Aktualitet

Ministria e Bujqësisë këtë vit aprovon Ligjin e ri të pyjeve, synohet rritja e transparencës

Published

5 years ago

on

Ministria e Bujqësisë ka mbajtur diskutimin mbi rishkimin e sektorit të pylltarisë në Kosovë.

Ministri i Bujqësisë Faton Peci, tha se pyjet janë pasuri e vendit dhe si të tilla janë prioritet i rëndësishëm për ministrinë që ai drejton, duke premtuar lirim të vendeve të punës.

“Pyjet mbulojnë gati gjysmën e Kosovës, andaj në aspektin ambiental dhe ekonomik paraqesin një proces strategjik. Ne në programin tonë kemi prioritet pikërisht këtë tematikë, dhe rrjedhimisht kjo krijon lirimin e vendeve të punës për ata persona që jetojnë në këto zona me pyje”.

“Ne si Qeveri kemi ndërmarrë hapa të rëndësishëm që korniza ligjore e këtij sektori të jetë një ndër prioritetet tona”, tha ai.

Tutje ai tha se këtë vit pritet nga kjo ministri të aprovohet ligji i ri i pyjeve, që do rris transparencën dhe ruajtjen e pyjeve.

“Ne këtë vit do aprovojmë ligjin e ri të pyjeve, i cili definon qartë ruajtjen e pyjeve dhe rregullon shfrytëzimin e produkteve dhe rritjen e transparencës”, theksoi tutje Peci.

Ambasadorja e Suedisë, Karin Hernmarck tha se një ndër sfidat e Kosovës janë degradimi i pyjeve, andaj edhe kjo Qeveri duhet ta ketë prioritet këtë problem.

“Kosova po përballet me sfida të mëdha të degradimit të ajrit, ujit e pyjeve dhe këto duhet të jenë synime dhe prioritete të qarta për Kosovën”.

“Pyjet janë me rëndësi strategjike për Kosovën ashtu siç janë edhe për Suedinë”, tha Hernmarck.

Koordinatorja për zhvillim e OKB-së në Kosovë, Ulrika Richardson tha se pylltaria nuk është vetëm një sektor, por një pasuri dhe resurs i çmuar dhe Kosova ka një resurs të madh.

“Me zbutjen e situatës së Covidit, kemi problemin tjetër lidhur me natyrën, pylltaria nuk është vetëm një sektor dhe një vlerë shoqërore dhe ekonomike, ku shumë njerëz varen nga ky sektor dhe vlerë kulturore”, tha Richardson.

Related Topics:
Continue Reading

Lajmet

Nisi edicioni i pestë i “Prizren Fest”: Java që e shndërron Prizrenin në skenë gjigante teatri

Published

32 minutes ago

on

July 22, 2026

By

Në Prizren ka nisur zyrtarisht edicioni i pestë i Festivalit Ndërkombëtar të Teatrit në Hapësirë të Hapur, Prizren Fest, i cili nga data 21 deri më 27 korrik do të shndërrojë qytetin në një skenë gjigante artit. Programi i sivjetmë sjell një gërshetim shfaqjesh teatrale, performancash street-art, koncertesh, stand-up komedi dhe punëtori artistike me pjesëmarrjen e trupave nga 10 shtete të botës, përfshirë me vendet si Italia, Franca, Brazili, Spanja e Kanada.

Mbrëmja hapëse u mbajt në Shtëpinë e Kulturës “Xhemajli Berisha”, ku morën pjesë figura të larta shtetërore e lokale, si dhe artdashës të shumtë. Perdeja e festivalit u ngrit me performancën sllovene “Borderless Body”.

Pikat kryesore të programit sipas ditëve:

  • 22 Korrik: Shfaqja “Darkness Picnic” (Itali) në Parkun e Universitetit (18:30) dhe “Souvenirs” (Francë) te Teatri i Lumit (21:30).

  • 23 Korrik: Performanca “Mission Roosevelt” (Francë) te Shatërvani (20:00) dhe drama “Lysistrata” (Turqi) në hapësirën e ITP-së (21:30).

  • 24 Korrik: Drama “Babai” (Maqedoni e Veriut) në teatrin “Bekim Fehmiu” (20:00) dhe koncerti i “Zanat Vocal Ensemble” te Lidhja e Prizrenit (22:00).

  • 25 Korrik: Shfaqja eksperimentale “A Scream in the Dark” (Brazil) në ambientet e Burgut të Qytetit (20:30) dhe “Pylli” (Kosovë) te teatri i qytetit (21:30).

  • 26 Korrik: Bashkëprodhimi francezo-shqiptar “Mall / Longing” te Katedralja Katolike (20:30), Stand-up komedi te Abi Çarshia (21:00) dhe “Última Planta” (Spanjë) te Lidhja e Prizrenit (21:30).

  • 27 Korrik: Mbyllja me performancën “The Body Symphonic” (Kanada-Holandë) te Këndi i Sinan Pashës (21:00)

Aktivitete shtesë & qasja: Më 23 dhe 24 korrik do të mbahet edhe masterklasa e aktrimit “The Guhelli Technique – Emotional Core Acting”. Organizatorët njoftojnë se të gjitha shfaqjet dhe aktivitetet janë plotësisht falas për të gjithë publikun. /E.A/

Foto: RTKlive

Continue Reading

Lajmet

IHMK paralajmëron stuhi, breshër dhe rrezik nga përmbytjet e rrufetë

Published

41 minutes ago

on

July 22, 2026

By

Instituti Hidrometeorologjik i Kosovës (IHMK) ka lëshuar një paralajmërim meteorologjik të nivelit portokalli për ditën e sotme, pasi i gjithë territori i vendit pritet të përfshihet nga stuhi lokale me bubullima, reshje intensive shiu, breshër dhe erëra të forta.

Për shkak të shkarkimeve të fuqishme atmosferike, IHMK-ja ngre alarm për rrezik të lartë nga goditjet e rrufesë, të cilat mund të sjellin pasoja për njerëzit e kafshët, dëmtime në rrjetin elektrik e të telekomunikacionit, si dhe vatrat e zjarrit. Gjithashtu, reshjet e dendura mund të shkaktojnë përmbytje të shpejta lokale, ndërsa breshëri dhe era e fortë rrezikojnë të dëmtojnë kulturat bujqësore, automjetet dhe pronat.

Në kuadër të kësaj situatë, institucionet u bëjnë thirrje qytetarëve të shmangin daljet në ambiente të hapura, të mos strehohen nën pemë apo pranë shtyllave elektrike, si dhe të tregojnë kujdes të shtuar gjatë ngasjes së makinave për shkak të rrugëve të rrëshqitshme dhe pamjes së kufizuar. Paralajmërimi mbetet në fuqi deri në mesnatë. /E.A/

Continue Reading

Aktualitet

Zelensky ndryshon komandantin e përgjithshëm pas presionit publik

Published

46 minutes ago

on

July 22, 2026

By

Presidenti ukrainas Volodymyr Zelensky ka shkarkuar komandantin e përgjithshëm të ushtrisë, Oleksandr Syrskyi, vetëm pak ditë pas largimit të Ministrit të Mbrojtjes, Mykhailo Fedorov.

Shkarkimi i Fedorov—një figurë mjaft popullore dhe e vlerësuar për modernizimin e ushtrisë e luftën kundër korrupsionit—nxiti protesta gjashtëditore në të gjithë vendin dhe konfirmoi përplasjet e tij të hapura me Syrskyi-n, i cili shihej si një komandant i shkollës së vjetër sovjetike.

Për t’iu përgjigjur presionit në rritje të publikut, Zelensky emëroi në krye të ushtrisë gjeneralin 43-vjeçar Mykhailo Drapatyi, një figurë e respektuar, inovative dhe me përvojë në fushëbetejë. Ndërkohë, ministria e mbrojtjes u mor nga Yevhenii Khmara.

Në mesazhin e tij lamtumirës, Syrskyi mbrojti punën e tij duke theksuar se po i dorëzon pasardhësit një ushtri që po përparon, ndërsa Zelensky e falënderoi atë për kontributin historik, përfshirë mbrojtjen e Kievit në fillim të pushtimit rus. Zelensky gjithashtu konfirmoi se i ka ofruar Fedorov-it një post tjetër të rëndësishëm në qeveri. /BBC/

Continue Reading

Lajmet

Kryesuesi i KPK-së, Arian Gashi, takoi zëvendëspërfaqësuesin e OKB-së, Milbert Domgjon Shin

Published

16 hours ago

on

July 21, 2026

By

Kryesuesi i Këshillit Prokurorial të Kosovës (KPK), Arian Gashi, i shoqëruar nga anëtarët e Këshillit, ka pritut sot në takim Zëvendëspërfaqësuesin Special të Sekretarit të Përgjithshëm të OKB-së, Milbert Domgjon Shin, bashkë me përfaqësues të tjerë të Zyrës së UNMIK-ut.

Përgjatë takimit u diskutua për zhvillimet e fundit në sistemin prokurorial, forcimin e sundimit të ligjit, si dhe për vazhdimin e bashkëpunimit ndërinstitucional me partnerët ndërkombëtarë.

Gjatë bashkëbisedimit, Kryesuesi Gashi e njoftoi delegacionin e UNMIK-ut me përbërjen e re të Këshillit Prokurorial, si dhe me përfundimin e procesit të zgjedhjes së Kryeprokurorit të ri të Shtetit, duke nënvizuar rëndësinë e funksionalizimit të plotë të institucioneve të drejtësisë.

Përveç kësaj, Gashi theksoi përkushtimin e KPK-së për garantimin e një sistemi gjithëpërfshirës përmes përfaqësimit të drejtë të të gjitha komuniteteve, me ç’rast bëri të ditur se së shpejti do të shpallet konkursi për pranimin e prokurorëve të rinj.

Kryesuesi i KPK-së shprehu mirënjohjen për mbështetjen e vazhdueshme të UNMIK-ut ndër vite dhe ritheksoi se institucioni që ai drejton do të vazhdojë punën për fuqizimin e sundimit të ligjit përmes profesionalizmit, integritetit dhe llogaridhënies.

Nga ana e tij, Zëvendëspërfaqësuesi Special i OKB-së, Milbert Domgjon Shin, vlerësoi punën e Këshillit Prokurorial dhe rolin e tij në garantimin e një sistemi të pavarur e efikas. Ai shprehu besimin se përmes përgjegjësisë institucionale do të vazhdohet me hapat që forcojnë besimin e qytetarëve te drejtësia.

Në përmbyllje të takimit, përfaqësuesit e UNMIK-ut konfirmuan gatishmërinë për të vazhduar mbështetjen ndaj KPK-së në avancimin e reformave dhe fuqizimin e mëtejshëm të sundimit të ligjit në Kosovë. /E.A/

Continue Reading

Të kërkuara