Lajmet

Ministrja Nagavci tregon sukseset dhe sfidat e MASHTI-t gjatë vitit 2022

Ministrja u shpreh se i kanë kushtuar vëmendje politikave të reja në arsimin parauniversitar.

Published

3 years ago

December 29, 2022

UBT news

Ministrja e Arsimit, Shkencës, Teknologjisë dhe Inovacionit, Arbërie Nagavci, sot në konferencën e fundvitit, deklaroi se fokusi i tyre ka qenë në të gjitha nivelet e edukimit.

Ajo përmendi disa nga punët e suksesshme të kryera gjatë vitit 2022, duke filluar nga edukimi i hershëm.

“Mendoj që kemi bërë një punë të mirë me finalizimin e ligjit për edukimin e hershëm, i cili ka kaluar në lexim të parë edhe në Kuvend e i cili është një dokument tepër i rëndësishëm për zhvillimin në këtë fazë të vërtetuar tashmë që është e rëndësishme për zhvillimin e secilit individ edhe të shoqërisë në përgjithësi. Pas ligjit të ri, edukimi në moshën 5 deri në 6 vjeç gjegjësisht deri në klasën parafillore do të jetë obligativ nga shtatori i vitit 2023. Për të gjithë fëmijët tanë, duke përfshirë kështu, duke rritur domethënë në 100% në këtë moshë në edukimin parafillor”, tha ajo.

Nagavci tha se janë paraparë edhe risi tjera të rëndësishme në projektligj, me çka tha se synojnë që të rrisin përfshirjen e fëmijëve nga mosha e hershme e jo vetëm të klasave parafillore.

Ministrja e MASHTI-t u shpreh se kanë miratuar edhe udhëzuesin për ushqyeshmërinë e shëndetshme në fëmijëri të hershme. Ajo potencoi se gjatë këtij viti është rishikimi i udhëzimit administrativ për përfshirjen e fëmijëve në institucionet edukativo-arsimore.

“Vëmendje të veçantë sigurisht i se i kemi kushtuar edhe infrastrukturës fizike të nevojshme për rritjen e përfshirjes së fëmijëve në edukimin e hershëm. Këtu do të them që përveç që kemi pasur rezultate në këtë drejtim, sigurisht që është një nga pjesët apo punët më sfidues, jo vetëm deri më tani, por edhe në të ardhmen, sepse është tepër e rëndësishme që investimet që i bëjnë, të mundëson vërtet përfshirjen, rritjen e përfshirjes së fëmijëve në edukimin e hershëm, por po ashtu të mirren për bazë edhe trendët e lëvizjeve, të migrimeve të popullsisë dhe të mos investohet në objekte të mëdha siç ka ndodh deri më tani, ku shpeshherë kanë mbet edhe pa fëmijë, qofshin këto shkolla, kryesisht”, tha ajo, duke shtuar se në këtë drejtim i kanë kushtuar dhe do të jetë në fokus të tyre edhe në vitin e ardhshëm, ofrimi i mundësive për edukimin e hershëm edhe fëmijëve në zonat rurale.

Ministrja u shpreh se i kanë kushtuar vëmendje politikave të reja në arsimin parauniversitar. Ajo tha se për herë të parë është ndarë buxheti prej 1.7 milionë euro për mësimdhënësit që kanë qenë në gjendje jo të mirë shëndetësore.

Nagavci potencoi se gjatë vitit 2022 në arsimin parauniversitar janë punësuar 100 asistentë dhe se për vitin 2023 është ndarë buxheti edhe për punësimin e 300 asistentve të tjerë.

Sa i përket infrastrukturës ligjore në arsimin parauniversitar, si rezultat, Nagavci përmendi miratimin e ligjit për tekstet shkollore, i cili u votua dje në Qeveri.

Si rezulatat të rëndësishëm, Nagavci përmendi edhe Abetaren e përbashkët Kosovë-Shqipëri, e cila nga shtatori i këtij viti është përdorur nga të dyja vendet. Si sukses të MASHTI-t, ministrja përmendi fillimin e pilotimit të arsimit dual.

Nagavci ceku se në kudër të sigurimit të cilësisë në shkolla profesionale, janë certifikuar 22 kordinatorë për sigurimin e cilësisë. Ministrja tha se punë jashtëzakonisht e madhe gjatë vitit të kaluar ka qenë finalizimi i strategjisë së arsimit për vitit 2022-2026, një punë ku janë angazhuar rreth 150 spacialistë të profileve të ndryshme.

Ajo tregoi se janë planifikuar 6 milionë e gjysmë euro për digjitalizimin e shkollave.

“Ne veçse kemi filluar që të fillojmë planifikimin me fokus në këtë vit të digjitalizimi. Janë ndarë te komunat udhëzuesit, janë planifiku 6 milionë e gjysmë euro për vitin e ardhshëm për digjitalizimin e shkollave tona dhe trajtimi i kërkesave që vijnë nga komunat do të bëhet në tre mujorin e parë të vitit të ardhshëm dhe besoj fillimi i pasjisjes së shkollave me pajisjet e nevojshme, që do të shkojë paralelisht edhe me aktivitetet e tjera, si zhvillimi i kompetencave të mësimdhënësve dhe akterëve të tjerë në mënyrë që pajisjet të shfrytëzohen në mënyrën sa më efikase për të përmirësuar edhe mësimdhënien edhe mësimnxënien e nxënësve”, u shpreh ajo.

Sa i përket arsimit të lartë, ajo theksoi se dje është finalizuar dhe votuar projektligji për arsimin e lartë, me ç’rast tha se ai i sjell disa risi.

Ministrja e Arsimit tha se për vitin 2023 buxheti do të jetë për 9 milionë e 712 mijë euro më shumë sesa në vitin 2022.

Ajo përmendi edhe ndarjen e bursave për studentët e dalluar në të gjitha nivelet e studimeve. Ajo tregoi se janë ndarë 3978 bursa për studentët për studime brenda dhe jashtë vendit.

Ndër të tjera, ministrja Arbërie Nagavci si sfidë, me të cilën janë ballafaquar gjatë këtij viti përmendi verifikim e diplomave të institucioneve të arsimit të lartë.

Lajmet

28 Nëntori pa kufij – Nga Shqipëria në Kosovë

Published

2 days ago

November 28, 2025

UBTnews

28 Nëntori është data që bashkon shqiptarët kudo në botë, pa kufij e pa dallime. Është data kur historia shqiptare merr frymë më fort dhe ku kujtesa kombëtare ndizet si një flakadan që udhëheq brezat e rinj.

Në këtë ditë, 113 vjet më parë, Shqipëria shpalli pavarësinë e saj. Ismail Qemali ishte në krye të procesit të shpalljes së pavarësisë. Dhe kreu i qeverisë së parë. Por, hija e trojeve shqiptare që mbetën jashtë kufijve ishte aty. Si shpresë dhe si mungesë.

Hija e Kosovës, gjithsesi!

E për Kosovën kjo datë ka peshë të dyfishtë – lidhet me dy momente të shenjta të historisë shqiptare.

Në këtë datë historike lindi një nga figurat më të mëdha të rezistencës kosovare, Adem Jashari. Ndërsa Prekazi i asaj kohe të vitit 1955 ishte një fshat i thjeshtë, pastaj duke kaluar në vitet e errëta të represionit, heroi Adem Jashari u bë një simboli i lirisë, zëri i qëndresës dhe zemra e Ushtrisë Çlirimtare të Kosovës (UÇK). Jeta dhe sakrifica e tij padyshim është shndërruar në betim për një popull të tërë.

Historia e familjes Jashari, ishte sakrifica e kthyer në një kapitull të rrugës drejt lirisë për Kosovën.

Po në këtë datë, kur frika ishte më e madhe, kur shumëkush nuk fliste hapur, dalja e Ushtrisë Çlirimtare të Kosovës për herë të parë publikisht, tregoi se Kosova nuk do qëndronte më e heshtur. Më figurat e Mujë Krasniqit, Daut Haradinajt e Rexhep Selimit, UÇK doli nga hija po me këtë datë, më 28 nëntor, si një mesazh që flamuri kuq e zi nuk valëvitej vetëm për Shqipëri, ai do rritej edhe në Kosovë, në zemrat e të gjithë shqiptarëve të Kosovës që ishin të vendosur të mos dorëzohen.

Pra, në këtë ditë, më 28 nëntor 1997, për shumë shqiptarë rezistenca nuk ishte e shpërndarë dhe e paorganizuar, ndërsa sot dalja e parë e UÇK-së kujtohet si një nga momentet më të rëndësishme të viteve ‘90. Ky moment mbetet i gdhendur në kujtesën kolektive si nisja e një etape drejt një Kosove të lirë.

Kështu, 28 nëntori për Kosovën nuk është vetëm festa e Flamurit, ajo është data kur gjaku, historia dhe identiteti kombëtar bashkohen në një. Është dita kur kujtojmë rrënjët tona, por edhe betejat e reja. Një datë e cila na rikujton se liria nuk ishte dhuratë, por amanet i hershëm. Një datë, në të cilën gjenerata të tëra festojnë lirshëm, gjithnjë duke kujtuar deceniet me radhë kur nuk mund të festohej haptazi, kur flamuri shqiptar ishte i ndaluar, kur për një “fjalë Shqipërie” mbusheshin burgjet me të rinj e të reja shqiptare.

Falë Adem Jasharit, falë UÇK-së, falë të gjitha lëvizjeve kombëtare shqiptare, të të gjitha kohërave – 28 Nëntori mbetet një ditë ku Shqipëria dhe Kosova bëhen një./UBTNews

lajme

UBT uron 28 Nëntorin – Ditën e Flamurit dhe Pavarësisë

Published

2 days ago

November 28, 2025

Driton Iseni

Rektori i UBT-së, Prof. Dr. Edmond Hajrizi, ka uruar studentët, pedagogët dhe gjithë bashkëkombësit shqiptarë për 28 Nëntorin, Ditën e Flamurit dhe të Pavarësisë së Shqipërisë.

Në mesazhin e tij, Rektori Hajrizi thekson rëndësinë historike të kësaj dite: ngritjen e flamurit kuq e zi mbi Kështjellën e Krujës nga Skënderbeu dhe shpalljen e Pavarësisë së Shqipërisë më 28 nëntor 1912 në Vlorë, si shenjë të qëndresës, sakrificës dhe ëndrrës për liri që çdo shqiptar e mban në zemër.

Ai nënvizon se kjo ditë nuk është vetëm një kujtesë historike, por edhe një thirrje për të ndërtuar të ardhmen. “Është përgjegjësia jonë të kultivojmë dijen, të zhvillojmë talentet dhe të edukojmë brezat e rinj që ata të jenë trashëgimtarët dinjitozë të këtij kombi,” thekson Rektori Hajrizi.

UBT beson se arsimi është flaka që do të ndezë Nëntorin e Tretë të kombit tonë – një Nëntor i dijes, i punës dhe i përkushtimit të rinisë. Të rinjtë janë fuqia që do të ruajë gjuhën, identitetin dhe vlerat kombëtare, duke ndërtuar një shoqëri të drejtë dhe të suksesshme.

Gëzuar 28 Nëntorin!

Lajmet

Kuvendi i Prishtinës diskuton në seancë të jashtëzakonshme për bllokadën e buxhetit

Published

3 days ago

November 27, 2025

UBTnews

Kuvendi Komunal i Prishtinës është mbledhur në seancë të jashtëzakonshme ku kryetari Përparim Rama ka kërkuar që të bëhet bartja e mjeteve në vlerë 28 milionë euro dhe votimin e buxhetit 2026.

Por asamblistët e VV-së kanë thënë se gjithë bllokimi i Prishtinës ka ndodhur për shkak të kryetarit.

“Urime të gjithë asamblistëve që janë zgjedhur dhe falënderim për ata që e kanë përfunduar, katër vite kanë qenë të rëndësishme dhe vendimtare te kryeqytetit. Edhe sot jemi në këtë seancë në shërbim të interesit publik. Para nesh kemi bartjen e mjeteve në vlerë 28 milionë euro dhe votimin e buxhetit për vitin 2026-të prioritet absolut janë qytetarët e kryeqyteti. Fondet do të shfrytëzohen menjëherë për pagat e punëtorëve dhe për shërbimet e kryeqytetit. Kërkojë edhe 35 milionë euro te cilat u takojnë qytetarëve me ligj duhet vullnet për miratim nga ministri i financave. Ju falënderoj për përgjegjësinë dhe zotohem para jush se do të jem i pranishëm në çdo veprim, nuk e mbrojmë interesin partiak po të qytetarëve”, tha ai.

Asamblisti i VV-së, Gëzim Sveçla i tha Ramës së i bakretuar ke ardh e me turp do të përfundosh.

“Jemi këtu sepse kryeqyteti është futur në krizën më të rëndë të menaxhimit jemi këtu sepse qyteti është bllokuar qytetarët kanë mbetur pa paga dhe autobusët janë ndalur dhe kryetari ka dërguar situatën në zero. Vetëm kur punëtorët e trafikut dolën në rrugë atëherë e kuptoj se bartja e mjeteve nuk bëhet në studio televizive por në kuvendin komunal. Kriza i duhet Përparim Ramës dhe LDK e përdori këtë strategji për fushatën lokale tash dëshiron ta përdor edhe për zgjedhjet lokale. Kur buxheti është miratuar ligji thotë komuna funksion me 1/12 te buxhetit paraprakë. Është e qartë se fajtori pse u vonua buxheti i Prishtinës është Përparim Rama, ai shpik miq imagjinar, shpik bllokada, u tha qytetarëve që Qeveria ua ka bllokuar mjete është gënjeshtër vetëm në nëntor dy alokime, për çfarë bllokade po flet, çerdhe i ke lënë pa rryme. Përparimi nuk është vetëm menaxher i keq është edhe borxhli i keq borxh operatorëve ekonomik, për rryme e për gjithçka derisa ka qenë Londër pasojat i ka bartur vetë. Kur zihen punët del merresh me emra të veçantë të VV-së të njëjtin njerëz për të cilët votove ne nuk kemi ndryshuar ti ke ndryshuar, nuk ka pasur parime kurrë. E din shumë mirë cka na ke thënë për LDK, për Lumir Abdixhikun”, tha ai.

Ndërsa Leutrim Retkoceri nga PDK ka thënë se ndërprerja e autobusëve rëndon më shumë jetën e qytetarëve.

“Mbledhja e jashtëzakonshme po zhvillohet në një kohë ku krizat financiare në Prishtinë po thellohen dhe po bëhet gjithnjë më serioze. Në një kohë kur ka rritje të çmimeve dhe kostos së shtrenjte dhe e ndërprerja e autobusëve kjo e rëndon më shumë jetën e qytetarëve të Prishtinës. PDK do të votojë në këtë seancë, ndëshkimi i një qyteti të tërë për shkak të mos arritjes objektive politike nuk ka vend në qeverisje dhe nuk duhet të tolerohet” , tha ai./EO

Lajmet

Ndërpritet greva pas lëshimit të mjeteve financiare për RTK-në

Published

3 days ago

November 27, 2025

UBTnews

Sindikata e Punëtorëve të RTK-së SPERTK njofton për ndërprerjen e grevës pas zhbllokimit të situatës me buxhetin e RTK-së dhe krijimin e mundësisë për adresimin e çështjeve të mbetura, që ndikojnë drejtpërdrejt në funksionimin e transmetuesit publik.

Pas protestave dhe grevës katërditore të zhvilluara nga punëtorët e RTK-së, Qeveria e Kosovës ka ndarë mjetet për pagat e punonjësve të RTK-së, raporton KosovaPress.

Sindikata thotë se punëtorët e RTK-së gjatë gjithë kësaj periudhe nuk kanë pasur komunikim adekuat nga ata që paguhen për sigurimin e stabilitetit të institucionit dhe pagesën e pagave, gjë që ka qenë për keqardhje dhe ka rënduar situatën, duke krijuar pasiguri dhe shqetësim të panevojshëm.

Për më tepër, sindikata falënderon Qeverinë dhe kryeministrin në detyrë për ndërmarrjen e hapave që çuan në zhbllokimin e situatës me buxhetin, si një veprim i domosdoshëm për stabilitetin e institucionit dhe ruajtjen e misionit të RTK-së si transmetues publik.

SPERTK përkujton se nëse gjatë janarit 2026 hasim sërish në situata të tilla, greva mund të rikthehet menjëherë dhe në çdo formë të nevojshme./KP