Hetimet për dyshimet e manipulimeve në procesin e votimit kanë hyrë në fazën më serioze, pasi që së shpejti pritet të nisë një operacion i gjerë intervistimesh ndaj personave të dyshuar për keqpërdorime gjatë numërimit të votave.

Burime të Sinjalit bëjnë të ditur se intervistimet do të zhvillohen në tri stacione policore, përkatësisht në “ALFA”, Lubizhdë dhe Suharekë, ku ekipet e hetuesve janë shpërndarë sipas planit operativ.

Sipas informacioneve, shumica e të ftuarve janë paraparë të paraqiten në orën 08:00, ndërsa një pjesë tjetër do të intervistohet në orën 10:00, në varësi të ndarjes së rasteve dhe përfshirjes së tyre në proces.

Burimet thonë se disa prej të dyshuarve tashmë kanë angazhuar edhe mbrojtës, ndërsa hetuesit do t’i ballafaqojnë me prova dhe materiale që dyshohet se dokumentojnë manipulimet, përfshirë edhe elemente të procesit të rinumërimit.

Hetimet lidhen me dyshimet për një skemë të keqpërdorimeve në numërimin e votave, ku është ngritur dyshimi se mijëra vota janë transferuar nga një kandidat për deputet te një tjetër, dukuri që ka shkaktuar reagime gjithandej dhe dyshime se ndërhyrjet kanë qenë të orkestruara.

Në këtë fazë të zhvillimeve, burimet paralajmërojnë se nuk përjashtohet mundësia që disa persona të ndalohen për 48 orë, nëse gjatë intervistimit rezulton se ekzistojnë dyshime të bazuara për përfshirje të drejtpërdrejtë në keqpërdorime.

Sinjali do t’ju mbajë të informuar me detaje të reja nga ky operacion dhe zhvillimet e ditës.

Në Qendrën e Numërimit dhe Rezultateve po vazhdon edhe sot numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.

Bazuar në përditësimin e fundit të Komisionit Qendror të Zgjedhjeve, deri më tani janë rinumëruar 48,49% vota.

Sipas këtyre rezultateve, LVV ka marrë 46.59% të votave, PDK 22.77%% të votave, LDK 10.20 % të votave si dhe AAK 4.14 %.

Njëherësh, KQZ ka njoftuar se procesi i rinumërimit të votave është përmbyllur plotësisht në 11 komuna.

Xhudistja e njohur kosovare, Laura Fazliu, është shpallur Sportistja e Vitit 2025 nga Federata e Sportit Universitar, si vlerësim për suksesin e jashtëzakonshëm të arritur në FISU World University Games 2025, ku fitoi medaljen e argjendtë, duke përfaqësuar Kosovën me dinjitet dhe krenari. Ky çmim konfirmon edhe një herë përkushtimin, disiplinën dhe talentin e saj në arenën ndërkombëtare të sportit universitar.

Laura Fazliu është studente në Fakultetin e Shkencave të Sportit dhe të Lëvizjes në UBT, ku krahas angazhimit akademik po ndërton edhe karrierën e saj sportive në nivelet më të larta. Ajo përfaqëson shembullin më të mirë të harmonizimit të studimeve me sportin elitar, duke u kthyer në frymëzim për studentët dhe të rinjtë që synojnë sukses si në arsim ashtu edhe në sport.

Me mbështetje të fortë institucionale dhe përkushtim të vazhdueshëm, kampionët ndërtohen çdo ditë – sot dhe në të ardhmen.