Si supermodelja e parë me hixhab në industrinë e modës, bukuroshja somalezo-amerikane Halima Aden njihet si vajza me hixhab që padyshim theu kufinjtë!
Por pas ecjes në pistat për markën e Kanye West, Yeezy dhe Alberta Ferretti – pastaj pozimin për British Vogue, Sports Illustrated Swimsuit Issue dhe shumëtë tjera – ajo tronditi fansat në nëntor të vitit të kaluar duke u larguar nga pasarela.
“Ata mund të më telefonojnë nesër dhe as për 10 milionë dollarë nuk do të rrezikoja kurrë të komprometoja hixhabin tim”, shkroi modelja në Instagram në atë kohë.
Tani, një vit më vonë, Aden është duke vënë në skenë rikthimin e saj në modë dhe këtë herë, ajo shpreson të krijojë ndryshim, në vend që të ndryshojë veten.
“Doja të kthehesha për të bërë punën që më pëlqen me markat që ndajnë vlerat e mia thelbësore”, tha ajo për Page Six Style duke vendosur t’i jepte fund pauzës së saj.
“Ishte e rëndësishme për mua që u ktheva sipas kushteve të mia dhe jam shumë mirënjohëse që pata mundësinë t’i bëj gjërat sipas mënyrës sime”.
Për punën e saj të parë tani, ajo po bashkohet me Vita Coco si zëdhënëse për iniciativën e ndikimit social të markës, Vita Coco Project, i cili mbështet komunitetet që kultivojnë arrën e kokosit në Filipine dhe Sri Lanka.
Ajo së fundi u emërua gjithashtu ambasadorja e parë e markës globale në Modanisa.
“Jam bërë shumë selektive me kë jam partner dhe çfarë shkaqesh jam duke mbështetur”, tha Aden.
Edhe pse të gjitha përvojat e saj të modelimit kanë qenë pozitive, ylli i modës e njeh ndikimin që fama e saj mund të ketë tek të tjerët që ndajnë besimin e saj.
“Si një vajzë e vogël kurrë nuk pashë dikë që më ngjante në revista apo në televizion”, tha Aden, e cila lindi në një kamp refugjatësh në Kenia dhe u transferua në Minesota me familjen e saj në moshën 6-vjeçare, transmeton UBT News.
“Kur shihja përfaqësimin e grave muslimane, zakonisht ishte në lidhje me shtypjen, gjë që nuk ishte përvoja ime e veshjes së hixhabit”, shtoi ajo.
“Si e rritur, jam shumë krenare që kam qenë gruaja e parë dukshëm muslimane në kaq shumë hapësira, sepse si fëmijë, kurrë nuk kam menduar se kjo do të ishte e mundur”.
Por Aden beson se ka ende “punë për t’u bërë në aspektin e diversitetit dhe përfshirjes”, duke thënë, “duhet një përpjekje e komunitetit për të nxitur ndryshime reale dhe afatgjatë”.
“Mos ndryshoni veten, ndryshoni lojën”, tha ajo. “Mos u ndjeni sikur duhet të përshtateni në mënyrë që të përziheni; përkundrazi, ji krenarë për atë që jeni dhe nga vini. Të gjithë kanë lindur për t’u dalluar dhe ne të gjithë duhet të përqafojmë dallimet e njëri-tjetrit. Bota do t’ju takojë aty ku jeni”./UBTNews/
Qendra Klinike Universitare e Kosovës (QKUK) ka përfunduar verifikimin e pronësisë së oborrit të saj dhe ka paralajmëruar se së shpejti do të nisë lirimin e hapësirave të uzurpuara prej shumë vitesh, duke rrënuar objektet e ndërtuara pa leje.
Ky hap vjen pas punës së një komisioni të posaçëm të formuar në mars të këtij viti, i cili në bashkëpunim me Drejtorinë e Kadastrit të Komunës së Prishtinës, përmes ortofotove dhe planeve kadastrale, ka vërtetuar gjendjen pronësore. “Sipas të dhënave kadastrale, brenda oborrit të QKUK-së nuk figuron asnjë pronë private”, thuhet në njoftimin zyrtar të këtij institucioni.
Para marrjes së vendimit për ndërhyrje, institucioni u ka dërguar dy njoftime zyrtare shfrytëzuesve të lokaleve afariste dhe kioskave që veprojnë brenda këtij perimetri, duke kërkuar dëshmi mbi bazën ligjore të shfrytëzimit të hapësirave.
Megjithatë, nga QKUK-ja bëhet e ditur se asnjëri prej shfrytëzuesve nuk ka paraqitur certifikatë pronësie apo dëshmi se objekti është në proces legalizimi, ndërsa dokumentet e dorëzuara kanë rezultuar të jenë kontrata të skaduara dhe aktvendime të paregjistruara në kadastër.
Procesi i lirimit të këtyre hapësirave ka marrë mbështetje edhe në terren nga Inspektorati i Ministrisë së Mjedisit, Planifikimit Hapësinor dhe Infrastrukturës (MMPHI), i cili gjatë inspektimeve të ditëve të fundit i ka vërtetuar të njëjtat gjetje.
“Me konfirmimet kadastrale dhe rekomandimet zyrtare si nga Inspektorati Komunal, ashtu edhe nga ai i MMPHI-së, menaxhmenti i QKUK-së tashmë ka në dorë të gjitha instrumentet ligjore dhe do t’i përdorë për t’ua kthyer pacientëve e qytetarëve pronën publike”, ka theksuar ky institucion. /E.A/
Kompania Kosovare për Distribuim me Energji Elektrike (KEDS) ka njoftuar se, përkundër erërave të fuqishme që shkaktuan dëmtime në rrjetin shpërndarës, furnizimi me energji elektrike është normalizuar për rreth 80 për qind të konsumatorëve të prekur brenda tri orëve të para pas qetësimit të motit.
Ndër zonat më të prekura nga moti i ligë kanë qenë Prishtina, Gjakova, Dragashi, Prizreni, Suhareka, Kamenica, Gjilani, Kaçaniku, Lipjani, Shtimja, Drenasi, Obiliqi, Fushë Kosova, Podujeva dhe Ferizaj.
Sipas KEDS-it, paralelisht me rikthimin e energjisë për shumicën e konsumatorëve, janë lokalizuar defektet në shtylla dhe përçues në pothuajse të gjitha pikat e rrjetit ku janë evidentuar dëmtime.
Ekipet në terren po vazhdojnë punën intensive për sanimin e plotë të problemeve dhe rikthimin e rregullt të furnizimit për të gjithë konsumatorët./E.A/
Gjykata Themelore në Prishtinë ka shpallur të premten aktgjykimin dënues ndaj Ilir dhe Rrahim Abdullahut, duke i dënuar me nga 18 vjet burgim secilin për vrasjen e zyrtarit policor, Triumf Riza. Kryetari i trupit gjykues, Avni Syla, bëri të ditur se gjykata i shpalli të akuzuarit fajtorë për kryerjen në bashkëkryerje të veprës penale “Vrasje e rëndë”, bazuar në aktakuzën e Prokurorisë Speciale.
Sipas vendimit të gjykatës, Ilir Abdullahut i është vazhduar masa e paraburgimit deri në plotfuqishmërinë e aktgjykimit, ndërsa e njëjta masë e paraburgimit i është caktuar edhe Rrahim Abdullahut. Gjatë seancës së shpalljes së vendimit, në sallë ishte i pranishëm vetëm i akuzuari Ilir Abdullahu i shoqëruar nga avokati i tij, Ramë Dreshaj, ndërsa Rrahim Abdullahu mungoi dhe u përfaqësua nga avokatja Agnesa Salihu. Në seancë mungoi po ashtu edhe prokurorja e rastit, Arbëresha Shala.
Zyrtari policor Triumf Riza u vra më 30 gusht të vitit 2007 në lagjen “Dardania” në Prishtinë. /Ekonomia Online/
Aleanca Kosovare e Bizneseve (AKB) ka shprehur shqetësimin për mënyrën se si po shfrytëzohet kapitali i diasporës në vend, duke vlerësuar se dërgesat e mërgimtarëve po mbeten kryesisht të orientuara drejt shpenzimeve të përditshme dhe sektorit të ndërtimit, në vend se të kanalizohen në zhvillimin e industrisë dhe prodhimit vendor.
Sipas një vlerësimi të kësaj organizate, gjatë periudhës nga viti 2021 deri në qershor të vitit 2026, Kosova ka pranuar gjithsej rreth 7.16 miliardë euro remitanca, prej të cilave rreth 80 për qind ose afro 5.73 miliardë euro janë shpenzuar në konsum, patundshmëri dhe ndërtim. Ndërkohë, vetëm 2 për qind e këtij kapitali, që përkthehet në rreth 143 milionë euro, është investuar në biznes, industri dhe prodhim, kurse 18 për qind e mbetur ka shkuar në destinime të tjera.
Të dhënat e prezantuara nga AKB-ja tregojnë një trend të vazhdueshëm të rritjes së dërgesave të diasporës ndër vite, duke filluar nga 1.15 miliardë euro në vitin 2021, 1.22 miliardë euro në vitin 2022, 1.33 miliardë euro në vitin 2023 dhe 1.35 miliardë euro në vitin 2024.
Kjo rritje ka vazhduar edhe në vitin 2025, kur remitancat arritën në 1.4 miliardë euro, ndërsa vetëm në gjashtëmujorin e parë të vitit 2026 në vend kanë hyrë rreth 690.7 milionë euro. Pavarësisht këtij potenciali të lartë financiar, AKB-ja vlerëson se këto mjete nuk po arrijnë të shndërrohen në motor të zhvillimit ekonomik përmes hapjes së fabrikave të reja apo rritjes së eksporteve.
Për ta ndryshuar këtë gjendje, AKB-ja i ka bërë thirrje Qeverisë së Kosovës që të hartojë një strategji të posaçme për orientimin e kapitalit të mërgatës drejt sektorëve prodhues, teknologjisë dhe eksportit.
Kryetari i kësaj organizate, Agim Shahini, ka kërkuar nga institucionet që të krijojnë një klimë më të favorshme investuese përmes garantimit të sigurisë juridike, ofrimit të lehtësirave fiskale dhe zbatimit të politikave konkrete mbështetëse, duke theksuar se vendi ka nevojë për investime që gjenerojnë fabrika dhe vende të reja pune, e jo vetëm mjete për konsum. /E.A/