Përfaqësuesja e Spanjës është dënuar nga FIFA me mbyllje të pjesshme të stadiumit në ndeshjen e ardhshme miqësore, pas thirrjeve diskriminuese të tifozëve ndaj myslimanëve gjatë përballjes me Egjiptin.

Incidenti ndodhi më 31 mars, në stadiumin “RCDE” të Espanyolit në Barcelonë, ku një grup tifozësh spanjollë u dëgjuan duke bërë thirrje islamofobike në minutën e dhjetë të pjesës së parë, të cilat u përsëritën edhe gjatë pjesës së dytë.

Gjatë ndeshjes, në ekranin e madh të stadiumit u shfaq një mesazh paralajmërues, përmes të cilit tifozëve iu kërkua të ndalonin thirrjet diskriminuese.

Pas incidentit, FIFA nisi procedurë disiplinore për sjellje islamofobike dhe ksenofobike, ndërsa vendimi për dënimin u zyrtarizua të premten.

Sipas vendimit, Spanja do të duhet të mbyllë 15 për qind të kapacitetit të stadiumit për tifozët në miqësoren e ardhshme. Megjithatë, këto vende mund të shfrytëzohen nga familjarë, studentë dhe përfaqësues të organizatave që luftojnë diskriminimin.

Përveç këtij dënimi, Federata Spanjolle e Futbollit është gjobitur me rreth 20 mijë euro.

Përballja miqësore ndërmjet Spanjës dhe Egjiptit kishte përfunduar pa gola, 0:0.

D.L

Kryetari i Prishtinës, Përparim Rama, ka paralajmëruar se Kosova rrezikon të humbasë organizimin e Lojërave Mesdhetare “Prishtina 2030”, pasi Komiteti Ndërkombëtar i Lojërave Mesdhetare (ICMG) ka ngritur shqetësime për mospërmbushjen e detyrimeve financiare dhe vonesat në procesin përgatitor.

Në një konferencë për media, Rama tha se ICMG-ja, përmes një letre zyrtare të dërguar më 15 tetor, ka paralajmëruar për vonesat dhe mungesën e përmbushjes së detyrimeve. Ai theksoi se më 19 dhjetor 2026 do të shqyrtohet e ardhmja e organizimit të Lojërave Mesdhetare në Prishtinë.

“Dje, pra më 15 tetor, komiteti ndërkombëtar i lojërave mesdhetare ICMG ka dërguar një letër zyrtare përmes së cilës paralajmëron për vonesat dhe mospërmbushjen e detyrimeve që rrezikojnë organizimin e lojërave mesdhetare në Prishtinë. Kjo nuk është letra e parë; është vazhdimësi e paralajmërimeve që kanë nisur muaj më parë dhe që, fatkeqësisht, nuk kanë marrë përgjigjen e duhur nga qeveria. ICMG konstaton se letra 21 shtatorit ka mbetur pa përgjigje. Garancia bankare ose e sigurimit e kërkuar që nga janari nuk është dorëzuar dhe detyrimet financiare që është dashur të përmbushen në qershor nuk janë paguar. Për më tepër, afatet për funksionalizimin e strukturave organizative, përgatitjen e masterplanit, buxhetit dhe proceseve të tjera janë shkelur vazhdimisht”, tha Rama.

Ai akuzoi Qeverinë e Kosovës për mungesë koordinimi dhe mosreagim ndaj kërkesave të kryeqytetit për mbledhjen e bordit drejtues, duke thënë se kryeministri Albin Kurti, si kryesues i këtij bordi, ka përgjegjësi për thirrjen e mbledhjeve.

Sipas Ramës, pas mbledhjes së 14 gushtit nuk është thirrur asnjë mbledhje tjetër e bordit, pavarësisht kërkesave të përsëritura nga kryeqyteti.

“Më 30 shtator, duke parë seriozitetin e situatës, kryeqyteti ndërmori iniciativën për thirrjen e mbledhjes së jashtëzakonshme më 8 tetor. Sipas statusit, nga 13 anëtarët e bordit kërkoheshin të paktën pesë nënshkrime. Tre përfaqësuesit e kryeqytetit e nënshkruan kërkesën. Përfaqësuesit e qeverisë dhe të Komitetit Olimpik të Kosovës nuk iu përgjigjën ftesës për nënshkrim. Si rezultat, mbledhja nuk u mbajt”, tha ai.

Rama theksoi se Komuna e Prishtinës ka përmbushur një sërë angazhimesh, përfshirë miratimin e statusit të komitetit organizativ, regjistrimin e organizatës dhe propozimin e pesë porteve urbane, të cilat, sipas tij, janë miratuar nga ICMG-ja më 29 qershor.

Ai theksoi se kryeqyteti ka paraqitur edhe propozimet për lokacionet sportive në Kuvendin Komunal, ndërsa ka kërkuar që institucionet përgjegjëse të veprojnë me urgjencë për të shmangur rrezikimin e organizimit.

“Në anën tjetër, kryeqyteti ka përmbushur një sërë angazhimesh konkrete. Së bashku me Komitetin Olimpik të Kosovës, kemi miratuar statusin e komitetit organizativ më 8 qershor dhe kemi përfunduar procesin e regjistrimit të organizatës më 24 qershor. Kemi propozuar pesë porte urbane, të cilat janë miratuar nga ICMG-ja më 29 qershor. Po ashtu, kemi paraqitur për votim në Kuvendin e kryeqytetit propozimet për lokacionet sportive. Por sot, kemi një paralajmërim që nuk mundemi me e injoru. ICMG-ja ka vendosur afate të reja për përmbushjen e detyrimeve. Dhe më e rëndësishmja, më 19 dhjetor 2026 do të shqyrtohet e ardhmja e lojërave mesdhetare Prishtina 2030. Kjo do të thotë se nuk kemi kohë sot për vonesa, nuk kemi kohë për mungesë koordinimi, nuk kemi kohë për heshtje institucionale. Lojërat mesdhetare nuk janë projekt i vetëm një individi, apo i një partie, apo i një institucioni. Lojërat mesdhetare janë një angazhim ndërkombëtar i Republikës së Kosovës dhe një mundësi historike për zhvillimin e sportit, të infrastrukturës, ekonomisë dhe promovimit të vendit tonë”, tha Rama.

Kreu i Prishtinës ia atribuoi një pjesë të vonesave edhe kërkesës së kryeministrit Kurti për ndryshimin e emrit të ngjarjes nga “Prishtina 2030” në “Kosova 2030”, si dhe insistimit që kryeministri të jetë kryetar i bordit drejtues.

“Edhe ta bëj edhe një gjë shumë të qartë: dy vjet, dy vjet i kemi humbur sepse kryeministri Albin Kurti ka kërkuar që emri i lojërave mesdhetare të ndryshohet nga Prishtina 2030 në Kosova 2030. Natyrisht, kjo kërkesë nuk është aprovuar, sepse në të gjithë botën lojërat mesdhetare mbajnë emrin e qytetit. Absurditeti tjetër ka qenë kërkesa e tij, apo insistimi i tij, që kryeministri të jetë kryetar i bordit drejtues, një praktikë e paparë faktikisht askund tjetër. Pra, vetëm te ne kryeministri kërkon të jetë edhe kryetar i bordit drejtues i lojërave mesdhetare, derisa natyrisht ka shumë pak kohë, apo hiç kohë, sepse ka punë të tjera më të mëdha për t’u marrë”, tha Rama.

Ai kërkoi përgjegjësi nga institucionet përkatëse, duke ngritur shqetësimin se mungesa e përgjigjeve dhe e vendimmarrjes mund ta rrezikojë një mundësi të rëndësishme për Kosovën.

“Pse nuk janë përmbushur detyrimet financiare? Po them, po e përmend edhe një herë: kemi këtu letrën nga ICMG, e cila është dërgu dje, që e bën këtë pyetje të saktë. Pse nuk është dërguar garancia e kërkuar? Pse nuk janë thirrë mbledhjet e bordit drejtues, pra po them edhe kemi letrën tjetër që vetëm kryeqyteti e ka nënshkruar, deri sa të tjerët e kanë injoruar? Dhe kush do ta marrë përgjegjësinë nëse Kosova e humb këtë mundësi historike? Prishtina i ka përmbushur përgjegjësitë e saj, dhe vazhdimisht ka kërkuar me u mbledh bordi pa përgjigje, qeveria nuk e ka kthyer asnjë email, as te ne, as te komiteti ndërkombëtar, dhe jemi në rrezik të humbjeve të lojërave. Nuk jam këtu për me u ankuar. Po ngre alarm publik për alarmet që ka ngritur ICMG. Që për shkak të mospërgjigjeve, mosveprimit të qeverisë, mund t’i humbim lojërat mesdhetare. Edhe ta bëj edhe një gjë shumë të qartë: 2 vjet, 2 vjet i kemi humbur sepse kryeministri Albin Kurti ka kërkuar që emri i lojërave mesdhetare të ndryshohet nga Prishtina 2030 në Kosova 2030. Natyrisht, kjo kërkesë nuk është aprovuar, sepse të gjithë botën lojërat mesdhetare mbajnë emrin e qytetit. Absurditeti tjetër ka qenë kërkesa e tij, apo insistimi i tij, që kryeministri të jetë kryetar i bordit. Drejtues, një praktikë e paparë, faktikisht askund tjetër. Pra, vetëm te ne kryeministri kërkon të jetë edhe kryetar i bordit drejtues i lojërave mesdhetare, derisa natyrisht ka shumë pak kohë, apo hiç kohë, sepse ka punë të tjera më të mëdha për me u marrë”, tha ai./A.K/

Sulmuesi i Kosovës, Fisnik Asllani, ka realizuar golin e tij të parë në garat evropiane, në humbjen 3:2 të Hoffenheimit ndaj Beshiktashit, në kuadër të xhiros së dytë të Ligës së Evropës.

Asllani u bë protagonist në minutën e 68-të, kur pas disa lëvizjeve të bukura pranë zonës kundërshtare, realizoi një gol të shkëlqyer për të barazuar rezultatin në 1:1.

Ky ishte goli i parë i sulmuesit kosovar në këtë sezon, si dhe realizimi i tij i parë në arenën evropiane.

Megjithatë, goli i tij nuk mjaftoi për Hoffenheimin, që në fund u mposht me rezultat 3:2 nga skuadra turke.

Asllani kishte kontribuar edhe fundjavën e kaluar me një asistim në Bundesligë, në humbjen 3:2 ndaj Hamburgut.

Për Hoffenheimin, ndeshjen e plotë e zhvilluan Fisnik Asllani dhe Leon Avdullahu, ndërsa Albian Hajdari mungoi për shkak të lëndimit. Në anën tjetër, te Beshiktashi nuk ishte i pranishëm as Milot Rashica.

D.L

Juventusi ka regjistruar fitoren e dytë radhazi në Ligën e Evropës, duke mposhtur në udhëtim Celta Vigon me rezultat 2:1, falë golit të Randal Kolo Muanit në minutat shtesë.

Përballja e zhvilluar të enjten mbrëma, në kuadër të xhiros së dytë të fazës së ligës, nisi më mirë për vendasit, të cilët kaluan në epërsi në minutën e 18-të me golin e Hugo Alvarez.

Skuadra italiane reagoi në pjesën e dytë, kur Nick Woltemade shfrytëzoi një gabim në mbrojtjen kundërshtare për të barazuar rezultatin në minutën e 58-të.

Kur ndeshja po shkonte drejt barazimit, Kolo Muani realizoi në minutën e 92-të, duke i siguruar Juventusit tri pikë të rëndësishme.

Në këtë përballje mungoi futbollisti kosovar Edon Zhegrova, i cili nuk është i regjistruar për garat e Ligës së Evropës dhe pritet të mbetet jashtë të paktën deri në janar.

Me këtë triumf, Juventusi regjistron dy fitore në dy ndeshje, ndërsa Celta Vigo pëson humbjen e dytë në këtë edicion.

D.L