Claudia Cardinale, një nga ikonat më të njohura të kinemasë italiane dhe botërore, u nda nga jeta në moshën 87-vjeçare në Nemours, pranë Parisit, Francë, ku kishte jetuar për shumë vite. Ajo u largua duke qenë pranë fëmijëve të saj.

Agjenti, Laurent Savry, e përshkroi si “trashëgimtare e shpirtit të një gruaje të lirë e të frymëzuar, si në jetën personale, ashtu dhe në art.”

E lindur më 15 prill 1938 në Tunis, nga prindër sicilianë që kishin emigruar gjatë periudhës së protektoratit britanik, Cardinale filloi karrierën në kinematografi në vitet 1950 dhe krijoi një rrugëtim artistik që zgjati më shumë se gjashtë dekada.

Gjatë karrierës, luajti në mbi 150 filma e bashkëpunoi me disa nga regjisorët më të mëdhenj të kohës, përfshirë Luchino Visconti, Federico Fellini, Sergio Leone, Mauro Bolognini dhe Werner Herzog. Roli i saj si Angelica në “Il Gattopardo” të Visconti-t, ku skena e vallëzimit me Alain Delon është tashmë legjendare, si dhe pjesëmarrja në “8½” të Fellinit, e vendosën atë në radhët e yjeve të kinemasë europiane.

Ndër filmat më të njohur:  “La ragazza con la valigia”, “C’era una volta il West”, “Fitzcarraldo”, “La pelle”, “La storia” “The Pink Panther”.

Përveç ekranit, Cardinale pati një përfshirje të madhe në teatër dhe mbështeti gjithmonë autorët e rinj. Ajo konsiderohej figurë e respektuar në skenën kulturore ndërkombëtare, duke qëndruar larg zhurmës mediatike, por gjithmonë aktive në art dhe çështje sociale.

U nderua me pesë çmime “David di Donatello”, pesë “Nastro d’Argento” me çmime për arritje jetësore nga festivalet e Venecias e Berlinit.

Claudia kujtohet jo vetëm për bukurinë dhe karizmën e saj në ekran, por edhe për integritetin dhe pasionin me të cilin e jetoi artin dhe jetën. /A.Z/UBT News/

Këngëtarja e njohur me famë botërore Camila Cabello i realizoi një ëndërr të paharrueshme një prej fansave të saj, duke i dhuruar një moment magjik në ditën më të veçantë të jetës së saj – ditën e dasmës.

Artistja 28-vjeçare e muzikës pop u bë pjesë e ceremonisë duke interpretuar live hitin e saj emocional “First Man”, këngë e cila u shoqërua me vallen prekëse mes nuses dhe babait të saj.

Gjesti i papritur dhe tepër i ndjerë erdhi pasi Camila kishte takuar nusen e ardhshme, Kelly, vetëm një ditë më parë në barin e një hoteli në Iowa. Aty, gjatë një bisede të rastësishme, këngëtarja u preku nga historia e saj dhe vendosi të bënte diçka të veçantë.

E gjithë skena u kthye shpejt në një moment viral, falë kushëririt të nuses, i cili publikoi videon në TikTok, duke marrë mijëra reagime dhe komente emocionuese nga fansa në mbarë botën.

“Camila Cabello takoi kushërirën time në barin e hotelit dhe një ditë më pas u shfaq në dasmën e saj për të kënduar vallen babë-bijë”, shkroi ai në përshkrimin e videos që po bën xhiron e rrjeteve sociale.

Ky veprim i Camila Cabello është cilësuar nga shumë ndjekës si një prej gjesteve më të bukura dhe të sinqerta që një artist mund t’i bëjë një admiruesi të vet, duke e kthyer një dasmë të zakonshme në një kujtim të paharrueshëm. /A.Z/UBT News/

Reperja me famë botërore, Cardi B, po tregon gjithnjë e më shumë afërsinë e saj me shqiptarët.

Pas videos virale në rrjetet sociale, ku me humor pyeste një të ri shqiptar për përkthimin e emrit të saj në shqip, artistja dhuroi një tjetër moment të veçantë.

Gjatë një eventi të madh për promovimin e albumit të saj të ri “Am I the Drama?”, Cardi B u fotografua pranë një të riu shqiptar, Drino.

Pamjet, të shpërndara në Instagram, bënë menjëherë xhiron e rrjetit.

Detaji që tërhoqi më shumë vëmendje ishte flamuri kuqezi, me të cilin reperja u shfaq e mbështjellë — një gjest që emocionoi jo vetëm fansat shqiptarë, por edhe tregoi aftësinë e saj për t’u lidhur natyrshëm me kultura dhe komunitete të ndryshme.

Ky moment nuk u pa thjesht si një rastësi, por si një shenjë se marrëdhënia e Cardi B me publikun shqiptar po merr një dimension të ri.

Çdo herë që ajo shfaqet pranë tyre, reperja arrin të ndezë rrjetet sociale dhe të forcojë krenarinë e një komuniteti që tashmë e konsideron një nga yjet e tyre më të mëdhenj botërorë. /A.Z/UBT News/

Tom Holland ka pësuar tronditje gjatë xhirimeve të filmit të ri, Spider-Man: Brand New Day. Incidenti ndodhi më 19 shtator, në Leavesden Studios në qytetin e Watford, jo shumë larg Londrës, sipas informacionit nga Daily Mail.

Aktori u rrëzua gjatë regjistrimeve dhe u dërgua në spital për të kryer ekzaminime mjekësore. Babai i tij, Dominic Holland, konfirmoi se djali i tij do të marrë një pushim nga xhirimet për t’u rikuperuar, duke qetësuar fansat që shqetësuan për gjendjen e tij

Spider-Man: Brand New Day u njoftua në CinemaCon 2025 në prill, dhe Holland kishte konfirmuar më parë se filmi i katërt i serisë do të fillonte xhirimet më vonë këtë vit. Xhirimet filluan me Holland dhe bashkëaktoren Zendaya, të cilët u panë në Londër në fillim të gushtit, ndërsa Holland ndau vetë pamje nga dita e tij e parë e xhirimeve në Skoci më 10 gusht.

Ky incident vjen ndërsa fansat presin vazhdimin e aventures së Spider-Man, duke e bërë kujdesin për sigurinë e aktorëve një çështje të rëndësishme në produksionet e mëdha filmike. Holland, i njohur për performancat dinamike, ka treguar përkushtim ndaj roleve të tij, dhe pushimi i shkurtër do t’i mundësojë rikuperimin e plotë para se të vazhdojnë xhirimet.

Produksioni pritet të vazhdojë pasi Holland të rikuperohet, dhe fansat mbeten të entuziazmuar për debutimin e filmit të ri, që premton aventura të reja dhe momente emocionuese për Spider-Man. /A.Z/UBT News/