Lajmet

Mes akuzave për pazare, Komisioni për buxhet miraton rishikimin e Buxhetit

Avdullah Hoti: Pushteti duhet ta ndërrojë qasjen.

Published

4 years ago

July 27, 2021

Betim Gashi

Komisioni për Buxhet, Punë dhe Transfere ka miratuar Raportin me amendamente të Projektligjit për rishikimin e buxhetit.

Projektligji u vlerësua nga deputetët e partive në pushtet, derisa u kritikua nga ata të opozitës, të cilët edhe thanë se pushteti po sillet në mënyrë arrogante duke anashkaluar gjitha kërkesat e tyre.

Deputeti i LDK-së, Avdullah Hoti tha se pushteti duhet ta ndërrojë qasjen, pasi sipas tij është për keqardhje mungesa e bashkëpunimit edhe për çështje të rëndësishme për vendin.

“Shpresoj që të ndërrohet kjo frymë e bashkëpunimit, por shpreh keqardhje për mënyrën si i keni kaluar amendamentet. Deputeti Hamza që ka qenë gjithashtu ministër i Financave ka dhënë plotë komente, jo amendamente që kanë implikime buxhetore, por komente se si mund të përmirësohet disa prej amendamenteve që buxheti të bëhet më funksional. Gjithashtu dy-tri propozime i kam dhënë për të përmirësuar disa amendamente të cilat ju si kryetar veç i keni qitë në votim duke i mbivotuar. Nuk është kjo mënyra e duhur dhe duhet të ndërrohet kjo qasje”, tha Hoti.

Por një gjë të tillë e mohoi deputeti i LVV-së, Eman Rrahmani, cili tha se është pikërisht opozita që nuk po reflekton për të bashkëpunuar.

Sipas tij, nëse deri më tani është mësuar të bëhen “pazare” në hartimin dhe rishikimin e buxhetit, tashmë gjëra të tilla s’do të ndodhin.

“Kjo mbledhje edhe mbledhja e kaluara kanë qenë një mundësi e bashkëpunimit dhe reflektimit të opozitës për të bashkëpunuar në projekte të cilat janë në interes të qytetarit. Për shkak se ju keni qenë dëshmitarë se në mbledhjen e kaluar të komisionit janë refuzuar kërkesa të ministrive që kanë ardhur. Natyrisht që refuzohen kërkesat nga komunat, pasi kërkesat e tyre nuk kanë bazë për t’u shqyrtuar. Nëse deri tash ishte praktikë ku edhe në rishikime bëhen pazare me subjekte e deputetë, mendoj se tash ka kaluar kjo kohë. Tash do të punohet ku është interesi i qytetarëve”, tha Rrahmani.

Megjithatë, deputeti i AAK-së, Pal Lekaj, tha se pushteti ka bërë “pazar” me rishikimin e buxhetit, pasi i vetmi amendament nga opozita që ka kaluar ka qenë i deputetes, Albena Reshitaj. Ajo në zgjedhjen e presidentes Vjosa Osmani, ishte ndër të vetmet nga opozita që dha votën pro. Kjo u përmend në komision.

“Është bërë e padrejtë ndaj kërkesave të kryetarëve të komunave që kanë qenë projekte tre vjeçare. Pothuajse 80 për qind këtyre projekteve janë ndaluar për shkak të buxhetit. Të kemi bashkëpunim ndërmjet vete. Ajo që ka votuar për presidenten, kërkesa e saj është aprovuar në këtë komision. Albena Reshitajt i është aprovuar në këtë komision, këtu çka po i vjen era. Mendoj se ne nuk kemi bërë pazare me askënd. I vetmi amendament që ka kaluar është i Albena Reshitajt. Kjo është e padrejtë”, u shpreh Lekaj.

Këtë e mohoi kryetari i Komisionit nga radhët e LVV-së, Armend Muja, i cili tha se “pazari” i vetëm ka qenë minimizimi i borxhit publik.

“Ne nuk kemi bërë asnjë pazar të mundshëm. I vetmi ka qenë kushtimisht të thuhet, minimizimi i borxhit publik”, tha Muja.

Kritika ndaj këtij projektligji adresoi edhe deputeti i PDK-së, Mërgim Lushtaku, i cili tha se nuk i plotëson kërkesat e qytetarëve. \ksp

Rajoni

Rektori Hajrizi viziton UniMarconi në Romë

Published

1 day ago

November 8, 2025

Driton Iseni

Gjatë vizitës zyrtare në Itali, Rektori i UBT-së, Prof. Dr. Edmond Hajrizi, zhvilloi një vizitë në Universitetin UniMarconi, i pari institucion digjital i i akredituar në Itali.

Me këtë rast, Rektori Hajrizi u takua me Rektorin e UniMarconi-t, Prof. Marco Abate, me Prof. Ulrike Haider-Quercia, udhëheqëse e Shkollës së Doktoratës, si dhe me Prof. Francesco Gaspari, përgjegjës për bashkëpunimin ndërkombëtar.

Të dy rektorët shkëmbyen përvoja rreth zhvillimit të universiteteve moderne, bashkëpunimeve ndërkombëtare dhe mundësive për forcimin e partneritetit ndërmjet dy institucioneve në fusha të ndryshme, si mobiliteti akademik, studimet e përbashkëta, projektet kërkimore dhe inovacioni.

Lajmet

Bellingham dhe Foden rikthehen në kombëtaren e Anglisë

Published

2 days ago

November 7, 2025

UBT News

Jude Bellingham dhe Phil Foden janë rikthyer në skuadrën e Anglisë për ndeshjet kualifikuese të Kupës së Botës kundër Serbisë dhe Shqipërisë.

Trajneri Thomas Tuchel ka ftuar për herë të parë mesfushorin e Bournemouthit, Alex Scott, i cili ka bërë paraqitje mbresëlënëse këtë sezon. Nga ana tjetër, Jack Grealish dhe Danny Welbeck nuk janë përfshirë në listë, ndërsa mungojnë edhe Ollie Watkins dhe Myles Lewis-Skelly.

Bellingham, që kishte munguar në grumbullimin e kaluar për shkak dëmtimi, është rikthyer në formë me Real Madridin, duke shënuar tre gola në katër ndeshjet e fundit. Edhe Foden ka shkëlqyer me Manchester Cityn, ku shënoi dy herë në Ligën e Kampionëve kundër Borussia Dortmund.

“Jemi të kënaqur që janë rikthyer. Të dy kanë qenë vendimtarë për klubet e tyre dhe tani mund të ndihmojnë edhe kombëtaren,” tha Tuchel.

Anglia kryeson Grupin K me 18 pikë pas gjashtë ndeshjeve, ndërsa përballet me Serbinë në Wembley të enjten dhe me Shqipërinë në Tiranë të dielën.

Skuadra e Anglisë:

Portierë: Henderson, Pickford, Pope

Mbrojtës: Burn, Guehi, James, Konsa, O’Reilly, Quansah, Spence, Stones

Mesfushorë: Anderson, Bellingham, Henderson, Rice, Rogers, Scott, Wharton

Sulmues: Bowen, Eze, Foden, Gordon, Kane, Rashford, Saka./S.K/KP/

Sport

Vdes në moshën 24 vjeçare lojtari i Cowboys, Marshawn Kneeland

Published

2 days ago

November 7, 2025

UBT News

Sipas autoriteteve ligjore, ka vdekur mbrojtësi i Dallas Cowboys, Marshawn Kneeland në moshën 24 vjeçare. Ekipi lëshoi një deklaratë të enjten duke mos përmendur shkakun e vdekjes.

“Me trishtim të madh, Dallas Cowboys njoftojnë se Marshawn Kneeland ndërroi jetë tragjikisht këtë mëngjes. Marshawn ishte një shok skuadre i dashur dhe anëtar i organizatës sonë. Mendimet dhe lutjet tona në lidhje me Marshawn janë me të dashurën e tij Catalina dhe familjen e tij.”, thuhet në njoftim.

Cowboys kanë vënë në dispozicion burime këshillimi për të gjithë lojtarët, trajnerët dhe stafin.

Lojtarët aktualisht janë në javën e pushimit dhe nuk janë planifikuar të stërviten përsëri deri të hënën.

Policia e DPS-së gjeti automjetin e Kneeland të rrëzuar në Dallas Parkway në drejtim të jugut pranë Warren Parkway. Sipas raportit, Kneeland iku nga vendi i ngjarjes në këmbë dhe oficerët kontrolluan zonën me ndihmën e K-9 dhe njësive të dronëve.

Ndërsa autoritetet po kërkonin Kneeland, një dispeçer u tha oficerëve se njerëzit që e njihnin kishin marrë një mesazh në grup nga Kneeland duke i thënë lamtumirë. Përafërsisht tre orë më vonë, Kneeland u gjet i vdekur./S.K/NFL/

Rajoni

Profesorët e UBT-së përfaqësojnë institucionin në konferencën ndërkombëtare të projektit COWEB në Sarajevë

Published

2 days ago

November 7, 2025

Driton Iseni

Profesorët Dr. Engelbert Zefaj dhe Dr. Mentor Shaqiri përfaqësuan UBT-në në konferencën punuese ndërkombëtare të projektit COWEB, e cila u mbajt në Sarajevë, në ambientet e International Burch University.

Gjatë konferencës, përfaqësues nga universitete partnere të rajonit prezantuan punimet dhe rezultatet e tyre kërkimore, duke ndarë përvoja mbi zhvillimin e praktikave të reja në mësimin virtual bashkëpunues.

Në këtë kuadër, profesori i UBT-së Dr. Engelbert Zefaj mbajti një prezantim me temën: “Kultura dhe Ndërkulturaliteti në Mësimin Virtual Bashkëpunues (VCL): Ndikimet Pedagogjike dhe Vlerësimi i Studentëve”, ku theksoi rëndësinë e bashkëpunimit ndërkulturor dhe ndikimin pozitiv të tij në përmirësimin e përvojës së të nxënit.

Projekti COWEB ka për qëllim ndërtimin e kapaciteteve në institucionet e arsimit të lartë në Ballkanin Perëndimor për bashkëpunim ndërkombëtar virtual, duke promovuar pedagogji inovative dhe bashkëkrijimin e përmbajtjeve digjitale që forcojnë aftësitë dhe kompetencat e shekullit XXI.

Nëpërmjet pjesëmarrjes aktive në këtë projekt, UBT vazhdon të dëshmojë rolin e tij si një ndër institucionet lidere në avancimin e metodave bashkëkohore të mësimdhënies dhe në nxitjen e bashkëpunimit akademik ndërkombëtar në rajonin e Ballkanit Perëndimor.