Lajmet

Ligji për Gjykatën Komerciale pritet të hyjë në fuqi në janar 2022

Published

5 years ago

on

Ligji për Gjykatën Komerciale mund të hyjë në fuqi më 1 janar 2022. Të paktën ky është synimi i Ministrisë së Drejtësisë për këtë institucion për të cilin ka pritshmëri se do të krijojë një klimë të përshtatshme të të bërit biznes dhe të rriten investimet.

Kështu deklaroi të enjten zëvendësministri i Drejtësisë, Blerim Sallahu në tryezën “Ndikimi i Gjykatës Komerciale në nxitjen e investimeve”, të organizuar nga Oda Ekonomike Amerikane e Kosovës (OEAK).

Gjatë këtij diskutimi, Sallahu para të pranishmëve tha se do të rrisin numrin e gjyqtarëve nga 5 sa është aktualisht në 30, ndërsa shtoi se krahas kësaj parashihet të rritet edhe numri i stafit administrativ.

Në këtë mënyrë, siç tha ai, numri i personelit komercial do të arrijë në 97 persona.

“Arsyeja tjetër pse ne kemi vendos që ta trajtojmë shumë shpejt këtë projektligj është pasi ju e dini që sot në Departamentin Ekonomik janë vetëm 5 gjyqtarë dhe sipas statistikave që kemi aktualisht në gjykata në vitin 2018-2020 janë diku 2 mijë e 260 lëndë të reja, përjashto lëndët më të vjetra që ekzistojnë. Pesë gjyqtarë, që i bie diku secili gjyqtar të ketë diku 500 lëndë për të kryer. Kështu, në këtë aspekt, është një lloj mundësie që të gjitha këto konteste të zgjidhen në mënyrë më të shpejtë duke e rritur numrin e gjyqtarëve nga 5 në 30, po ashtu edhe me staf administrativ të paraparë, që përafërsisht stafi dhe rritja e numrit të gjyqtarëve, do të ketë diku 97 veta. Kjo lehtëson zgjidhjen e mosmarrëveshjeve, personave fizikë dhe juridikë dhe tregon se po krijojmë një ambient të përshtatshëm për të bërë biznes”, tha ai.

Drejtori i Odës Ekonomike Amerikane, Arian Zeka, tha se do të ishte mirë që Projektligji për Gjykatën Komerciale të votohet sa më shpejtë në Kuvendin e Kosovës, në mënyrë që të mund të hyjë në fuqi më 1 janar të vitit 2022. Ai theksoi se fuqizimi i sundimit të ligjit por edhe zbatimi i kontratave janë çështjet për të cilat është parë pak progres ndër vite, teksa shtoi se me themelimin e Gjykatës Komerciale do të përmirësohet situata.

“Shpresojmë që sa më shpejtë të jetë e mundur ligji të hidhet në votim para deputetëve të Kuvendit të Republikës të Kosovës, dhe si i tillë, do të përfundojë të gjitha procedurat e nevojshme dhe nuk e di nëse është ideale, të hyjë në fuqi më 1 janar të vitit 2022, edhe pse e di se nevojiten edhe përgatitjet e tjera edhe në aspektin e kapaciteteve njerëzore, që duhet të kryhen gjatë kësaj periudhe. Kurdoherë dhe që Banka Botërore ka nxjerrë raportin e saj për të bërit biznes në vend, indikatori i zbatimit të kontratave ishte njëri prej indikatorëve me më së paku progres. Prandaj, shpresojmë që krijimi i Gjykatës Komerciale do të ndikojë në përmirësimin e këtij indikatori, edhe në nxitjen e investimeve të brendshme edhe në tërheqjen e investimeve të jashtme në vend”, u shpreh Zeka.

Lidhur me këtë zëvendësministri Sallahu tha se janë të interesuar që ligji të futet në fuqi më 1 janar të vitit të ardhshëm, por theksoi se paraprakisht për këtë duhet të konsultohet ministri i Financave, Hekuran Murati.

“Sot do të isha i kënaqur të jepja një zotim të tillë, mirëpo mendojmë paraprakisht të marrim edhe një konsultë nga ministri i Financave, Hekuran Murati, sepse ai është që e adreson dhe e vendos këtë çështje. Mirëpo, nëse kemi edhe para nga donatorët, dhe prej qeverisë, jemi të interesuar që më 1 janar të vitit të ardhshëm të futet në fuqi, mirëpo duhet paraprakisht një konsultim me ministrin e Financave”, tha Sallahu.

Ndërsa Ardi Shita, jurist në OEAK, tha se do të ndihmojnë Ministrinë e Drejtësisë për rritjen e zbatueshmërisë së kontratave.

Related Topics:
Continue Reading

Lajmet

PZAP refuzon ankesat për rinumërim, KQZ pret afatin për ankim në Gjykatën Supreme

Published

4 hours ago

on

June 22, 2026

By

Komisioni Qendror i Zgjedhjeve (KQZ) ka bërë të ditur se do të presë përfundimin e të gjitha procedurave ankimore para shpalljes së rezultateve përfundimtare të zgjedhjeve të parakohshme për Kuvendin e Kosovës.

Kjo vjen pasi Paneli Zgjedhor për Ankesa dhe Parashtresa (PZAP) ka refuzuar ankesat e paraqitura nga kandidatët për deputetë, Bekim Haxhiu nga PDK-ja dhe Qëndrim Kryeziu nga LDK-ja, të cilët kishin kërkuar rinumërim të votave.

Sipas vendimit të PZAP-it, ankesat janë vlerësuar si të pabazuara dhe nuk është urdhëruar rinumërim shtesë.

Zëdhënësi i KQZ-së, Valmir Elezi, ka konfirmuar se institucioni është njoftuar me vendimet, por ka theksuar se palët kanë të drejtë ankese në Gjykatën Supreme brenda afatit ligjor prej 48 orësh.

Sipas KQZ-së, vetëm pas plotfuqishmërisë së vendimeve do të vlerësohet nëse ekzistojnë obligime konkrete për zbatim nga ana e institucionit. Nëse nuk do të ketë vendime të tjera që ndikojnë në proces, atëherë KQZ do të procedojë me shpalljen e rezultateve përfundimtare të zgjedhjeve.

Kujtojmë se Bekim Haxhiu kishte kërkuar rinumërim të plotë të votave të kandidatëve të PDK-së, duke argumentuar se gjatë rinumërimeve të deritanishme janë evidentuar mospërputhje në numërim dhe se diferencat e ngushta mes kandidatëve mund të ndikojnë në renditjen përfundimtare. Megjithatë, PZAP nuk e ka mbështetur këtë kërkesë. /A.K/

 

Continue Reading

Lajmet

Përurohet “Oda e Zejtarëve” në Çarshinë e Vjetër të Gjakovës

Published

5 hours ago

on

June 22, 2026

By

Në Çarshinë e Vjetër të Gjakovës është përuruar “Oda e Zejtarëve”, një projekt i dedikuar promovimit të zejeve tradicionale dhe ruajtjes së trashëgimisë kulturore të qytetit.

Lajmin e ka bërë të ditur kryetari i Komunës së Gjakovës, Ardian Gjini, i cili ka vlerësuar rëndësinë e këtij investimi për zhvillimin kulturor dhe turistik të komunës.

“Sot, në Çarshinë e Vjetër të Gjakovës, përuruam Odën e Zejtarëve – një projekt i veçantë për qytetin dhe trashëgiminë tonë kulturore”, ka deklaruar Gjini.

Sipas tij, projekti do t’u shërbejë zejtarëve lokalë si një hapësirë e dedikuar për promovimin e zejeve tradicionale, ndërsa të rinjtë dhe vizitorët do të kenë mundësi të njihen më nga afër me këtë pjesë të rëndësishme të trashëgimisë kulturore.

Investimi është realizuar në kuadër të projektit “Ndërlidhja e turizmit përmes trashëgimisë kulturore dhe zgjidhjeve inteligjente në Lezhë dhe Gjakovë”, i financuar nga Programi IPA Cross-Border Shqipëri–Kosovë.

Kryetari Gjini ka theksuar se zhvillimi i turizmit dhe fuqizimi i ofertës kulturore të Gjakovës mbeten ndër prioritetet kryesore të qeverisjes lokale./A.K/

Continue Reading

Lajmet

Siparantum Kids sjell mbrëmje artistike në Prishtinë për Festën Ndërkombëtare të Muzikës

Published

5 hours ago

on

June 22, 2026

By

Në kuadër të Festës Ndërkombëtare të Muzikës, Siparantum Kids organizoi një mbrëmje të veçantë artistike në zemër të Prishtinës, duke sjellë para publikut performanca të zërave të rinj.

Me një program të përzgjedhur muzikor, fëmijët interpretuan këngë korale dhe përcollën mesazhe bashkimi, gëzimi dhe shprese, duke dëshmuar fuqinë e muzikës si një gjuhë universale që lidh njerëzit përtej kufijve.

Sipas Ambasadës Franceze në Kosovë, e cila ka mbështetur këtë aktivitet kulturor, çdo tingull, buzëqeshje dhe duartrokitje e mbrëmjes ishte një festë e talentit, kreativitetit dhe dashurisë për artin.

Ngjarja mblodhi artdashës dhe qytetarë të shumtë, duke e kthyer Prishtinën në një hapësirë feste dhe promovimi të kulturës përmes muzikës.

/A.K/

Continue Reading

Lajmet

“Toy Story 5” drejt një debutimi rekord në kinema

Published

5 hours ago

on

June 22, 2026

By

Filmi i ri i Disney dhe Pixar, “Toy Story 5”, pritet të jetë një nga premierat më të suksesshme të vitit 2026, pasi ka shënuar rezultate mbresëlënëse që në para-shfaqje.

Sipas raportimeve, vazhdimi i shumëpritur i sagës së animuar ka arkëtuar rreth 15.2 milionë euro në para-shfaqje, duke regjistruar rezultatin më të mirë të vitit dhe të dytin më të lartë ndonjëherë për një film të animuar.

Parashikimet tregojnë se filmi mund të arkëtojë nga 126 deri në 130 milionë euro gjatë fundjavës së hapjes në Amerikën e Veriut, ndërsa disa analiza e vendosin këtë shifër edhe mbi 140 milionë euro.

“Toy Story 5” pritet të tejkalojë debutimin e “Toy Story 4”, duke vendosur një rekord të ri për serinë. Në tregjet ndërkombëtare, filmi synon të arkëtojë rreth 117 milionë euro, duke e çuar totalin global të fundjavës së parë në mbi 239 milionë euro.

Në këtë kapitull të ri, Buzz, Woody, Jessie dhe lodrat e tjera përballen me sfida të reja, ku teknologjia shfaqet si antagonisti kryesor përmes tabletit inteligjent Lilypad.

Në kastin e zërave rikthehen aktorët Tom Hanks, Tim Allen dhe Joan Cusack, ndërsa pjesë e filmit janë edhe Conan O’Brien dhe Greta Lee.

Me një buxhet prej rreth 217 milionë eurosh, “Toy Story 5” konsiderohet një nga projektet më të mëdha të Disneyt për këtë vit dhe pritet të shënojë sukses të madh në arkat kinematografike./BBC/

/A.K/

Continue Reading

Të kërkuara