Ceremonia e hapjes mblodhi studentë, profesorë dhe pjesëmarrës të interesuar për zhvillimet bashkëkohore në fushën e medias, komunikimit dhe teknologjisë, duke krijuar një hapësirë për shkëmbimin e njohurive, përvojave dhe ideve inovative.

Në kuadër të programit të ditës së parë, Prof. Dr. Votim Hanolli mbajti ligjëratën me temën “Teknologjia Arsimore dhe Mjetet Digjitale”, ku trajtoi ndikimin e teknologjive moderne në procesin e mësimdhënies dhe të të nxënit. Gjatë prezantimit u diskutua rëndësia e përdorimit të platformave dhe mjeteve digjitale në edukim, si dhe roli i tyre në zhvillimin e kompetencave të reja profesionale, komunikimit efektiv dhe përshtatjes me kërkesat e epokës digjitale.

Po ashtu, Prof. Halil Ponik mbajti ligjëratën me temën “Aktiviteti i përbashkët me Universitetin e Elbasanit”, ku prezantoi bashkëpunimin akademik ndërinstitucional dhe rëndësinë e projekteve të përbashkëta në avancimin e arsimit të lartë.

Gjatë sesioneve u zhvilluan diskutime interaktive me pjesëmarrësit, të cilët patën mundësinë të ndajnë përvoja, të parashtojnë pyetje dhe të diskutojnë mbi sfidat dhe mundësitë që teknologjia dhe bashkëpunimi akademik sjellin për profesionistët e ardhshëm të medias dhe komunikimit.

Akademia Verore e Fakultetit të Media dhe Komunikimit do të vazhdojë edhe në ditët në viim me ligjërata, punëtori dhe aktivitete në terren, duke ofruar një platformë të rëndësishme për zhvillimin akademik dhe profesional të studentëve, si dhe për promovimin e inovacionit dhe bashkëpunimit në fushën e medias dhe komunikimit. /E.S/

Kryeprokurori i Prokurorisë Speciale, Blerim Isufaj, ka bërë të ditur se hetimet për rastin e sulmit ndaj familjes Jashari në Prekaz, të ndodhur në vitin 1998, pritet të përfundojnë së shpejti.

Në një konferencë për media, Isufaj tha se bëhet fjalë për një rast shumë të ndjeshëm, i cili kërkon maturi gjatë zhvillimit të hetimeve.

“Hetimet në rastet që lidhen me lagjen dhe familjen Jashari së shpejti do të finalizohen. Hetimi do të përfundojë shumë shpejt, pastaj të shohim. Ky hetim është shumë sensitiv, shumë i ndjeshëm dhe kërkon maturi. Thjesht, ne po e bëjmë atë punë. Nuk mund të them asgjë më tepër, përveçse hetimi është në përfundim”, deklaroi Isufaj.

Duke bërë një përmbledhje të punës së Prokurorisë Speciale gjatë vitit të fundit, ai veçoi edhe dy operacione të rëndësishme në fushën e hetimit të krimeve të luftës.

Sipas tij, në kuadër të hetimeve për Masakrën e Reçakut janë arrestuar pesë persona të dyshuar për krime lufte, ndërsa edhe pesë persona të tjerë janë arrestuar në lidhje me rastin e Syriganës në Skenderaj./A.K/

Në kuadër të festivalit të madh ndërkombëtar “Global UBT Fest 2026”, Fakulteti i Inxhinierisë Ndërtimore dhe Infrastrukturës në UBT ka hapur zyrtarisht punimet e Akademisë Verore nën moton mjaft aktuale “Green Buildings and Green Infrastructure”.

Ky program katërditor vjen si një platformë dinamike që bën bashkë botën akademike dhe liderët e industrisë, duke u ofruar studentëve një mundësi unike për të zhvilluar kompetencat e tyre profesionale përmes ndërlidhjes së teorisë me praktikat më të avancuara të ndërtimit të qëndrueshëm.

Ceremonia e hapjes dhe fjala e mirëseardhjes u udhëhoq nga Dekani i Fakultetit, Prof. Visar Krelani, i cili theksoi rëndësinë e këtij edicioni për trajtimin e sfidave dhe trendeve të reja të inxhinierisë së qëndrueshme.

Menjëherë pas hapjes zyrtare, dita e parë e akademisë i është kushtuar tërësisht praktikës në terren, me një vizitë studimore në Fabrikën për Prodhimin e Çimentos “Sharrcem” në Han të Elezit.

Vizitën e udhëhoqën Prof. Visar Krelani, Dekan i Fakultetit të Ndërtimtarisë, Prof. Naser Morina, si dhe Agron Parduzi nga zyra e Shitjes në UBT.

Gjatë kësaj vizite, studentët u pritën nga stafi teknik dhe menaxherial i fabrikës, ku patën mundësinë të shohin nga afër proceset e prodhimit, laboratorët dhe teknologjinë e përdorur në ndërtimtari.

Lidhur me këtë eksperiencë, Dekani Krelani u shpreh se kjo vizit për studentet është një mundësi e mirë që të njihen nga afër me aspektet teknike dhe aplikimin e teknologjisë në prodhimin e çimentos.

“Studentët patën mundësinë që përmes Menaxherit të Prodhimit, z. Pasion Suma, dhe z. Teodor të njihen nga afër me aspektet teknike dhe aplikimin e teknologjisë në prodhimin e çimentos. Përmes vizitave në laboratorë, ku panë provat kimike, fizike e mekanike që realizohen çdo orë, ata morën informata direkte nga përgjegjësit e sektorëve dhe kuptuan rëndësinë e kësaj industrie për sektorin tonë. Dita e dytë nesër vazhdon në orën 09:00, ku së bashku me Fakultetin e Energjisë Efiçiente do të trajtojmë mbetjet e ndërtimit, efiçiencën e energjisë dhe të drejtat ujore”, shprehet Krelani.

Akademia Verore do të vazhdojë me ligjërata të ngjeshura dhe sesione të tjera akademike edhe në ditët në vazhdim, duke trajtuar tema kyçe për zhvillimin e infrastrukturës së gjelbër. /E.A/

Turqia do të jetë mikpritëse e Samitit të NATO-s për herë të parë pas 22 vitesh, duke mbledhur në Ankara liderët e vendeve anëtare në një periudhë të shënuar nga sfida të mëdha të sigurisë globale.

Samiti i 36-të i krerëve të shteteve dhe qeverive të NATO-s konsiderohet një nga takimet më të rëndësishme të aleancës, ku pritet të diskutohen çështje kyçe që lidhen me të ardhmen e sigurisë ndërkombëtare dhe forcimin e bashkëpunimit mes vendeve anëtare.

Zyrtarët turq e kanë cilësuar samitin si një takim që zhvillohet në një “epokë pasigurish”, duke theksuar se ai synon të forcojë koordinimin dhe unitetin brenda aleancës.

Ankaraja e sheh organizimin e samitit si një mundësi për të theksuar rolin e saj diplomatik dhe ndikimin në rritje brenda NATO-s, si dhe për të prezantuar kontributin në fushën e mbrojtjes, industrinë ushtarake, menaxhimin e krizave dhe diplomacinë.

Një nga temat kryesore të diskutimit pritet të jetë ndarja e barrës financiare dhe ushtarake mes vendeve anëtare të NATO-s.

Në samit pritet të marrin pjesë liderët e 32 shteteve anëtare të aleancës, përfshirë presidentin e Shteteve të Bashkuara, Donald Trump, si dhe ministrat e Jashtëm dhe të Mbrojtjes.

Të ftuar do të jenë edhe partnerët indo-paqësorë të NATO-s – Australia, Japonia, Zelanda e Re dhe Koreja e Jugut – duke zgjeruar diskutimet mbi sfidat globale të sigurisë./A.K/