Prof. Ass. Dr. Mentor Bici, profesor në Fakultetin e Shkencave të Ushqimit dhe Bioteknologjisë në UBT, mori pjesë në një trajnim ndërkombëtar shtatëditor të organizuar në Universitetin e Valencias, Spanjë, i fokusuar në metodat bashkëkohore të trajtimit të ujërave të ndotura dhe praktikat më efikase për mbrojtjen, menaxhimin dhe shfrytëzimin e qëndrueshëm të burimeve ujore.

Trajnimi është zhvilluar në një nga qendrat më të njohura evropiane për menaxhimin e ujit, ku qyteti i Valencias njihet ndërkombëtarisht për standardet e larta në ruajtjen e cilësisë dhe sigurisë së ujit të pijshëm, si dhe për zbatimin e zgjidhjeve inovative në fushën e trajtimit të ujërave.

Përmes pjesëmarrjes në këtë program, Prof. Bici ka avancuar njohuritë dhe kompetencat profesionale në teknologjitë më të reja të trajtimit të ujërave, duke krijuar mundësi për transferimin e këtyre praktikave dhe përvojave në procesin mësimor dhe kërkimor në UBT.

Ky aktivitet realizohet në kuadër të programit COST (European Cooperation in Science and Technology), i cili synon forcimin e bashkëpunimit ndërkombëtar në kërkim shkencor dhe inovacion. Në këtë kuadër, Prof. Bici ka kontribuar edhe në krijimin e urave të bashkëpunimit ndërmjet Universitetit të Valencias, UBT-së dhe universiteteve të tjera pjesëmarrëse në këtë aktivitet ndërkombëtar, duke zgjeruar rrjetin akademik dhe mundësitë për projekte të përbashkëta kërkimore në të ardhmen.

Presidenti i SHBA-së, Donald Trump, fitoi më shumë se 1 miliard dollarë  vitin e kaluar nga bizneset e tij me kriptomonedha, sipas raportit të tij të detyrueshëm financiar për vitin 2025.

Në deklaratën prej 927 faqesh, ai raportoi 635 milionë dollarë fitime nga një “meme coin” (monedhë virtuale) me emrin e Trump-it, vlera e së cilës ka rënë ndjeshëm që nga periudha kur ai e lansoi atë, vetëm pak ditë para se të merrte detyrën.

Ai gjithashtu raportoi mbi 500 milionë dollarë të ardhura nga “World Liberty Financial”, një kompani kriptomonedhash e themeluar nga djemtë e tij dhe fëmijët e të dërguarit të tij të posaçëm, Steve Witkoff.

Trump fitoi miliona të tjerë nga pasuritë e paluajtshme dhe produktet me brendin e tij. Megjithatë, Shtëpia e Bardhë ka mohuar që ai po përfiton financiarisht nga pozita e presidentit.

Fitimet nga deklarimi i tij i fundit financiar i kalojnë dukshëm ato të vitit 2024, kur Trump kishte deklaruar mbi 600 milionë dollarë të ardhura.

Shtëpia e Bardhë, e cila ka theksuar vazhdimisht se Trump i ka kaluar bizneset e tij në një fond të menaxhuar nga djemtë e tij, përsëri mohoi të ketë ndonjë konflikt interesi.

Zëvendëspressekretarja e Shtëpisë së Bardhë, Anna Kelly, tha se presidenti e ka bërë me krenari SHBA-në “kryeqytetin e kriptomonedhave në botë”.

“As Presidenti dhe as familja e tij nuk janë përfshirë kurrë – dhe nuk do të përfshihen – në konflikte interesi”, tha ajo në një deklaratë, duke shtuar: “Të gjitha veprimet e Presidentit Trump dhe administratës së tij ndërmerren në interesin më të mirë të popullit amerikan – dhe çdo i ashtuquajtur ‘gazetar’ që pretendon të kundërtën, thjesht po riciklon të njëjtën narrativë të vjetër dhe të rreme që demokratët dhe mediat tradicionale po e shtyjnë tash e një dekadë.”

Vetë presidenti gjithashtu ka potencuar se ai nuk i nënshtrohet ligjeve federale për konfliktin e interesit.

Trump dikur i kishte kritikuar kriptomonedhat, duke e quajtur Bitcoin-in një “mashtrim” dhe “një katastrofë që pret të ndodhë”.

Mirëpo, deklarimi i së martës tregon se fitimet e tij nga kriptomonedhat lanë plotësisht në hije të ardhurat nga biznesi i tij i pasurive të paluajtshme, i cili e bëri atë të famshëm fillimisht.

Ai fitoi rreth 77 milionë dollarë nga klubi i tij Mar-a-Lago dhe 122 milionë dollarë nga klubi i tij i golfit në Doral të Floridës. Ai gjithashtu fitoi mbi 30 milionë dollarë nga secili prej klubeve të golfit në Bedminster (New Jersey), Jupiter (Florida) dhe Turnberry (Skoci).

Sipas deklaratës financiare, Trump fitoi miliona edhe nga sipërmarrje të tjera biznesi. Këtu përfshihen 4.7 milionë dollarë nga markat e orëve me emrin Trump, krahas Biblave, atletet, parfumet dhe kitarat e brenduara me emrin e tij. /BBC/ /E.A/

Institucionet përgjegjëse kanë paralajmëruar mbikëqyrje për zbatimin e vendimit, ndërsa kanë pranuar se sektori i pastrimit dhe ai i sigurisë fizike mbeten me problematikët për zbatimin e këtij vendimi të Qeverisë. E në Sindikatën e punëtorëve të sektorit privat kanë thënë se janë skeptikë për zbatimin e këtij vendimi nga kompanitë që kanë marrëdhënie kontraktuale me institucionet shtetërore

Nga e mërkura, paga minimale në Kosovë do të rritet në 500 euro bruto. Kjo është faza e dytë e zbatimit të vendimit të Qeverisë, pas rritjes në 425 euro më 1 janar të këtij viti.

Kryetari i Sindikatës së Punëtorëve të Sektorit Privat, Jusuf Azemi, është shprehur skeptik nëse paga minimale do të respektohet te kompanitë që kanë marrëdhënie kontraktuale me institucione shtetërore, raporton KOHA.

“Paga në sektorin privat, aty ku ka direkt pronarë të kompanive, nëse nuk ka dikë në mes, zbatohet. Por nuk po zbatohet as paga minimale që është 425 euro, vetëm tek ato kompani që kanë marrëdhënie kontraktuale me institucione shtetërore dhe komunale. Kemi shumë kompani të cilat nuk e kanë zbatuar pagën minimale”, ka thënë Azemi.

Edhe në Inspektoratin Qendror të Punës kanë pranuar që sektorët me rrezik për të mos zbatuar këtë vendim janë: ai i pastrimit dhe sigurisë fizike, por nëse kjo gjë ndodh kanë paralajmëruar masa.

“Bizneset të cilat nuk e respektojnë vendimin e pagës minimale, sipas procedurës inspektuese, kur konstatohet kjo gjendje, do të iniciohet procedurë kundërvajtëse. Sektorët që paraqesin rrezik më të lartë në zbatimin e vendimit janë sektori i pastrimit dhe ai i sigurisë fizike, ku edhe bazuar në risk janë realizuar inspektime”, thuhet në përgjigjen e Inspektoratit Qendror të Punës.

E qytetarët kanë mendime të ndryshme për rritjen e pagës minimale.

“Nuk është e mjaftueshme për një punëtor. 500 euro çfarë shpenzimesh, çfarë jete e shtrenjtë. 500 euro me nejt gjithë ditën në ndërtesë, s’është e mjaftueshme”, ka thënë qytetari Sali Brahimi.

Edhe Atdhe Geci e ka quajtur të pamjaftueshme.

“Sipas rritjes së çmimeve pagat janë të ulëta, së paku për 200 euro. Besoj se 700 euro do të ishte e mjaftueshme”, ka thënë ai.

Sipas një raporti të GAP-it nga viti 2011 deri në vitin 2023, paga minimale bruto në Kosovë ishte e pandryshuar për një periudhë 12-vjeçare.

Gjatë kësaj kohe, për punëtorët nën moshën 35 vjeç paga minimale bruto ishte 130 euro, ndërsa për ata mbi 35 vjeç ishte 170 euro.

Sipas raportit, ky dallim i bazuar në moshë u eliminua në vitin 2023, kur paga minimale u unifikua në 264 euro bruto për të gjithë punëtorët.

Që nga viti 2023, paga minimale ka shënuar rritje të vazhdueshme.

Në vitin 2024, ajo u rrit në 350 euro bruto, për të vazhduar me rritje më 1 janar 2026 dhe tash më 1 korrik 2026 në 500 euro bruto. /KOHA/ /E.A/

Sot mbi vendin tonë do të mbretërojë mot i ndryshueshëm dhe mjaft i paqëndrueshëm.

Sipas meteorologëve, gjatë ditës pritet të ketë zhvillim të vranësirave të cilat do të sjellin reshje lokale shiu, të shoqëruara me shkarkime rrufesh.

Në zona më të izoluara nuk përjashtohet mundësia për rënie breshri dhe erëra të përkohshme më të fuqishme.

Malet termike do të shënojnë vlera minimale nga 15 deri në 18 gradë Celsius, ndërsa ato maksimale të ditës do të lëvizin mes 30 dhe 34 gradë Celsius.

Gjatë ditës do të fryjë erë kryesisht nga drejtimi i verilindjes me një shpejtësi prej 1 deri në 9 m/s. /E.A/