Uji është thelbësor për mbijetesën e shpendëve shtegtarë. Ai është jetik për shumimin, pushimin dhe furnizimin me energji gjatë migrimeve dhe dimërimeve. Zogjtë shtegtarë mbështeten në liqene, lumenj, pellgje, ligatina bregdetare dhe madje edhe në lagështinë e farave, luleve dhe mjegullës. Por uji është duke u kërcënuar.

Ndryshimet klimatike, ndotja dhe kërkesa e shtuar njerëzore për ujë po rrezikojnë ekosistemet dhe furnizimin me ujë të pastër, jo vetëm për zogjtë, por edhe për njerëzit. Në 50 vitet e fundit, 35% e ligatinave në botë janë zhdukur, ndërsa mbi 2 miliard njerëz nuk kanë qasje në ujë të pijshëm të sigurt, sipas Raportit Botëror të Ujit të OKB-së.

Jo vetëm cilësia, por edhe sasia e ujit është në rrezik. Për shembull, Liqeni Çad, një vend Ramsar dhe një nga trupat ujorë më të mëdhenj në Afrikë në vitin 1960, ka humbur 90% të sipërfaqes së tij, duke dëmtuar burimet ujore për komunitetet lokale dhe zogjtë shtegtarë.

Në pellgun Amur-Heilong në Azi, ndryshimet klimatike po përkeqësojnë shkatërrimin e habitatit, duke lënë zogjtë pa vende të rëndësishme për shumim dhe ndalesa. Në Shtetet e Bashkuara, thatësira e gjatë ka lënë ligatina si Cheyenne Bottoms në Kansas të thata gjatë migrimeve, duke ndikuar tek zogjtë e bregdetit dhe specie të tjera. Aktualisht, 48% e specieve të shpendëve në botë po përjetojnë rënie të popullsisë.

Dita Botërore e Zogjve Shtegtarë është thirrje globale për veprim. Me zogjtë shtegtarë që kalojnë kufijtë e shumë vendeve, bashkëpunimi ndërkombëtar është kyç për ruajtje. Vetëm duke vepruar së bashku adresojmë krizën globale të ujit e sigurojmë mbrojtjen e zogjve tanë.

Fushata organizohet nga Konventa për Ruajtjen e Specieve Migruese të Kafshëve të Egra (CMS), Marrëveshja Afriko-Euraziatike për Zogjtë Ujorë Shtegtues (AEWA), Mjedisi për Amerikën (EFTA) dhe Partneriteti i Rrugëve Aziatike-Australiane (EAAFP).

Ngjarje të ndryshme janë planifikuar për 14 tetor, duke përfshirë një aktivitet edukativ përgjatë lumit Kherlen në Mongoli, festival ruajtjeje të shpendëve në Bangladesh, festivale në Guatemalë, aktivitete në kopshtet zoologjike në Belize, dhe shumë të tjera në mbarë botën. /A.Z/UBT News/

Continue Reading

Lajmet

Pjesëmarrja në zgjedhjet lokale në Kosovë deri në orën 15:00 arrin në 25.30 për qind

Published

4 days ago

on

October 12, 2025

By

Zgjedhjet lokale që po mbahen sot në gjithë territorin e Kosovës po zhvillohen me një pjesëmarrje mesatare prej 25.30% deri në orën 15:00, sipas të dhënave të Komisionit Qendror të Zgjedhjeve (KQZ).

Sipas raportimeve zyrtare, nga gjithsej 2,025,105 qytetarë të regjistruar në listën e votuesve, deri në këtë orë kanë votuar 512,331 qytetarë. Deri tani janë përpunuar 94.32% të vendvotimeve, respektivisht 2,425 nga 2,571 gjithsej.

Komunat me pjesëmarrjen më të lartë janë:

  • Mamushë me 54.60%,
  • Zveçan me 49.69%,
  • Zubin Potok me 49.61%,
  • Ranillug me 48.38%,
  • Novobërdë me 44.04%.

Komunat me pjesëmarrjen më të ulët deri në orën 15:00 janë:

  • Rahovec me 18.05%,
  • Skënderaj me 18.95%,
  • Prizren me 19.17%,
  • Dragash me 19.64%,
  • Gjakovë me 20.75%.

Në kryeqytet, Prishtina ka regjistruar një pjesëmarrje prej 29.52%, ndërsa në qytetet e mëdha si Ferizaj (23.18%), Pejë (22.37%), Gjakovë (20.75%) dhe Prizren (19.17%), pjesëmarrja mbetet nën mesataren kombëtare.

KQZ thekson se këto të dhëna përfshijnë vetëm votimet në vendvotimet e rregullta, duke mos përfshirë votimet me kusht, votimin e personave me nevoja të veçanta dhe votimin me postë.

Continue Reading

Të kërkuara