Sipas Corriere dello Sport, klubi zikaltër i ka kërkuar mesfushorit shqiptar Kristjan Asllani që të largohet gjatë kësaj vere, por refuzimi i tij për të pranuar transferimin po shqetëson drejtuesit.

Asllani iu bashkua Interit në verën e vitit 2022 nga Empoli dhe ka kaluar tashmë tre sezone në San Siro, por pa arritur asnjëherë të konsolidohet si titullar. Pavarësisht potencialit të treguar, ai ka mbetur gjithmonë një alternativë në mesfushë, në një skuadër të mbushur me konkurrencë të fortë.

Sipas raportimit, trajneri i ri Chivu i ka komunikuar personalisht lojtarit se nuk bën pjesë në planet e tij për sezonin e ardhshëm, dhe se nuk e sheh me rol të rëndësishëm në mesin e fushës. Interi beson se, në moshën 23-vjeçare dhe me përvojë në një klub të madh, Asllani ka të gjitha mundësitë për të rifilluar karrierën në një skuadër tjetër.

Megjithatë, përgjigjja e futbollistit ka qenë negative. Ai nuk ka treguar entuziazëm për një largim dhe, mbi të gjitha, nuk dëshiron të transferohet jashtë Serie A, duke refuzuar për shembull interesin konkret nga Real Betis, finalist në Conference League.

Ky qëndrim i Asllanit ka filluar të krijojë tension te Interi, që synon ta shesë lojtarin dhe të përfitojë nga kartoni i tij për të financuar afrime të reja gjatë merkatos. Klubi kërkon që lojtari të pranojë realitetin e situatës dhe të ndihmojë në arritjen e një marrëveshjeje të favorshme për të gjitha palët.

Për momentin, e ardhmja e Asllanit mbetet e pasigurt, por duket e qartë se ditët e tij në Milano janë të numëruara nëse nuk ndodh ndonjë ndryshim drastik në qëndrimin e tij apo në planet e Interit.

Ish-ylli i AC Milan, Juventus dhe Inter Milan, Andrea Pirlo, ka nisur një aventurë të re si trajner, duke marrë drejtimin e klubit Dubai United në Emiratet e Bashkuara Arabe. Ai rikthehet në stol pas një periudhe pushimi, ndërsa klubi nga Dubai, që luan në divizionin e dytë të kampionatit të Emirateve, e ka prezantuar zyrtarisht si trajnerin e ri.

Pirlo, fitues i Kupës së Botës 2006, së fundmi kishte drejtuar Sampdorian. Dubai United është klubi i tij i dytë jashtë Italisë, pas eksperiencës me skuadrën turke Karagumruk në sezonin 2022/2023. Më herët, gjatë sezonit 2020/2021, ai ishte trajner i Juventusit, me të cilin fitoi Kupën dhe Superkupën e Italisë.

“Fitues i Kupës së Botës 2006 dhe një ikonë e futbollit global, Pirlo sjell me vete një vizion unik dhe përvojë të rëndësishme si trajner, të fituar në stolat e Juventusit dhe Sampdorias. Emërimi i tij përfaqëson një kapitull të ri dhe ambicioz për United FC”, thuhet në njoftimin zyrtar të klubit.

Kryetari i klubit, Ilie Cebanu, deklaroi: “Jemi krenarë që e mirëpresim Andrean në familjen e United FC. Ai mishëron vlerat dhe ambiciet e klubit tonë dhe jemi të bindur se do të jetë një figurë kyçe në çuarjen e klubit në një nivel më të lartë.”

Xhudistja kosovare Enise Zijade ka shkruar histori duke fituar medaljen e bronztë në Festivalin Evropian të Rinisë Olimpike (EYOF) Shkup 2025, e para për sportin e xhudos dhe e dyta në historinë e pjesëmarrjes së Kosovës në EYOF-a.

Pas suksesit të madh të saj, Zijade u shpreh shumë e lumtur për këtë sukses për të cilin tha se ka bërë shumë mund dhe sakrificë.

“Së pari falënderoj shumë dy trajnerët, Driton Kuka dhe Majlinda Kelmendi, ne ushtrojmë dy herë në ditë, në orën gjashtë të mëngjesit fillojmë dhe në orën shtatë në mbrëmje. Për dy vite kam qenë ën formë por nuk kam marrë medalje, kam pritur që marr, sot ishte dita dhe jam shumë e lumtur për sakrificën dhe mundin që e kam bërë për ta marrë këtë medalje”, theksoi Zijade.

Për suksesin e Zijades, ka reaguar edhe trajneri Dirton Kuka, i cili përmes një shkrimi në rrjete sociale ka thënë se ndihet edhe më i lumtur pasi kanë filluar të korren frytet e para të Majlinda Kelmendit si trajnerë.

Milani po përgatit një ofertë të re dhe të përmirësuar për Club Brugge për Ardon Jasharin, duke rritur tarifën fikse në 35 milionë euro dhe duke ulur bonuset që lidhen me performancën.

“La Gazzetta dello Sport” thekson se kjo është afërsisht e njëjta shifër e përgjithshme për investimin, por struktura e tij do të ndryshojë.

Kjo do të thotë që kur drejtori ekzekutiv Giorgio Furlani u tha drejtorëve belgë se oferta përfundimtare do të ishte 32.5 milionë euro plus bonuse, kjo nuk ishte krejtësisht e pasaktë.

Prandaj, do të zhvendoset në 35 milionë euro të garantuara, plus një shifër më të vogël për shtesat e lidhura me performancën e lojtarit dhe të ekipit gjatë kohës së tij në San Siro.

Duke ndryshuar strukturën e ofertës, nëse jo shifrën totale, kjo mund të sjellë një rezultat të ndryshëm për Milanin.

Club Brugge e kishte bërë të qartë se ishte i gatshëm ta linte Jasharin të shkonte vetëm nëse merrte 35 milionë euro paraprakisht.

Me këtë ndryshim, Milani është i bindur se mund ta arrijë marrëveshjen dhe t’i japë Max Allegrit mesfushën e tij të ripërtërirë plotësisht me Samuele Ricci, Jashari dhe Luka Modric.