Lajmet

Mehmetaj: Nuk kam pasur njohuri për njerëz të arrestuar, këto janë gënjeshtra

Ai tha se këto janë gënjeshtra nga persona të cilët kanë pasur qëllime të caktuara.

Published

4 years ago

March 24, 2022

UBT news

Ish-anëtari i BIA-s, Brahim Mehmetaj nga banka e dëshmitarit në gjykimin ndaj Salih Mustafës në Hagë ka thënë se asnjëherë nuk ka marrë pjesë në arrestimin e ndonjë personi apo mbajtjes së njerëzve në ndonjë qendër ndalimi në Zllash, siç pretendon prokuroria.

Mehmetaj ka thënë se këto janë gënjeshtra të bëra nga persona të cilët sipas tij kanë pasur qëllime të caktuara.

Në ditën e dytë të dëshmisë së tij para trupit gjykues në Dhomat e Specializuara të Kosovës në Hagë, Mehmetaj është pyetur nga prokurorja Silvia D’Ascoli, nëse ai ka marrë pjesë në arrestimin, por edhe lirimin e personave nga një qendër ndalimi në Zllash.

Krejt këto i ka mohuar dëshmitari Mehmetaj sipas së cilit gjykata duhet të merret me ata që kanë shpifur.

Prokurorja D’Ascoli: Ju morët pjesë në arrestimin e disa prej personave që u dërguan të dhoma e ndalimit në Zllash apo jo?

Dëshmitari Mehmetaj: Mund ta quaj lirisht gënjeshtra e vitit, në cilin vit është thënë nuk e di, por besoj se është gënjeshtra më e madhe që është thënë ndonjëherë në atë vit. Unë nuk kam marrë pjesë asnjëherë në asnjë arrestim, në asnjë vend, as Zllashë, as asnjë vend në Kosovë që ekziston, kjo temë arrestim për mua nuk ka ekzistuar asnjëherë.

Prokurorja D’Ascoli: Morët pjesë në keqtrajtimin e të ndaluarve që u mbajtën në dhomat e ndalimit në Zllash, në shtëpinë e sigurt të BIA-s apo jo?

Dëshmitari Mehmetaj: Nuk kam pasur dijeni për asnjë vend të ndalimit dhe as ndonjë të arrestuar apo të burgosur, çështja e keqtrajtimit e këto janë tema që janë komplet gënjeshtra të caktuara, për qëllime të caktuara, nga individë të caktuar, nuk kanë të bëjnë me mua dhe jam përgjegjës para drejtësisë, para çdo kujt, se ky veprim nuk është i imi, nuk e kam bërë asnjëherë dhe marr përgjegjësi për çdo gjë në këtë punë, sikur që do të duhej të merrnin përgjegjësi edhe njerëzit që kanë sajuar gënjeshtra dhe ju kanë lajthitur ju prokurorinë për të më futur mua brenda grupit kriminal.

Prokurorja D’Ascoli: Ju morët pjesë në lirimin e disa prej të ndaluarve që mbaheshin në bazën e BIA-s në Zllash kur filloi ofensiva serbe më datën 18-19 prill, apo rreth këtyre datave, në vitin 1999, apo jo, morët pjesë në lirimin e tyre?

Dëshmitari Mehmetaj: Me përgjegjësi të plotë penale, ligjore, morale, familjare e të gjitha me radhë, nuk kam marrë pjesë, nuk kam parë ndonjë gjë të tillë, nuk kam qenë prezent në ato vende ku ju thoni dhe nuk i kam kryer unë këto veprime asnjëherë. Krejt është gënjeshtër prej njerëzve me qëllime të caktuara me të cilët unë propozoj gjykatësen e nderuar të merret me ta për këto gënjeshtra.

Gjatë marrjes në pyetje, prokurorja ka thënë se mospërputhje në mes të deklaratave që dëshmitari Mehmetaj i ka dhënë ZPS-së në intervistën e mëparshme e atyre që po i jep sot para trupit gjykues.

Lidhur me këtë, Mehmetaj ka thënë se mund të ketë harruar ndonjë detaj për shkak të kohës së gjatë që ka kaluar nga lufta e fundit në Kosovë, por ka shtuar se është nën betim dhe para trupit gjykues po e deklaron vetëm të vërtetën.

Ndërsa avokati mbrojtës, Julius Von Bone ka kërkuar nga Mehmetaj të sqarojë nëse ndonjëherë ka qenë në dijeni për persona të ndaluar në Zllashë.

Lidhur me këtë, Mehmetaj ka thënë se kishte dëgjuar fjalë, por të cilat nuk i ka besuar e as vërtetuar ndonjëherë.

“Në drejtim të vërtetës edhe e kam thënë atëherë në atë deklaratën para prokurorit që kjo është krejt çka unë e kam dëgjuar prej burimeve jo të sigurta, e këtu e kam thënë para gjykatës që nuk kam pasur asnjë informacion zyrtar asnjëherë që është ndaluar dikush e asnjëherë nuk kam pas asnjë informacion që unë e kam ditë realisht që është ndaluar dikush. Në kuadër të organizimit dhe përgjegjësisë së gueriles BIA nuk ka pasur asnjë njeri, i cili ka pasur kompetencë të ndalojë, të mbajë ose të organizojë ndalime për asnjë lloj njeriut të asnjë lloj natyre. Guerilja BIA me përgjegjësitë e saj nuk ka pasur kompetenca territoriale, nuk ka pasur territor të cilin e ka kontrolluar, nuk ka pasur polici ushtarake brenda gueriles BIA dhe nuk ka pasur mekanizëm të sigurisë për të vlerësuar se kë duhet ndaluar ose kush paraqet rrezik për këtë punë”, ka thënë dëshmitari Mehmetaj.

Derisa është përgjigjur në pyetjet e avokatit mbrojtës, Mehmetaj ka thënë se asnjëherë më parë nuk ka dëgjuar se anëtarë të BIA-s kanë keqtrajtuar njerëz dhe se këtë e ka dëgjuar për herë të parë kur e ka lexuar aktakuzën e prokurorisë.

“Nuk kam dëgjuar asnjëherë derisa nuk e kam lexuar në aktakuzën që është përpiluar prej prokurorisë, aty në aktakuzë e kam lexuar dhe jam çuditur me atë jo realitet, atë jo të vërtetë”, ka thënë Mehmetaj.

Me këtë ka përfunduar dëshmia e Brahim Mehmetaj që është dëshmitari i parë i mbrojtjes në gjyqin ndaj Salih Mustafës, aktakuza ndaj të cilit është konfirmuar më 12 qershor 2020.

Lajmet

28 Nëntori pa kufij – Nga Shqipëria në Kosovë

Published

24 hours ago

November 28, 2025

UBTnews

28 Nëntori është data që bashkon shqiptarët kudo në botë, pa kufij e pa dallime. Është data kur historia shqiptare merr frymë më fort dhe ku kujtesa kombëtare ndizet si një flakadan që udhëheq brezat e rinj.

Në këtë ditë, 113 vjet më parë, Shqipëria shpalli pavarësinë e saj. Ismail Qemali ishte në krye të procesit të shpalljes së pavarësisë. Dhe kreu i qeverisë së parë. Por, hija e trojeve shqiptare që mbetën jashtë kufijve ishte aty. Si shpresë dhe si mungesë.

Hija e Kosovës, gjithsesi!

E për Kosovën kjo datë ka peshë të dyfishtë – lidhet me dy momente të shenjta të historisë shqiptare.

Në këtë datë historike lindi një nga figurat më të mëdha të rezistencës kosovare, Adem Jashari. Ndërsa Prekazi i asaj kohe të vitit 1955 ishte një fshat i thjeshtë, pastaj duke kaluar në vitet e errëta të represionit, heroi Adem Jashari u bë një simboli i lirisë, zëri i qëndresës dhe zemra e Ushtrisë Çlirimtare të Kosovës (UÇK). Jeta dhe sakrifica e tij padyshim është shndërruar në betim për një popull të tërë.

Historia e familjes Jashari, ishte sakrifica e kthyer në një kapitull të rrugës drejt lirisë për Kosovën.

Po në këtë datë, kur frika ishte më e madhe, kur shumëkush nuk fliste hapur, dalja e Ushtrisë Çlirimtare të Kosovës për herë të parë publikisht, tregoi se Kosova nuk do qëndronte më e heshtur. Më figurat e Mujë Krasniqit, Daut Haradinajt e Rexhep Selimit, UÇK doli nga hija po me këtë datë, më 28 nëntor, si një mesazh që flamuri kuq e zi nuk valëvitej vetëm për Shqipëri, ai do rritej edhe në Kosovë, në zemrat e të gjithë shqiptarëve të Kosovës që ishin të vendosur të mos dorëzohen.

Pra, në këtë ditë, më 28 nëntor 1997, për shumë shqiptarë rezistenca nuk ishte e shpërndarë dhe e paorganizuar, ndërsa sot dalja e parë e UÇK-së kujtohet si një nga momentet më të rëndësishme të viteve ‘90. Ky moment mbetet i gdhendur në kujtesën kolektive si nisja e një etape drejt një Kosove të lirë.

Kështu, 28 nëntori për Kosovën nuk është vetëm festa e Flamurit, ajo është data kur gjaku, historia dhe identiteti kombëtar bashkohen në një. Është dita kur kujtojmë rrënjët tona, por edhe betejat e reja. Një datë e cila na rikujton se liria nuk ishte dhuratë, por amanet i hershëm. Një datë, në të cilën gjenerata të tëra festojnë lirshëm, gjithnjë duke kujtuar deceniet me radhë kur nuk mund të festohej haptazi, kur flamuri shqiptar ishte i ndaluar, kur për një “fjalë Shqipërie” mbusheshin burgjet me të rinj e të reja shqiptare.

Falë Adem Jasharit, falë UÇK-së, falë të gjitha lëvizjeve kombëtare shqiptare, të të gjitha kohërave – 28 Nëntori mbetet një ditë ku Shqipëria dhe Kosova bëhen një./UBTNews

lajme

UBT uron 28 Nëntorin – Ditën e Flamurit dhe Pavarësisë

Published

1 day ago

November 28, 2025

Driton Iseni

Rektori i UBT-së, Prof. Dr. Edmond Hajrizi, ka uruar studentët, pedagogët dhe gjithë bashkëkombësit shqiptarë për 28 Nëntorin, Ditën e Flamurit dhe të Pavarësisë së Shqipërisë.

Në mesazhin e tij, Rektori Hajrizi thekson rëndësinë historike të kësaj dite: ngritjen e flamurit kuq e zi mbi Kështjellën e Krujës nga Skënderbeu dhe shpalljen e Pavarësisë së Shqipërisë më 28 nëntor 1912 në Vlorë, si shenjë të qëndresës, sakrificës dhe ëndrrës për liri që çdo shqiptar e mban në zemër.

Ai nënvizon se kjo ditë nuk është vetëm një kujtesë historike, por edhe një thirrje për të ndërtuar të ardhmen. “Është përgjegjësia jonë të kultivojmë dijen, të zhvillojmë talentet dhe të edukojmë brezat e rinj që ata të jenë trashëgimtarët dinjitozë të këtij kombi,” thekson Rektori Hajrizi.

UBT beson se arsimi është flaka që do të ndezë Nëntorin e Tretë të kombit tonë – një Nëntor i dijes, i punës dhe i përkushtimit të rinisë. Të rinjtë janë fuqia që do të ruajë gjuhën, identitetin dhe vlerat kombëtare, duke ndërtuar një shoqëri të drejtë dhe të suksesshme.

Gëzuar 28 Nëntorin!

Lajmet

Kuvendi i Prishtinës diskuton në seancë të jashtëzakonshme për bllokadën e buxhetit

Published

2 days ago

November 27, 2025

UBTnews

Kuvendi Komunal i Prishtinës është mbledhur në seancë të jashtëzakonshme ku kryetari Përparim Rama ka kërkuar që të bëhet bartja e mjeteve në vlerë 28 milionë euro dhe votimin e buxhetit 2026.

Por asamblistët e VV-së kanë thënë se gjithë bllokimi i Prishtinës ka ndodhur për shkak të kryetarit.

“Urime të gjithë asamblistëve që janë zgjedhur dhe falënderim për ata që e kanë përfunduar, katër vite kanë qenë të rëndësishme dhe vendimtare te kryeqytetit. Edhe sot jemi në këtë seancë në shërbim të interesit publik. Para nesh kemi bartjen e mjeteve në vlerë 28 milionë euro dhe votimin e buxhetit për vitin 2026-të prioritet absolut janë qytetarët e kryeqyteti. Fondet do të shfrytëzohen menjëherë për pagat e punëtorëve dhe për shërbimet e kryeqytetit. Kërkojë edhe 35 milionë euro te cilat u takojnë qytetarëve me ligj duhet vullnet për miratim nga ministri i financave. Ju falënderoj për përgjegjësinë dhe zotohem para jush se do të jem i pranishëm në çdo veprim, nuk e mbrojmë interesin partiak po të qytetarëve”, tha ai.

Asamblisti i VV-së, Gëzim Sveçla i tha Ramës së i bakretuar ke ardh e me turp do të përfundosh.

“Jemi këtu sepse kryeqyteti është futur në krizën më të rëndë të menaxhimit jemi këtu sepse qyteti është bllokuar qytetarët kanë mbetur pa paga dhe autobusët janë ndalur dhe kryetari ka dërguar situatën në zero. Vetëm kur punëtorët e trafikut dolën në rrugë atëherë e kuptoj se bartja e mjeteve nuk bëhet në studio televizive por në kuvendin komunal. Kriza i duhet Përparim Ramës dhe LDK e përdori këtë strategji për fushatën lokale tash dëshiron ta përdor edhe për zgjedhjet lokale. Kur buxheti është miratuar ligji thotë komuna funksion me 1/12 te buxhetit paraprakë. Është e qartë se fajtori pse u vonua buxheti i Prishtinës është Përparim Rama, ai shpik miq imagjinar, shpik bllokada, u tha qytetarëve që Qeveria ua ka bllokuar mjete është gënjeshtër vetëm në nëntor dy alokime, për çfarë bllokade po flet, çerdhe i ke lënë pa rryme. Përparimi nuk është vetëm menaxher i keq është edhe borxhli i keq borxh operatorëve ekonomik, për rryme e për gjithçka derisa ka qenë Londër pasojat i ka bartur vetë. Kur zihen punët del merresh me emra të veçantë të VV-së të njëjtin njerëz për të cilët votove ne nuk kemi ndryshuar ti ke ndryshuar, nuk ka pasur parime kurrë. E din shumë mirë cka na ke thënë për LDK, për Lumir Abdixhikun”, tha ai.

Ndërsa Leutrim Retkoceri nga PDK ka thënë se ndërprerja e autobusëve rëndon më shumë jetën e qytetarëve.

“Mbledhja e jashtëzakonshme po zhvillohet në një kohë ku krizat financiare në Prishtinë po thellohen dhe po bëhet gjithnjë më serioze. Në një kohë kur ka rritje të çmimeve dhe kostos së shtrenjte dhe e ndërprerja e autobusëve kjo e rëndon më shumë jetën e qytetarëve të Prishtinës. PDK do të votojë në këtë seancë, ndëshkimi i një qyteti të tërë për shkak të mos arritjes objektive politike nuk ka vend në qeverisje dhe nuk duhet të tolerohet” , tha ai./EO

Lajmet

Ndërpritet greva pas lëshimit të mjeteve financiare për RTK-në

Published

2 days ago

November 27, 2025

UBTnews

Sindikata e Punëtorëve të RTK-së SPERTK njofton për ndërprerjen e grevës pas zhbllokimit të situatës me buxhetin e RTK-së dhe krijimin e mundësisë për adresimin e çështjeve të mbetura, që ndikojnë drejtpërdrejt në funksionimin e transmetuesit publik.

Pas protestave dhe grevës katërditore të zhvilluara nga punëtorët e RTK-së, Qeveria e Kosovës ka ndarë mjetet për pagat e punonjësve të RTK-së, raporton KosovaPress.

Sindikata thotë se punëtorët e RTK-së gjatë gjithë kësaj periudhe nuk kanë pasur komunikim adekuat nga ata që paguhen për sigurimin e stabilitetit të institucionit dhe pagesën e pagave, gjë që ka qenë për keqardhje dhe ka rënduar situatën, duke krijuar pasiguri dhe shqetësim të panevojshëm.

Për më tepër, sindikata falënderon Qeverinë dhe kryeministrin në detyrë për ndërmarrjen e hapave që çuan në zhbllokimin e situatës me buxhetin, si një veprim i domosdoshëm për stabilitetin e institucionit dhe ruajtjen e misionit të RTK-së si transmetues publik.

SPERTK përkujton se nëse gjatë janarit 2026 hasim sërish në situata të tilla, greva mund të rikthehet menjëherë dhe në çdo formë të nevojshme./KP