Lajmet

24 mars 1999: NATO filloi sulmet ajrore kundër forcave serbe

Published

8 months ago

on

Mbrëmjen e 24 marsit të vitit 1999, Aleanca Veriatlantike filloi sulmet kundër forcave serbe, në Serbi, në Mal të Zi e në Kosovë.

Ishte natë e gjatë gëzimi për shqiptarët, sepse po fillonte të shihej drita në fund të tunelit. Por, ishin 78 ditë të mbushura me luftë të përgjakshme të UÇK-së kundër forcave serbe në tokë, sulme nga qielli të aeroplanëve të NATO-s, por në terren vazhduan masakra e tmerre mbi popullatën civile shqiptare.

Por, në natyrën e rubrikës sonë, të lë shohim ngjarjet që shënuan këtë ditë, deri në fillimin e bombardimeve, në mbrëmje:

 Edicioni i parë: Dështon misioni i Hollbrukut – Solana i jep urdhër gjeneralit Klark për aksione mbi caqet ushtarake serbe

Misionari amerikan Riçard Hollbruk u kthye dje në orët e vona në Bruksel dhe e njoftoi sekretarin e përgjithshëm të NATO-s, Havier Solana, për mossukesin e misionit të tij për të bindur Millosheviqin që të pranojë planin për Kosovën, të propozuar nga Grupi i Kontaktit.

Po mbrëmë, në orën 23:15, në një brifing me gazetarë, Solana tha se i kishte dhënë urdhër kryekomandantit të forcave të NATO-s për Evropë, gjeneralit Ueslli Klark, që të ndërmarrë sulme kundër caqeve ushtarake të Jugosllavisë së vetëshpallur.

Në të njëjtën kohë, me urdhër të presidentit Jelcin, kryeministri rus, Jevgenij Primakov, ka hequr dorë nga vizita në Uashington dhe është kthyer në gjysmë të rrugës, mbi Atlantik. Kështu, ai shprehu mospajtimin e Rusisë me sulmet e NATO-s ndaj caqeve ushtarake serbe.

Ndërkohë, mediat shtetërore serbe transmetuan deklaratat e zyrtarëve serbë se assesi nuk do të pranojnë vendosjen e trupave të NATO-s në Kosovë, dhe se do të mbrohen me të gjitha mjetet nga sulmet eventuale të NATO-s.

Ndërsa nga terreni njoftohet se forcat serbe kanë bartur gjatë natës tërë armatimin dhe mjetet luftarake dhe i kanë strehuar nëpër vendbanime civile. Duket se objektet ushtarake që mund të jenë cak i sulmeve të aeroplanëve të Aleancës Veriatlantike janë zbrazur.

 

Lajme të tjera:

Digjen shtëpitë në një lagje të Podujevës – koncentrim i madh forcash dhe zhvendosje e popullatës;

Vushtrri: Lëvizje të mëdha të forcave serbe, granatime drejt Pasomës dhe fshatrave të Vushtrrisë;

Një konvoj i forcave serbe shkoi rreth orës 7 në drejtim të fshatit Karaçë;

Kaçanik: Granatime në fshatrat e Kaçanikut, djegie shtëpishë në Gajre;

Forcat serbe po granatojnë disa fshatra të Deçanit e të Dushkajës së Gjakovës;

Një shtëpi shqiptare në Zajm u qëllua me minahedhës dhe automatik.

 

 

Lajm i plotë: Njoftohen emrat e shtatë shqiptarëve të vrarë të hënën në Suharekë

KI i Degës së LDK-së në Suharekë ka njoftuar emrat e shtatë shqiptarëve që u vranë gjatë një aksioni të forcave serbe pardje në qendër të këtij qyteti,

Pas vrasjes së një serbi në rrethana e nga autorë të panjohur, snajperistët serbë shtinë pa kontroll dhe me këtë rast vranë Emërllah Hoxhën (70), Mehmet Emërllah Hoxhën (33), të dy nga Peqani, Naser Abdyl Bytyçi (33) nga Suhareka, Xhemajl Haxhi Morina (35) nga Reshtani, Ramadan Morina (48) nga Reshtani, Fadil Haxhi Bytyçi nga Suhareka dhe Bislim Miftar Morina nga Reshtani.

Po gjatë këtij aksioni forcat serbe dogjën një shtëpi.

 

Lajme të tjera:

Mbi fshatin Sllatinë përforcime të mëdha të forcave ushtarake-policore serbe

Në fshatin Barilevë janë djegur 14, kurse janë demoluar dhe plaçkitur rreth 200 shtëpi

Zhbllokohet rruga Prishtinë-Podujevë

 

 

Edicioni i dytë:

Lajm i plotë: Gjendje dramatike në komunën e Vushtrrisë

Një gjendje dramatike ka përfshirë sot në mesditë komunën e

Vushtrrisë, ndërsa në qytet ka vërshuar një lum i madh i popullsisë së zhvendosur.

Komisioni për Informim i Degës së LDK-së në Vushtrri njofton se forcat serbe hynë rreth mesditës në fshatin Studime e Poshtme dhe kanë filluar të djegin shumë shtëpi. Banorët e këtij fshati, i cili gjendet afër Vushtrrisë, kanë mësyrë qytetin. Zhvendosje të mëdha të popullsisë ka edhe nga Begaj, Pasoma, Banjska, Smrekonica e fshatrat tjera. Dega e LDK-së në Vushtrri është mobilizuar për strehimin e të zhvendosurve. Njoftohet se të zhvendosurit do të strehohen në xhamitë dhe në shkollat e qytetit.

I njëjti burim bën të ditur se sot, rreth orës 9:00, në oborrin e burgut në Srekonicë kanë rënë 4 granata, që dyshohet të jenë shkrepur nga pozicionet e forcave serbe në fshatin Banjskë. Sipas dëshmitarëve, viktima në njerëz nuk ka pasur.

 

 

Lajm i plotë: Mitrovicë: Granatime në fshatrat e Shalës, dy të plagosur në lagjen Bair

Edhe sot në mesditë forcat serbe po vazhdojnë granatimin e fshatrave të Shalës së Bajgorës, njofton Komisioni për Informim i Degës së LDK-së në Mitrovicë.

I njëjti burim bën të ditur se mbrëmë, rreth orës 19:30, persona të paidentifikuar kanë shtënë me automatik në kafenenë “Te Meda”, në lagjen “Bair” të Mitrovicës, me ç’ rast janë plagosur lehtë Hamdi (Hajrë) Kuqi (36) e Muhedin (Ramadan) Mikulani (42), banorë të kësaj lagjeje.

Burimi bën të ditur se është bërë identifikimi edhe i dy shqiptarëve të ekzekutuar në Skënderaj. Këta janë: Ilaz (Osman) Oruçi (42) nga Rezalla dhe Sadri (Zenel) Goshani (45) nga Polluzha e Skënderajt.

Nga Mitrovica njoftohet edhe për lëvizje të mëdha të forcave serbe. Sot, rreth orës 8:15, nga Mitrovica në drejtim të Skënderajt kanë shkuar 10 automjete me ushtarë, ndërsa në orën 9:40, në të nëjtin drejtim shkuan edhe 12 automjete me policë.

Burimet thonë se policët serbë kanë urdhëruar familjen Dr. Sami Beqirit të ndjerë që ta braktisë shtëpinë dhe në të janë vendosur forcat ushtarake e policore serbe.

 

Lajm i plotë: Forcat serbe po mitralojnë disa fshatra të Malishevës

Edhe sot forcat serbe kanë mitraluar disa fshatra të komunës së Malishevës. Komisioni për Informim i Degës së LDK-së të Malishevës bën të ditur se forcat serbe po mitralojnë nga Malisheva, Llazica e Smonica (përballë Tërpezës) fshatrat Tërpezë, Lladrovc, Carrallugë, Mleçan e Balinc. Lumi i banorëve të zhvendosur nga këto fshatra, të cilët kanë mësyrë zona më të qeta, është shumë i gjatë.

I njëjti burim bën të ditur se dje, prej orës 14:00 deri në orën 17:00, ka pasur luftime ndërmjet forcave të UÇK-së dhe forcave serbe në rrethinën e Rahovecit. Në njoftim thuhet se forcat serbe kanë sulmuar pozicionet e UÇK-së në fshatrat Reti e Opterushë të Rahovecit dhe në fshatin Shkozë të Malishevës, ndërsa njësitet e UÇK-së u janë përgjigjur këtyre sulmeve. Bëhet e ditur se gjatë këtyre luftimeve nuk ka pasur viktima.

 

Lajm i plotë: “Jugosllavia” shpallë gjendjen e jashtëzakonshme

Kryeministri i “Jugosllavisë” ka shpallur mbrëmë gjendje të jashtëzakonshme, të cilësuar si “gjendje para rrezikut të luftës”.

Ky vendim u mor vetëm disa orë pas dështimit të Misionit të Hollbrukut dhe para deklarimit të Sollanës se e ka autorizuar gjeneralit Klark për sulme kundër caqeve ushtarake serbe.

 

Shënim: Më 24 mars 1999, në mbrëmje, filluan bombardimet e NATO-s. Deri në çlirimin e Kosovës më nuk pati mundësi pune për gazetarët në Kosovë.

 ####

Por, le të shohim edhe cilat kanë qenë zhvillimet në këtë datë, që nga viti 1993:

 

 

24 mars 1993

Lajmet kryesore:

U lirua dr. Abdyl Krasniqi;

Dega e LDK-së organizon tubim proteste Munih;

Trafiku në Kosovë pothuajse u bllokua tërërisht;

Lidhje kulturore të Shqipërisë me Gjermaninë;

Policia e arrestoi ish-oficerin e APJ-së Fadil F.Rekajn;

Gjykatë speciale për krimet në ish-Jugosllavi;

Qeveria e Shqipërisë ka përkrahjen e Fondit Monetar Ndërkombëtar.

 

 

24 mars 1994

Lajmet kryesore:

Presidenti Klinton zgjodhi edhe Shqipërinë për ndihma ushtarake;

Tubim madhështor protestues i shqiptarëve në Stokholm;

Dr. Fehmi Agani: S’ka përçarje midis partive politike shqiptare;

Kryetari i Partisë Republikane të Kosovës u dërgua në burgun e Pejës;

Një i ri nga Suhareka u dërgua me dhunë në ushtrinë serbe;

Policia serbe hyri në zyrën e Degës së LDK-së në Kodrën e Trimave;

Demonstrata paqësore në Gjermani kundër kthimit të refugjatëve shqiptarë ;

Reagimi i Këshillit për të Drejtat e Njeriut për kthimin e refugjatëve nga Gjermania;

Protestë e Shoqatës së Gazetarëve të Kosovës;

Policia ndërpreu turneun e shahut “Kosova ’94”.

 

 

Represioni i policisë serbe në Kosovë

Mitrovicë: Sot në hyrje të Mitrovicës një patrullë e policisë serbe ndali autobusin me regjistrim të Nishit, i cili po kthehej nga Bullgaria përplotë udhëtarë. Pas legjitimimimit të udhëtarëve, policët dërguan në stacionin e policisë Bujar Xhemën, Afrim Vehapin, Safet Pecin dhe Ymer Gashin, si dhe tre udhëtarë tjerë, emrat e të cilëve nuk arritëm t’i mësojmë. Njoftohet se të arrestuarit po mbahen ende në stacionin e policisë në Mitrovicë.

Ndërkaq, dje, rreth orës 12, në stacioni e autobusëve në Mitrovicë, një patrullë e policisë serbe rrahu brutalisht vëllezërit Bashkim, Qenan, Adnan dhe Ruzhdi Ibrahimin nga Tërrnava e Preshevës. Vëllezërit Ibrahimi janë pronarë të firmës transportuese “Bashkimi”, të cilët e kanë të regjistruar vijën Preshevë-Mitrovicë dhe anasjelltas.

Vëllezërit Ibrahimi u rrahën pa kurrfarë shkaku.

Prishtinë: Parmbrëmë, rreth orës 17, në rrugën “Drenica II” në lagjen Kodra e Trimave, dy policë serbë rrahën fëmiun 13-vjeçar, Besnik Maloku, vetëm për shkak se Besniku nuk dinte të fliste serbisht.

I Istog: – Dje, organet e policisë serbe në Istog, morën në pyetje korrespodentin e “Bujkut”, Daut Blakajn. Inspektorët serbë nga

Daut Blakaj u interesuan të dinë veçanërisht rreth sistemit të informimit, si dhe rreth aktivitetit të Këshillit komunal për financim.

Më 21 mars, polica serbe mori në pyetje, Zymer Ademajn, kryetar i Nëndegës së LDK-së në Banjë, i cili u keqtrajtua psikikisht nga ana e policisë serbe.

Ndërkaq, dje inspektorët e sigurimit serb në Istog morën në pyetje dr.Sadik Bujupin nga Istogu, i cili kohë më parë kishte punuar me iniciativën e Komisionit për Shëndetësi të LDK-së.

Dje, rreth orës 11, shefi i policisë serbe në Istog, mori në pyetje edhe Hazbi Bajrajn, kryetar i Nëndegës së LDK-së në Istog. Edhe Hazbi Bajraj u mor në pyetje për shkak të kontrollimit mjekësor të nxënësve shqiptarë në Istog.

Hazbi Bajraj u lirua me kusht që të paraqitet sot sërish në stacionin e policisë në Istog në orën 8.

Po ashtu dje, organet e sigurimit serb, ftuan edhe Tush Gegajn, kryetar i Degës së SHH “Nënë Tereza” në Istog.

Lipjan: – Dje, rreth orës 5 të mëngjesit, policia serbe nën pretekst të kërkimit të armëve, bastisi familjen e Bajram Ollurit në fshatin Krojmir të Lipjanit. Familja e Bajram Ollurit është bastisur edhe gjatë vitit të kaluar, ndërsa edhe tash nga ai kërkohet që të dorëzojë një revole. Gjatë bastisjes, policia serbe u soll me vandalizëm duke thyer e demoluar shumë orendi. Pas bastisjes, policia mori me vete djalin e Bajramit, Heset Ollurin, të cilin e futën në bagazh të veturës dhe e dërguan në stacionin e policisë në Lipjan, me ç’rast u rrah brutalisht.

Klinë: – Më 21 mars, policia serbe i la ftesën që të paraqitet në stacionin e policisë në Klinë, Tahir Terdevajt nga Kërrnica. Pasi Tahiri të nesërmen u paraqit në polici, ai menjëherë u dërgua në Pejë.

Më 18 mars, disa policë serbë ishin mysafirë në familjen e Avdyl H.Asllanajt në Cerovik të Klinës. Njoftohet se Abdyl H.Asllanaj është bashkëpunëtor i okupatorit serb, ndërkaq në shtëpinë e tij policët ndejtën rreth katër orë.

Viti: Dje, në fhsatin Goshicë të Vitisë, policia serbe ia konfiskoi Sami Ahmetit një revole.

 

 

24 mars 1995

Lajmet kryesore:

Konferencë për gazetarë e presidentit të Republikës së Kosovës dr. Ibrahim Rugova;

U shënua numri jubilar i Informatorit ditor të QIK-ut;

Bota po e teston vendosmërinë tonë për pavarësi;

Kosova në hartat e mbrojtjes së Evropës;

Në Parlamentin e Norvegjisë u themelua Komiteti për Kosovën;

Protesta për pavarësinë e Kosovës organizohen edhe në Danimarkë;

Shkrimtarët shqiptarë në sallonet e librit në Paris;

Në Han të Elezit policia serbe bastisi dhe plaçkiti disa familje shqiptare;

Në Han të Elezit shpërndahen thirrje për shërbim ushtarak;

Filloi procesi kundër vrasësit të Z. Rashitit;

Papa: Tragjedia e Bosnjës dhe Kroacisë rrezikon tërë Evropën Juglindore;

Greqia pranon takimet direkte me Maqedoninë;

Asociacionet e rinisë së Kosovës organizojnë tubim me rastin e “Javës së aksionit evropian kundër racizimit”;

Dr. Kadrush Berisha u dënua me 20 ditë burg;

Policia ndërhyri sërish në SHM ” Muharrem Bekteshi” në Vushtrri;

Në Dragash u arrestuan dy të rinjë që kanë dezertuar nga ish-armata jugosllave;

Vazhdon dhuna e policisë serbe kundër banorëve shqiptarë në Grejkovc të Suharekës.

 

Një qytetar rom hodhi gruan dhe tre fëmijët e tij në ujërat e liqenit të Batllavës

Më 21 mars në Orllan ndodhi një tragjedi e rëndë familjare. Një qytetar rom, i vendosur në Beograd, i cili më parë ka jetuar në fshatin Sfeqël të Podujevës, për shkaqe tash për tash të panjohura, në ujërat e liqenit të Batllavës hodhi gruan dhe tre fëmijët e tij. Njëri nga fëmijët humbi jetën në ujërat e liqenit, ndërsa dy fëmijët dhe bashkëshortja e tij janë në gjendje të rëndë dhe gjenden të shtrirë në shok dhomë, në spitalin e Prishtinës. Kryesi i kësaj vepre ndodhet në arrati.

 

 

24 mars 1997

Lajmet kryesore:

UE kushtëzon Jugosllavinë e vetëshpallur me Kosovën;

Dialogu rreth Kosovës – pa kushtëzime paraprake;

Ministri shqiptar i mbrojtjes priti atasheun ushtarak të Francës;

Rigjykohen udhëheqësit e Odës Ekonomike të Kosovës;

Marrëveshje e Suedisë me Beogradin për kthimin e refugjatëve;

Kukës: 46 të plagosur nga krismat e pakontrolluara të armëve;

Pesë shqiptarë u mbytën në ujërat e Adriatikut;

“Vëllazëria Shqiptare” e Stambollit apelon për ruajtjen e Shqipërisë;

Grumbullohen ndihma për Shqipërinë;

Në Prishtinë policia serbe keqtrajtoi dhe plaçkiti një student;

Një i kthyer nga Gjermania u dënua me 20 muaj burg;

Dhuna e përditshme në Kosovë;

Në Vushtrri u mbajtën takimet tradicionale të poeteve shqiptare të Kosovës.

Related Topics:
Continue Reading

Lajmet

REL: A mund ta zhbllokojë debati për Specialen rrugën e Kosovës drejt Këshillit të Evropës?

Published

14 hours ago

on

November 10, 2026

By

Konsultimet e Kosovës me Bashkimin Evropian për ndryshimet në Ligjin për Dhomat e Specializuara mund të shërbejnë si mundësi për ta rikthyer besimin e partnerëve evropianë dhe për t’i dhënë shtysë anëtarësimit të Kosovës në Këshillin e Evropës – proces ky i bllokuar prej më shumë se dy vjetësh.

Disa njohës të çështjeve evropiane vlerësojnë se mënyra se si Kosova i trajton këto ndryshime, mund të dëshmojë përkushtimin e saj ndaj sundimit të ligjit dhe respektimit të detyrimeve ndërkombëtare – çështje me rëndësi për anëtarësimin në Këshillin e Evropës.

Kosova ishte pranë anëtarësimit në këtë organizatë në vitin 2024, por procesi ngeci për shkak të kërkesave politike të disa shteteve anëtare, kryesisht lidhur me Asociacionin e komunave me shumicë serbe.

Ndonëse konsultimet për Ligjin për Dhomat e Specializuara dhe anëtarësimi në Këshillin e Evropës janë dy procese të ndara, njohësit vlerësojnë se ato janë të lidhura politikisht.

Ramadan Ilazi, nga Qendra Kosovare për Studime të Sigurisë (QKSS), thotë se shumë prej shteteve që vendosin për anëtarësimin e Kosovës në Këshillin e Evropës, janë edhe ato që përcjellin nga afër përmbushjen e detyrimeve të saj ndërkombëtare.

Megjithatë, zgjidhja e mosmarrëveshjes me BE-në për ndryshimet ligjore nuk do të nënkuptonte automatikisht zhbllokimin e anëtarësimit.

Vendimi përfundimtar mbetet në duart e shteteve anëtare të Këshillit të Evropës, ndërsa kërkesat e tyre politike, veçanërisht ato lidhur me Asociacionin, mbeten të pazgjidhura.

Një provë për marrëdhëniet me Evropën

Më 5 nëntor, komisionarja evropiane për Zgjerim, Marta Kos, konfirmoi se Bashkimi Evropian po zhvillon bisedime me Qeverinë e Kosovës për ndryshimet në Ligjin për Dhomat e Specializuara, të njohura edhe si Gjykata Speciale.

Qeveria, megjithatë, nuk ka dhënë publikisht hollësi për këto bisedime dhe as nuk u është përgjigjur pyetjeve të Radios Evropa e Lirë për zhvillimin dhe përmbajtjen e tyre.

Kryeministri Albin Kurti, duke folur më 10 nëntor në Forumin e Paqes në Paris, nuk iu referua ndryshimeve ligjore, por tha se pakënaqësitë me aktgjykimin e Gjykatës Speciale duhet të adresohen përmes apelimit.

Ndryshimet në ligj, të iniciuara nga Partia Demokratike e Kosovës, u miratuan në Kuvend më 6 tetor, pas protestave kundër aktgjykimit dënues të shkallës së parë ndaj katër ish-krerëve të Ushtrisë Çlirimtare të Kosovës.

Më 16 shtator, Gjykata Speciale në Hagë dënoi për krime lufte ish-presidentin Hashim Thaçi dhe ish-kryeparlamentarin Jakup Krasniqi me nga 25 vjet burgim, ish-kryeparlamentarin Kadri Veseli me 18 vjet dhe ish-deputetin Rexhep Selimi me 13 vjet.

Ndryshimet ligjore synojnë, ndër të tjera, kufizimin e juridiksionit të Gjykatës Speciale dhe ndryshimin e disa dispozitave që lidhen me procedurat dhe dënimet.

BE-ja i kundërshtoi ato, duke paralajmëruar se bien ndesh me detyrimet ndërkombëtare të Kosovës dhe mund të cenojnë pavarësinë e gjykatës.

Më 22 tetor, presidentja e Kosovës Justina Shiroka Pula e ktheu ligjin në Kuvend për rishqyrtim.

Sipas Rregullores së Kuvendit, komisioni përgjegjës ka katër javë afat nga pranimi i ligjit për ta përgatitur raportin për seancë plenare.

BE-ja e mirëpriti vendimin e presidentes dhe kërkoi të konsultohej për çdo ndryshim të mëtejshëm, në përputhje me shkëmbimin e letrave të vitit 2014 ndërmjet Kosovës dhe BE-së.

Në raportin e 4 nëntorit, edhe Komisioni Evropian paralajmëroi se ndryshimet e propozuara ngrenë shqetësime serioze për detyrimet ndërkombëtare të Kosovës, pavarësinë e gjyqësorit, mbrojtjen e viktimave dhe dëshmitarëve, si dhe llogaridhënien për krimet e luftës.

Engjëllushe Morina, hulumtuese e lartë për politika në Këshillin Evropian për Marrëdhënie me Jashtë, me bazë në Berlin, paralajmëron se ndryshimet në Ligjin për Dhomat e Specializuara mund të kthehen në pengesën e radhës për Kosovën në rrugën drejt Këshillit të Evropës.

Ajo vlerëson se tani, kur Kosova ka institucione të qëndrueshme, duhet ta intensifikojë bashkëpunimin me BE-në dhe angazhimin diplomatik për integrimin evropian.

“Kosova nuk ka më kohë për të humbur. Duke pasur parasysh kontekstin politik në Evropë, gjërat po lëvizin shumë shpejt dhe viti 2027, me zgjedhje nacionale në shumë vende anëtare, mund ta ndryshojë konstelacionin politik në BE. Kjo mund të na çojë në një situatë ku Kosova do të ketë edhe më pak përkrahje”, vlerëson Morina për Radion Evropa e Lirë.

Për Ilazin, ndërkaq, konsultimet me BE-në mund të jenë një mundësi për të dëshmuar se Kosova është e gatshme t’i trajtojë shqetësimet e partnerëve evropianë përmes dialogut dhe institucioneve.

“Nëse ndryshimet bëhen në mënyrë të njëanshme, rezervat ekzistuese vetëm sa do të forcohen. Nëse kalojnë përmes konsultimeve serioze, Kosova e forcon argumentin e saj” për anëtarësim në Këshillin e Evropës, thotë ai.

Ilazi vlerëson se shqetësimet për mënyrën se si Dhomat e Specializuara e kanë administruar procesin gjyqësor janë legjitime, por se duhet të adresohen përmes dialogut dhe mekanizmave institucionalë, e jo përmes ndryshimeve të njëanshme ligjore.

Ky qëndrim u pasqyrua edhe në një deklaratë të përbashkët, të publikuar më 1 nëntor, të cilën Ilazi e nënshkroi bashkë me 20 akademikë, aktivistë dhe përfaqësues të shoqërisë civile nga Kosova dhe jashtë saj.

Në të, nënshkruesit kërkuan që shqetësimet lidhur me proceset gjyqësore në Hagë të trajtohen duke respektuar njëkohësisht të drejtat e të akuzuarve, drejtësinë për viktimat dhe detyrimet ndërkombëtare të Kosovës.

Ilazi thotë se drejtësia për viktimat nuk duhet të krijojë përshtypjen se po gjykohet vetë lufta çlirimtare, ndërsa thekson se viktimat dhe familjet e tyre, nga të gjitha komunitetet, meritojnë të vërtetën dhe llogaridhënien.

“Këto parime duhet të respektohen së bashku dhe pa diskriminim. Ky është edhe mesazhi që Kosova duhet t’i dërgojë Këshillit të Evropës”, thotë ai.

Sipas tij, trajtimi i çështjeve të ndjeshme përmes institucioneve, ekspertizës dhe dialogut do të ishte një mesazh i rëndësishëm për Strasburgun dhe kryeqytetet evropiane.

Asociacioni, pengesa që mbetet

Përtej debatit për Gjykatën Speciale, një tjetër pengesë politike vazhdon ta mbajë pezull anëtarësimin e Kosovës në Këshillin e Evropës: Asociacioni i komunave me shumicë serbe.

Më 16 prill 2024, Asambleja Parlamentare e Këshillit të Evropës rekomandoi pranimin e Kosovës, me 131 vota për, 29 kundër dhe 11 abstenime.

Por, një muaj më vonë, aplikimi i saj nuk u përfshi në rendin e ditës të takimit të Komitetit të Ministrave – organit që merr vendimin përfundimtar për anëtarësimin.

Disa shtete anëtare, përfshirë Gjermaninë dhe Francën, kërkuan që Kosova ta dërgonte për vlerësim në Gjykatën Kushtetuese draft-statutin e Asociacionit, të përgatitur nga BE-ja, si dëshmi të përkushtimit ndaj marrëveshjeve të arritura në dialogun me Serbinë.

Qeveria e Kosovës fillimisht e kundërshtoi kërkesën. Më pas, ministrja e atëhershme e Punëve të Jashtme, Donika Gërvalla, njoftoi se kishte dërguar një letër në Këshillin e Evropës, duke paralajmëruar dërgimin e draft-statutit në Gjykatën Kushtetuese deri në fund të majit 2024.

Por, kjo nuk mjaftoi për ta zhbllokuar procesin.

Sipas Ilazit, kërkesa për Asociacionin nuk ishte kriter formal për anëtarësim, por kusht politik i disa shteteve anëtare.

Ai vlerëson se rekomandimi pozitiv i Asamblesë Parlamentare kishte dëshmuar se Kosova i plotësonte standardet kryesore për pranim.

“Pra, sot problemi nuk është se Kosova është e papërgatitur. Problemi është mungesa e besimit politik. Ky besim mund të ndërtohet, por kërkon punë të vazhdueshme dhe të koordinuar”, thotë Ilazi.

Nuk ka konfirmim publik se shtetet që e vendosën Asociacionin si kusht politik, kanë hequr dorë nga kjo kërkesë.

Radio Evropa e Lirë i është drejtuar Ministrisë së Punëve të Jashtme të Kosovës për të pyetur nëse Asociacioni mbetet kusht për anëtarësim dhe çfarë hapash kërkohen për sigurimin e mbështetjes së shteteve anëtare. Nga Këshilli i Evropës ka kërkuar sqarime për kushtet e mbetura dhe mundësinë e shqyrtimit të aplikimit në takimin e ardhshëm ministror.

Asnjëri institucion nuk është përgjigjur deri në publikimin e artikullit.

Sipas Morinës, kushti i Asociacionit “është ende aty”, ndërsa mbetet të shihet se si do ta trajtojë Kosova këtë çështje në dialogun me Serbinë.

Edhe Ilazi thotë se për disa shtete evropiane, Asociacioni mbetet tregues i gatishmërisë së Kosovës për t’i përmbushur detyrimet e marra në dialog.

Ai vlerëson se dërgimi i draft-statutit në Gjykatën Kushtetuese nuk duhet të shihet si lëshim politik, por si një mekanizëm për të garantuar përputhshmërinë e çdo zgjidhjeje me rendin kushtetues të Kosovës.

“Është procedurë kushtetuese që e mbron vetë Kosovën, sepse Gjykata garanton se çdo zgjidhje do të jetë në përputhje me Kushtetutën dhe me karakterin unitar të shtetit. Kosova duhet ta bëjë këtë hap, por jo në heshtje dhe jo si veprim të izoluar”, thekson Ilazi.

Sipas tij, Kosova duhet të sigurojë paraprakisht garanci politike nga partnerët kryesorë evropianë dhe Shtetet e Bashkuara se një hap i tillë do t’i hapte rrugën shqyrtimit të aplikimit të saj.

A mund të jetë viti 2027 një mundësi e re?

Më 10 nëntor, Mali i Zi mori kryesimin gjashtëmujor të Komitetit të Ministrave të Këshillit të Evropës, duke pasuar Monakon.

Kryesimi i tij do të përmbyllet më 12 maj 2027, kur është planifikuar të mbahet takimi i ardhshëm vjetor ministror në Mal të Zi.

Por, ende nuk ka konfirmim se aplikimi i Kosovës do të përfshihet në rendin e ditës së këtij takimi.

Për pranimin e një anëtari të ri, Komiteti i Ministrave duhet të sigurojë mbështetjen e dy të tretave të të gjithë përfaqësuesve që kanë të drejtë të marrin pjesë në këtë organ, sipas Statutit të Këshillit të Evropës.

Kjo do të thotë se, përveç përmbushjes së standardeve të kërkuara, Kosovës i nevojitet edhe mbështetje e gjerë politike nga shtetet anëtare.

Për Ilazin, përfshirja e aplikimit në agjendën e vitit 2027 kërkon angazhim të koordinuar diplomatik dhe hapa konkretë në raport me partnerët evropianë.

“Kjo kërkon tri gjëra: përmirësim të marrëdhënieve me BE-në, përfshirë një zgjidhje të konsultuar për ligjin e Dhomave të Specializuara, hapa të besueshëm në dialog dhe një fushatë diplomatike të koordinuar me shtetet që hezitojnë”, thotë ai.

Anëtarësimi në Këshillin e Evropës do t’i hapte Kosovës rrugën drejt sistemit evropian të mbrojtjes së të drejtave të njeriut, përfshirë mundësinë që individët nën juridiksionin e saj t’i drejtoheshin Gjykatës Evropiane për të Drejtat e Njeriut.

 

Continue Reading

Lajmet

Presidentja Shiroka Pula takon ambasadoren zvicerane, diskutojnë thellimin e bashkëpunimit

Published

15 hours ago

on

November 10, 2026

By

Presidentja e Kosovës, Justina Shiroka Pula, ka pritur në takim ambasadoren e Zvicrës në Kosovë, Anne-Lise Cattin Hennin, me të cilën ka diskutuar për marrëdhëniet ndërmjet dy vendeve dhe mundësitë për thellimin e bashkëpunimit.

Gjatë takimit, Shiroka Pula ka vlerësuar raportet e mira ndërmjet Kosovës dhe Zvicrës, duke e cilësuar këtë shtet si një nga partnerët e rëndësishëm të Kosovës në aspektin politik, ekonomik dhe zhvillimor.

Ajo ka shprehur mirënjohje për mbështetjen shumëvjeçare të Zvicrës në procesin e shtetndërtimit dhe në rrugëtimin evropian të Kosovës.

Presidentja ka theksuar gjithashtu rëndësinë e mërgatës shqiptare në Zvicër dhe kontributin e saj në forcimin e marrëdhënieve ndërmjet dy vendeve.

Në takim është diskutuar edhe për kontributin e Forcave të Armatosura të Zvicrës përmes kontingjentit Swisscoy, pjesë e misionit paqeruajtës të KFOR-it që nga viti 1999.

Shiroka Pula ka theksuar se bashkëpunimi me Zvicrën do të vazhdojë të thellohet dhe se ky shtet do të mbetet një nga partnerët e rëndësishëm të Kosovës./A.K/

Continue Reading

Lajmet

Kuvendi i Kosovës mblidhet nesër në seancë të jashtëzakonshme për Raportin e Progresit

Published

15 hours ago

on

November 10, 2026

By

Kuvendi i Kosovës do të mbajë nesër një seancë të jashtëzakonshme, e cila është caktuar të nisë në orën 13:00.

Në qendër të këtij takimi të jashtëzakonshëm të deputetëve do të jetë debati parlamentar lidhur me Raportin e Progresit të Komisionit Evropian, dokument ky që i është dorëzuar zyrtarisht institucioneve të Kosovës para pak ditësh.

Përfaqësuesit e popullit pritet të diskutojnë gjetjet kryesore, të arriturat dhe sfidat e evidentuara nga Bashkimi Evropian sa i përket përmbushjes së reformave dhe standardeve evropiane në vend. /E.A/

Continue Reading

Lajmet

Aktakuzë ndaj një personi për sulmet ndaj KFOR-it dhe Policisë në Zveçan më 29 maj 2023

Published

16 hours ago

on

November 10, 2026

By

Prokuroria Speciale e Kosovës ka ngritur aktakuzë ndaj një personi me inicialet A.S., nën dyshimin për sulm ndaj personave zyrtarë dhe pjesëmarrje në turmë që kryen vepër penale dhe huliganizëm, gjatë trazirave të 29 majit 2023 në Zveçan.

Sipas Prokurorisë, i pandehuri dyshohet se në bashkëpunim me persona të tjerë ka marrë pjesë në sulmet pranë objektit të Komunës së Zveçanit, nga ora 06:00 deri në orët e mbrëmjes.

Në aktakuzë thuhet se A.S., në bashkëkryerje me persona të tjerë nga Kosova dhe Serbia, ka sulmuar pjesëtarët e misionit paqeruajtës të KFOR-it, duke përdorur mjete të forta, mjete shpërthyese të improvizuara dhe armë zjarri.

Si pasojë e sulmeve, janë lënduar disa pjesëtarë të Policisë së Kosovës dhe të paktën 30 pjesëtarë të KFOR-it, tre prej të cilëve kanë pësuar lëndime të rënda.

Gjatë trazirave, sipas Prokurorisë, janë sulmuar edhe automjetet e gazetarëve që po raportonin nga vendi i ngjarjes.

Prokuroria Speciale ka bërë të ditur se po vazhdon të ndërmarrë veprimet e nevojshme hetimore për zbardhjen e plotë të sulmeve ndaj Policisë së Kosovës, KFOR-it dhe gazetarëve më 29 maj 2023./A.K/

Continue Reading

Të kërkuara