Ish-presidentja e Kosovës, Atifete Jahjga ka takuar ish-presidentin amerikan, Barack Obama, të cilin e ka falënderuar për mbështetjen e jashtëzakonshme që i ka dhënë Kosovës. Ky takim ndodhi gjatë një samiti global në Erie, Pensilvani, ku ajo adresoi pasojat e luftës.

“Me ftesë të The Jefferson Educational Society, sot mora pjesë në samitin global në Erie, Pensilvani, do flas për adresimin e pasojave të luftës gjatë mandatit tim si Presidente e Kosovës.  Në margjinat e samitit, pata nderin të takoj Presidentin Barack Obama, të cilin e falënderova për mbështetjen e jashtëzakonshme që i ka dhënë Kosovës gjatë mandatit tim, si dhe për përkushtimin e vazhdueshëm të Shteteve të Bashkuara ndaj vendit tonë. Kërkova nga Presidenti Obama angazhimin e mëtejshëm në forcimin e marredhenieve ndermjet SHBA dhe Kosoves, te cilat jane sfiduar me pezullimin e dialogut strategjik se fundmi. Kërkova edhe ndihmën dhe përkrahjen e z. Obama në konsolidimin e shtetësisë tonë në arenën ndërkombëtare”, ka shkruar Jahjaga.

Ajo ka ritheksuar edhe historinë  ndër vite të partneriteti dhe mbështetjes amerikane për Kosovën, përcjell Ekonomia Online.

“Kosova nuk ka pasur dhe nuk do të ketë kurrë aleat më të madh se Shtetet e Bashkuara të Amerikës dhe populli amerikan. Falë këtij partneriteti, ne sot gëzojmë lirinë, pavarësinë, njohjen ndërkombëtare dhe anëtarësimin në shumë organizata botërore. Për këtë mbetemi përjetësisht falënderues”, përfundon shkrimi i ish-presidentes./S.K/EO/

Të martën është raportuar se janë suspenduar katër policë të Njësisë Speciale, pikërisht të Njësisë për Reagim të Shpejtë, Sami Hoti, Sedat Ramadani, Alert Kuqi dhe Artan Krasniqi.

Sipas raportimeve, suspendimi i tyre u bë pasi policët kishin bërë shaka mes kolegësh me kryetarin e Kuvendit të Kosovës, Dimal Bashën.

Eksperti i sigurisë, Drizan Shala, kritikoi vendimin duke thënë se ai është rezultat i interferimeve politike dhe rrezikon të dëmtojë imazhin e Policisë së Kosovës.

“Tani është e qartë që interferimi politik padyshim ka ndikuar te pjesa e kontrollit të brendshëm të policisë së Kosovës, edhe pse suspendimi nuk ka ardhur si rezultat apo i ndonjë kërkese të IPK-së, por ka ardhur sipas të gjitha gjasave nga një presion i jashtëm politik dhe që mekanizmi i brendshëm policor i kontrollit nuk do të duhej fare të bie pre e këtij provokimi, pavarësisht asaj që ne nuk e dimë në fakt se çfarë shakaje dhe çfarë karakteri shakaje ka qenë ajo me të cilën është bërë dhe se si është bërë.
Por, sipas të gjitha gjasave zyrtarët policorë do të rikthehen në detyrë dhe me këtë gjë po humbet figura institucionale e policisë së Kosovës nga interferimet e caktuara, sepse këto grupet e mbyllura padyshim në vetvete ngërthejnë një element krucial. Pra, elementi i asaj që skena politike ka tentuar të devalvojë strukturën policore dhe ndoshta ndonjë koment apo mendim i ndonjë zyrtari policor është parë në formatin e një kërcënimi apo një prishje të imazhit, që në fakt nuk korrespondon me realitetin e fjalës”, tha Shala.

Sipas tij, veprime të tilla mund të demoralizojnë stafin policor dhe të ndikojnë në funksionimin e strukturave të sigurisë.

“Fakti që shumica e zyrtarëve policorë tanimë edhe me pjesën e përcaktimit të pagës, pjesën e përcaktimit të rrezikshmërisë dhe baraspeshimi në aspekte të ndryshme administrative ka krijuar një pakënaqësi të madhe, interferimet dhe marrja e masave, të themi administrative, të ndikuara dhe të motivuara politikisht mund të ndikojnë drejtpërdrejt në mbarëvajtjen e procesit, sepse ne kemi një element krucial. Elementi i asaj që nuk po kemi mundësi ta mbulojmë pjesën e nevojave tona me zyrtarë të rinj policorë për arsye që po janë të njohur me problematikën brenda strukturave policore, sepse problemet brenda policisë së Kosovës janë shumë më të thella dhe shumë më të rënda se ndoshta janë në shqyrtim të parë, për arsye që janë të mbingarkuar, kanë një mospërkrahje institucionale. Por, nevojat e tyre dhe të gjitha këto reflektojnë në një veprim ndoshta të motivuar, që sipas të gjitha gjasave politikisht, për suspendimin e zyrtarëve policorë”, tha Shala.

Shala shtoi se deri tani ky mekanizëm ka funksionuar në mënyrë të pavarur dhe pa ndikime politike, duke ruajtur imazhin dhe llogaridhënien brenda Policisë së Kosovës.

“Policia e Kosovës ka kontrollin e brendshëm dhe kontrollin e jashtëm. Pra, në kuadër të kontrollit të brendshëm hyjnë të gjitha masat disiplinore që vijnë nga ana e zyrtarëve policorë dhe që ndërmerren. Pra, në kuadër të kësaj kemi veprime të caktuara hetimore preliminare dhe në rast se ka elemente kriminale apo të veprës penale, më pas delegohen te mekanizmi i jashtëm që është IPK-ja. Deri në këtë masë, kontrolli i brendshëm deri më tani ka qenë në masën më të madhe të pandikuar politikisht për marrjen e veprimeve të caktuara për ta ruajtur imazhin e policisë së Kosovës dhe për të garantuar llogaridhënie brenda mekanizmit përkatës, por në fakt tanimë nga ndryshimet e këtyre viteve që kemi lënë pas, vërehet një tendencë e nivelit politik të interferojë brenda kontrollit të brendshëm policor”, tha Shala./S.K/KP/

Në Qendrën Korrektuese të Dubravës është zhvilluar një bastisje e qëllimshme nga Departamenti i Sigurisë, në bashkëpunim edhe me njësinë K9.

Gjatë këtij operacioni është parandaluar tentativa e disa të dënuarve, të cilët, duke shfrytëzuar programin e punësimit jashtë institucionit, kanë tentuar të fusin në mënyrë të kontrabanduar substanca të dyshuara narkotike, telefona, dhe suplemente të ndryshme brenda institucionit.

“Materialet e dyshuara janë konfiskuar, ndërsa për rastin është njoftuar Policia e Kosovës për ndërmarrjen e procedurave të mëtejme ligjore”, thuhet në njoftim.

Sipas njoftimit të dënuarit e dyshuar humbin privilegjin e mundësuar nga rendi shtëpiak dhe ndaj tyre do të iniciohen procedura penale./S.K/KP/

Presidentja e Kosovës, Vjosa Osmani ka zhvilluar bisedë telefonike me diplomatin amerikan, Brendan Hanrahan.

Përmes një postimi në rrjetin social “X”, Osmani tha se me diplomatin amerikan bisedoi për rëndësinë e ruajtjes së aleancës së fortë me SHBA si partner strategjik.

“Sot pata një telefonatë me Zyrtarin e Lartë të Byrosë,Brandon Hanrahan, gjatë së cilës u përqendrova në rëndësinë e ruajtjes së aleancës sonë të fortë dhe sigurimit të koordinimit të ngushtë me partnerin tonë kyç. Aleanca e fortë me SHBA-në ka qenë gjithmonë në dobi të popullit tonë, sigurisë kombëtare, stabilitetit rajonal dhe integrimit euroatlantik. Si Presidente e vendit tim, do të angazhohem me administratën e Presidentit Trump për të ruajtur dhe mbrojtur aleancën tonë bazuar në besim dhe bashkëpunim të ndërsjellë”, ka shkruar ajo.

Kujtojmë që ditë më parë SHBA pezulloi Dialogun Strategjik me Kosovën për veprimet e Qeverisë aktuale në detyrë./S.K/KP/