Ushtaraku i FSK-së, Major Vilson Musaj, student në nivelin Master në Fakultetin e Politikave Publike dhe Menaxhimit në UBT, mbrojti me sukses tezën e tij me temë: “Rëndësia e regjimenteve të këmbësorisë në Forcën e Sigurisë së Kosovës – Një perspektivë strukturore: studim krahasimor (FSK, Ushtria Amerikane dhe NATO)”.

Ky punim, i cili u realizua me përkushtim të madh, i siguroi Major Musajt diplomën dhe gradën shkencore “Master në Politika Publike dhe Menaxhim”.

Komisioni vlerësues, i përbërë nga Prof. Dr. Hajdi Xhixha (kryetare), Prof. Dr. Arian Kadriu (anëtar) dhe Prof. Dr. Bahri Gashi (mentor), e vlerësuan këtë hulumtim si të parë në format dhe strukturën e tij në këtë fushë, duke e konsideruar si një punim serioz shkencor dhe mjaft kompleks.

Prezantimi i të gjeturave, argumentimi dhe krahasimi i hipotezave u vlerësuan me performancë të lartë akademike dhe notë maksimale, duke reflektuar një strukturë të qartë operacionale ushtarake dhe qasje profesionale në trajtimin e temës.

Major Vilson Musaj, i cili u gradua në këtë gradë më 1 korrik 2025, është emëruar Oficer për Bashkëpunim me ODC dhe Iowa (Office for Defense Cooperation – Zyra për Bashkëpunim të Mbrojtjes në Ambasadën Amerikane) në Departamentin për Bashkëpunim Ndërkombëtar dhe Integrime Euro-Atlantike në Ministrinë e Mbrojtjes. Ai vazhdon të shërbejë aktualisht në këtë departament të rëndësishëm, duke kontribuar në zhvillimin dhe integrimin e Forcës së Sigurisë së Kosovës.

UBT po ofron bursë 20 për qind në nivelin Master në programet Shkenca Politike dhe Studime të Sigurisë, për të gjithë kandidatët nga Akademia e Policisë, Forca e Sigurisë së Kosovës (FSK) dhe Shërbyesit Civilë.

Programi Master në Shkenca Politike ofron një mjedis akademik të avancuar, të orientuar drejt kërkimit shkencor dhe zhvillimit të mendimit kritik. Studentët pajisen me njohuri dhe aftësi për të adresuar sfidat politike në nivel lokal dhe ndërkombëtar, për të kontribuar në zhvillimin demokratik dhe për të ndikuar në politikëbërjen moderne. Ky program përgatit ekspertë, mendimtarë dhe liderë të rinj që promovojnë qeverisje efektive dhe procese demokratike.

Ndërkaq, programi Master në Studime të Sigurisë është i konceptuar për të përgatitur profesionistë të aftë të përballen me sfidat e sigurisë në kontekste kombëtare dhe ndërkombëtare. Ai trajton tema bashkëkohore si siguria kibernetike, kërcënimet hibride, terrorizmi, migrimi, gjeopolitika dhe siguria energjetike. Studentët zhvillojnë aftësi analitike dhe praktike për të krijuar strategji efikase në fushën e sigurisë dhe për të kontribuar në stabilitetin dhe qëndrueshmërinë e shoqërisë.

Të dy programet ofrojnë orare fleksibile, qasje praktike, staf akademik me eksperiencë ndërkombëtare dhe mundësi për mobilitete studimore në universitete partnere në Evropë dhe më gjerë.

UBT thekson se qëllimi i këtyre programeve është të fuqizojnë kapacitetet akademike dhe profesionale të studentëve, duke i pajisur ata me njohuri multidisiplinare që tejkalojnë standardet e industrisë dhe i përgatisin për karrierë ndërkombëtare, punësim në institucione vendore dhe globale, si dhe për vazhdim studimesh në nivel doktorature.

APLIKO TANI ONLINE për të përfituar bursën 20 për qind dhe për të qenë pjesë e gjeneratës së re të ekspertëve të politikës dhe sigurisë në Kosovë.

UBT ka shpallur hapjen zyrtare të thirrjes për dorëzimin e abstrakteve për Konferencën Ndërkombëtare mbi Shëndetin Mendor dhe Mirëqenien (PSY 2025), e cila do të zhvillohet në kuadër të aktiviteteve të edicionit të 14-të të Konferencës Ndërkombëtare të UBT-së.

Kjo konferencë synon të bashkojë profesionistë, studiues, praktikues dhe studentë të psikologjisë, vendorë dhe ndërkombëtarë, për të ndarë përvoja, njohuri dhe ekspertizë mbi faktorët që ndikojnë në përmirësimin e shëndetit mendor, duke kontribuar si në komunitetin akademik ashtu edhe në praktikën profesionale.

Konferenca Ndërkombëtare mbi Shëndetin Mendor dhe Mirëqenien do të mbahet më 23, 24 dhe 25 tetor 2025, ndërsa tema kryesore e këtij viti është: “Shëndeti Mendor dhe Mirëqenia”. Ajo ka për qëllim të bashkojë studiues, edukatorë dhe profesionistë nga fusha të ndryshme, për të eksploruar dhe shkëmbyer ide mbi lidhjen mes shëndetit mendor dhe proceseve të rezistencës që mbështesin qëndrueshmërinë, inovacionin dhe mirëqenien mendore.

UBT mirëpret abstrakte që lidhen (por jo vetëm) me fushat e mëposhtme:

• Aftësitë e rezistencës në komunitetet e margjinalizuara
• Avancimet në kërkimin mbi sjelljen
• Shëndeti mendor dixhital dhe epoka dixhitale
• Baza biologjike e sjelljes njerëzore
• Shëndeti mendor dhe pabarazia
• Strategjitë e përballimit të stresit
• Ndërgjegjësimi për shëndetin mendor

Konferenca do të mbahet në format hibrid, duke u lejuar pjesëmarrësve të marrin pjesë fizikisht në Kampusin e UBT-së ose online, duke ofruar fleksibilitet për kontribuesit vendorë dhe ndërkombëtarë. Pjesëmarrës në këtë ngjarje do të jenë hulumtues shkencorë nga SHBA-ja, Republika Çeke, Turqia, Shqipëria dhe Maqedonia e Veriut.

Datat e rëndësishme:

• Dorëzimi i abstrakteve: 10 tetor 2025
• Njoftimi për pranimin e abstrakteve: 17 tetor 2025
• Dorëzimi i punimeve: 14 nëntor 2025
• Procesi i rishikimit: 17 tetor 2025
• Regjistrimi i hershëm: 17 tetor 2025
• Regjistrimi i vonë: 20 tetor 2025
• Datat e konferencës: 23–25 tetor 2025

Koordinatorët e konferencës:

Dr. Fatbardh Qehaja Osmani & Dr. Elona Krasniqi

Prof. Dr. Alfred Marleku, profesor në Fakultetin e Shkencave Politike të UBT-së, ka publikuar së fundmi recensionin e tij shkencor në revistën prestigjioze ndërkombëtare Defense & Security Analysis, e cila botohet nga Routledge, një ndër shtëpitë botuese akademike më të njohura në fushën e sigurisë dhe marrëdhënieve ndërkombëtare. 

Recensioni mban titullin “Great power cyber competition: competing and winning in the information environment” dhe trajton librin e botuar nga David V. Gioe dhe Margaret W. Smith, i cili analizon dimensionet strategjike të konkurrencës kibernetike mes fuqive të mëdha si SHBA, Rusia dhe Kina. 

Në artikullin e tij, Prof. Marleku vlerëson librin si një përmbledhje gjithëpërfshirëse të mënyrës se si operacionet kibernetike dhe lufta e informacionit po formësojnë rivalitetin global. Ai thekson se konkurrenca në hapësirën kibernetike nuk është më vetëm një çështje teknike, por një fushëbetejë strategjike ku shtetet përdorin mjete jo-kinetike për të ndikuar në narrativat ndërkombëtare, për të avancuar interesat e tyre dhe për të sfiduar demokracitë perëndimore. 

Recensioni nxjerr në pah analizat mbi operacionet kibernetike të Rusisë dhe Kinës, si dhe rastet studimore mbi ndikimin e tyre në Afrikë, Amerikën Latine dhe veçanërisht në luftën në Ukrainë. Sipas Marlekut, libri kontribuon në kuptimin e dimensioneve të reja të sigurisë ndërkombëtare, përfshirë edhe rolin e inteligjencës publike, operacioneve psikologjike dhe bashkëpunimit ndërmjet sektorit publik dhe atij privat në fushën e sigurisë kibernetike. 

Megjithëse libri paraqet një hyrje të vlefshme në temën e garës në fushën kibernetike, Prof. Marleku vëren se libri mbetet i kufizuar në disa aspekte. Së pari, mungon një analizë më e thelluar në literaturën më të re dhe debatet akademike aktuale, gjë që e bën më pak të dobishëm për studiuesit e avancuar në një fushë kaq dinamike si siguria kibernetike. Së dyti, për shkak të mbizotërimit të burimeve nga stidiues amerikanë dhe britanikë, analiza është e kornizuar kryesisht nga një perspektivë perëndimore, çka mund të krijoj një qasje të njëanshme. Së fundi, megjithëse theksohet nevoja për strategji më të sofistikuara nga demokracitë perëndimore, mungojnë rekomandime konkrete dhe hapa praktikë, duke e lënë të paplotë kërkesën për një udhërrëfyes strategjik të qartë. 

Publikimi i Prof. Marlekut përbën një kontribut të rëndësishëm në literaturën e studimeve të sigurisë, duke reflektuar mbi një nga temat më kritike të epokës sonë: rivalitetin e fuqive të mëdha në domenin kibernetik dhe atë të informacionit./UBTNews/

Recensioni i plotë mund të lexohet në: https://www.tandfonline.com/eprint/RW7BBZDIY4R9GTS2KYAB/full?target=10.1080/14751798.2025.2542601