Biblioteka Kombëtare e Kosovës “Pjetër Bogdani”, më 27 prill, do të promovojë botimin shumëvëllimësh “Ydriz Basha i Novosejt” në Ambasadën e Republikës së Kosovës në Belgjikë, në prani të komunitetit shqiptar.

Ky aktivitet synon të rrisë ndërgjegjësimin e komunitetit shqiptar dhe të publikut të gjerë për rëndësinë e ruajtjes së kujtesës historike, si dhe të promovojë veprën dhe kontributin e Ydriz Bashës – një figurë me rol të veçantë në çështjen e Kosovës dhe në procesin e ndërtimit të shtetit.

Botimi shumëvëllimësh është pjesë e kolanës së veçantë “Kujtesa e Kosovës”, e cila sjell në fokus vlera të rëndësishme të historisë dhe identitetit kombëtar.

Një nga veprat më të suksesshme bashkëkohore, “ART” sjell një mbrëmje plot humor, emocione dhe reflektim mbi miqësinë, artin dhe egon njerëzore.

Shfaqja do të mbahet më 15 prill 2026, në ora 20:00, në Teatrin “Avdush Hasani” në Podujevë.

Vepra është e autores Yasmina Reza, me regji të Bashkim Ramadanit, ndërsa në kastin e aktorëve janë Ard Islami, Ylber Bardhi dhe Butrint Lumi.

Baleti Kombëtar i Kosovës do të prezantojë shfaqjen “Carmina Burana” në Bogotá, si pjesë e turneut në Amerikën Qendrore dhe Latine.

Shfaqja do të mbahet më 21 maj në Teatro Municipal Jorge Eliécer Gaitán, një nga skenat më të rëndësishme kulturore në Kolumbi, duke sjellë para publikut kolumbian një nga veprat më të njohura të repertorit ndërkombëtar.

Kjo paraqitje vjen në kuadër të turneut që përfshin edhe El Salvadorin dhe Kolumbinë, duke shënuar një hap të rëndësishëm në prezantimin ndërkombëtar të Baletit Kombëtar të Kosovës.

Filmi me metrazh të gjatë “DUA”, me skenar dhe regji nga Blerta Basholli, do të ketë premierën botërore në seksionin prestigjioz Semaine de la Critique në kuadër të Festivalit të Cannes. Prodhimi është përzgjedhur në mesin e vetëm shtatë filmave të gjatë të këtij programi për edicionin e sivjetmë.

Kjo shënon herën e parë që një film nga Kosova përfshihet në këtë seksion të njohur dhe mjaft konkurrues të festivalit, ku “DUA” do të garojë për katër çmime kryesore në kategorinë e filmave të gjatë.Filmi është një dramë “coming of age”, e vendosur në Kosovën e viteve ’90 dhe e frymëzuar nga përvojat personale të regjisores. Ngjarja ndjek rrugëtimin e një adoleshenteje introverte në kërkim të identitetit në një periudhë të ndërlikuar politike dhe shoqërore.

Producentë të filmit janë Valon Bajgora dhe Yll Uka (Ikonë Studio, Kosovë), ndërsa bashkëproducentë janë Britta Rindelaub dhe Thomas Reichlin (Alva Film, Zvicër), si dhe Amaury Ovise (Kazak Productions, Francë).

Projekti është mbështetur nga Centre National du Cinéma et de l’Image Animée (CNC), Office Fédéral de la Culture, ARTE Cinema, Eurimages, SRF – Schweizer Radio und Fernsehen, Cineforom dhe Qendra Kinematografike e Kosovës.