Botë

Lideri koreanoverior urdhëron “prodhim masiv” të dronëve sulmues

Published

2 years ago

on

Udhëheqësi i Koresë së Veriut, Kim Jong Un, ka urdhëruar “prodhim masiv” të dronëve sulmues, raportoi media shtetërore më 15 nëntor, teksa shqetësimet po rriten lidhur me thellimin e bashkëpunimit mes Phenianit dhe Rusisë.

Pheniani fillimisht bëri publik dronët e tij sulmues në gusht, teksa ekspertët thanë se aftësia për të prodhuar armë të tilla mund t’i atribuohet aleancës së Koresë së Veriut me Rusinë.

Korja e Veriut ka ratifikuar një pakt të mbrojtjes me Rusinë, teksa po akuzohet se ka dërguar mijëra trupa në Rusi për të mbështetur luftën e Moskës kundër Ukrainës. Ky fakt ka shtyrë presidentin e Koresë së Jugut, Yoon Suk Yeol, që të paralajmërojë për mundësinë e transferimit nga Rusia te Koreja e Veriut teknologji të ndjeshme ushtarake.

Kim një ditë më herët mbikëqyri dizajnimin e dronëve, që mund të shënjestrojnë edhe caqet tokësore dhe detare, e të cilat po prodhohen në kompleksin e Koresë së Veriut për prodhimin e dronëve, tha media shtetërore koreanoveriore, KCNA.

“Ai theksoi nevojën e ndërtimit të një sistemi të prodhimit serik sa më shpejt që të jetë e mundur dhe të shkohet në prodhim në masë”, raportoi KCNA.

Drontë janë të dizajnuar që të bartin mjete shpërthyese dhe munden që të përplasen edhe me caqet armike dhe kështu të veprojnë edhe si raketa të telekomanduara.

Sipas KCNA-së, në testimet e kryera të enjten, dronët goditën “në mënyrë precize” caqet e tyre.

“Drontë vetëvrasës që do të përdoren për rreze të ndryshme veprimi duhet të kryejnë misione për të sulmuar në mënyrë precize çdo objektiv armiku në tokë dhe në det”, tha agjencia.

Kim tha se dronët “janë të lehtë për të përdorur” për të kryer sulme dhe po ashtu kanë kosto relativisht të ulët të prodhimit.

Ai tha se Koreja e Veriut “i ka kushtuar rëndësi kohëve të fundit” prodhimit të dronëve dhe integrimit të tyre në strategjinë e përgjithshme ushtarake të shtetit.

Ekspertët kishin deklaruar se dronët – imazhet e të cilëve u publikuan në gusht nga Koreja e Veriut – dukeshin të ngjashëm me dronët HAROP, të prodhuara nga Izraeli, dronët Lancet-3 të prodhimit rus dhe dronët HERO 30 të prodhuara nga Izraeli.

Koreja e Veriut mund të ketë marrë teknologji për prodhimin e dronëve nga Rusia, e cila me gjasë i ka marrë nga Irani, teksa vet Teherani akuzohet se e ka vjedhur këtë teknologjinë nga Izraeli.

Më 2022, Pheniani dërgoi dronë përtej kufirit dhe ushtria e Seulit nuk arriti t’i rrëzonte, duke thënë se fluturaket ishin shumë të vogla./REL/

Related Topics:
Continue Reading

Aktualitet

Mbi 1,700 të vdekur nga tërmetet në Venezuelë: Familjarët akuzojnë autoritetet për neglizhencë në kërkim-shpëtim

Published

60 minutes ago

on

June 30, 2026

By

Venezuela po përballet me pasojat e asaj që Presidentja e përkohshme, Delcy Rodríguez, e ka cilësuar si “katastrofën natyrore më brutale” në historinë e vendit. Dy tërmete të njëpasnjëshme, që goditën javën e kaluar, kanë lënë të vdekur të paktën 1,700 persona, ndërsa qyteti bregdetar La Guaira mbetet një nga zonat më të shkatërruara.

Në këtë qytet, skenat e ankthit përsëriten çdo ditë. Pranë rrënojave të një ndërtese 12-katëshe, ekipet e shpëtimit nga Venezuela dhe Kolumbia bëjnë thirrje për heshtje totale, duke fikur makineritë në përpjekje për të dëgjuar ndonjë shenjë jete nën pllakat e betonit. Megjithatë, për shumë familjarë që presin buzë rrugës, shpresa po zbehet nga zemërimi ndaj reagimit të ngadaltë të qeverisë.

Familjarët e personave të bllokuar thonë se janë humbur ditë të çmueshme përpara se të niste operacioni zyrtar i shpëtimit. Fillimisht, ishin vetëm banorët e zonës ata që gërmonin me duar, ndërsa policia vetëm vëzhgonte pa ndihmuar. Shumë prindër, si Miguel Oscar Nunez, djaloshi 34-vjeçar i të cilit ndodhet nën rrënoja, i frikësohen faktit se vonesat e autoriteteve mund t’u kushtojnë jetën të afërmve të tyre.

Ndërkohë, në pjesë të tjera të shtetit La Guaira, ekipet e shpëtimit dhe makineritë nuk kanë mbërritur ende, duke i lënë banorët krejtësisht të vetëm në kërkim të familjarëve.

Më poshtë janë dëshmitë prekëse të prindërve që po kërkojnë fëmijët e tyre mes rrënojave dhe spitaleve:

“Djali im, ashtu si qindra të tjerë, është i bllokuar nën rrënoja. Kemi nevojë urgjente për më shumë mbështetje nga autoritetet për t’i nxjerrë. Ka mundësi që tërmeti të mos e ketë mbytur, por a e imagjinoni dot nëse ai vdes për shkak të neglizhencës së autoriteteve? Nuk e kam humbur shpresën, por ndihem i shkatërruar. Ligji i natyrës është që babai të vdesë para djalit.”

Miguel Oscar Nunez, prind i një djalit 34-vjeçar të bllokuar në rrënoja. “Operacioni i shpëtimit ka filluar shumë vonë dhe ka qenë i ngadaltë. Përgjigja e qeverisë ka qenë frustruese dhe na ka lënë të pafuqishëm.”

Kevin Montilla, shtëpia e të cilit u shkatërrua teksa gruaja dhe vajza e tij 16-vjeçare ndodheshin brenda. “Nuk kam ndihmë nga askush. Asnjë makineri apo shpëtimtar nuk është dërguar për të gërmuar në rrënoja. Është sikur të jesh lënë krejtësisht vetëm për të gjetur njerëzit e tu të dashur. Vajzat e mia ishin të qeta, vajza që mësonin. Thjesht i dua ato mbrapsht me çdo kusht.”

Deilisbeth Herreira, nënë vetëushqyese që po kërkon nëpër spitale dhe rrënoja dy vajzat e saj, 12 dhe 13 vjeçe. /BBC/ /E.A/

Continue Reading

Lajmet

Të shtëna me armë në Gjermani, të paktën pesë persona humbin jetën

Published

18 hours ago

on

June 29, 2026

By

Të paktën pesë persona janë vrarë si pasojë e të shtënave me armë në qytetin Stade, në veri të Gjermanisë.

Një zëdhënës i policisë konfirmoi se një person është arrestuar në lidhje me rastin, por nuk dha detaje të tjera mbi identitetin e të dyshuarit apo numrin e saktë të viktimave.

Policia e Lüneburgut u ka bërë thirrje qytetarëve që të shmangin zonën, ndërsa hetimet për zbardhjen e rrethanave të ngjarjes janë në zhvillim.

Autoritetet nuk kanë dhënë ende informacione për motivin e sulmit, ndërsa një numër i madh i ekipeve të emergjencës vazhdojnë të jenë të angazhuara në vendin e ngjarjes./A.K/

Continue Reading

Lajmet

Të shtëna me armë në zonën e tifozëve të Kupës së Botës në Kaliforni, një i vrarë dhe një i plagosur rëndë

Published

20 hours ago

on

June 29, 2026

By

Të paktën një person ka humbur jetën dhe një tjetër është plagosur rëndë si pasojë e të shtënave me armë në një zonë të dedikuar për tifozët e Kupës së Botës në San Jose të Kalifornisë.

Sipas Departamentit të Policisë së San Jose, njëri nga viktimat u shpall i vdekur në vendin e ngjarjes, ndërsa personi tjetër u dërgua me lëndime të rënda në një spital lokal.

“Një viktimë u shpall e vdekur në vendngjarje. Viktima e dytë u transportua në një spital lokal me lëndime kërcënuese për jetën”, njoftoi policia.

Autoritetet kanë bërë të ditur se rasti po hetohet si vrasje dhe se disa rrugë në zonë janë mbyllur për shkak të hetimeve.

“Ky incident po hetohet si vrasje. Disa rrugë përreth janë të mbyllura në zonë”, thuhet në njoftimin e policisë.

Të shtënat ndodhën në Sheshin San Pedro, një nga hapësirat ku tifozët janë mbledhur për të ndjekur ndeshjet e Kupës së Botës në ekrane të mëdha në natyrë. Megjithatë, në momentin e incidentit nuk po transmetohej asnjë ndeshje futbolli.

Deri më tani, në Zonën e Gjirit të San Franciskos janë zhvilluar pesë ndeshje të Kupës së Botës, ndërsa e fundit ishte ndeshja eliminatore mes Bosnjës dhe Shteteve të Bashkuara të Amerikës./A.K/

Continue Reading

Lajmet

Shkon në afro 1.500 numri i viktimave nga tërmetet në Venezuelë, vazhdojnë kërkimet për të mbijetuar

Published

20 hours ago

on

June 29, 2026

By

Ekipet e shpëtimit në Venezuelë po vazhdojnë operacionet intensive të kërkim-shpëtimit pas dy tërmeteve të fuqishme që goditën vendin javën e kaluar, ndërsa numri i viktimave ka arritur në afro 1.500.

Sipas Reuters, ekipe shpëtimi nga vende të ndryshme kanë mbërritur në shtetin La Guaira, zona më e goditur nga fatkeqësia, ku dhjetëra ndërtesa janë shembur. Ky rajon bregdetar ndodhet rreth 40 kilometra në veri të kryeqytetit, Karakas.

Presidentja në detyrë, Delcy Rodríguez, ka deklaruar se operacionet e kërkim-shpëtimit do të vazhdojnë për aq kohë sa ekziston shpresa për të gjetur të mbijetuar.

“Sot kemi nxjerrë njerëz të gjallë nga rrënojat, prandaj operacionet vazhdojnë. Ne nuk e humbasim shpresën”, është shprehur Rodríguez.

Ajo ka bërë të ditur gjithashtu se është formuar një komision presidencial për të vlerësuar sigurinë e ndërtesave të dëmtuara, ndërsa mësimi në shkolla do të mbetet i pezulluar edhe për një javë. Sipas saj, furnizimi me energji elektrike në La Guaira është rikthyer në rreth 75 për qind.

Qeveria ka falënderuar vullnetarët që po dërgojnë ndihma në zonat e prekura, por ka kufizuar qarkullimin në rrugët kryesore për të lehtësuar lëvizjen e automjeteve të emergjencës.

Ndërkohë, presidenti i Asamblesë Kombëtare, Jorge Rodríguez, ka bërë të ditur se deri më tani janë konfirmuar 1.450 viktima, 3.150 persona të lënduar, 12.721 të pastrehë dhe 774 ndërtesa të shembura.

“Po kalojmë orë vendimtare për të shpëtuar sa më shumë jetë dhe për të ngritur kampe për njerëzit që kanë humbur shtëpitë ose nuk mund të kthehen në banesat e tyre”, ka deklaruar ai.

Para mbërritjes së më shumë se 2.600 punonjësve ndërkombëtarë të shpëtimit, familjarët dhe vullnetarët kërkuan për ditë të tëra të mbijetuar dhe viktima mes rrënojave, duke u ankuar për mungesën e makinerive të rënda dhe ndihmës së mjaftueshme nga autoritetet.

Situata mbetet kritike edhe për shkak të qindra lëkundjeve pasuese që vazhdojnë të godasin zonat e prekura, duke vështirësuar operacionet e kërkim-shpëtimit./A.K/

Continue Reading

Të kërkuara