Senatori amerikan Bernie Sanders ka kritikuar arrestimin e studentit palestinez dhe aktivistit Mahmoud Khalil, i cili udhëhoqi protestat në Universitetin Columbia, duke thënë se burgosja e protestuesve është një hap tjetër në rrugën drejt autoritarizmit.

Sanders kritikoi arrestimin e Khalilit përmes një postimi që ai ndau në llogarinë e tij në rrjetin social X.

“Z.president, ju nuk mund të arrestoni ose ndaloni në mënyrë të paligjshme askënd që është rezident i ligjshëm i SHBA-së për shkak të pikëpamjeve ose opinioneve të tyre politike“, deklaroi Sanders duke theksuar se burgosja e protestuesve është një hap tjetër në rrugën drejt autoritarizmit.

Studenti palestinez dhe aktivisti Mahmoud Khalil u arrestua pas udhëheqjes së protestave pro-palestineze në Universitetin Columbia në SHBA.

Avokatja e tij, Amy Greer deklaroi se megjithëse Khalili ishte në SHBA si “rezident i përhershëm me kartë të gjelbër” dhe se gruaja e tij ishte amerikane, ai u arrestua nga zyrtarët e Emigracionit dhe Doganave të SHBA-së (ICE) dhe iu anulua karta e tij e gjelbër.

Sekretari amerikan i Shtetit, Marco Rubio, në mesazhin që ndau në llogarinë e tij në X tha: “Ne do të anulojmë vizat ose kartat gjelbra të mbështetësve të Hamasit në SHBA. Në këtë mënyrë ata do të mund të deportohen“.

Një gjykatës në SHBA ka bllokuar përkohësisht deportimin e Mahmud Khalilit.

Të paktën 20 persona u plagosën dhe 103 të tjerë u arrestuan në protestat antiqeveritare në Argjentinë, të mbështetura nga sindikatat, organizatat e ndryshme të shoqërisë civile dhe tifozët e ekipeve të futbollit.

Qindra protestues u përleshën me forcat e sigurisë, pasi u mblodhën në sheshin e Kongresit në kryeqytetin Buenos Aires. Në incidentet në të cilat policia ndërhyri me gaz piper dhe ujë me presion, u plagosën 20 persona prej të cilëve 1 rëndë ndërsa 103 të tjerë u arrestuan.

Me pankartat dhe tabelat që mbajtën, protestuesit kërkuan përmirësime të kushteve të jetesës, veçanërisht pensioneve. Duke reaguar ndaj politikave ekonomike të presidentit Javier Milei, sindikatat deklaruan se do të shtojnë intensitetin e protestave nëse nuk plotësohen kërkesat e tyre.

Ndërkohë fotoreporteri argjentinas Pablo Grillo, u plagos rëndë kur një bombël gazi lotsjellës e goditi në kokë teksa po filmonte protestat. Thuhet se Grillo po vazhdon trajtimin në spital.

Ministrja e Sigurisë Kombëtare, Patricia Bullrich në një deklaratë për mediat tha se do të marrin masa të ashpra kundër protestuesve që dëmtojnë pronën publike. Në imazhet e shpërndara në rrjetet sociale, shihen shumë automjete të përmbysura dhe prona publike të shkatërruara.

Në Argjentinë mosha e daljes në pension është 60-vjeç për gratë dhe 65-vjeç për burrat. Rreth 7.4 milionë pensionistë në vend përbëjnë 15.7 për qind të popullsisë së përgjithshme.

Mark Rutte shkon sot në Shtëpinë e Bardhë për një nga takimet më të rëndësishme midis një sekretari të përgjithshëm të NATO-s dhe drejtuesit të tij kryesor që nga themelimi i aleancës ushtarake.

Ky takim vjen pasi Donald Trump ka kërcënuar  të ndalojë mbrojtjen e aleatëve të NATO-s nëse nuk rrisin shpenzimet e mbrojtjes, të aneksojë Grenlandën nga aleati i NATO-s, Danimarka dhe të tërhiqet krejtësisht nga aleanca 32-anëtare. SHBA-ja është deri tani kontribuuesi më i madh i NATO-s përsa i përket shpenzimeve dhe aftësive të mbrojtjes.

Rutte do të ulet në tavolinë me Trump në një kohë kur zyrtarët evropianë prej javësh kanë shkëmbyer me nervozizëm zërat për një mundësinë që SHBA të tërheqë trupat amerikane nga kontinenti, ndërprerjen e stërvitjeve të përbashkëta me aleatët ose një reduktim drastik të angazhimeve të SHBA-së për sigurinë.

Shefi i NATO-s të hënën dhe të martën qëndroi fillimisht në Bosnjë e Hercegovinë, e më pas vizitoi edhe Kosovën, ku pati takime të ndara me presidenten e vendit, Vjosa Osmani si dhe kryeministrin e vendit, Albin Kurti.

Takimet u cilësuan si rikonfirmim i angazhimit të Kosovës për siguri në rajon dhe më gjerë.

Takimi i sotëm i Trumpit me Rutten u konfirmua para dy ditësh nga Shtëpia e Bardhë.

Trump do të mirëpresë gjithashtu kryeministrin irlandez Micheal Martin në Shtëpinë e Bardhë të mërkurën, thanë ata.

Ministria e Jashtme e Egjiptit tha se vlerëson deklaratat e bëra nga presidenti amerikan, Donald Trump, për të mos kërkuar që banorët e Rripit të Gazës të largohen nga enklava.

Më 12 mars, Trump tha se “askush nuk po dëbon ndonjë palestinez nga Gaza”, teksa u përgjigj në një pyetje për këtë çështje gjatë një takimi në Shtëpinë e Bardhë me kryeministrin irlandez, Micheal Martin.

“Ky qëndrim pasqyron një kuptim të nevojës për të parandaluar përkeqësimin e mëtejmë të situatës humanitare në Gazë dhe rëndësinë e gjetjes së një zgjidhjeje të drejtë, të qëndrueshme për çështjen palestineze”, tha Ministria e Jashtme e Egjiptit përmes një deklarate.

Trump kishte propozuar që SHBA-ja të merrte në pronësi Gazën, enklavën që ka përjetuar shkatërrim të madh pas luftës mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian. Presidenti amerikan kishte deklaruar më herët se zhvendosja e palestinezëve do të bëhej me qëllim që territori bregdetar të zhvillohej ekonomikisht dhe të shndërrohej në një vend “fenomenal” ku kombësi të ndryshme mund të jetojnë në paqe.

Përveç dëmeve të mëdha materiale, lufta në Gazë, që nisi më 7 tetor 2023 pasi Hamasi sulmoi Izraelin, ka shkaktuar edhe viktima të shumta. Si pasojë e sulmit të radikalëve palestinezë, në Izrael u vranë afër 1.200 persona dhe u rrëmbyen 250 të tjerë. Në Gazë, ndërkaq, si rezultat i ofensivës izraelite janë vrarë më shumë se 48.000 palestinezë.

Izraeli dhe Hamasi arritën një marrëveshje armëpushimi në janar dhe në fazën e parë u liruan disa pengje dhe të burgosur palestinezë. Fazat pasuese, për të cilat duhet të negociohen, parashohin lirimin e të gjitha pengjeve në këmbim të të burgosurve palestinezë, dhe një armëpushim të qëndrueshëm.

Ndërkaq, më herët gjatë marsit udhëheqësit arabë miratuan një plan egjiptian në vlerë prej 53 miliardë dollarësh për rindërtimin e Gazës, plan që do të shmangte zhvendosjen e palestinezëve nga enklava, ashtu siç ka propozuar presidenti amerikan./REL/