Policia ka ndaluar një automjet me targa vendore në Vërmicë, ku janë gjetur katër migrantë, shtetas të huaj.

Rasti ka ndodhur më 21 shtator, rreth orës 04:00. Automjeti drejtohej nga një i dyshuar mashkull kosovar.

I dyshuari është intervistuar dhe, me vendim të prokurorit, është liruar në procedurë të rregullt.

Ndërkohë, migrantët janë trajtuar nga institucionet përkatëse dhe më pas janë dërguar në qendrën strehimore./A.K/

Një burrë në Ferizaj ka kërkuar ndihmë mjekësore pasi dyshohet se është therur me një mjet të mprehtë, konkretisht kaçavidë, nga dy persona të panjohur.

Rasti është raportuar më 21 shtator, rreth orës 22:30.

Viktima ka marrë tretman mjekësor dhe më pas është liruar.

Policia ka bërë të ditur se rasti po hetohet./A.K/

Policia e Kosovës ka identifikuar tre persona të dyshuar për veprën penale “Materiale me përmbajtje të shfrytëzimit dhe keqpërdorimit seksual të fëmijëve”.

Rasti është raportuar më 21 shtator në Prizren dhe Drenas. Si prova materiale janë sekuestruar tre telefona celularë.

Njëri nga të dyshuarit është arrestuar dhe, pas intervistimit, është liruar në procedurë të rregullt, ndërsa dy të dyshuarit e tjerë janë ftuar për intervistim.

Rasti mbetet në procedurë hetimore, njofton Policia e Kosovës./A.K/

Presley Gerber, djali i supermodeles Cindy Crawford dhe sipërmarrësit Rande Gerber, ka vdekur në moshën 27-vjeçare. Vdekja e tij po hetohet nga autoritetet amerikane si një mbidozë e dyshuar.

Policia e Santa Monikës bëri të ditur se më 20 shtator, rreth orës 09:35, mori një njoftim për një mbidozë të mundshme në një objekt në Santa Monica. Kur mbërritën në vendngjarje, zyrtarët gjetën Gerberin pa shenja jete. Vdekja e tij u konfirmua në orën 09:45 nga ekipet mjekësore.

Autoritetet kanë theksuar se deri tani nuk ka asnjë tregues për vepër penale. Shkaku dhe mënyra zyrtare e vdekjes ende nuk janë përcaktuar nga Zyra e Mjekut Ligjor të Los Angelesit, e cila ka bërë të ditur se nevojiten ekzaminime dhe analiza shtesë.

Gerber kishte folur publikisht për betejën e tij me varësinë dhe problemet e shëndetit mendor. Ai kishte ndarë me ndjekësit edhe përvojat e tij gjatë përpjekjeve për trajtim dhe rikuperim, përfshirë përdorimin e ibogainës në Meksikë.

Sipas raportimeve, Gerber ishte në një qendër rehabilitimi në Santa Monica në kohën e vdekjes. Ai ishte model dhe kishte punuar me agjenci të njohura të modës, duke ndjekur edhe profesionin e nënës së tij.

Hetimi për vdekjen e tij vazhdon, ndërsa familja Gerber ka kërkuar privatësi gjatë kësaj kohe./A.K/