Presidenti ukrainas, Volodymyr Zelensky, komentoi sulmet raketore të Rusisë ndaj një ndërtese banimi në Kiev, duke theksuar se këto sulme janë një shenjë e qartë se duhet të ushtrohet presion më i madh ndaj Moskës për të arritur një armëpushim.

Lufta midis Rusisë dhe Ukrainës, që ka filluar para tre vjetësh, është intensifikuar së fundmi, me sulme të përhapura me dronë dhe raketa, të cilat kulmuan me sulmin e së martës ndaj kryeqytetit ukrainas. Ky ishte sulmi më vdekjeprurës ndaj Kievit gjatë këtij viti, ku mbetën të vrarë 28 persona dhe u plagosën 142 të tjerë.

Zelensky së bashku me ministrin e Brendshëm, Ihor Klymenko, vizituan vendin e sulmuar, ku vendosën kurora me lule për të nderuar kujtimin e 23 personave që humbën jetën në këtë sulm.

Në një postim në Telegram, presidenti ukrainas shkroi se “ky sulm është një përkujtues për botën se Rusia refuzon armëpushimin dhe zgjedh vrasjet”.

Ai gjithashtu falënderoi partnerët ndërkombëtarë të Ukrainës, duke theksuar gatishmërinë e tyre për të rritur presionin mbi Rusinë, në mënyrë që Moska të “ndiejë koston e vërtetë të luftës”.

Në Shtëpinë e Bardhë po përshkallëzohen tensionet lidhur me mundësinë e një ndërhyrjeje ushtarake amerikane ndaj Iranit. Burime të brendshme raportojnë për përçarje të dukshme midis presidentit Donald Trump dhe drejtoreshës së Inteligjencës Kombëtare, Tulsi Gabbard, e cila është përjashtuar nga diskutimet më të rëndësishme strategjike mbi krizën.

Mungesa e saj në takimin e zhvilluar më 8 qershor në Camp David, ku u diskutuan tensionet mes Izraelit dhe Iranit, ka ngritur dyshime për një mosmarrëveshje të thellë në Shtëpinë e Bardhë. Zyrtarisht mungesa u arsyetua me angazhimin e saj në një trajnim të Gardës Kombëtare, por mediat amerikane bëjnë me dije se ajo ka qenë përjashtuar për shkak të qëndrimeve të saj skeptike ndaj ndërhyrjes ushtarake.

Presidenti Trump ka shprehur hapur mosbesimin ndaj Gabbard, veçanërisht pas dëshmisë së saj në Kongres në mars, ku ajo theksoi se komuniteti i inteligjencës nuk është i bindur se Irani po zhvillon armë bërthamore, që përbën një kundërshtim të hapur ndaj retorikës presidenciale.

Përplasja midis tyre u theksua edhe më shumë pas publikimit të një videoje nga Gabbard, e cila paralajmëron për rrezikun e një konflikti bërthamor dhe u interpretua si një kritikë e qasjes së administratës Trump ndaj krizës me Iranin.

Kjo përçarje reflekton ndarjet më të gjera brenda lëvizjes MAGA, ku një pjesë e republikanëve mbështesin linjën e ashpër ndaj Teheranit, ndërsa Gabbard promovon diplomacinë dhe shpreh skepticizëm për ndërhyrjet ushtarake.

Megjithatë, disa zyrtarë të administratës, përfshirë zëvendëspresidentin JD Vance, vazhdojnë ta mbështesin Gabbard si një zë të rëndësishëm brenda ekipit të sigurisë kombëtare, edhe pse pozita e saj politike mbetet e brishtë.

Turqia ka ndërmarrë hapa të rëndësishëm për të forcuar sigurinë përgjatë kufirit të saj lindor me Iranin, ndërsa tensionet mes Teheranit dhe Tel Avivit vazhdojnë të rriten. Sipas një burimi nga Ministria e Mbrojtjes Kombëtare të Turqisë, Ankaraja po implementon një sistem të integruar mbrojtjeje ajrore dhe raketore, kryesisht me pajisje të prodhuara në vend.

Ndërsa nuk është vërejtur ndonjë fluks i jashtëzakonshëm migracioni nga Irani, Turqia po mban një gatishmëri të lartë ushtarake dhe ka aktivizuar avionët e Reagimit të Shpejtë për patrullime të vazhdueshme përgjatë kufirit. Këto avionë monitorojnë çdo shkelje të mundshme të hapësirës ajrore nga forcat izraelite, pas sulmeve të fundit të Izraelit ndaj objektivave iraniane.

Forcimi i sigurisë në kufirin turko-iranian ndodh në një moment kritik, ndërsa rajoni përballet me rrezikun e përshkallëzimit të konfliktit ushtarak mes Iranit dhe Izraelit, i cili mund të përfshijë edhe aktorë ndërkombëtarë si Shtetet e Bashkuara.