Reperi amerikan A$AP Rocky ka reaguar për herë të parë publikisht lidhur me incidentin e rëndë që ndodhi në muajin mars, kur një grua dyshohet se hapi zjarr drejt shtëpisë së tij dhe të partneres së tij, Rihannas, në Beverly Hills.

Më 25 mars, autoritetet amerikane ngritën 14 akuza penale ndaj Ivanna Ortizit, përfshirë tentativë vrasjeje, 10 akuza për sulm me armë gjysmëautomatike dhe tri akuza për të shtëna ndaj një objekti banimi. Sipas prokurorisë, ajo dyshohet se më 8 mars qëlloi me një pushkë gjysmëautomatike të tipit AR-15 drejt rezidencës së çiftit.

Në një intervistë për revistën “VIBE”, A$AP Rocky e cilësoi ngjarjen si jashtëzakonisht të rëndë, duke treguar ndikimin që ajo ka pasur te familja e tij.

“Dikush tentoi të më dëmtonte mua dhe familjen time. Kjo na mori shumë nga qetësia dhe lumturia për të jetuar të lirë. Nuk dua të më merret paqja dhe gëzimi”, u shpreh artisti.

A$AP Rocky dhe Rihanna jetojnë me tre fëmijët e tyre, RZA, Riot dhe Rocki. Sipas mediave amerikane, Rihanna dhe fëmijët ndodheshin në shtëpi në momentin e të shtënave, por fatmirësisht askush nuk pësoi lëndime.

Prokurori i Qarkut të Los Anxhelosit, Nathan Hochman, dënoi ashpër incidentin, duke theksuar se përdorimi i armëve të zjarrit në zona të banuara paraqet rrezik serioz për jetën e qytetarëve.

“Hapja e zjarrit në një lagje të populluar është jashtëzakonisht e rrezikshme. Jemi mirënjohës që askush nuk u lëndua, por një dhunë e tillë e papërgjegjshme do të ndiqet penalisht”, deklaroi ai.

Nëse shpallet fajtore për të gjitha akuzat, Ortiz mund të përballet me burgim të përjetshëm.

Burime pranë çiftit kanë bërë të ditur se pas incidentit Rihanna ka forcuar masat e sigurisë dhe ka shtyrë disa angazhime profesionale. Sipas tyre, këngëtarja mbetet e tronditur nga fakti se familja e saj mund të ketë qenë në shënjestër.

“Rihanna dëgjoi të shtënat, por fillimisht nuk e kuptoi se çfarë po ndodhte. Edhe me një ekip të fortë sigurie, është e frikshme të kuptosh se diçka e tillë mund të ndodhë”, tha një burim i afërt me familjen.

Cara Delevingne ka nisur zyrtarisht karrierën e saj muzikore me publikimin e dy këngëve të para, “I Forgot” dhe “Out of My Head”, të cilat janë frymëzuar nga përvojat personale me shëndetin mendor dhe rrugëtimi i saj drejt esëllimit.

Modelja dhe aktorja britanike, e njohur për karrierën e suksesshme në industrinë e modës dhe për rolet në filma e seriale të njohura, tha se kënga “Out of My Head” është frymëzuar nga viti i saj i parë pa varësi. Sipas saj, kënga pasqyron konfliktet e brendshme dhe sfidat emocionale me të cilat u përball gjatë asaj periudhe.

Ajo tregoi se refreni i këngës u ndryshua në “Out of My Head”, pasi përfaqëson përpjekjen e saj të përditshme për të dalë nga cikli i mendimeve të tepërta.

Ndërkohë, kënga “I Forgot” trajton vështirësitë e shëndetit mendor dhe emocionet e forta që e shoqërojnë atë. Delevingne tha se dëshironte të krijonte një këngë që reflekton realitetin e ashpër dhe ndonjëherë të dhimbshëm të këtyre përvojave.

Ajo shtoi se muzika është bërë mënyra më e shëndetshme për të shprehur emocionet dhe për të përballuar zemërimin, diçka me të cilën ka pasur vështirësi gjatë jetës së saj.

Delevingne ka folur edhe më herët për betejën me depresionin dhe varësinë, duke treguar se programi i trajtimit me 12 hapa e ka ndihmuar në procesin e rikuperimit.

Sipas saj, përmes muzikës dëshiron të shfaqë një anë më personale dhe autentike të vetes, duke theksuar se të gjithë njerëzit përballen me dhimbje dhe sfida, ndërsa muzika ka fuqinë t’i bashkojë ata përmes përvojave të përbashkëta.

Dy këngët janë shoqëruar edhe me një videoklip shtatëminutësh me elemente kinematografike, i realizuar nga Jessica Lee Gagné.

Pas gati një dekade betejash ligjore, divorci mes Angelina Jolie dhe Brad Pitt po i afrohet përfundimit. Më 12 korrik, binjakët e tyre Vivienne dhe Knox mbushin 18 vjeç, duke mbyllur edhe çështjen e kujdestarisë së fëmijëve.

Jolie kërkoi divorcin në vitin 2016, duke akuzuar Pitt për sjellje abuzive gjatë një fluturimi privat. Aktori i ka mohuar vazhdimisht akuzat, ndërsa autoritetet amerikane nuk ngritën akuza për mungesë provash. Sipas mediave amerikane, Pitt ka kontakte të kufizuara me fëmijët e tij, ndërsa disa prej tyre kanë hequr ose po kërkojnë të heqin mbiemrin e tij.

Ish çifti vazhdon të jetë në konflikt ligjor edhe për pronën dhe vreshtarinë franceze Chateau Miraval.