Lajmet

Ministria për Komunitete dhe Kthim s’arrin ta rikthejë faqen e saj të hakuar në Facebook

Published

on

Ministria për Komunitete dhe Kthim në Qeverinë e Kosovës, e udhëhequr nga Nenad Rashiq, nuk ka arritur ende ta rikthejë faqen e saj në Facebook, tri ditë pasi iu hakua.

Njësia Nacionale për Siguri Kibernetike (KOS-CERT) nuk i është përgjigjur pyetjeve të Radios Evropa e Lirë (REL) nëse është njoftuar se faqja në Facebook e institucionit të Qeverisë së Kosovës është hakuar më 4 shkurt, pse nuk është rikthyer as tri ditë më vonë dhe nëse ky incident online mund të ketë pasoja për informacionet apo dokumentet e Ministrisë për Komunitete dhe Kthim.

Kjo faqe ndiqet nga mbi 2.000 njerëz, dhe kryesisht publikon aktivitetet e Ministrisë së lartpërmendur.

REL-i e ka kontaktuar edhe ministrin Rashiq për ta pyetur se si institucionet kompetente nuk kanë mundur ta rikthejnë faqen në Facebook të institucionit të Qeverisë së Kosovës për tri ditë dhe nëse ai ka ndonjë informacion se kush e ka kryer sulmin kibernetik dhe për çfarë motivi, por nuk mori përgjigje.

Ndërkaq, ministri Rashiq në llogarinë e tij personale në Facebook tha se nuk është i befasuar, sepse “e di se me kë kemi të bëjmë”.

Nga ana tjetër, në tri ditët e fundit, faqja në Facebook e Ministrisë për Komunitete dhe Kthim ka bërë një sërë postimesh nga persona që e kanë hakuar profilin më 4 shkurt, kur u njoftua se “nga ky moment do të fillojë raportimi objektiv për abuzime, makinacione dhe forma të tjera të veprimtarisë së paligjshme brenda së njëjtës Ministri në dy vjetët e fundit”.

Në të njëjtën ditë, ministri Rashiq njoftoi se faqja në Facebook e Ministrisë që ai drejton ishte hakuar dhe u bëri thirrje të gjithëve që “t’i vlerësojnë postimet e mëtejshme nga ai profil si plotësisht të rrejshme”.

Ndërkohë, më 7 shkurt u publikua një video, ku gjoja shihet ministri Rashiq “duke bërë listat e atyre që nuk lejohen të kalojnë”, gjegjësisht marrin ndihmë nga Ministria për Komunitete dhe Kthim.

Një ditë më parë, më 6 shkurt, u publikua një “letër” e një person i quajtur Jovica Çukaloviq, drejtuar Nenad Rashiqit, ku thuhej se ai refuzon ofertën për t’u përfshirë politikisht në partinë e tij Për Liri, Drejtësi dhe Mbijetesë dhe se “ndërpret bashkëpunimin për shkak të manipulimeve politike”.

Rashiq garon në zgjedhjet parlamentare të 9 shkurtit me partinë e tij Për Liri, Drejtësi dhe Mbijetesë.

Përveç tij, partitë tjera politike serbe që marrin pjesë në këto zgjedhje janë, Lista Serbe, Demokracia Serbe, Partia e Serbëve të Kosovës, Lëvizja Popullore Serbe dhe Nisma Qytetare Drejtësia Popullore.

Lideri i Demokracisë Serbe, Aleksandar Arsenijeviq, e ka akuzuar partinë e Nenad Rashiqit për “blerje të votave me fondet e Qeverisë së Kosovës”, pra për shpërndarjen e teknikës së bardhë dhe subvencione bujqësore gjatë fushatës zgjedhore.

Në një deklaratë për Radion Evropa e Lirë, Rashiq i ka mohuar këto akuza, duke shtuar se këto janë “programe të rregullta” të Ministrisë për Komunitete dhe Kthim.

Kur u pyet nëse Ministria që ai drejton aktualisht shpërndan teknikë të bardhë, Rashiq u përgjigj: “Me sa di unë, jo”.

Megjithatë, ai nuk ka mundur të shpjegojë se si dhe kur është bërë video-incizimi, në të cilën mund të shihet dhe dëgjohet përpilimi i listave nëpër zyrat e partisë për këtë lloj ndihme për qytetarët.

Edhe Lista Serbe u përball me akuza për “blerje votash”. Kundërshtarët e tyre politikë pohuan se në vend që të shkojnë në Shërbimin Kombëtar të Punësimit të Republikës së Serbisë, pjesëtarët e komunitetit serb në Kosovë dërgohen në zyrat e partisë së Listës Serbe për të “bërë lista” për të marrë 20.000 dinarët e ndihmës që shteti serb kishte premtuar për 5.000 të papunë.

Kjo ndihmë është dhënë në bazë të një vendimi të Qeverisë së Serbisë, i cili pasoi pasi u prezantua në opinion në shtator të vitit të kaluar nga vetë presidenti serb Aleksandar Vuçiq, për shkak të mbylljes së institucioneve që veprojnë në Kosovë në kuadër të sistemit serb./REL/

Rajoni

Rektori Hajrizi: Studentët e UBT-së, të gatshëm për tregun global të punës

Published

on

UBT ka dëshmuar se është institucioni lider në arsim, shkencë dhe inovacion në Kosovë e rajon, duke nxjerrë kuadro profesionale që sot kontribuojnë në kompani e industri të nivelit botëror. Në një intervistë në FIVE të Dukagjinit, Rektori i UBT-së, Prof. Dr. Edmond Hajrizi, thekson se përmes programeve moderne dhe industrive të krijuara brenda institucionit, studentët përgatiten jo vetëm për tregun e punës vendor, por edhe për atë global.

“Ne prodhojmë 400 arkitektë në vit, dhe nuk është se ka aq kompani vendore për t’i absorbuar. Ata punojnë për kompani globale. Po ashtu, ne përgatisim 1.000 programerë çdo vit, dhe kërkesa nuk është vetëm në Kosovë. Janë të mjaftueshme për tregun vendor, por ka kërkesa edhe në nivel botëror”, tha Rektori Hajrizi.

Ai nënvizoi se UBT ka arritur të harmonizojë kërkesat e tregut të punës me programet akademike, duke krijuar kushte që studentët të kenë qasje në teknologjitë më të reja, sikurse universitetet dhe industritë më të zhvilluara të botës.

“Studenti ynë ka mundësi të mësojë e të punojë me teknologjitë më të fundit, njësoj sikur studentët e universiteteve elitare në botë. Ne kemi krijuar edhe industri të brendshme, kompani ku studentët përjetojnë të gjithë ciklin organizativ të teknologjive dhe të kompanive moderne, në mënyrë që kur të dalin në treg të jenë të gatshëm menjëherë”, u shpreh Rektori.

Ai veçoi si shembull programet e arkitekturës dhe urbanizmit, ku studentët përgatiten me koncepte moderne të projektimit, por edhe fushën e “smart cities”, ku UBT është shembull ndërkombëtar për ndërtimin e qyteteve të mençura.

“Smart cities janë e ardhmja e qyteteve dhe e organizimit modern. Ne kemi treguar se edhe nga Kosova mund të ndërtohen modele të tilla të suksesshme. Nuk ka teknologji që e gjen në Amerikë, Gjermani apo Japoni, e që nuk mund ta hasësh edhe në UBT”, theksoi Hajrizi.

Duke folur për rolin e UBT-së në rajon, Rektori nënvizoi se institucioni ka qenë gjithmonë pararojë me programe unike dhe inovative, duke filluar që nga viti 2001 me menaxhimin inxhinierik, mekatronikën dhe më pas me teknologjitë e reja.

“Besoj se për Ballkanin gjithmonë kemi qenë një lloj lidershipi. Ne kemi qenë të parët që kemi hapur programe moderne, kemi krijuar qendra kërkimore dhe jemi pozicionuar ndërkombëtarisht, nga Londra, Vjena, deri në Finlandë. Ky është tregues se UBT është institucion proaktiv dhe inovativ në nivel global”, theksoi ai.

Në fund, Rektori Hajrizi potencoi se studentët e UBT-së nuk duhet të kenë kompleks inferioriteti, sepse tashmë kanë dëshmuar se janë të barabartë, madje shpesh më të mirë se bashkëmoshatarët e tyre në universitete ndërkombëtare.

“Shumë prej tyre sot punojnë në Zvicër, Gjermani, Amerikë, e më gjerë, duke kontribuar në zhvillime globale. Ky është konfirmim se UBT po udhëheq në Ballkan, duke prodhuar dije e kuadro të nivelit botëror”, përfundoi Rektori Hajrizi.

Continue Reading

Vendi

Në UBT Ferizaj u organizua sesioni informues për bursën prestigjioze Chevening Scholarship

Published

on

UBT Ferizaj ishte mikpritës i një sesioni të veçantë informues për bursën prestigjioze Chevening Scholarship, me pjesëmarrjen e përfaqësuesve të Ambasadës Britanike në Kosovë, në bashkëpunim me Chevening Alumni Foundation in Kosovo.

Gjatë këtij aktiviteti, studentët e UBT-së në Ferizaj u njohën me procesin e aplikimit, kriteret e përzgjedhjes dhe afatet e rëndësishme, si dhe morën këshilla praktike për një aplikim të suksesshëm.

Ky aktivitet synoi të nxisë interesimin e studentëve për të aplikuar në bursën Chevening dhe të ofronte njohuri të thelluara mbi mundësitë që kjo bursë ofron pas përfundimit të studimeve, si zhvillimi i aftësive profesionale dhe krijimi i perspektivave të reja karrierike.

Continue Reading

Lajmet

Kosova e Turqia vazhdojnë bashkëpunimin në fushën e mbrojtjes

Published

on

By

Komandanti i Forcës së Sigurisë së Kosovës, gjenerallejtënant Bashkim Jashari, ka pritur sot në takim shefin e Mbrojtjes së Turqisë, gjeneral Selçuk Bayraktaroğlu, me të cilin ka biseduar për zgjerimin e bashkëpunimit në fushat e trajnimeve, edukimit dhe mbështetjes në ngritjen e kapaciteteve ushtarake të FSK-së.

Jashari me këtë rast falënderoi Bayraktaroğlu për mbështetjen e vazhdueshme që Turqia i ka dhënë FSK-së në ngritjen e kapaciteteve profesionale, raporton KosovaPress.

Ndërsa, shefi i Mbrojtjes së Turqisë ri-konfirmoi përkushtimin e vendit të tij për të vazhduar dhe thelluar bashkëpunimin me FSK-në, duke vlerësuar lart zhvillimin dhe profesionalizmin e ushtrisë së Kosovës.

Të dy gjeneralët u pajtuan për vazhdimin e zgjerimit të mëtutjeshëm të bashkëpunimit bilateral në fushën e mbrojtjes, thuhet në njoftimin e FSK-së./D.B/KP

Continue Reading

Lajmet

UBT dhe AMIK nisin projektin “Inkuadrimi i Vajzave në Ndërmarrësi” me trajnimin e parë

Published

on

Në ambientet e Parkut Shkencor, Inovativ dhe Teknologjik të UBT-së u zhvillua hapja e projektit “Inkuadrimi i Vajzave në Ndërmarrësi”, një iniciativë e organizuar nga UBT në bashkëpunim me AMIK – Asociacioni i Institucioneve Mikrofinanciare të Kosovës.

Ky aktivitet ka për qëllim fuqizimin e vajzave dhe grave të reja përmes ofrimit të njohurive praktike, mentorimit dhe krijimit të mundësive të reja për angazhim në botën e ndërmarrësisë. Pjesëmarrëset do të pajisen me shkathtësi të rëndësishme për të ndërmarrë iniciativa profesionale dhe për të kontribuar në zhvillimin ekonomik dhe social të vendit, duke rritur mundësitë e tyre për punësim, krijim të bizneseve të vogla dhe inovacion.

Në hapje të aktivitetit, u theksua rëndësia e partneritetit mes institucioneve akademike dhe sektorit financiar për mbështetjen e gjeneratës së re të sipërmarrësve.

Rektori i UBT-së, Prof. Dr. Edmond Hajrizi, vuri në pah se projektet e tilla janë të nevojshme për të krijuar një platformë të qëndrueshme për ndërmarrësi dhe zhvillim ekonomik në nivel vendi, dhe se bashkëpunimi me sektorin financiar dhe organizatat që mbështesin inovacionin është kyç për suksesin e vajzave të reja.

Zëvendësguvernatorja e Bankës Qendrore të Kosovës, Nesrin Shileku-Shala, i inkurajoi pjesëmarrëset duke theksuar rëndësinë e edukimit financiar, planifikimit dhe guximit për të ndërmarrë iniciativa të reja, duke u bërë modele suksesi për komunitetet e tyre.

Drejtori i Bordit të AMIK, Adrian Alo, theksoi se fuqizimi i vajzave përmes projekteve të ndërmarrësisë kontribuon në stabilitetin ekonomik dhe përfshirjen sociale, duke nxitur edhe zhvillimin e sektorit mikrofinanciar dhe inovacionin në vend.

Përfaqësuesi i AMIK, Prof. Shpresim Vranovci, nënvizoi rëndësinë e mentorimit dhe krijimit të rrjetit të kontakteve për pjesëmarrëset, si një element kyç për arritjen e suksesit profesional dhe zhvillimin e projekteve të reja sipërmarrëse.

Ndërsa, Drejtori i Departamentit për Edukim dhe Zhvillim Profesional në UBT, Prof. Dr. Besnik Skenderi, theksoi se institucioni mbetet i përkushtuar të ofrojë platforma praktike për zhvillimin e studentëve dhe të rinjve, duke i lidhur ata me sektorët strategjikë të ekonomisë dhe aktorë që kontribuojnë drejtpërdrejt në krijimin e mundësive të reja për punësim, ndërmarrësi dhe inovacion.

Ky projekt shënon një hap të rëndësishëm drejt përfshirjes së vajzave dhe grave në ekonominë inovative dhe ndërmarrëse të vendit, duke nxitur një kulturë të barazisë, sipërmarrësisë dhe zhvillimit të qëndrueshëm ekonomik dhe social.

Continue Reading

Të kërkuara