Policia e Kosovës ka njoftuar për një rast të kanosjes ndaj punonjësve shëndetësorë në Podujevë, që ka ndodhur mbrëmjen e së hënës, rreth orës 20:10.

Sipas raportit policor, tre persona (një doktor dhe dy infermierë) kanë raportuar se janë kërcënuar përmes telefonit nga një i dyshuar mashkull kosovar. Ende nuk dihen motivet që kanë çuar deri te ky veprim.

Policia ka arritur ta identifikojë dhe ta intervistojë të dyshuarin. Pas përfundimit të procedurave fillestare, me vendim të prokurorit, i dyshuari është liruar dhe rasti do të vazhdojë të trajtohet në procedurë të rregullt.

Një përleshje fizike mes disa personave të mitur ka ndodhur mbrëmjen e së dielës në Prishtinë, duke rezultuar në lëndime të rënda trupore për njërin prej tyre. Sipas raportit 24 orësh të Policisë së Kosovës, ngjarja ka ndodhur rreth orës 20:22.

Viktima ka pranuar tretmanin e nevojshëm mjekësor, ndërsa Policia ka reaguar shpejt duke identifikuar të përfshirët. Gjatë ditës së hënë (20 prill), janë arrestuar dy të dyshuar, të cilët po ashtu janë të moshës së mitur.

Me vendim të prokurorit, dy të dyshuarit janë dërguar në mbajtje për 24 orë për procedura të mëtejshme hetimore. Rasti po trajtohet si “Lëndim i rëndë trupor”.

Edhe pse ka qëndruar larg kamerave, Presidenti Donald Trump ka zgjedhur rrjetet sociale për të shpërfaqur një dozë të lartë optimizmi përpara bisedimeve të paqes me Iranin, që pritet të nisin këtë javë në Pakistan. Përmes platformës së tij, Truth Social, Trump ka bërë të ditur se SHBA-ja ndodhet në një pozicion shumë të favorshëm negociues.

Sipas Presidentit, bllokada detare e SHBA-së në Ngushticën e Hormuzit po i shkakton Iranit humbje prej 500 milionë dollarësh në ditë, duke e rënduar ndjeshëm ekonominë e këtij vendi. Trump pretendon se ky presion po funksionon dhe se çdo marrëveshje e re do të jetë shumë më e favorshme se akordi i vitit 2015 (JCPOA) i arritur gjatë administratës Obama.

“Nuk jam nën presion” -Trump hodhi poshtë raportimet se ai po nxiton drejt një marrëveshjeje për shkak të presioneve të brendshme apo ndërkombëtare.

“Lexoj lajmet e rreme që thonë se jam nën presion. Kjo nuk është e vërtetë! Nuk jam nën asnjë lloj presioni, megjithëse çdo gjë do të ndodhë relativisht shpejt,” ka deklaruar ai.

Përkundër toneve triumfuese, mbeten shumë pikëpyetje. Ende nuk ka një konfirmim zyrtar nëse të dyja palët do të ulen vërtet në tryezën e bisedimeve në Pakistan. Gjithashtu, Trump përballet me presionin e tij ekonomik për të rihapur Ngushticën e Hormuzit për tregtinë ndërkombëtare, ndërkohë që opinioni publik në Amerikë mbetet gjerësisht kundër përfshirjes në një konflikt të ri të armatosur.

Megjithatë, për Presidentin Trump, situata po shkon “shumë mirë” dhe ai beson se Amerika do të dalë me një marrëveshje historike që tejkalon të gjitha marrëveshjet e mëparshme./BBC/

Ministria e Industrisë, Ndërmarrësisë, Tregtisë dhe Inovacionit (MINT) ka publikuar çmimet maksimale të lejuara për shitjen e derivateve të naftës, të cilat do të jenë valide për datën 21 prill 2026.

Sipas vendimit të fundit, çmimet tavan për produktet e naftës janë: Nafta (dizel): 1.68 euro për litër, benzina: 1.41 euro për litër, gasi: 0.88 euro për litër.

Këto çmime hyjnë në fuqi nga ora 10:00.

Ministria ka njoftuar se qytetarët që hasin në parregullsi apo çmime mbi tavanin e lejuar, mund t’i adresojnë ankesat e tyre në emailin zyrtar [email protected] ose përmes numrit të telefonit falas 0800 11000.