Lajmet

​Limaj: Qeveria Kurti duhet të shkarkohet, jo të shpërbehet Kuvendi

Published

2 years ago

on

Kryetari i Nisma Socialdemokrate, Fatmir Limaj, ka thënë se Qeveria Kurti duhet të shkarkohet për t’i hapur rrugë zgjedhjeve të parakohshme dhe jo të shpërbëhet Kuvendi. Limaj u ka bërë thirrje deputetëve që të mos e shkarkojnë veten, pasiqë sipas tij në këtë formë administrohet keqqeverisja e kryeministrit Kurti.

Ish-deputeti Limaj tha se Kurti ka dështuar në secilin sektor, andaj duhet të jap dorëheqje ose të shkarkohet nga deputetët.

“Kur keni dështime në të gjitha planet, në planin social, planin e brendshëm ekonomik, ka dështime në diplomaci, në çdo sektor të zhvillimit ekonomik. Sot arsimtari dhe punëtori i shëndetësisë jeton shumë më keq sesa para katër vjetëve, shporta familjare është dyfishuar. Rrogat nuk kanë lëvizur, kurse gjendja sociale në shoqëri, polarizimi dhe përplasjet kanë arritur në shkallën më të lartë. Largimi i njerëzve dhe fuqisë aktive të punës e shohim si faktor dhe në situata të tilla duhet dikush të marrë përgjegjësinë. Përgjegjësinë e merr ai që e drejton vendin, ata që e duan vendin dhe janë të përgjegjshëm para atyre që kanë votuar japin dorëheqje. Nëse s’ka nivel të tillë të sensit të përgjegjësisë shkohet në një rrugë tjetër, mblidhen deputetët dhe shkarkojnë. Këto janë dy rrugë që i bënë demokracia dhe njihet në sistemin demokratik. Sot tendenca që të mos bëhet askush përgjegjës për këtë situatë është skandaloz. Ne e mbështesim këtë rrugë që e ka iniciuar Aleanca, çdo rrugë tjetër është me i ikë përgjegjësisë dhe me amnistua dhe kjo është me zgjatë agoninë dhe keqmenaxhimin. Apeli jonë është që i ftoj të gjithë deputetët që mos te marrin përgjegjësinë që s’iu takon. Askund në botë deputeti nuk e shkarkon vetën. Bashkohuni dhe shkarkoni”, tha ai.

Duke folur për dialogun me Serbinë, Limaj tha se është e trishtueshme rruga që e ka ndjekur kryeministri Kurti.

“Është e trishtueshme se me sa lehtësi dhe papërgjegjshmëri sillen ata që flasin në emër tonin. Është e trishtueshëm me i pa diplomatët ndërkombëtar që tash nuk e fshehin. Ata që ne na prezantojnë si negociator ne i quajmë si gënjeshtar dhe mashtrues, fatkeqësisht tash e disa herë ka ndodhur nga Brukseli t’i shohim kështu ata që na përfaqësojnë neve si negociator. Kjo është një arsye shtesë për t’u alarmuar dhe për të lanë mërit anash. Tani është koha për racionalitet, pjekuri që dikur mund të bëhet vonë. Ashtu dëmi është bërë dhe jemi të vonuar dhe koha është për ndryshime të mëdha”, theksoi Limaj.

Këto komente i bëri ai pasi prezantoi aderimin e ri në parti, doktor Murtez Zekolli. Zekolli para mediave tha se angazhimi në Nisma është për shkak të nevojës për ndryshim në Kosovë.

“Jam i pakënaqur me gjendjen që gjendet Kosova në këto momente dhe dëshirojë të jap kontribut për vendin tim, çfarë kontributi përpos aktivitetit politik. Unë kam vendosur që përmes këtij subjekti politik të ndryshojmë gjendjen në Kosovë. Besoj se Kosova se ka merituar këtë gjendje që e ka sot”, deklaroi Zekolli.

Kryeministri Albin Kurti para dy ditësh ka takuar kryetarin e PDK-së, Memli Krasniqi me të cilin kanë diskutuar edhe mundësinë për zgjedhje të parakohshme. Kurti ka takuar edhe Mimoza Kusari-Lila nga Alternativa dhe Donika Gërvallën nga iniciativa Guxo, por ftesën për takim e kanë refuzuar nga LDK dhe AAK. Kurti po kërkon që në zgjedhje të shkohet duke e shpërbërë Kuvendin, me të cilët janë të pajtimit edhe në PDK, por LDK dhe AAK po kërkojnë që së pari Kurti të jap dorëheqje dhe pastaj të shpërbëhet Kuvendi.

Related Topics:
Continue Reading

Lajmet

Justina Shiroka-Pula merr zyrtarisht detyrën e presidentes

Published

6 hours ago

on

October 7, 2026

By

Justina Shiroka-Pula ka marrë zyrtarisht detyrën e presidentes së Republikës së Kosovës.

Në ceremoninë e inaugurimit, ushtruesja e detyrës së presidentes, Albulena Haxhiu, ia ka dorëzuar Kushtetutën presidentes së re.

Justina Shiroka-Pula mori 81 vota në Kuvend, në votimin që u zhvillua në mesnatën mes të martës dhe të mërkurës, në fund të afatit kushtetues që e caktoi 6 tetorin si datë të fundit për zgjedhjen e presidentit. Detyrën e siguroi pas dakordimit të Vetëvendosjes dhe Partisë Demokratike të Kosovës./A.K/

Continue Reading

Lajmet

BE-ja shqetësohet për ndryshimet në Ligjin për Dhomat e Specializuara

Published

6 hours ago

on

October 7, 2026

By

Bashkimi Evropian ka shprehur shqetësim të thellë për miratimin nga Kuvendi i Kosovës të Projektligjit për ndryshimin dhe plotësimin e Ligjit për Dhomat e Specializuara të Kosovës.

Në një përgjigje për KOHËN, një zëdhënës i BE-së ka thënë se ndryshimet e miratuara janë në kundërshtim me obligimet ndërkombëtare të Kosovës ndaj Bashkimit Evropian.

“Partneriteti ynë nënkupton jo vetëm interesa të përbashkëta, por edhe përgjegjësi të përbashkëta”, thuhet në përgjigje.

BE-ja ka theksuar se vazhdimisht ka mbështetur punën e Dhomave të Specializuara të Kosovës si institucion të pavarur gjyqësor, të themeluar përmes vendimeve të Kuvendit në vitet 2014–2015 dhe të përcaktuar në Kushtetutën e Kosovës.

Sipas BE-së, mandati dhe pavarësia e Dhomave të Specializuara duhet të respektohen plotësisht, ndërsa drejtësia duhet të vazhdojë të bazohet në parimin e përgjegjësisë penale individuale.

BE-ja i ka bërë thirrje Kosovës që t’u përmbahet obligimeve të saj ndërkombëtare dhe të garantojë pavarësinë gjyqësore të Dhomave të Specializuara, si dhe llogaridhënien dhe drejtësinë për viktimat dhe familjet e tyre nga të gjitha komunitetet në Kosovë.

Projektligji u miratua në Kuvend të martën, pak para përfundimit të afatit për zgjedhjen e Presidentit, pas një marrëveshjeje mes Lëvizjes Vetëvendosje dhe Partisë Demokratike të Kosovës.

Miratimi i tij u shoqërua me protesta në Kosovë, ndërsa kundërshtimi ndaj Dhomave të Specializuara është rritur pas aktgjykimit të 16 shtatorit ndaj Hashim Thaçit, Kadri Veselit, Jakup Krasniqit dhe Rexhep Selimit./A.K/

Continue Reading

Lajmet

Schuebel uron presidenten e re, mbështetja e BE-së do të mbetet e palëkundur

Published

9 hours ago

on

October 7, 2026

By

Ambasadori i Bashkimit Evropian në Kosovë, Dirk Schuebel, ka uruar Justina Shiroka-Pulën për zgjedhjen e saj në postin e Presidentes së Republikës së Kosovës.

Schuebel ka shprehur shpresën për rikthimin e stabilitetit politik dhe institucional në vend, duke theksuar gatishmërinë për të bashkëpunuar me presidenten e re, institucionet e Kosovës dhe spektrin politik.

“Me shpresën për ripërtëritjen e stabilitetit politik dhe institucional, pres me kënaqësi të punoj me Presidenten Shiroka-Pula, institucionet e Kosovës dhe spektrin e gjerë politik për ta afruar vendin më pranë Bashkimit Evropian”, ka deklaruar Schuebel.

Ai ka theksuar gjithashtu se mbështetja e Bashkimit Evropian për Kosovën do të vazhdojë të jetë e palëkundur.

Justina Shiroka-Pula u zgjodh Presidente e Kosovës në raundin e parë të votimit, duke marrë 81 vota në seancën e Kuvendit që kishte nisur më 6 tetor. Votimi përfundoi pak pas mesnate, ndërsa numërimi i votave përfundoi rreth 15 minuta më vonë.

Me zgjedhjen e Shiroka-Pulës, Kosova tashmë ka presidenten e re, ndërsa mesazhi i BE-së vjen me theks të veçantë te stabiliteti institucional dhe vazhdimi i rrugëtimit të vendit drejt Bashkimit Evropian.

D.L

Continue Reading

Lajmet

15 milionë euro për subvencionimin e faturave të energjisë për familjet në nevojë

Published

9 hours ago

on

October 7, 2026

By

Ministri për Punë, Familje dhe Vlerat e Luftës Çlirimtare, Andin Hoti, ka bërë të ditur se janë ndarë 15 milionë euro për mbështetjen e familjeve për faturat e energjisë elektrike, përmes Programit për Mbrojtjen e Konsumatorëve të Cenueshëm të Energjisë Elektrike 2026–2027.

Hoti ka njoftuar se programi është miratuar në mbledhjen e pestë të Qeverisë dhe synon subvencionimin e faturave për familjet që plotësojnë kriteret për përfitim.

Ai ka thënë se në ditët në vijim do të nënshkruajë vendimin që përcakton kushtet dhe kriteret për përfituesit, pas së cilës pritet të hapet thirrja për aplikim.

Sipas Hotit, programi lidhet edhe me obligimet e Kosovës në kuadër të procesit të integrimit evropian dhe zbatimit të Planit të Rritjes për Ballkanin Perëndimor, veçanërisht për identifikimin dhe mbështetjen e konsumatorëve të cenueshëm.

“15 milionë euro mbështetje. Drejtpërdrejt në faturat e familjeve”, ka shkruar Hoti./A.K/

Continue Reading

Të kërkuara