

Lajmet
Mehaj: Rusia me çdo kusht kërkon destabilizimin e Kosovës
Ai ka theksuar se Kosova qëndron e vendosur në rrugën e demokracisë perëndimore dhe deklaron fuqishëm orientimin e saj euroatlantik.
Published
3 years agoon
By
UBT newsMinistri i Mbrojtjes, Armend Mehaj ka deklaruar se trazirat e fundit në veri të Kosovës dhe përfshirja e diplomatëve rusë, siç ishte rasti i ish-punonjësit të UNMIK-ut vite më parë, përfshirja e zyrtarëve rusë dhe bjellorus, gjoja si gazetarë të arrestuar nga Policia e Kosovës, si dhe vizita e ambasadorit rus në Serbi, bërë forcave serbe të grumbulluara në kufi me Kosovën, dëshmojnë se Rusia me çdo kusht kërkon destabilizimin e Kosovës.
Mehaj i ka bërë këto komente gjatë konferencës vjetore të Kartës së Adriatikut-SHBA, para ministrave të mbrojtjes dhe delegacioneve të tyre, të mbajtur dje në Split, ku theksoi se Ballkani është një objektiv i kërcënimeve kineze dhe ruse.
Ai ka theksuar se Kosova qëndron e vendosur në rrugën e demokracisë perëndimore dhe deklaron fuqishëm orientimin e saj euroatlantik. Për të konfirmuar këtë pikëpamje, në fillim të pandemisë COVID-19, ne u përpoqëm të menaxhonim situatën, por në asnjë mënyrë nuk pranuam donacione nga Rusia apo Kina.
“Të gjitha vaksinat e administruara janë të licencuara nga BE. Edhe në kohë të vështira, ne nuk e humbëm fokusin dhe orientimin tonë, sepse besojmë në partneritetin dhe miqësinë e përjetshme dhe përqafojmë vlerat demokratike në çdo kohë”, ka thënë Mehaj.
Fjalimi i plotë:
“I nderuar Ministër Banozic,
I nderuar, zv.ndihmës sekretar Adler
Të nderuar kolegë, ministra të mbrojtjes,
Si Ministër i Mbrojtjes i Republikës së Kosovës, kam nderin dhe kënaqësinë e madhe që jam sot këtu me ju, në Ministrealin e Kartës së Adriatiku- SHBA, si pjesë e Takimit Gjithëpërfshirës Rajonal.
Dëshiroj të falënderoj mikun tim, ministrin kroat të mbrojtjes, që na ftoi të marrim pjesë në këtë takim dhe për pritjen e ngrohtë si nikoqir i kësaj ngjarjeje.
Vizioni i Republikës së Kosovës është promovimi i stabilitetit dhe sigurisë, jo vetëm për qytetarët e saj, por edhe për rajonin, Evropën dhe më gjerë.
Kosova është e përkushtuar që të jetë pjesë integrale e strukturave rajonale dhe globale të sigurisë, në veçanti OKB-së, BE-së, NATO-s dhe OSBE-së.
Ne gjithashtu punojmë shumë për të qenë pjesë e nismave rajonale dhe për të promovuar marrëdhënie paqësore fqinjësore në funksion të rritjes së stabilitetit dhe besimit midis vendeve në rajon.
Situata e krijuar nga COVID-19 na e ka bërë shumë të qartë çdo vendi dhe çdo kombi se vendet mund të kenë sukses vetëm nëse veprojnë së bashku. Vetëm kur të gjithë ramë dakord për masat për parandalimin ose ngadalësimin e përhapjes së pandemisë, arritëm ta kontrollojmë atë.
Pandemia na kujtoi se një qasje gjithëpërfshirëse dhe koordinimi i aktiviteteve nga të gjitha vendet e rajonit dhe vendet në të gjithë botën është domosdoshmëri për të shpëtuar jetë dhe për të kontrolluar përhapjen e pandemisë.
Menaxhimi i pandemive ishte gjithashtu një sfidë reale për të gjithë ne. U dëshmua fuqishëm se jemi të sigurt vetëm nëse fqinjët tanë janë të sigurt. Duke qenë qoftë vend i vogël apo vend i madh, në betejën me COVID-19, ishim të barabartë.
Derisa po përpiqeshim të kuptonim sëmundjen, mbyllëm kufijtë tanë dhe hapëm shtigje të reja mbështetjeje dhe ndihme. Bashkëpunimi dhe ndihma e njëri-tjetrit ishte e vetmja rrugë.
Me ndihmën dhe mbështetjen e kombeve tona mike, përfaqësues të disave që janë ulur këtu në mesin tonë, Kosova ka marrë një numër të madh të dozave të vaksinave si donacion dhe kemi arritur të vaksinojmë një numër mjaft të madh të qytetarëve deri në 54%, kurse personelin ushtarak dhe civilëve të Ministrisë së Mbrojtjes kemi arritur ta vaksinojmë 100%.
Ne vlerësojmë shumë ndihmën dhe mbështetjen e partnerëve tanë me donacionet e vaksinave. Dhe unë shfrytëzoj këtë rast për t’ju falënderuar përzemërsisht. Një ndihmë e tillë bujare është një demonstrues i shkëlqyeshëm se duke punuar dhe ndihmuar njëri-tjetrin mund të arrijmë qëllime të mëdha.
Vetë misioni i Kartës së Adriatikut –SHBA është të sjellë vendet e Ballkanit Perëndimor më afër proceseve integruese në NATO, me qëllimin përfundimtar të rritjes së sigurisë rajonale dhe forcimit të partneritetit ndërfqinjësor.
Prandaj, ne e vlerësojmë shumë ftesën tuaj në këtë takim dhe në të njëjtën kohë, ju bëjmë thirrje të gjithëve që të shtrini dorën dhe të na lejoni t’i bashkohemi nismës, si anëtar i barabartë.
Kosova është e gatshme të marrë role dhe përgjegjësi të reja. Në muajt e fundit, ne kemi treguar përkushtim në disa mënyra. Ne kemi ndihmuar dhe mbështetur operacionin e drejtuar nga NATO për evakuimin e refugjatëve afganë dhe sapo kemi përfunduar bashkë-zbarkimin e parë të trupave të FSK-së në Kuvajt.
Sfidat e COVID-19 kanë ndikuar shumë në bashkëpunimin rajonal.
Rikthimi i bashkëpunimit midis vendeve A5 dhe të tjerëve është i një rëndësie të madhe për të rifituar qëndrueshmërinë, duke iu përgjigjur sfidave të mbrojtjes dhe sigurisë së bashku.
Është i nevojshëm bashkëpunimi më intensiv pas COVID-19 në fushën e mbrojtjes dhe sigurisë, duke pasur parasysh zhvillimin rajonal dhe më gjerë.
Kërcënimet hibride të Rusisë dhe Kinës në rajon dhe më gjerë paraqesin tregues që ne duhet të punojmë së bashku për të krijuar një mjedis më të sigurt dhe për të mbështetur njëri-tjetrin në rrugën e integrimeve.
Është e vështirë për ne që të përballemi vetëm dhe individualisht me ndikimin e vendeve të fuqishme si Kina apo Rusia, por një qasje e përbashkët bën të mundur menaxhimin e situatës, në funksion të sigurisë së qëndrueshme dhe ofrimit të mirëqenies për qytetarët tanë.
Kosova është e gatshme të kontribuojë në çdo iniciativë rajonale dhe më gjerë.
Anëtarësimi ynë në Kartën e Adriatikut do të na ofronte një mundësi më të madhe për të kontribuar drejtpërdrejt në paqen dhe stabilitetin përtej kufijve tanë.
Në të njëjtën kohë, do të përcillte edhe një mesazh të qartë për kundërshtarët e integrimit të Ballkanit Perëndimor, se kjo pjesë e botës ka një rrugë të sigurt drejt integrimit në NATO dhe se vendet e Ballkanit janë të përkushtuara për të ofruar paqe dhe stabilitet.
Siç e përmenda më herët, Ballkani është një objektiv i kërcënimeve kineze dhe ruse. Me çdo mjet të mundshëm, ata përpiqen përmes vendeve të cenueshme, në këtë rast Serbisë, të ndërhyjnë në stabilitetin e Ballkanit dhe Evropës dhe të krijojnë destabilitet si kundërmasë ndaj vlerave demokratike euroatlantike.
Duke ofruar mbështetje ushtarake dhe politike, si dhe vaksina për Serbinë, Rusia përpiqet të imponojë narrativën e saj dhe të ndikojë në Serbi, duke e përdorur atë si një përfaqësues kundër NATO-s në këtë pjesë të rajonit.
Ne ishim dëshmitarë të tentativës së Serbisë për të destabilizuar Malin e Zi dhe Bosnjë-Hercegovinën. Në aksionin e MPB-së së Kosovës në veri të Kosovës, ministrat serbë kërcënuan me luftë dhe përdorën retorikën e viteve të 90-ta. Të njëjtën gjuhë si krimineli i luftës, Sllobodan Millosheviq.
Të kujtojmë krimet e Serbisë në Kosovë: 1,1 milion qytetarë të dëbuar, 20 mijë gra të dhunuara, 230 mijë shtëpi të djegura, 1600 të zhdukur, 13 mijë të vrarë, etj. Të kujtojmë krimet e Serbisë në Bosne dhe Kroaci, me qindra mijë të vrarë, miliona të deportuar, mijëra gra të dhunuara, qindra vendbanime të djegura e shkatërruara.
Prandaj duke mos harruar kurr, është koha të rrugëtojmë së bashku drejtë anëtarësimit në NATO.
E ashtuquajtura Qendra Humanitare Ruse në jug të Serbisë dhe TV Rus “Sputnik” , transmetues në Serbi, janë qendra propagande dhe dezinformimi kundër NATO-s, BE-së dhe vendit tonë.
Trazirat e fundit në veri të Kosovës dhe përfshirja e diplomatëve rusë, siç ishte rasti i ish-punonjësit të UNMIK-ut vite më parë, përfshirja e zyrtarëve rusë dhe bjellorus, gjoja si gazetarë të arrestuar nga Policia e Kosovës, si dhe vizita e ambasadorit rus në Serbi, bërë forcave serbe të grumbulluara në kufi me Kosovën, dëshmojnë se Rusia me çdo kusht kërkon destabilizimin e Kosovës. E së fundmi, më 23 tetor, vendi ynë shpalli “non-grata” dy diplomatë rusë.
Të nderuar të pranishëm,
Kosova qëndron e vendosur në rrugën e demokracisë perëndimore dhe deklaron fuqishëm orientimin e saj euroatlantik. Për të konfirmuar këtë pikëpamje, në fillim të pandemisë COVID-19, ne u përpoqëm të menaxhonim situatën, por në asnjë mënyrë nuk pranuam donacione nga Rusia apo Kina. Të gjitha vaksinat e administruara janë të licencuara nga BE. Edhe në kohë të vështira, ne nuk e humbëm fokusin dhe orientimin tonë, sepse besojmë në partneritetin dhe miqësinë e përjetshme dhe përqafojmë vlerat demokratike në çdo kohë.
Edhe një herë ju falënderoj për ftesën për të marrë pjesë në këtë aktivitet shumë të rëndësishëm për ne.
Le të punojmë për një rajon më të mirë për të gjithë ne.
Ju faleminderit për vëmendjen!
Lajmet
Protestë e re kundër shtrenjtimit të rrymës në Prishtinë
Published
13 hours agoon
April 18, 2025By
UBTNews
Grupi “Asnjë cent më shumë” ka njoftuar se do të organizojë një protestë të re më 19 prill, kundër rritjes së çmimit të energjisë elektrike. Protesta do të mbahet në sheshin “Skënderbeu” në orën 12:00, dhe organizatorët kanë ftuar qytetarët të marrin pjesë në masë.
Besnik Shabiu, organizatori i protestës, ka deklaruar se protesta është një reagim ndaj vendimit të ZRRE-së për rritjen e çmimit të energjisë elektrike, duke theksuar se, nëse autoritetet nuk reagojnë, grupi nuk përjashton mundësinë e përshkallëzimit të aksioneve. Ai paralajmëroi se mund të ndodhin bllokime të rrugëve dhe institucioneve, për të siguruar që zëri i qytetarëve të dëgjohet.
Shabiu ka shtuar se protesta e nesërme vjen në një moment të rëndësishëm, pasi të njëjtën orë mbahet edhe vazhdimi i seancës konstituive të Kuvendit të Kosovës. Ai bëri thirrje për deputetët e zgjedhur që, sapo Kuvendi të konstituohet, të thirret komisioni për energji dhe ZRRE-ja për të raportuar mbi çështjen e rritjes së çmimit të energjisë.
“Zëri i qytetarëve duhet të dëgjohet pa ndërprerë. Ne do të vazhdojmë të jemi të zëshëm, dhe nëse pas kësaj proteste nuk ka reagim, do të jemi të detyruar të përshkallëzojmë aksionet”, tha Shabiu.
Ai gjithashtu njoftoi se po shqyrtohen mundësitë e pezullimit të pagesave për energjinë elektrike për qytetarët si një masë për të mbrojtur interesat e tyre. “Ky është një kërkesë legjitime e qytetarëve. Kur institucionet nuk punojnë për qytetarët, pse duhet të funksionojnë?”, shtoi ai.
Në anën tjetër, Ardian Bajraktari, një nga përfaqësuesit e grupit, ka bërë të ditur se ekipi i tij po punon për hartimin e padisë për anulimin e vendimit të aktit administrativ nga ZRRE. Sipas tij, ky vendim është marrë në shpërputhje me autorizimet e këtij institucioni dhe ka dëme të mëdha për qytetarët. Ai ka njoftuar se janë duke përgatitur gjithashtu një propozim për një masë të përkohshme, për të shtyrë ekzekutimin e vendimit derisa të shqyrtohet nga gjykatat.
Ky zhvillim vjen pas njoftimit të ZRRE-së për një rritje të çmimit të energjisë elektrike për 16%, që do të hyjë në fuqi nga muaji maj. Ky vendim ka shkaktuar reagime të shumta nga qytetarët, bizneset dhe subjektet politike, që po kundërshtojnë një rritje të tillë. Protesta të ngjashme janë mbajtur tashmë dhe grupet e aktivistëve po kërkojnë anulimin e këtij vendimi.
Për më shumë, grupi “Asnjë cent më shumë” ka paralajmëruar se do të vazhdojnë aksionet deri në arritjen e kërkesave të tyre dhe kanë ftuar qytetarët të bashkohen në protestën e nesërme për të shprehur pakënaqësinë e tyre ndaj shtrenjtimit të rrymës.
Lajmet
Osmani dekoron me medalje tre të mbijetuar të dhunës seksuale gjatë luftës
Published
13 hours agoon
April 18, 2025By
UBTNews
Presidentja e Republikës së Kosovës, Vjosa Osmani, ka dekoruar me medaljen “Nderi i Republikës së Kosovës” tre të mbijetuar të dhunës seksuale gjatë luftës së fundit në Kosovë. Në një ceremoni të organizuar në Presidencë, medalja iu dorëzua Vasfije Krasniqi-Goodman, Shyrete Tahiri-Sylejmani dhe Ramadan Nishori, të cilët kanë folur publikisht për përvojat e tyre të dhunës nga forcat serbe gjatë luftës.
Në fjalimin e saj, Presidentja Osmani ka vlerësuar guximin e të mbijetuarve për të ndarë me publikun përvojat e tyre dhe ka theksuar rëndësinë e dëshmive të tyre për drejtësinë dhe të vërtetën historike të Kosovës. Ajo ka shtuar se këta individë janë dëshmi e gjallë e luftës për drejtësi dhe kanë kontribuar në ndriçimin e rrugës së drejtë të historisë së vendit.
“Ka momente ku fjalët nuk mjaftojnë për të shprehur mirënjohjen, siç ka edhe njerëz që me guximin e tyre të lënë pa fjalë. Sot jemi këtu për t’iu përulur me respektin më të thellë përballë tre individëve që janë më shumë se thjesht individë, sepse me dhimbjen e tyre kanë ndriçuar rrugën e drejtë së vërtetës, drejtësisë dhe shpresës. Ju jeni zëri që keni zgjedhur dinjitetin, jeni zëri i të mbijetuarve që kanë zgjedhur heshtjen. Ky është një premtim i gjallë se historia nuk do t’i harrojë,” tha Osmani.
Pas dekoratës, Ramadan Nishori shprehu mirënjohjen për përkrahjen nga populli, duke theksuar se ndihej mirë që kishte marrë mbështetje në këtë rrugëtim të vështirë. “E përshëndes gjithë popullin tonë që më ka përkrahur këto ditë,” tha ai shkurt.
Vasfije Krasniqi, një tjetër e dekoruar, bëri thirrje që viktimat e dhunës seksuale të flasin hapur dhe të kërkojnë drejtësi. “Dua të falënderoj për qasjen, angazhimin. Të dashura viktima, ju lutem, ku do që jeni, ka ardhur koha të kërkojmë drejtësi. Lirojeni shpirtin që të mos ia falim Serbisë krimin që ka kryer,” tha Krasniqi.
Shyrete Tahiri-Sylejmani, gjithashtu e dekoruar, theksoi rëndësinë e drejtësisë për arritjen e paqes. “Kur të kemi drejtësi, kemi paqe. Faleminderit për kurajën që na jepni,” përfundoi ajo.
Lajmet
Prokuroria kërkon vazhdimin e paraburgimit për Selimin dhe Krasniqin
Published
13 hours agoon
April 18, 2025By
UBTNews
Prokuroria në Hagë ka kërkuar vazhdimin e paraburgimit për Rexhep Selimin dhe Jakup Krasniqin edhe për dy muaj të tjerë.
Në kërkesën për Krasniqin e ngjashëm edhe për Selimin, Prokuroria thotë se përfundimi i paraqitjes së provave nga ana e tyre rrit rrezikun e pengimit të drejtësisë dhe kryerjes së krimeve të tjera.
Veç kësaj, ZPS ka thënë se kjo justifikon edhe rishqyrtimin e rrezikut të arratisjes në vendimet për vazhdimin e paraburgimit. E njëjta gjë është theksuat edhe tek vendimi për Rexhep Selimin.
Sipas tyre vazhdon të ekzistojnë dyshime të bazuara se Jakup Krasniqi ka kryer një ose më shumë prej krimeve që bien në jurisdiksiomin e DHSK-së. Madje, Prokuroria thotë se ky dyshim është përforcuar edhe nga provat e ZPS-së që tashme janë përfshirë në dosjen e gjykimit.
Ata thonë se, fakti që Krasniqi dhe Selimi tani kanë njohuri të veçantë mbi rastin dhe provat kundër tij e rrit rrezikun që ai mund të kryejë krime të tjera, përfshirë kundër dëshmitarëve që kanë dhënë ose mund të japin dëshmi në çështje dhe/ose që mund të paraqiten para këtij Paneli në faza të ardhshme të procedurave.
“Për më tepër, Selimi tashmë është në dijeni të identitetit të të gjithë dëshmitarëve të ZPS-së dhe të provave të tyre. Përfundimi i çështjes së ZPS-së nuk e zvogëlon rrezikun e pengimit, por e rrit atë, pasi i akuzuari tashmë ka njohuri të plotë për përmbajtjen e çështjes ndaj tij. Siç është theksuar nga Trupi Gjykues, ekziston rreziku që ndërhyrjet me qëllim për të siguruar tërheqje të dëshmive dhe/ose për të dekurajuar dëshmitarët e ardhshëm nga dhënia e dëshmive mund të pengojnë përparimin e procedurës. Më tej, ekziston mundësia që dëshmitarët të thirren sërish, duke i bërë ata të cenueshëm ndaj përpjekjeve për ndërhyrje”, thuhet në kërkesën e Prokurorisë për Selimin.
Përveç rrezikut të arratisjes dhe pengimit të procedurave, Prokuroria ka thënë se masat e vendosura ne objektet e paraburgimit kanë ofruar garanci kundër vizitave dhe komunikimeve të pa-monitoruara si masa për të minimizuar rreziqet përkatëse.
Ata thonë se paraburgimi mbetet proporcional dhe i arsyeshëm veçanërisht që procedurat tashmë kanë përparuar.
Ndryshe, Prokuroria më 15 prill 2025 ka njoftuar se ka përfunduar paraqitjen e provave në këtë rast.
Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /Betimi për Drejtësi/
Lajmet
Rama: Vendimi për ndërprerjen e projektit në shesh nuk është i mbështetur ligjërisht
Published
13 hours agoon
April 18, 2025By
UBTNews
Kryetari i Prishtinës, Përparim Rama, ka deklaruar se vendimi për ndalimin e punimeve në sheshin “Xhorxh Bush” është i paligjshëm dhe i pambështetur në argumente juridike. Ai tha se institucionet që morën këtë vendim po ndikohen nga qëllime politike, edhe pse duhet të veprojnë në mënyrë të pavarur.
“Për herë të dytë janë ndërprerë punimet në një projekt të planifikuar për transformimin e hapësirës publike. Arsyetimet për këtë ndërhyrje nuk qëndrojnë në bazë ligjore dhe nuk janë ngritur nga palët përkatëse,” tha Rama në një konferencë për media.
Ai theksoi se projekti ka për qëllim përmirësimin e hapësirës publike dhe integrimin e trashëgimisë kulturore në zhvillimin urban të qytetit.
“Ka munguar përgjigjja nga Ministri për një debat publik për këtë çështje, edhe pse kemi qenë të hapur për diskutim,” shtoi ai.
Rama njoftoi se Komuna e Prishtinës do të ndjekë rrugë ligjore ndaj veprimeve që, sipas tij, bien ndesh me ligjin.
“Kryeqyteti do të vazhdojë procedurat ligjore ndaj të gjithë atyre që shkelin ligjin,” përfundoi ai.

Protestë e re kundër shtrenjtimit të rrymës në Prishtinë

Osmani dekoron me medalje tre të mbijetuar të dhunës seksuale gjatë luftës

Prokuroria kërkon vazhdimin e paraburgimit për Selimin dhe Krasniqin

Rama: Vendimi për ndërprerjen e projektit në shesh nuk është i mbështetur ligjërisht

Avokati Rodney Dixon: Trupi gjykues po sfidon padrejtësisht dëshmitarin

Van Damme thotë se ka simpati për Putinin: Dua të shkoj në Rusi dhe të bëhem ambasador i paqes atje

Kryetari i Prishtinës mirëpret Vasfije Krasniqin në Odën e Kryeqytetit

Rama: Sot kujtojmë sakrificën për liri dhe demokraci

Sporti ndihmon edhe në përmirësimin e shikimit
Të kërkuara
-
Bota3 months ago
Marrëveshja për pranimin e pakufizuar të emigrantëve, Shtëpia e Bardhë tërhiqet nga tarifat ndaj Kolumbisë
-
Bota3 months ago
Fluturimet e dëbimit kanë filluar, thotë Shtëpia e Bardhë
-
Bota3 months ago
Shtëpia e Bardhë: Armëpushimi në Liban do të zgjatet deri më 18 shkurt
-
Lajmet nga UBT2 months ago
Përgatituni për të udhëhequr politikën e të ardhmes me Fakultetin e Shkencave Politike në UBT