Gjykata Supreme i ka hapur rrugë përmbylljes së procesit elektoral, duke refuzuar si të pabazuara të pesë ankesat ndaj rezultateve përfundimtare të zgjedhjeve parlamentare të 7 qershorit. Pas këtij vendimi që vërtetoi qëndrimet e Panelit Zgjedhor për Ankesa dhe Parashtresa (PZAP), Komisioni Qendror i Zgjedhjeve (KQZ) ka caktuar mbledhjen e radhës për sot në orën 11:00, me të vetmen pikë në rend dite: certifikimin e rezultateve.

Ankesat e refuzuara nga Supremja ishin të dy llojeve. E para lidhej me pretendimet e disa partive të komuniteteve joshumicë se subjekte rivale të të njëjtit komunitet kishin marrë vota në vendbanime ku nuk jetojnë qytetarë të asaj etnie. Konkretisht, Lista Serbe pretendonte se partia ZSPO e Nenad Rashiqit kishte fituar vota në mjedise joserbe, duke i rrezikuar asaj një ulëse të garantuar. Gjykata e cilësoi këtë kontradiktore, pasi mandatin po e fitonte sërish një subjekt serb, ndërsa theksoi se struktura etnike nuk mund të përdoret si kriter për ligjshmërinë e votës, e cila mbetet individuale, e lirë dhe e fshehtë. Ankesa të ngjashme të paargumentuara me prova pati edhe nga Nova Demokratska Stranka (NDS) e Emilja Rexhepit ndaj Koalicionit Vakat dhe ZSPO-së.

Lloji i dytë i ankesave vinte nga kandidatët e PDK-së për deputetë, Bekim Haxhiu dhe Qëndrim Kryeziu, të cilët kërkonin rinumërimin e të gjitha votave preferenciale të partisë. Gjykata Supreme i hodhi poshtë edhe këto kërkesa, duke konstatuar se rinumërimi paraprak i 7.41% të votave nuk kishte nxjerrë dallime të mëdha dhe se mospërputhjet e vogla lidheshin vetëm me gabime njerëzore apo rikategorizim fletëvotimesh në Qendrën e Numërimit dhe Rezultateve (QNR).

Me vendimet e Gjykatës Supreme procesi kalon në fazën finale. Pas certifikimit të rezultateve nga KQZ-ja gjatë ditës së sotme, deputetët e legjislaturës së re kanë në dispozicion një afat prej 30 ditësh për thirrjen e seancës konstituive të Kuvendit. /E.A/

Në UBT ka nisur zyrtarisht trajnimi profesional “Investimi në Tregjet Kapitale”, i udhëhequr nga eksperti i financave dhe investimeve, Prof. Shpresim Vranovci. Programi është krijuar për t’u ofruar pjesëmarrësve njohuri të thelluara mbi funksionimin e tregjeve financiare dhe për t’i aftësuar ata të marrin vendime më të informuara investimi përmes një qasjeje praktike dhe të strukturuar.

Trajnimi ka bërë bashkë studentë, profesionistë, sipërmarrës dhe të gjithë ata që synojnë të avancojnë njohuritë e tyre në fushën e investimeve dhe financave. Përmes ligjëratave profesionale, analizave të rasteve konkrete, ushtrimeve praktike dhe diskutimeve interaktive, pjesëmarrësit do të zhvillojnë kompetenca të nevojshme për të kuptuar dhe vlerësuar mundësitë që ofrojnë tregjet moderne të kapitalit.

Gjatë programit katërditor do të trajtohen tema kyçe si funksionimi dhe roli i tregjeve të kapitalit, makroekonomia dhe ndikimi i saj në tregjet financiare, obligacionet dhe bonot e thesarit si instrumente investimi, aksionet (stocks), ETF-të dhe diversifikimi i portofolit. Po ashtu, pjesëmarrësit do të njihen me bazat e stock trading, analizën dhe vlerësimin e aksioneve, ndërtimin e strategjive efektive të investimit, menaxhimin e riskut, investimet në kriptovaluta dhe përdorimin praktik të platformave moderne të investimit (brokerëve).

Nën udhëheqjen e Prof. Shpresim Vranovci, pjesëmarrësit do të kenë mundësinë të përfitojnë njohuri të aplikueshme në botën reale të investimeve, duke ndërtuar një bazë të fortë profesionale për analizimin e tregjeve financiare dhe menaxhimin e aseteve në një ekonomi gjithnjë e më dinamike dhe të digjitalizuar.

Përmes këtij programi, UBT vazhdon të zgjerojë ofertën e trajnimeve profesionale të orientuara drejt nevojave të tregut, duke fuqizuar kompetencat e pjesëmarrësve dhe duke krijuar mundësi konkrete për zhvillim profesional në fushën e financave, investimeve dhe tregjeve të kapitalit.