Lideri i Nismas Socialdemokrate, Fatmir Limaj, ka deklaruar se subjekti që ai përfaqëson ndihet më i përgjegjshëm për shkak se ka ofruar një opsion për zgjidhje politike, duke bërë thirrje për një marrëveshje gjithëpërfshirëse ndërmjet partive politike në vend.

“Kjo është skandaloze, çka po ndodhë. Ne që nga fillimi kemi ftuar për marrëveshje politike. Kjo situatë na bën të ndihemi përgjegjës, pasi kemi dhënë një opsion. Çdo gjë tjetër që po ndodh këtu, është skandaloze,” tha Limaj.

Ai theksoi se drejtuesit politikë në vend duhet të jenë më konstruktivë, pasi bota po përballet me ndryshime drastike, dhe çdo shmangie nga përgjegjësia mund t’i kushtojë Kosovës shumë.

“Nëse lejohet që çdo dy muaj të shkohet në zgjedhje, atëherë krejt çka mund të them është se nuk e meritoni besimin e qytetarëve të Kosovës,” përfundoi Limaj.

Deputetja e Partisë Demokratike të Kosovës, Vlora Çitaku, ka komentuar qëndrimin e presidentit amerikan Donald Trump ndaj Kosovës, duke theksuar se vendi duhet të jetë i përgatitur për të përballuar një botë në ndryshim të vazhdueshëm.

Në fjalën e saj, Çitaku shprehu kritika ndaj kryeministrit Albin Kurti, duke e akuzuar atë se ka sjellë sanksione ndaj Kosovës pas 26 vitesh liri dhe pavarësi.

“Me administratën e parë të Trump, Kosova arriti të transformojë Forcën e Sigurisë në ushtri dhe mori njohjen nga Izraeli,” tha ajo.

“Fatkeqësisht, deputetit Albin Kurti nuk i bën përshtypje kjo. Për shkak të politikave të tij, Kosova po ndodhet sot nën sanksione nga vendet që dikur e ndihmuan në procesin e pavarësisë dhe lirisë,” shtoi Çitaku.

Deputeti i Partisë Demokratike të Kosovës (PDK), Abelard Tahiri, ka theksuar se Kosova duhet të sigurojë sa më shpejt formimin e një qeverie të re dhe të mos vazhdojë më me kryeministrin në detyrë, Albin Kurti.

Tahiri argumenton se kjo është e nevojshme për shkak të rekordit të dëmshëm që Kurti ka krijuar në raport me administratën e parë të Shteteve të Bashkuara të Amerikës nën udhëheqjen e Donald Trumpit.

“Kosova duhet që sa më shpejt të sigurohet që të ketë një qeveri të re dhe të mos vazhdojë më tutje me Kurtin në krye. Kurti ka një rekord të dëmshëm në raport me administratën e parë të Trump. Nëse deri më tani ka pasur dyshime për vazhdimësinë e tij, pavarësisht se VV ka dalë si parti fituese në zgjedhje, paralajmërimi i ish-presidentit Trump na jep një mesazh të qartë: të angazhohemi maksimalisht të gjitha partitë opozitare për t’i dhënë vendit një qeveri të re, pa përfshirjen e Kurtit dhe Lëvizjes Vetëvendosje,” tha Tahiri.

Ai shtoi se përfshirja e Vetëvendosjes në qeveri do të jetë e dëmshme për marrëdhëniet me administratën amerikane dhe për interesat e Kosovës në përgjithësi.

Ministri në detyrë i Financave, Hekuran Murati, ka kërkuar nga opozita që të reflektojë dhe të përmbushë detyrimin kushtetues për të votuar në seancat parlamentare.

Ai tha se gjatë më shumë se 20 seancave të fundit, opozita nuk ka ushtruar të drejtën e votës, duke mos shprehur vullnetin e lirë as për apo kundër çështjeve që diskutohen.

“Janë mbi 20 seanca që opozita nuk voton, duke mos ushtruar vullnetin e tyre të lirë as për apo kundër. Presim që opozita të reflektojë dhe të përmbushë obligimin kushtetues që është votimi. Siç e dini, Gjykata Kushtetuese ka vendosur që deputetët janë të detyruar të votojnë në seancën konstituive. Vullneti i tyre i lirë mund të jetë që të votojnë kundër apo të abstenojnë, por vota duhet të jepet. Megjithatë, kemi tashmë mbi 20 seanca që deputetët e opozitës nuk votojnë dhe nuk ushtrojnë këtë detyrim kushtetues”, tha Murati.