UASHINGTON – Administrata e Presidentit Trump ka urdhëruar Byronë e Mbrojtjes Financiare të Konsumatorëve (CFPB) që të ndërpresë pothuajse të gjithë funksionet e saj, duke mbyllur praktikisht një agjenci që u krijua për të mbrojtur konsumatorët pas krizës financiare të vitit 2008 dhe skandalit të kredive për blerjen e shtëpive.

Russell Vought, drejtori i ri i Zyrës së Menaxhimit dhe Buxhetit, udhëzoi CFPB-në, në një email të konfirmuar nga agjencia e lajmeve Associated Press të dërguar mbrëmjen e së shtunës, të ndalë punën për proceset në vijim dhe të mos fillojë asnjë hetim të ri. Agjencia ka tërhequr vëmendjen e konservatorëve që kur ish-Presidenti Barack Obama këmbënguli për krijimin e saj me legjislacionin e reformës financiare të vitit 2010, që pasoi krizën financiare të periudhës 2007-2008.

Mesazhi i dërguar me email gjithashtu urdhëroi CFPB-në të “ndërpriste të gjitha aktivitetet e mbikëqyrjes dhe ekzaminimit”.

Meqenëse CFPB-ja është krijuar nga Kongresi, do të duhej një akt i veçantë i Kongresit për ta eliminuar atë zyrtarisht. Por drejtuesi i agjencisë vendos sidoqoftë në lidhje me veprimtarinë e saj ligjzbatuese.

Në platformën e mediave sociale X, Elon Musk komentoi të premten: “U prehtë në paqe CFPB-ja” (“CFPB RIP”). Dhe faqja kryesore në internet e CFPB-së nuk funksionoi të dielën, e zëvendësuar me një mesazh se “faqja nuk gjendet”.

Ndërkohë në orët e vona të së shtunës, zoti Vought tha në një postim në mediat sociale se CFPB-ja nuk do të tërhiqte shumën e ardhshme të financimit nga Rezerva Federale, duke shtuar se rezervat e saj aktuale prej 711.6 milionë dollarësh janë “të tepruara”. Kongresi pati vendosur që buxheti i kësaj byroje të jepej nga Rezerva Federale, për ta mbrojtur atë nga trysnia politike.

Ky mekanizëm “që kontribuon prej kohësh për mos-përgjegjshmërinë e CFPB-së, tashmë po mbyllet”, tha zoti Vought në rrjetin ‘X’.

CFPB-ja thotë se ka arritur të lehtësojë financiarisht me rreth 20 miliardë dollarë konsumatorët amerikanë, që nga themelimi i saj, në formën e borxheve të anuluara, kompensimit dhe kredive të reduktuara. Muajin e kaluar, byroja paditi bankën Capital One me akuza për mashtrimin e konsumatorëve në lidhje me ofertat e saj për llogaritë e kursimeve me interes të lartë, duke përfituar për rrjedhojë mbi 2 miliardë dollarë që duhet t’u kishin shkuar klientëve në formën e interesit.

Dennis Kelleher, president i organizatës “Better Markets”, tha se, “kjo është arsyeja përse bankat më të mëdha të Wall Street-it dhe aleatët miliarderë të Trump-it e urrejnë byronë: pasi është një zbatuese efektive e ligjeve për financat dhe ka qëndruar krah për krah me qindra miliona amerikanë – republikanë dhe demokratë – përballë financierëve grabitqarë, mashtruesve dhe shkelësve”.

Masa ndaj CFPB-së gjithashtu vë në dukje tensionet mes premtimeve më populiste të Presidentit Trump për të ulur kostot për familjet e klasës punëtore dhe premtimit të tij për të reduktuar rregullat e qeverisë.

Gjatë fushatës, Presidenti Trump tha se do t’i kufizonte normat e interesit të kartave të kreditit në 10%, pasi ato u rritën në nivele mesatare rekord mbi 20%, kur Rezerva Federale rriti normat e interesit në 2022 dhe 2023. CFPB-ja kishte filluar punën për zbatimin e këtij propozimi.

Byroja mund të vazhdojë të pranojë ankesa, por nuk mund të fillojë hetime ose të vazhdojë me ato ekzistuese, sipas një personi në dijeni të proceseve të agjencisë, që kërkoi t’i ruhet anonimiteti. Memorandumi lë të kuptohet se ndalohet gjithashtu komunikimi me kompanitë, organizatat e konsumatorëve ose grupe të tjera të jashtme.

Ekipi i zotit Musk do të kishte gjithashtu qasje tek ankesat, hetimet dhe të dhënat e mbikëqyrjes rregullatore. Qasja do të ngrinte pikëpyetje të pakëndshme nëse kompania X e zotit Musk krijon një sistem të ri pagesash, pasi CFPB-ja ka të dhëna për kompani të ngjashme që do të ishin konkurrente me të, si Cash App, tha personi.

Email-i i zotit Vought u dërgua pasi një direktivë e ngjashme u dha nga Sekretari i Thesarit, Scott Bessent më 3 shkurt dhe është masa më e fundit e administratës së Presidentit Trump për të kufizuar me shpejtësi punën e agjencive federale që i ka konsideruar të tepërta.

Ish-Presidenti Obama udhëhoqi përpjekjet për krijimin e byrosë në vazhdën e krizës së strehimit dhe asaj financiare të viteve 2007-2008, e cila u shkaktua pjesërisht nga dhënia e huave të parregullta për blerjen e shtëpive. Ideja për krijimin e kësaj byroje ishte propozuar nga senatorja demokrate nga Massachusetts, Elizabeth Warren. Ndaj byrosë janë ngritur padi nga banka të mëdha dhe shoqatat e sektorit financiar.

“Vought po u hap bankave të mëdha dhe korporatave gjigante dritën jeshile për të mashtruar familjet“, tha senatorja Warren.

Javën e kaluar, senatorja Warren i bëri thirrje Presidentit Trump që të punojë me byronë për të mbrojtur amerikanët nga praktika e bankave që mbyllin llogaritë e klientëve sepse besojnë se ato paraqesin rreziqe financiare, ligjore apo për reputacionin e bankave.

Në email-in e zotit Vought thuhej se Presidenti Donald Trump e kishte ngarkuar atë të premten me detyrën e drejtorit të përkohshëm të CFPB-së. Presidenti Trump shkarkoi drejtorin e mëparshëm të byrosë, Rohit Chopra, më 1 shkurt. Zoti Vought ishte ndër hartuesit e Projektit 2025, një plan politikash për Shtëpinë e Bardhë, plan që Presidenti Trump u përpoq ta mohonte gjatë fushatës së vitit të kaluar.

Nën drejtimin e zotit Chopra, CFPB-ja miratoi rregulla për të kufizuar tarifat bankare dhe ka propozuar kufizime për kompanitë ndërmjetëse që kanë qasje tek informacione personale, si numrat e Sigurimeve Shoqërore.

Më shumë se 48,200 palestinezë janë vrarë në Rripin e Gazës për shkak të veprimeve të ushtrisë izraelite që nga fillimi i përshkallëzimit në enklavë në tetor 2023, njoftoi Ministria e Shëndetësisë palestineze.

Sipas agjencisë, “numri i të vdekurve ka arritur në 48,208 që nga fillimi i operacionit ushtarak të Izraelit, ndërsa 111,655 u plagosën”. Ministria shtoi se gjatë 24 orëve të fundit, mjekët në Rripin e Gazës nxorrën 14 trupa nga nën rrënoja dhe 15 palestinezë të plagosur u sollën në spitale.

Situata në Lindjen e Mesme u përshkallëzua ndjeshëm pas një depërtimi të militantëve të Hamasit nga Rripi i Gazës në Izrael më 7 tetor 2023, i shoqëruar me vrasjen e banorëve të vendbanimeve izraelite pranë kufirit dhe marrjen e pengjeve. Hamasi e konsideron sulmin si një përgjigje ndaj veprimeve izraelite kundër xhamisë Al-Aksa në Jerusalem.

Izraeli shpalli një rrethim të plotë të Rripit të Gazës dhe filloi të kryejë sulme në atë zonë dhe pjesë të Libanit dhe Sirisë. Kjo u pasua nga një operacion tokësor izraelit në enklavë.

Kryeministri i Katarit dhe ministri i Jashtëm Mohammed bin Abdulrahman Al Thani tha më 15 janar se falë ndërmjetësimit të Egjiptit, Katarit dhe Shteteve të Bashkuara, Izraeli dhe Hamasi kishin arritur një marrëveshje për të mbajtur një armëpushim në Gaza dhe për të liruar pengjet e mbajtur në enklavë.

Gjatë fazës së parë 42-ditore të marrëveshjes, Hamasi do të lirojë 33 pengje në këmbim të të burgosurve palestinezë nga paraburgimi izraelit. Armëpushimi hyri në fuqi më 19 janar.

Presidenti rus, Vladimir Putin ka deklaruar se Ministria e Jashtme ruse garanton ndërveprimin e vendit me shumicën e botës në paqëndrueshmërinë aktuale.

“Edhe në mjedisin e sotëm të vështirë ndërkombëtar, Ministria e Jashtme ruse mbron me vendosmëri dhe në mënyrë të vazhdueshme interesat legjitime kombëtare të Rusisë, siguron bashkëpunim produktiv me shumicën e vendeve në mënyrë që të ndërtohet një rend botëror i drejtë multipolar bazuar në respektin reciprok, ligjin ndërkombëtar dhe parimet e sigurisë së barabartë dhe të pandashme”, tha Putin.

Ai uroi punonjësit dhe veteranët e Ministrisë së Jashtme të Punës Diplomatike të Rusisë. Puna e suksesshme e kryesimit të BRICS të Rusisë në vitin 2024 dhe suksesi i samitit të grupit në Kazan vërtetojnë të gjitha gjërat e përmendura, vuri në dukje presidenti rus.

Presidenti i Rumanisë, Klaus Iohannis, njoftoi se po jepte dorëheqje nga ky post.

Ky njoftim vjen teksa opozita rumune po bënte një përpjekje për ta rrëzuar atë nga posti, pasi ai qëndroi si president edhe pas vendimit të Gjykatës Kushtetuese për të anuluar zgjedhjet presidenciale, rundin e parë të të cilave e fitoi kandidati i krahut të djathtë, prorusi Calin Georgescu.

Klaus tha më 10 shkurt se ai do të largohet nga posti i presidentit pas dy ditësh.

Gjykata Kushtetuese i kishte kërkuar atij të qëndronte në postin e presidentit edhe pas mandatit të tij, që i përfundoi në mesin e dhjetorit, për shkak të anulimit të zgjedhjeve.

Gjykata Kushtetuese anuloi zgjedhjet dy ditë para se të mbahej rundi i dytë mes Georgescut dhe kandidates proevropiane, Elena Lasaconi.

Gjykata citoi dokumente shtetërore që supozohet se tregonin që Georgescu, i cili garoi si kandidat i pavarur, kishte përfituar nga një fushatë e padrejtë në rrjetet sociale, që me gjasë ishte orkestruar nga Rusia.

Moska ka mohuar se ka ndërhyrë në zgjedhjet në Rumani.

Zgjedhjet e reja presidenciale planifikohen të mbahen më 4 maj dhe nëse asnjë nga kandidatët nuk merr shumicën, rundi i dytë do të mbahet më 18 maj./REL/