Ish-Komandanti i Lartë i NATO-s, gjenerali amerikan Wesley Clark, ka reaguar me revoltë dhe tronditje ndaj aktgjykimit të Gjykatës Speciale në Hagë, e cila i dënoi katër ish-drejtuesit e Ushtrisë Çlirimtare të Kosovës me gjithsej 81 vjet burgim.

I ftuar në emisionin “Off the Record” në A2 CNN, gjenerali Clark deklaroi se vendimi i trupit gjykues është plotësisht i pabarazpeshuar me realitetin e luftës dhe argumentet e prezantuara gjatë procesit. Ai nëvizoi se përvoja e tij direkte në krye të aleancës ushtarake dhe dëshmia e tij zyrtare në këtë gjyq vërtetojnë qartë se bashkëpunimi me UÇK-në shërbente për t’i dhënë fund krimeve të regjimit serb.

“Jam i shokuar dhe i zemëruar. Unë e njoh Thaçin dhe shokët e tij dhe të gjithë ata që kanë bërë luftën. Unë kam dëshmuar në gjyq kam thënë se çfarë kam parë dhe e dija se çfarë po ndodhte në Kosovë dhe bashkëpunimin tonë me UÇK-së dhe nuk kam parë asnjë dëshmi që të justifikojë këtë lloj vendimi. Fatkeqësisht Gjykata e dha vendimin e vet dhe kjo do të jetë një rrugë e vështirë në të ardhmen”, u shpreh gjenerali.

Duke folur për pretendimet e prokurorisë, Clark sqaroi se lufta e UÇK-së ishte një kryengritje popullore kundër shtypjes shtetërore dhe dhunës ndaj civilëve shqiptarë. Ai vlerësoi lart përpjekjet e Hashim Thaçit për ruajtjen e rendit dhe mbrojtjen e pakicës serbe, duke hedhur poshtë kategorikisht çdo mundësi që ai të mbajë përgjegjësi për krime lufte.

“Me aq sa di, këto dëshmitë sekrete që edhe vetë nuk më treguan asnjë dëshmi nga prokuroria, nuk do të më bënin dhe që të ndryshonin mendimin tim. Unë jam takuar tre herë me Hashim Thaçin gjatë konfliktit dhe në Rambuje. Sigurisht e takova atë kur isha në Kosovë, por UÇK-ja dhe ajo çfarë po ndodhte atje ishte një rebelim kundër një regjimi autoritar dhe jo vetëm një regjim autoritar, por edhe shumë krime individuale të kryera nga serbë individualë përkundër fqinjëve të tyre shqiptarë. Dhe siç e kam shpjeguar dhe në gjykatë edhe sot kishte me shumë emocion me njerëz që kishin njohur njëri-tjetrin dhe shqiptarët u ndjen të tradhtuar nga fqinjët e tyre serbë që kishin jetuar një jetë së bashku, por sigurisht që ishin ndjesi të forta dhe këtë mendova se Hashim Thaçi bëri një punë të shkëlqyer për të ruajtur edhe popullatën e pafajshme serbe, si për ata të cilët ë që ishin mbi lumin Ibër që i shtyn shqiptarët më poshtë. Pra kam patur shqetësime për më tej, por nuk mund të thosha që Thaçi ishte dikush që të mund të dënohej për krime lufte”, përfundoi Clark.

Presidentja e Komisionit Evropian, Ursula von der Leyen, i ka bërë një ofertë historike Kanadasë për t’u bërë “anëtarja e parë e asociuar” e Bashkimit Evropian, duke kërkuar ngritjen e marrëdhënieve dypalëshe në nivelin më të lartë të mundshëm.

Gjatë fjalës së saj në Parlamentin Evropian në Strasburg pranë kryeministrit kanadez, Mark Carney, Von der Leyen theksoi se të dyja palët ndajnë të njëjtat vlera demokratike dhe qasje për sfidat globale si inteligjenca artificiale, ndryshimet klimatike, lufta në Ukrainë dhe gjeopolitika. Oferta përfshin thellimin e bashkëpunimit përmes përmirësimit të marrëveshjes tregtare, krijimin e një aleance teknologjike, integrimin e industrive të mbrojtjes, si dhe investime të përbashkëta në energji, minerale kritike, siguri kibernetike dhe rajonin e Arktikut.

Kjo lëvizje vjen si përgjigje ndaj ndryshimeve gjeopolitike pas rikthimit të Donald Trump në Shtëpinë e Bardhë, i cili ka vendosur tarifa ndaj aleatëve dhe ka sugjeruar mundësinë e anëtarësimit të Kanadasë si shteti i 51-të i SHBA-së. Në këtë kuadër, Kanadaja po kërkon të ulë varësinë tregtare nga Uashingtoni përmes kësaj aleance unike me bllokun evropian, ndonëse mbeten për t’u definuar detajet se si do të funksionojë ky status i ri me tregun e përbashkët të BE-së. /Reuters/

Ministria e Punëve të Jashtme e Kroacisë ka reaguar zyrtarisht lidhur me aktgjykimin ndaj ish-krerëve të UÇK-së në Hagë, duke e cilësuar atë si një vendim jo përfundimtar të shkallës së parë dhe duke refuzuar të paragjykojë epilogun e mëtutjeshëm të procedurës.

Përmes këtij reagimi, MPJ-ja kroate nëvizoi se ky aktgjykim nuk e ndryshon kontekstin historik të ngjarjeve, ku Kosova dhe popullsia e saj ishin viktima të represionit dhe krimeve të rënda të regjimit të Sllobodan Millosheviqit.

Diplomacia kroate përfundoi se përgjegjësia individuale e personave të caktuar nuk mund të përdoret aspak si bazë për relativizimin e krimeve serbe, e as për vënien në pikëpyetje të lirisë dhe pavarësisë së Kosovës.

Emisari presidencial i Trumpit, Richard Grenell, ka reaguar pas vendimit të Gjykatës Speciale. Grenell ka thënë se kryeministri Albin Kurti duhet të veprojë shpejt për ta zhbërë Gjykatën Speciale dhe sipas tij, deputetët e Kuvendit të Kosovës duhet ta ndihmojnë në këtë.

“Dënimi i shpallur nga Gjykata e Hagës ndaj Hashim Thaçit, për një luftë të zhvilluar 25 vjet më parë, është i turpshëm.

Askush nuk është i sigurt nga këto gjykata ndërkombëtare, ku elitat akademike marrin vendime politike. Këta tre gjyqtarë dhe prokurori amerikan janë të gjithë të majtë ekstremë. Ata qartazi nuk i dëgjuan këshilltarët e Bill Clintonit, të cilët e bënë të qartë se Thaçi nuk e drejtonte luftën.

Gjyqtari zviceran Guénaël Mettraux ishte në të vërtetë udhëheqësi, duke injoruar çështjet ligjore dhe duke zgjedhur në vend të tyre politikën e Jack Smithit.

Të gjitha këto gjykata duhet të financohen më menjëherë. Departamenti i Drejtësisë i SHBA-së dhe Prokurori i Përgjithshëm Todd Blanche duhet të veprojnë shpejt. Amerikanët po paguajnë për këto ndjekje penale politike dhe kjo duhet të ndalet.

Edhe Albin Kurti duhet të veprojë shpejt për ta shpërbërë këtë Gjykatë të huaj. Anëtarët e Parlamentit duhet të punojnë me Kurtin për ta bërë këtë të mundur. Kosovës nuk i duhet një gjykatë në Holandë”, ka shkruar Grenell.