Kompania e Elon Musk e cila synon të vendosë çipet kompjuterike në trurin e njeriut, Neuralink, ka marrë aprovimin e autoriteteve amerikane për lansimin e studimit të parë te njeriu.

Një gjë e tillë i ka hapur rrugë vendosjes së pajisjeve nga Neuralink te njeriu dhe lajmi vjen pasi Elon Musk pretendoi gjatë muajit nëntor se kompania e tij është vetëm gjashtë muaj larg nga testimi i parë.

Por kush do të ishte i gatshëm të pranonte vendosjen e një pajisje të tillë në trurin e tij? A do të jetë dikush që ka një gjendje shëndetësore prej së cilës do të kishte përfitime nëse vendos një çip nga Neuralink?

Kompania është akuzuar vazhdimisht se ka abuzuar me testet e bëra te majmunët, akuza që kompania vazhdimisht i mohon dhe aktualisht është nën hetime.

Administrata Amerikane e Ushqimit dhe Barnave (FDA) refuzoi kërkesën e parë të Neuralink në fillim të 2022 për testime te njeriu. Por nuk është kompania e parë që e pretendon të bëjë një gjë të tillë. Synchron u aprovua nga FDA për të nisur testimet në vitin 2021 dhe korrikun e vitit të kaluar zbuloi implantin e parë kompjuterik./PCWorld Albanian

Meta Platforms vazhdoi me raundin e fundit të largimeve nga puna, tha një burim i njohur me çështjen, si pjesë e një plani që u shpall gjatë muajit mars nga kompania.

Gjatë muajit mars, Meta u bë kompania e parë Big Tech që njoftoi një raund të dytë pushimesh masive nga puna.

Shefi Ekzekutiv i Metas, Mark Zuckerberg tha gjatë muajit mars se pjesa më e madhe e pushimeve nga puna në raundin e dytë të kompanisë do të ndodhin në tri “momente” gjatë disa muajve, kryesisht duke përfunduar në maj./UBTNews/

WhatsApp thotë se do t’i lejojë përdoruesit t’i ndryshojnë mesazhet që i dërgojnë, ky është një ndryshim që është i njëjtë me disa prej konkurrentëve si Telegram dhe Signal.

Kompania thotë se mesazhet mund të modifikohen deri në 15 minuta pas dërgimit.

Shërbimi i mesazheve të çastit është pjesë e gjigantit amerikan të teknologjisë Meta, i cili zotëron gjithashtu Facebook dhe Instagram.

Ky funksion do të vihet në dispozicion për 2 miliardë përdorues të WhatsApp në javët e ardhshme. Ajo numëron Indinë si tregun e saj më të madh, me 487 milionë përdorues.

“Nga korrigjimi i një gabimi të thjeshtë drejtshkrimor deri tek shtimi i kontekstit shtesë në një mesazh, ne jemi të lumtur që ju sjellim më shumë kontroll në bisedat tuaja”, thanë me anë të një postimi nga Meta të hënën.

“Gjithçka që duhet të bëni është të shtypni gjatë një mesazh të dërguar dhe të zgjidhni ‘Ndrysho’”, thuhet në njoftim.

Mesazhet e modifikuara do të etiketohen si “të redaktuara”, kështu që marrësit janë të vetëdijshëm se përmbajtja është ndryshuar.

Megjithatë, atyre nuk do të tregohet se si mesazhi është modifikuar me kalimin e kohës, shkruan BBC, transmeton Klankosova.tv.

Montana është bërë shteti i parë amerikan që e ka ndaluar aplikacionin kinez të videove të shkurtra, TikTok.

Guvernatori i Montanas, Greg Gianforte, e ka nënshkruar dokumentin në ligj, të mërkurën.

“Për të mbrojtur banorët e Montanas, të dhënat personale dhe private nga Partia Komuniste Kineze, e kam ndaluar TikTok-un në Montana”, ka thënë Gianforte, pas nënshkrimit të ligjit.

Vendimi i ri ua ndalon kompanive ofrimin e këtij aplikacioni nga 1 janari i vitit të ardhshëm, si dhe e parandalon TikTok-un nga operimi si biznes në shtet.

Për secilën ditë që kjo platformë do të jetë e qasshme, pas fuqizimit të ligjit, ofruesit e aplikacionit do të duhet të paguajnë gjobë prej 10.000 dollarëve.

Përdoruesit nuk do të gjobiten, dhe ata që e kanë përdorur aplikacionin në të kaluarën nuk do të preken nga vendimi.

TikTok-u nuk ka reaguar ende ndaj këtij ndryshimi ligjor.

Në ditët në vijim pritet të ketë ankesa ose padi që sfidojnë këtë vendim, me arsyetimet e lirisë së shprehjes.

Në pronësi të kompanisë kineze, ByteDance, TikTok veçse është ndaluar në pajisjet qeveritare të Kanadasë, Australisë, Zelandës së Re, Britanisë, dhe Shteteve të Bashkuara.

Të gjitha këto shtete i kanë përmendur shqetësimet për sigurinë kibernetike, si arsye për vënie të ndalesës.

Aplikacioni ka më shumë se një miliard përdorues në gjithë botën, dhe përdoret gjerësisht në SHBA dhe Evropë.

Ekzistojnë shqetësime se autoritetet kineze dhe shërbimet sekrete, mund ta përdorin aplikacionin për të mbledhur informacion nga përdoruesit, dhe të përhapin më pas ndikim.

Kompania, në anën tjetër, i ka hedhur poshtë këto sugjerime./REL