Ukraina thotë se Rusia lëshoi një raketë balistike ndërkontinentale gjatë natës, duke shënjestruar qytetin Dnipro në pjesën qendrore-lindore të vendit. Kjo është hera e parë që Moska përdor një raketë të tillë gjatë luftës.

Nuk është e qartë saktësisht se çfarë lloj rakete u lëshua, por Forca Ajrore e Ukrainës tha në një deklaratë në Telegram të enjten se ajo u lëshua nga rajoni i Astrahanit në Rusi.

Sipas Forcës Ajrore të Ukrainës, mëngjesin e 21 nëntorit, trupat ruse sulmuan Dnipron me lloje të ndryshme raketash, duke përfshirë edhe lëshimin e një rakete balistike ndërkontinentale.

Raketat balistike ndërkontinentale (ICBM) janë armë strategjike të dizajnuara për të shpërndarë koka bërthamore dhe janë një pjesë e rëndësishme e mbrojtjes bërthamore të Rusisë.

Ukrainasit nuk specifikuan se çfarë lloj koke kishte raketa apo çfarë tipi rakete ishte. Nuk ka asnjë sugjerim nëse ajo ishte e pajisur me armë bërthamore.

Ky zhvillim ndodh ndërsa lufta ka marrë një dimension gjithnjë e më ndërkombëtar me mbërritjen e trupave të Koresë së Veriut për të ndihmuar Rusinë në fushën e betejës.

Sipas autoriteteve lokale, një ndërmarrje industriale u dëmtua në Dnipro për shkak të goditjes, dhe dy zjarre shpërthyen gjithashtu në qytet.

Kryetari i Bashkisë së Dnipros, Borys Filatov, shtoi se ndërtesa e Qendrës për rehabilitimin e personave me aftësi të kufizuara u dëmtua nga bombardimet.

Rusia, e cila pushtoi Ukrainën në shkurt të vitit 2022, nuk komentoi
menjëherë mbi deklaratën e Forcave Ajrore.

Një ditë më parë, Ambasada e SHBA-së në Ukrainë raportoi se kishte marrë “informacione specifike” për një sulm të mundshëm të rëndësishëm ajror rus më 20 nëntor. Si masë paraprake, ambasada u mbyll. Më pas, misionet diplomatike të Spanjës, Italisë dhe Greqisë njoftuan gjithashtu mbylljen për vizitorët më 20 nëntor.

Shtetet e Bashkuara të Amerikës kanë njoftuar se kanë rihapur ambasadën e saj në Kiev të mërkurën vonë, pas një periudhe mbylljeje të shkaktuar nga kërcënimi i mundshëm i një sulmi ajror. Ambasada u mbyll një ditë më parë, pas një kërcënimi të mundshëm nga sulmet ajrore, ndërsa ndodhi gjithashtu pas një veprimi të Ukrainës, që përdori raketa amerikane për të goditur një objektiv brenda territorit të Rusisë.

Rusia e kishte konsideruar sulmin me raketa si një përshkallëzim të luftës 1000-ditore mes dy vendeve, duke theksuar se ky ishte një hap që mund të rrisë tensionet më tej. Agjencia e spiunazhit ushtarak të Ukrainës ka deklaruar se Rusia po përpiqej të shkaktonte panik, duke shpërndarë mesazhe të rreme në internet për një sulm të afërt me raketa dhe dronë.

Në njoftimin e saj, ambasada amerikane ka nënvizuar rëndësinë e vigjilencës, duke i inkurajuar qytetarët amerikanë të qëndrojnë të informuar dhe të monitorojnë burimet zyrtare të informacionit për ndonjë përditësim mbi situatën. Po ashtu, ambasada ka paralajmëruar që qytetarët duhet të jenë të përgatitur për mundësinë e strehuarjes në rast të shpalljes së alarmit ajror në Kiev.

Departamenti i Shtetit të SHBA-së kishte njoftuar më herët se ambasada në Kiev pritej të rifillonte funksionimin e saj normal të enjten, duke theksuar angazhimin e SHBA-së për të mbështetur Ukrainën gjatë periudhës të tensioneve të larta me Rusinë./UBTNews/

Liderët e Bashkimit Evropian u mblodhën për ditën finale të samitit të G20-s në Rio de Zhaneiro, ku diskutimet kishin si fokus luftërat në Ukrainë dhe Lindjen e Mesme, si dhe pasiguritë që mund të sjellin politikat amerikane, të cilat mund të ndryshojnë nën udhëheqjen e Donald Trump.

Në fjalimin e tij, presidenti i Brazilit, Luiz Inácio Lula da Silva, bëri thirrje për më shumë aksion në luftën kundër ngrohjes globale, duke propozuar që vendet e zhvilluara të rishqyrtojnë objektivat për klimën dhe të i kalojnë ato nga viti 2050 në vitin 2040, ose më së voni në vitin 2045.

Ndërkohë, në kuadër të samitit, presidenti francez Emmanuel Macron u takua kokë më kokë me presidentin kinez Xi Jinping. Macron riafirmoi angazhimin e Francës për të forcuar marrëdhëniet me Kinën dhe theksoi se dy vendet ndajnë një vizion të përbashkët për paqen në Ukrainë. Ai u shpreh se Franca dhe Kina mbështesin zbatimin e Statutit të Organizatës së Kombeve të Bashkuara dhe promovimin e paqes globale.

“Ne ndajmë një vizion të përbashkët për zbatimin e Statutit të OKB-së dhe promovimin e paqes. Pas 1 mijë ditësh lufte që ka nisur Rusia ndaj Ukrainës, unë e di që sikurse ne, edhe ju keni dëshirën për një paqe afatgjatë dhe shqetësoheni për retorikën ushtarake dhe bërthamore të Rusisë”, deklaroi Macron gjatë takimit me Xi Jinping.

Kjo deklaratë vjen në një moment të ndjeshëm për marrëdhëniet ndërkombëtare, pasi Kina ka paralajmëruar mundësinë e vendosjes së taksave për produktet franceze, duke rrezikuar një përshkallëzim të mundshëm të një lufte tregtare mes dy vendeve. Macron, megjithatë, kërkoi të ulë tensionet dhe të forcojë lidhjet e Francës me Kinën, duke theksuar rëndësinë e dialogut dhe bashkëpunimit për zgjidhjen e krizave ndërkombëtare./UBTNews/

Koreja e Veriut dhe Rusia kanë arritur marrëveshje të re për zgjerimin e bashkëpunimit ekonomik, pas bisedimeve të nivelit të lartë në Phenian këtë javë, tha të enjten agjencia shtetërore e lajmeve e Veriut.

Agjencia e Lajmeve Qendrore e Koresë së Veriut (KCNA) nuk tregoi hollësi rreth marrëveshjes së nënshkruar të mërkurën mes zyrtarëve të lartë të tregtisë së Veriut dhe një delegacionit rus të udhëhequr nga Alexandr Kozlov, i cili është ministër i Ekologjisë dhe Burimeve Natyrore të Rusisë.

Agjencia ruse e lajmeve, TASS, raportoi të martën se zyrtarët ranë dakord t’i rrisin numrin e fluturimeve çarter midis dy vendeve për ta promovuar turizmin.

Kozlov, i cili mbërriti në Korenë e Veriut të dielën, u takua me liderin koreanoverior, Kim Jong Un, dhe me zyrtarin e tij kryesor ekonomik, kryeministrin Kim Tok Hun, para se të kthehej në shtëpi të mërkurën, raportoi KCNA.

Gjatë vizitës së Kozlovit, presidenti rus Vladimir Putin ia dhuroi Kopshtit Zoologjik Qendror të Phenianit më shumë se 70 kafshë, përfshirë luanë, arinj dhe disa lloje zogjsh, sipas TASS-it, duke shfaqur shenja të reja se marrëdhëniet mes këtyre dy vendeve po vazhdojnë të rriten.

Në muajt e fundit, Kim Jong Un i ka dhënë përparësi marrëdhënieve me Moskën në përpjekje për të dalë nga izolimi ndërkombëtar dhe për ta forcuar pozitën e tij, duke mbështetur vazhdimisht luftën e Putinit në Ukrainë, dhe njëkohësisht duke e paraqitur Korenë e Veriut si pjesëmarrëse në një front të bashkuar kundër Uashingtonit.

Kim ende nuk e ka pranuar drejtpërdrejt që ka furnizuar Rusinë me pajisje ushtarake dhe trupa për të mbështetur luftën e saj kundër Ukrainës.

Në një seancë me dyer të mbyllur në Parlament, Shërbimi Kombëtar i Inteligjencës i Koresë së Jugut (NIS) tha të mërkurën se në fund të tetorit rreth 11.000 ushtarë koreanoveriorë u zhvendosën në rajonin Kursk të Rusisë – ku trupat ukrainase kanë marrë nën kontroll pjesë të territorit këtë vit – pasi u stërvitën fillimisht në verilindje të Rusisë.

SHBA-ja, Ukraina dhe vende të tjera kanë vlerësime të ngjashme mbi numrin e ushtarëve koreanoveriorë të Rusi.

Nis beson se ushtarët koreanoveriorë janë regjistruar në njësite të forcave ruse dhe disa prej tyre kanë marrë pjesë tashmë në luftime përkrah rusëve, sipas deputetit Lee Seong Kweun, i cili mori pjesë në seancë.

Koreja e Veriut mund t’i fitojë mbase nga 320 milionë deri në 1.3 miliard dollarë në vit nga Rusia për dërgimin e trupave të saj në Ukrainë, duke marrë parasysh numrin e tyre dhe nivelin e pagesave që Rusia ka ofruar për mercenarët e huaj, sipas një studimi të fundit nga Lim Soo-ho, një analist koreanojugor në një institut kërkimor të drejtuar nga Shërbimi Kombëtar i Inteligjencës (NIS).

Megjithëse ky do të ishte burim i rëndësishëm të ardhurash për ekonominë e dëmtuar dhe të sanksionuar rëndë të Koresë së Veriut, fitimi mund të jetë më e ulët se ai që Veriu e fiton nga eksportet e paligjshme të qymyrit ose nga furnizimi me pajisje ushtarake për Rusinë, tha Lim.

Kjo sugjeron se dërgimi i trupave nga Koreja e Veriut ka më pak të bëjë me paratë dhe më shumë me marrjen e teknologjive të rëndësishme ruse për ta avancuar më tej programin e saj bërthamor dhe raketor, gjë që përbën shqetësim madhor në Seul, tha Lim.

Kim e ka shtuar trysninë ndaj Koresë së Jugut, duke hequr dorë nga synimi e kahershëm i vendit të tij për pajtim ndërkorean dhe duke kërcënuar verbalisht me sulme bërthamore ndaj Jugut, nëse provokohet.

Ai ka shfrytëzuar luftën e Rusisë në Ukrainë si shpërqendrim për të përshpejtuar zhvillimin e ushtrisë së tij të armatosur me armë bërthamore, e cila tani zotëron sisteme të ndryshme të armëve bërthamore dhe raketa balistike ndërkontinentale që mund ta godasin SHBA-në.