Sekretari i përgjithshëm i NATO-s, Mark Rutte, ka theksuar nevojën për garanci “të forta” të sigurisë për t’i dhënë fund “agresionit të tmerrshëm” të Rusisë në Ukrainë dhe ka shtuar dora e Kievit duhet të forcohet në tryezën e negociatave.

Komentet e shefit të NATO-s erdhën në një konferencë për media së bashku me presidentin sllovak, Peter Pellegrini, gjatë vizitës së tij në Sllovaki.

“Ne të gjithë duam të shohim fundin e agresionit të tmerrshëm kundër Ukrainës dhe është jetike që çdo marrëveshje e arritur të sjellë një paqe të qëndrueshme se Rusia më kurrë nuk do të përpiqet të marrë as edhe një kilometër katror të tokës ukrainase”, tha Rutte.

Ai tha se “kjo do të kërkojë garanci të forta”, duke theksuar se aleatët e NATO-s po diskutojnë në mënyrë aktive se çfarë mund ta sjellë këtë.

Më tej, ai gjithashtu theksoi “rolin jetik të Evropës në garantimin e paqes në Ukrainë”.

“Ne jemi qenë në kontakt të ngushtë me administratën amerikane për këtë në çdo nivel dhe të gjithë jemi dakord se kemi nevojë për një paqe të qëndrueshme në Ukrainë. Në të njëjtën kohë, ne duhet të vazhdojmë të forcojmë duart e Ukrainës në mënyrë që ato të vijnë në tryezën e bisedimeve nga një pozicion i fortë si aleancë”, tha ai.

Presidenti i Afrikës së Jugut, Cyril Ramaphosa, ka kërkuar avokim të vazhdueshëm të G20-tës për zgjidhje diplomatike të konflikteve në mbarë botën.

Takimi i ministrave të jashtëm të vendeve të G20-tës ka filluar zyrtarisht në Johannesburg, me pjesëmarrjen e ministrave të jashtëm dhe përfaqësuesve të mbi 30 vendeve dhe organizatave ndërkombëtare.

“Si G20, ne duhet të vazhdojmë të avokojmë për zgjidhje diplomatike të konflikteve. Përvoja jonë si Afrikë e Jugut është se zgjidhja paqësore e konfliktit përmes dialogut gjithëpërfshirës është garantuesi kryesor i paqes së qëndrueshme”, tha Ramaphosa në fjalën e tij në hapjen e takimit.

Ramaphosa gjithashtu përsëriti thirrjen e vendit të tij për reforma në Këshillin e Sigurimit të OKB-së për ta bërë atë më përfaqësues dhe më të përgjegjshëm ndaj realiteteve aktuale globale.

Ai theksoi “humbjen e rëndë njerëzore dhe rritjen e pasigurisë globale” të shkaktuar nga konfliktet në Ukrainë, Republikën Demokratike të Kongos, Sudan, Sahel dhe Gaza.

“Afrika e Jugut përshëndet marrëveshjen e armëpushimit të arritur midis Izraelit dhe Hamasit si një hap i parë vendimtar drejt përfundimit të krizës së rëndë humanitare me të cilën përballet populli palestinez në Gaza”, tha Ramaphosa.

Ai gjithashtu theksoi se ky armëpushim duhet të vendosë bazën për një paqe të drejtë dhe të qëndrueshme në përputhje me rezolutat e OKB-së, të drejtën ndërkombëtare dhe parametrat e rënë dakord në nivel ndërkombëtar.

Presidenca e Afrikës së Jugut me G20-tën, që shënon herën e parë që një vend afrikan kryeson forumin ndërkombëtar, sipas presidentit afrikano-jugor, thekson “rritjen e rëndësisë së kontinentit afrikan në diskutimet globale ekonomike, politike dhe mjedisore që po pasojnë në mbarë botën”.

Sipas tij, Afrika e Jugut ka katër prioritete për presidencën e saj me G20-tën, duke përfshirë qëndrueshmërinë ndaj fatkeqësive, qëndrueshmërinë e borxhit për vendet me të ardhura të ulëta, tranzicionin e energjisë, si dhe rritjen e qëndrueshmërisë përmes mineraleve kritike.

Duke theksuar se ndryshimet klimatike prekin vendet në zhvillim në mënyrë të pabarabartë, Ramaphosa tha se “çdo komb ka përgjegjësinë të kontribuojë në përpjekjet globale të klimës”.

Ai theksoi se fatkeqësitë natyrore të shkaktuara nga klima kanë një “ndikim veçanërisht shkatërrues në vendet që nuk mund të përballojnë kostot e rimëkëmbjes dhe rindërtimit”.

Presidenti i Afrikës së Jugut kërkoi që G20-ta të rinovojë përpjekjet për të avancuar qëndrueshmërinë e borxhit me një “theks të veçantë në vendet afrikane, më gjerëisht, në vendet në Jugun Global”.

“Ata që janë më përgjegjës për ndryshimet klimatike kanë një detyrë dhe përgjegjësi për të mbështetur ata që janë më pak përgjegj”, tha Ramaphosa.

Koalicioni botëror i punonjësve shëndetësorë “Mjekët Kundër Gjenocidit” (Doctors Against Genocide) i ka bërë thirrje Senatit amerikan që të ndërmarrë veprime për t’i dhënë fund gjenocidit në Rripin e Gazës.

“Ne jemi këtu në Senat për të kërkuar që ata të bëjnë punën e tyre“, tha për Anadolu dr. Nidal Jboor, bashkëthemelues i asociacionit DAG.

Koalicioni global i punonjësve shëndetësorë ka mobilizuar mbi 100 mjekë dhe profesionistë të tjerë shëndetësorë në Capitol, duke bërë thirrje edhe për rikthimin e financimit të Agjencisë së OKB-së për Refugjatët Palestinezë (UNRWA).

Jboor tha se DAG i bën thirrje Senatit që të pranojë dhe miratojë dy rezoluta.

“Rezoluta nr. 68 e Senatit paralajmëron kundër përfshirjes së SHBA-së, kundër vendosjes së forcave amerikane në Gaza, duke e konsideruar si joligjore zhvendosjen me forcë të palestinezëve. SHBA nuk duhet të përfshihet në këtë. Rezoluta gjithashtu thekson të drejtën e popullit palestinez, si të gjithë popujt në botë, për vetëvendosje. Pra, ne u bëjmë thirrje senatorëve që të nënshkruajnë bashkë këtë rezolutë“, shtoi ai.

Jboor shtoi se rezoluta tjetër synon të rikthejë financimin për UNRWA-në.

“Ne e dimë se për këtë do të ketë një votim në Senat dhe u bëjmë thirrje të gjithë senatorëve të punojnë për të rivendosur fondet për UNRWA-në, sepse UNRWA ofron 70 për qind të kujdesit parësor shëndetësor në Gaza“, tha ai, duke shtuar se roli i agjencisë është “shumë vendimtar”.

UNRWA, e themeluar në vitin 1949, ofron shërbime shëndetësore, arsimore dhe sociale për refugjatët palestinezë në Bregun Perëndimor të pushtuar, Kudsin Lindor, Liban, Jordani dhe Gaza.

Megjithatë, Izraeli muajin e kaluar urdhëroi agjencinë të mbyllte të gjitha operacionet e saj në Kudsin Lindor.

Shefi i UNRWA-së, Philippe Lazzarini, ka theksuar vazhdimisht se agjencia është “shtylla kurrizore” e reagimit humanitar në Gaza.

Në nëntor, Gjykata Ndërkombëtare Penale lëshoi ​​urdhrarreste për kryeministrin izraelit Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.

Izraeli po përballet gjithashtu me padi për gjenocid në Gjykatën Ndërkombëtare të Drejtësisë për luftën e tij në enklavë.

Pas kritikave të ashpra të Presidentit amerikan Donald Trump ndaj udhëheqësit të Ukrainës të mërkurën, ky i fundit tha se po përgatitej për një takim të enjten me të dërguarin e zotit Trump në Kiev, për të punuar drejt “një paqeje të qëndrueshme” me Rusinë.

“Për ne është thelbësore që takimi dhe bashkëpunimi ynë në përgjithësi me Shtetet e Bashkuara të jetë konstruktiv”, tha zoti Zelenskyy në fjalimin e mbrëmjes drejtuar kombit.

“Së bashku me Shtetet e Bashkuara dhe Evropën, paqja mund të jetë më e sigurt dhe ky është qëllimi ynë”, shtoi ai më tej.

Të mërkurën Presidenti Trump dhe Presidenti Zelenskyy shkëmbyen akuza në distancë. Presidenti amerikan e quajti zotin Zelenskyy një “diktator të pazgjedhur” ndërsa udhëheqësi i Ukrainës akuzoi zotin Trump se jeton në një “hapësirë dezinformimi” të ndikuar nga Rusia.

Ndërsa fati i luftës trevjeçare Rusi-Ukrainë mbetet i paqartë, zoti Zelesky druhet se udhëheqësi amerikan po përpiqet t’i japë fund sulmit rus, me kushte më të favorshme për Moskën sesa Kievin.

Presidenti Trump akuzoi gjithashtu zotin Zelensky për refuzim të zhvillimit të zgjedhjeve në Ukrainë, të cilat ishin planifikuar të mbaheshin në prill të vitit 2024, por që u shtynë për shkak të sulmit rus ndaj Ukrainës në vitin 2022.

Presidenti Trump e quajti zotin Zelensky një “një komedian me sukses modest”, që arriti të bindë Shtetet e Bashkuara të Amerikës për të shpenzuar 350 miliardë dollarë, për t’u futur, siç tha ai ‘në një luftë që nuk mund të fitohej, e cila nuk duhej të kishte filluar kurrë në radhë të parë, e që tashmë nuk mund të fitohej pa Shtetet e Bashkuara dhe Donald Trump-in”.

Udhëheqësi amerikan, i cili refuzoi vitin e kaluar gjatë një debati politik të thoshte nëse donte që Ukraina ta fitonte luftën, tha se “e vetmja gjë për të cilën Zelesky ishte i mirë, ishte manipulimi i ish-Presidentin amerikan Joe Biden, për më shumë ndihma ushtarake’.

“Unë e dua Ukrainën”, tha Presidenti Trump, “por Zelensky ka bërë një punë të tmerrshme, vendi i tij është shkatërruar dhe miliona kanë vdekur pa qenë e nevojshme – dhe kështu do të vazhdojë…”.

Kritikat e Presidentit Trump ndaj zotit Zelensky erdhën pasi udhëheqësi ukrainas shprehu zemërimin e tij për mospërfshirjen e Kievit në bisedimet diplomatike të nivelit të lartë SHBA-Rusi, që u mbajtën të martën në Arabinë Saudite.

Pas më shumë se katër orë bisedimesh Uashingtoni dhe Moska thanë se kishin rënë dakord të takoheshin sërish së shpejti, për të përcaktuar se si t’i jepnin fund luftës.

Po kështu u ra dakord për rikthimin e funksionimit normal të misioneve të ndërsjella diplomatike, si dhe për rritje të bashkëpunimit në fusha me interes të përbashkët, përfshi ekonominë.