Dita kur do të marrim vesh kush do ta fitojë titullin në ligën më të fortë të basketbollit në botë, NBA, po afron.

Kur Oclahoma City thunder e ktheu serinë e fitoreve në favor të vetin (3:2), u mendua se garës i erdhi fundi.

Megjithatë, Indiana Pacers u kujdes për një fitore mbrëmë (108-91), për ta barazuar rezultatin dhe për të lënë që gjithçka rreth më të mirit të vendoset në ndeshjen e shtatë të finales.

Më të mirët te Indiana ishin Obi Topin me 20 pikë, Andrew Nembhan me 17 dhe Paskal Siakam me 16, derisa te Oclahoma u dalluan Shai Gilgeous-Alexander me 21 pikë dhe Jalen Williams me 16.

Prishtina sot mirëpret afro 300 pingpongist ne edicionin e tretë të turneut ndërkombëtar të pingpongut Prishtina Open 2025, një prej ngjarjeve më të mëdha sportive të vitit në vend.

Gjatë tri ditëve të ardhshme, Pallati i Rinisë dhe Sportit do të jetë qendra e këtij sporti, ku mbi 300 pingpongistë nga 25 shtete të ndryshme do të përballen në duele të mbushura me energji dhe pasion.

Turneu përfshin të gjitha kategoritë, nga më të vegjlit U11 e deri tek veteranët, duke ofruar mundësi për secilin sportist të tregojë talentin dhe përkushtimin e tij në një skenë ndërkombëtare. Krahas garave, organizatorët kanë përgatitur një atmosferë mikpritëse për pjesëmarrësit dhe spektatorët, me aktivitete përcjellëse dhe surpriza për publikun.

Ky event organizohet nga Klubi i Pingpongut Priping, ne kuadër te aktiviteteve te Ditës se Çlirimit te Prishtinës, dhe synon jo vetëm ngritjen e nivelit të pingpongut në vend, por edhe promovimin e Kosovës si një destinacion sportiv ndërkombëtar.

Turneu fillon ne ora 10:00 me kategoritë junior U19.

Sokol Cikalleshi, një prej emrave më të spikatur të sulmit kuqezi në dekadën e fundit, ka vendosur t’i japë fund karrierës së tij si futbollist profesionist.

Lajmi është mësuar nga burime të “Panorama Sport”, që raportojnë se ky është vendimi aktual i sulmuesit kavajas, edhe pse një komunikim zyrtar ende nuk është bërë nga vetë lojtari.

Cikalleshi e mbylli sezonin e fundit në Turqi, ku aktivizohej me skuadrën e Adanasporit, pjesë e ligës së dytë turke.

Megjithatë, përfundimi i aventurës nuk ishte ai që do të kishte dëshiruar sulmuesi: skuadra nuk arriti të siguronte mbijetesën në kategori dhe për pasojë edhe kontrata afatshkurtër e Cikalleshit, që ishte vetëm për 6 muaj, nuk u rinovua.

Pas shumë vitesh karrierë mes Shqipërisë, Kroacisë, Turqisë dhe Arabisë Saudite, ku ka qenë pjesë e disa klubeve me peshë dhe ka qenë një emër i qëndrueshëm në listën e trajnerëve të Kombëtares, 34-vjeçari ka vendosur të mbyllë një kapitull të rëndësishëm të jetës së tij.

Me 60 ndeshje dhe 13 gola të shënuar me fanellën kuqezi, Cikalleshi do të mbahet mend si një prej sulmuesve më të rëndësishëm të brezit të tij.

Juventusi dha një paraqitje të jashtëzakonshme në ndeshjen e parë të Kupës së Botës për Klube, duke mposhtur bindshëm skuadrën arabe Al Ain me rezultatin 5-0. Pavarësisht formës së mirë të kundërshtarit, që kishte pësuar vetëm një gol në shtatë ndeshjet e fundit, “Zonja e Vjetër” dominoi lojën nga minuta e parë deri në fund.

Randal Kolo Muani hapi serinë e golave vetëm pas 11 minutash, ndërsa Francisco Conceição dhe Kenan Yıldız shënuan gola të bukur për të thelluar avantazhin. Pak para përfundimit të pjesës së parë, Kolo Muani realizoi edhe golin e tij të dytë personal.

Në pjesën e dytë, Conceição shënoi përsëri për të vulosur fitoren, ndërsa Juventusi kontrolloi totalisht ndeshjen. Portieri i Al Ainit, Rui Patrício, ishte një nga më të mirët në fushë, duke parandaluar disfatën edhe më të thellë, përmes një pritjeje të madhe ndaj një goli të mundshëm të Kolo Muanit për hat-trick.

Kjo fitore për Juventusin është një sinjal i fortë përpara sfidës së ardhshme kundër Wydad AC, ndërsa Al Ain do të ketë një përballje tepër sfiduese me Manchester Cityn në fazën tjetër të turneut.