KQZ ka mbajtur mbledhjen e radhës ku janë shqyrtuar disa pika të rendit të ditës. Në këtë mbledhje janë sqaruar arsyet e refuzimit të aplikimit për votim me postë të diasporës.

“Është e vërtetë që është numër i madh i refuzimeve, janë dy arsye kryesore që ata janë refuzuar. Mungon dokumenti që dëshmon adresën e vendbanimit. Arsyeja e dytë është adresa e deklarimit që nuk është e njëjtë me dokumentin që dëshmon adresën. Lidhur me këto kategori të refuzimit, sekretariati i KQZ u ka dërguar email njoftues të gjithëve dhe i ka telefonuar ata”, tha Buzhala.

Sa i përket ridestinimit të mjeteve për projekte kapitale Buzhala tha se këto mjete pritet të ridestinohen të mërkurën.

“Ministria e Financave nuk e ka lejuar ridestinimin e mjeteve për projkete kapitale, për shkak që është mbi përqindjen e lejuar. Meqë është mbi përqindjen e lejuar është dashur të ketë pajtim në Kuvendin e Kosovës. Duke qenë në këtë situatë i kemi dërguar një shkresë Ministrisë së Financave Punëve dhe Transfereve dhe në përputhje ne kemi kërkuar 15% e të gjitha projekteve kapitale. Presim që deri të mërkurën të na ridestinojë mjetet të cilat do të shfrytëzohen për nevojat e KQZ-së dhe projekte konkrete”, tha ai.

KQZ miratoi raportin për analizën e votave të pavlefshme për zgjedhjet nacionale. Po ashtu u miratuan edhe zëvendësimi i anëtarit të KKZ-së në Mitrovicë të Veriut.

Emir Azemi në Mitrovicën e Veriut do të zëvendësohet nga Besnik Rexhepi nga radhët e PDK-së.

KQZ miratoi raportin financiar janar- qershor 2025 dhe raportin e shpenzimeve të derivateve për automjetet e KQZ-së për periudhën kohore Janar-Qershor 2025. Në këtë mbledhje u miratua edhe zëvendësimi i të ndjerit, Mehmet Spahiu në Dragash nga Nexhmi Dauti nga radhët e LDK-së.

Presidenti i SHBA-ve, Donald Trump ka kërkuar nga Izraeli që të sigurojë që palestinezët në Gaza të marrin ushqimin që u nevojitet.

“Ne duam që Izraeli t’i ushqejë. Po japim disa kontribute mjaft të mëdha, në thelb për të blerë ushqim në mënyrë që njerëzit të mund të ushqehen“, u tha Trump gazetarëve para se të kthehej në Uashington nga resorti i tij i golfit në New Jersey.

“Ne nuk duam që njerëzit të vuajnë nga uria dhe nuk duam që njerëzit të vdesin nga uria“, shtoi ai, shkruan Anadolu.

I pyetur në lidhje me një vizitë në Gaza të premten nga i dërguari i SHBA-së për Lindjen e Mesme, Steve Witkoff, për të inspektuar operacionet e Fondacionit Humanitar të Gazës (GHF) të mbështetur nga SHBA-të, Trump tha se ai po bënte një “punë të shkëlqyer”.

Kur u pyet nëse Witkoff kishte vërejtur prova të një “gjenocidi” në Gaza të kryer nga Izraeli, megjithatë, Trump nuk e përshkroi atë si të tillë.
Trump ka pohuar vazhdimisht se SHBA-të kanë siguruar 60 milionë dollarë ndihmë ushqimore për Gazën. Megjithatë, raportet e fundit tregojnë se deri më tani janë shpërndarë vetëm 3 milionë dollarë.

Witkoff vizitoi të premten një qendër ndihme në Gazën jugore, të operuar nga GHF. Ai tha se qëllimi ishte t’i jepej Trumpit “një kuptim i qartë i situatës humanitare dhe të ndihmohej në hartimin e një plani për të ofruar ndihmë ushqimore dhe mjekësore për popullin e Gazës”.

Ushtria izraelite, duke hedhur poshtë thirrjet ndërkombëtare për armëpushim, ka ndjekur një ofensivë brutale në Gaza që nga 7 tetori 2023, duke vrarë më shumë se 60,800 palestinezë, shumica prej tyre gra dhe fëmijë.

Bombardimet kanë shkatërruar enklavën dhe kanë çuar në mungesa të rënda ushqimore dhe vdekje nga uria.

Presidenti i Ukrainës, Volodymyr Zelensky, duket se po e shijon heshtjen nga Rusia, sipas The Guardian, pas vendimit të Donald Trump për të lëvizur dy nëndetëse bërthamore në përgjigje të komenteve provokuese nga ish-presidenti i vendit, Dmitry Medvedev.

“Në momentin që u shfaqën nëndetëset bërthamore amerikane, … [ai] papritmas heshti. Rusia e kupton vetëm një gjë: forcën”, tha ai.

Pritet që Kievi të vazhdojë me përfaqësime të ngjashme këtë javë, përpara se i dërguari i posaçëm amerikan, Steve Witkoff, të vizitojë Rusinë “të mërkurën ose të enjten” për bisedime të mëtejshme, përpara afatit të përcaktuar nga Trump më 8 gusht për një armëpushim në Ukrainë.

Të premten, nuk kishte shenja se Vladimir Putin ishte i gatshëm të ndryshonte mendje, pasi përsëriti se “kushtet ruse mbeten sigurisht të njëjtat”, edhe pse nominalisht u shpreh se mbështet “një paqe të qëndrueshme dhe afatgjatë”.

Mungesa e Kuvendit të konstituar po bën që marrëveshjet ndërkombëtare të mos mund të votohen dhe sipas njohësve të fushës Kosovës po i shkaktohet dëm i madh në rrafshin ekonomik. Njohësi i ekonomisë dhe ish-kryetari i Odës Ekonomike të Kosovës, Safet Gërxhaliu, i sheh me shqetësim këto ecuri.

Ai vë në dukje se vendi ka pësuar humbje afro 1.2 miliardë euro, përfshirë fondet IPA nga BE-ja dhe projekte të financuara nga SHBA-ja dhe Banka Botërore që janë të ngrira deri më tani.

“Nga mungesa e institucioneve ne nuk kemi ratifikim të marrëveshjeve ndërkombëtare. Po e them me keqardhje që dëmet aktuale janë pothuajse afër një miliard e 200 milionë euro, duke përfshirë afër 830 milionë euro që kanë të bëjnë me IPA fondet 2 dhe 3, që kanë të bëjnë me agjendën për reforma të Bashkimit Evropian, me projekte të financuara nga SHBA-ja dhe kur krejt kësaj i shtohet fakti që kemi dy marrëveshje të paratifikuara me Bankën Botërore prej 230 milionë eurosh, e treta është 90 milionë euro dhe ato janë të ngrira, atëherë paramendoni cilat janë dëmet që po i shkaktohen Kosovës. Sot në Bruksel nuk flitet për Kosovën, sot për Kosovën po dominon një heshtje në qarqet evropiane dhe kjo është më e keqja që mund t’i ndodhë Kosovës”, tha Gërxhaliu.

Duke u ndalur te qëndrimi i Qeverisë në detyrë lidhur me këto marrëveshje, ai tha se ata po shprehen vetëm nga këndvështrimi politik apo partiak dhe se këto fonde nuk do mund ta kenë përdorimin e njëjtë me kalimin e kohës si pasojë e inflacionit.

Sipas tij, meqë shumë projekte kanë afat skadence, ato do të alokohen për shtete të tjera, duke mos iu dhënë Kosovës si pasojë e mosrespektimit të këtyre afateve.

“Është mjerim që dëgjohen terme të tilla të shprehura vetëm nga këndvështrimi politik dhe partiak, jo real dhe ekonomik dhe në këtë drejtim vërtet të gjithë këta parametra dhe në fund të fundit duhet të kuptohet që edhe të prolongohet shfrytëzimi i këtyre mjeteve ata do të përjetojnë amortizim edhe moral dhe do të jenë të tkurrur nga inflacioni. Duhet ta dinë edhe ministrat në detyrë, edhe të tjerët që një projekt, i cili në vitin 2023 ndoshta ka kushtuar 100 milionë, sot nuk mund të realizohet as për 140 apo 150 milionë euro dhe ky është dëmi direkt. Dhe e dyta, shumë projekte kanë skadencë.Për shembull, nëse nuk kemi ratifikim të marrëveshjeve, në Bankën Botërore ato mjete do të stopohen për Kosovën dhe do të rialokohen për vende të tjera dhe kush është humbës? Është Kosova”, shton Gërxhaliu.

Dhe unë nuk e kam përgatitur veten që do të vijmë në një stad që dikush nga politikanët aktualë në Kosovë do të krenohet pse kanë bllokuar për shembull një projekt me energji me diell, një projekt me energji të diellit, e kanë bllokuar Kosovën e Re dhe kanë evituar apo kanë bllokuar projektin e elektranave. Në rrethana normale, Kosova do të duhej të kishte kapacitete të reja gjeneruese”, tha Gërxhaliu.

Edhe kryetari i tanishëm i Odës Ekonomike të Kosovës, Lulzim Rafuna, ka thënë se si pasojë e moskonstituimit të kuvendit, marrëveshjet ndërkombëtare nuk po mund të kalojnë dhe kjo cenon zhvillimin ekonomik të vendit dhe përmirësimin e standardit të qytetarëve të Kosovës.

“Kemi marrëveshje që janë mbi 800 milionë euro ose afër 900 milionëve, të cilat presin në Kuvendin e Kosovës për ratifikim, marrëveshje që janë të parapara për projekte kapitale, të cilat ndikojnë drejtpërdrejt në rritje ekonomike dhe në përmirësimin e cilësisë apo standardit të qytetarëve të Republikës së Kosovës dhe këto marrëveshje nuk po mund të ratifikohen, sepse nuk e kemi Kuvendin”, tha Rafuna.