Deputeti i PDK-së, Rashit Qalaj, deklaroi se ngërçi institucional në Kuvendin e Kosovës mund të tejkalohet nëse partia me më së shumti ulëse propozon një kandidat tjetër që të jetë i pranuar nga spektri politik.

“Problemi në Kuvend mund të zgjidhet në momentin që partia fituese propozon dikë tjetër, që të jetë i pranueshëm për partitë e tjera. PDK-ja ka dhënë propozimet e veta dhe po punon që të evitojë një situatë ku kandidati i propozuar nuk do të përfaqësonte unitetin e nevojshëm dhe nuk do të ishte i pranueshëm si kryetar i parlamentit,” tha Qalaj pak para vazhdimit të seancës së 34-të konstituive.

Komandanti i Forcës së Sigurisë së Kosovës, gjeneral-lejtnant Bashkim Jashari, ka zhvilluar një vizitë në zonën e trajnimit të Joint Readiness Training Center (JRTC) në Shtetet e Bashkuara të Amerikës, ku po trajnohen pjesëtarë të FSK-së.

Vizita u zhvillua me rastin e Ditës së Vizitorëve të Shquar (DVDay), gjatë së cilës gjenerali Jashari u takua me personelin ushtarak të FSK-së që po marrin pjesë në trajnimin për gatishmëri dhe dislokim në kuadër të programeve shumëkombëshe.

Në adresimin e tij para trupave, komandanti i FSK-së theksoi se partneriteti me Gardën Kombëtare të Iowas është ndërtuar ndër vite dhe ka avancuar drejt trajnimeve të përbashkëta, duke kulmuar me përgatitjet për një zbarkim të përbashkët në Lindjen e Mesme.

“Sot ky synim është bërë realitet, falë përkushtimit të pjesëtarëve tanë dhe mbështetjes së palëkundur nga Garda Kombëtare e Iowas, e udhëhequr nga gjeneralmajor Stephen Osborn,” u shpreh gjenerali Jashari.

Ai nënvizoi rëndësinë e ngritjes së një force profesionale, të ndërveprueshme me aleatët dhe partnerët ndërkombëtarë, si dhe të gatshme për të kontribuar në misione paqeruajtëse.

Gjenerali Jashari falënderoi gjithashtu personelin e JRTC-së për mbështetjen dhe përkushtimin në realizimin e këtij procesi, duke shprehur mirënjohje të veçantë për pjesëtarët e FSK-së që, sipas tij, kanë treguar disiplinë dhe profesionalizëm, duke përfaqësuar me dinjitet Forcën e Sigurisë së Kosovës në një ambient operacional shumëkombësh.

Kjo është hera e parë që FSK-ja merr pjesë në një qendër trajnuese të këtij niveli në SHBA.

Kandidatët që synojnë të garojnë për postin e kryetarit të komunës në zgjedhjet lokale të 12 tetorit 2025, duhet të plotësojnë një sërë kriteresh ligjore, përfshirë kushtin që të kenë qenë banorë të komunës për së paku tre vite.

Zëdhënësi i Komisionit Qendror të Zgjedhjeve, Valmir Elezi, ka bërë të ditur se ky kriter përcaktohet nga Ligji për Zgjedhjet Lokale dhe vjen përveç kushteve të përcaktuara në nenin 30 të Ligjit për Zgjedhjet e Përgjithshme. Sipas tij, neni 9, paragrafi 2 i Ligjit për Zgjedhjet Lokale kërkon që kandidati të ketë pasur vendbanimin në komunën përkatëse për së paku tri vite, për të pasur të drejtë të kandidojë për kryetar.

Elezi ka theksuar se, sipas nenit 30 të Ligjit për Zgjedhjet e Përgjithshme, një person nuk mund të certifikohet si kandidat nëse: është funksionar me status të veçantë sipas Ligjit për Zyrtarët Publikë; është pjesë e shërbimit të jashtëm apo përfaqësues diplomatik; është anëtar i KQZ-së apo Komisionit Komunal të Zgjedhjeve; është zyrtar i PZAP-it; i është ndaluar e drejta e kandidimit me vendim gjyqësor ose të PZAP-it; është dënuar me burgim efektiv në tre vitet e fundit; nuk ka përmbushur pagesën e gjobave të shqiptuara nga PZAP-i ose KQZ-ja; apo nuk ka respektuar ndonjë urdhër të këtyre institucioneve.

Për verifikimin e përmbushjes së këtyre kushteve, KQZ do të kërkojë bashkëpunim me institucione të ndryshme shtetërore.

Afati për aplikim të subjekteve politike nis më 26 qershor dhe përfundon më 13 gusht 2025. Gjatë kësaj periudhe, partitë politike, koalicionet, iniciativat qytetare dhe kandidatët e pavarur mund të dorëzojnë kërkesën për certifikim në Zyrën për Regjistrim, Certifikim dhe Kontroll Financiar të Subjekteve Politike.

Sipas Elezit, është në vullnetin e subjekteve politike që të vendosin se në cilat komuna do të garojnë dhe nëse do të paraqesin kandidatë për kryetar komune, për kuvend komunal, apo për të dyja.

Presidentja e Kosovës, Vjosa Osmani, ka caktuar datën 12 tetor 2025 për mbajtjen e zgjedhjeve lokale për kryetarë dhe kuvende komunale.

Vazhdimi i seancës për konstituimin e Kuvendit të ri të Kosovës do të mbahet sot nga ora dhjetë (10:00).

Tridhjetetre vazhdimet e deritanishme kanë dështuar për formimin e legjislaturës së nëntë të dalë nga zgjedhjet e nëntë shkurtit.

Përveç betimit të deputetëve të zgjedhur, Kuvendi i ri ka mbetur i pa konstituar në mungesë të zgjedhjes së kryetarit të ri dhe nënkryetarëve.

Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe NISMA nuk po i japin votën kandidates së propozuar për kryetare nga Lëvizja Vetëvendosje, Guxo e Alternativa.

Albulena Haxhiu në gjashtë tentime ka dështuar të kalojë provimin dhe në mungesë të kësaj Lëvizja Vetëvendosje, Guxo e Alternativa po kërkojnë komision për votim të fshehtë, për të cilën gjë Aleanca për Ardhmërinë e Kosovës ka kërkuar interpretim nga Gjykata Kushtetuese.

Kujtojmë, zgjedhjet parlamentare janë mbajtur më nëntë (9) shkurt. Mbledhja e parë për konstituimin e Kuvendit të ri është mbajtur më pesëmbëdhjetë (15) prill. Që nga ajo datë çdo dyzetetetë (48) orë po mbahen vazhdime të seancës konstituive pa arritur ndonjë rezultat konkret./kosovapress/