Lajmet

Mungesa e infermierëve po konsiderohet sfidë

Published

5 years ago

January 27, 2021

Betim Gashi

Kryetari i Sindikatës së Infermierëve të Kosovës, Fitim Havolli ka thënë se ka shtretër të mjaftueshëm në spitale pasi tani numri i të infektuarve me Covid-19 është ulur, por që mungesa e stafit të infermierëve, vazhdon të jetë një sfidë.

“Realisht sa i përket mjeteve mbrojtëse për komunitetin shëndetësor, në përgjithësi kemi pasur mjaftueshëm dhe kemi për t’u përballur me këtë virus dhe derisa vaksina ende nuk është duke u dhënë edhe në shtetin tonë do të jetë e vetmja mënyrë për mbrojtjen nga Coronavirusi. Po ashtu edhe shtretër kemi mjaftueshëm përderisa edhe numri është pak më i ulët dhe ka kapacitete të mjaftueshme. Sa i përket komunitetit të infermierëve edhe si sistem shëndetësor ka pasur mungesë të vazhdueshme të këtij komuniteti apo resursi human për t’i shërbyer vendit. Në këtë kohë pandemie roli dhe rëndësia e infermierit ka qenë e jashtëzakonshme me shërbimin që iu është ofruar atyre qytetarëve të prekur me Covid-19. Po shpresoj që në të ardhmen që e gjithë shoqëria dhe shteti do të merren më konkretisht me sistemin shëndetësor dhe të mos na gjej një virus i tillë e që sistemi shëndetësor të jetë i papërgatitur edhe me resurse humane”, tha ai për Ekonomia Online.

Tutje, Havolli tha se që nga paslufta nuk janë trajtuar me prioritet problemet e sektorit të shëndetësisë, prandaj ai thotë se ka vendosur të kandidojë për deputet si pjesë e listës së LDK-së, ku thotë se nëse arrin ta fitojë mandatin e deputetit do të jetë zëri i komunitetit të infermierëve.

Mes tjerash, ai tha se sigurimi shëndetësor është çelësi i zgjidhjeve të shumë problemeve në shëndetësi.

“Fokusi im konkretisht se pse i jam futur politikës është t’i ndihmojmë sa më shumë sistemin shëndetësor në përgjithësi por në veçanti meqenëse i përkas komuniteti të infermierëve do të kem fokus të veçantë për ato kërkesa të cilat në vazhdimësi i kemi bërë dhe ato do të jenë tash e tutje nëse e marr besimin qytetar do t’i shtyjmë përpara që shëndetësia të ketë një vend më të merituar. Duke marrë parasysh që shëndetësia që nga paslufta nuk është trajtuar me prioritet nga të gjitha partitë politike. Sistemi shëndetësor ka nevojë të ketë një fokus të veçantë dhe investim shumë më të madh në resurse humane në mënyrë që të ketë pak më i përafërt me shërbime më të avancuara shëndetësore qoftë në aspektin e resurseve qoftë në aspektin e përgatitjeve të tjera profesionale. Sigurimi shëndetësor do të jetë një çelës i zgjidhjeve dhe shumë problemeve në shëndetësi, i cili nuk ka ndodhur ende dhe shpresoj që qeveria e re duhet ta ketë në fokus sigurimin shëndetësor të popullatës dhe investimet e vazhdueshme që duhet të ndodhin në resurse humane por edhe ato të infrastrukturës moderne që e ka bota. Por duhet shumë me investuar dhe me shtuar numrin e komuniteteve me nevojë sepse sistemi shëndetësor ka mungesë qe 20 vjet”, përfundoi ai.

Aktualitet

UBT shpall thirrjen për Konferencën Ndërkombëtare të Gjuhës dhe Kulturës 2025

Published

18 hours ago

September 27, 2025

Driton Iseni

UBT ka bërë hapjen e thirrjes për pjesëmarrje në Konferencën Ndërkombëtare të Gjuhës dhe Kulturës 2025 (IC-LAC), e cila këtë vit organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.

Ky aktivitet shkencor do të bashkojë studiues, akademikë, studentë të cikleve të avancuara, doktorantë, ekspertë të fushës dhe profesionistë të arsimit nga vende të ndryshme të botës, me synim shkëmbimin e njohurive, përvojave dhe praktikave më të mira mbi gjuhën, kulturën dhe ndërthurjen e tyre në sistemet bashkëkohore arsimore.

Tema kryesore e këtij edicioni është: “Ndërtimi i sistemeve arsimore reziliente për një të ardhme të qëndrueshme.”

Datat kryesore:

Dorëzimi i abstrakteve: 10 tetor 2025
Njoftimi i pranimit & rishikimi shkencor: 17 tetor 2025
Regjistrimi i hershëm: deri më 17 tetor 2025
Regjistrimi i vonuar: deri më 20 tetor 2025
Dorëzimi i punimit të plotë: 14 nëntor 2025

Qëllimet dhe objektivat

Konferenca IC-LAC synon të hapë një hapësirë të gjërë diskutimi mbi rolin e gjuhës dhe kulturës në shoqëritë moderne, duke nxitur qasje multidisiplinare për edukimin dhe komunikimin ndërkulturor.

Fushat e diskutimit përfshijnë:

Gjuha dhe kultura në arsim
Përdorimi i teknologjisë në mësimdhënie dhe të nxënë
Komunikimi ndërkulturor dhe shumëgjuhësia
Praktikat e qëndrueshme në edukimin gjuhësor
Inteligjenca artificiale dhe ndikimi i saj në të nxënit e gjuhëve
Përkthimi, interpretimi dhe komunikimi global
Rezilienca arsimore dhe dizajnimi i kurrikulave

Dorëzimi i punimeve

Punimet e paraqitura duhet të jenë origjinale, të papublikuara më parë dhe të mos jenë në proces shqyrtimi në konferenca të tjera. Gjatësia maksimale e një punimi është 6 faqe. Punimet që nuk respektojnë kriteret e formatimit nuk do të merren në konsideratë.

Organizatorët ftojnë të gjithë të interesuarit që të kontribuojnë me hulumtimet e tyre shkencore dhe praktikat profesionale, duke u bërë pjesë e një platforme ndërkombëtare shkëmbimi idesh që synon të forcojë lidhjen mes gjuhës, kulturës dhe arsimit për një të ardhme më të qëndrueshme.

Lajmet

Gjykata spanjolle liron Dani Alves-in

Published

2 days ago

September 26, 2025

UBT News

Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.

Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.

“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.

Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/

Lajmet

Caktohet data, Pogba rikthehet në fushë

Published

2 days ago

September 26, 2025

UBT News

Paul Pogba është shumë pranë rikthimit në futboll pas një periudhe të gjatë mungese tha trajneri i Monacos, Adi Hütter. Ai zyrtarisht ka konfirmuar se mesfushori francez po përparon ndjeshëm.

“Fizikisht dhe mendërisht po shkon mirë. Është stërvitur për tre muaj dhe është afër kthimit në skuadër,” deklaroi Hütter.

Sipas mediave franceze, Pogba pritet të jetë i disponueshëm më 5 tetor, në ndeshjen e Ligue 1 kundër Nice në Stade Louis II.

Ndërkohë, rikthimi në sfidën e së shtunës kundër Lorient shihet më pak i mundshëm.

Ish-mesfushori i Juventusit nuk ka luajtur një ndeshje zyrtare që prej 3 shtatorit 2023, kur u aktivizua ndaj Empolit.

Pak javë më vonë, ai u pezullua për doping dhe u dënua fillimisht me katër vite jashtë fushave. Megjithatë, në tetor 2024, Gjykata e Arbitrazhit Sportiv uli ndalimin në 18 muaj, që skadoi më 11 mars 2025.

Pas ndarjes me Juventusin, Pogba refuzoi një transferim në MLS dhe verën e kaluar nënshkroi një kontratë dyvjeçare me Monacon, e vlefshme deri më 30 qershor 2027.

Klubi monegask e ka regjistruar 31-vjeçarin edhe për Ligën e Kampionëve, ku pritet të rikthehet në tetor.

Ky rikthim do të shënojë një moment të rëndësishëm për kampionin e botës 2018, i cili synon të rifitojë formën dhe të lërë pas periudhën më të vështirë të karrierës së tij./S.K/KP/CNN/