Autoritetet ruse kanë njoftuar të mërkurën se kanë arrestuar një shtetas të Uzbekistanit, i cili, sipas tyre, ka pranuar montimin e një bombe që vrau gjeneralin rus, Igor Kirillov, në Moskë, një ditë më parë, me porosi nga shërbimi i sigurisë i Ukrainës.

Kirillov, i cili ishte shef i Trupave për Mbrojtje Bërthamore, Biologjike dhe Kimike të Rusisë, u vra para banesës së tij, bashkë me asistentin e tij, pas shpërthimit të një bombe të fshehur në një skuter elektrik.

Ndonëse asnjë individ apo grup nuk e ka marrë përgjegjësinë për vrasjen, një burim brenda shërbimit të inteligjencës i Ukrainës, SBU – agjenci që ka akuzuar Kirillovin se ka qenë përgjegjës për përdorimin e armëve kimike kundër trupave ukrainase, diçka që Moska e mohon – ka thënë për Radion Evropa e Lirë se shpërthimi ka qenë rezultat i një operacion special të SBU-së.

Komiteti Hetues i Rusisë, i cili heton krime serioze, ka thënë përmes një komunikate, të mërkurën, se i dyshuari i paidentifikuar u kishte thënë, gjatë marrjes në pyetje, se kishte ardhur në Moskë, ku kishte marrë një pajisje të improvizuar shpërthyese për të kryer vrasjen.

Deklarata e autoriteteve ruse ka thënë se ai ka përshkruar se si e kishte vendosur mjetin shpërthyes në një skuter elektrik, të cilin e kishte parkuar para hyrjes së ndërtesës së banimit, ku Kirillov jetonte.

Hetuesit e kanë cituar atë të ketë thënë se ai kishte vendosur një kamerë monitoruese në një veturë të marrë me qira aty afër, dhe se organizatorët e vrasjes, që ai thuhet të ketë thënë se janë nga qyteti ukrainas i Dnipros, kishin përdorur kamerën për të gjurmuar Kirillovin dhe e kishin aktivizuar bombën na largësia, pas daljes së tij nga banesa.

Sipas deklaratës së hetuesve rusë, të dyshuarit, i lindur më 1995, i ishin ofruar 100.000 dollarë për rolin e tij në vrasjen e gjeneralit, si dhe banim në një vend evropian.

Hetuesit rusë kanë thënë se janë duke identifikuar njerëz të tjerë të përfshirë në vrasje, ndërsa e përditshmja Kommersant ka raportuar se është arrestuar edhe një i dyshuar tjetër.

Ky pohim nuk ka qenë i mundur të konfirmohet në mënyrë të pavarur./REL/

Presidenti turk Rexhep Tajip Erdogan i kërkoi BE-së të mbështesë kthimin e refugjatëve sirianë që ikën gjatë luftës civile 13-vjeçare të vendit.

Gjatë një konference për shtyp me Presidenten e Komisionit Evropian Ursula von der Leyen ai bëri thirrje për një administratë gjithëpërfshirëse në Siri dhe përjashtoi çdo rol të grupeve “terroriste” në rajon.

“Ne kemi parë se jemi dakord për krijimin e një administrate gjithëpërfshirëse në Siri,” tha Erdogan.

Shtetet perëndimore po hapin gradualisht kanale për autoritetet e reja në Damask të udhëhequra nga grupi islamik Hayat Tahrir al-Sham (HTS), megjithëse ata vazhdojnë ta cilësojnë atë si një grup terrorist.

Erdogan tha se nuk kishte vend për organizatat terroriste në rajon, duke iu referuar veçanërisht Shtetit Islamik dhe grupeve militante kurde. Ministri i Jashtëm turk Hakan Fidan ka theksuar më parë rëndësinë e një procesi tranzicioni gjithëpërfshirës në Siri.

Erdogan gjithashtu i bëri thirrje Bashkimit Evropian që të mbështesë kthimin në shtëpi të sirianëve që ikën nga lufta, miliona prej tyre në Turqi.

“Ne presim që Bashkimi Evropian të mbështesë kthimet në Siri,” tha ai.

Një sulm ajror izraelit në Rripin e Gazës i ka lënë të vdekur të paktën tetë njerëz nga familja e njëjtë, thanë të martën zyrtarët shëndetësorë palestinezë.

Shumica e të vdekurve në këtë sulm janë gra dhe fëmijë, sipas tyre.

Sulmi ndodhi të hënën natën dhe e goditi një shtëpi në lagjen qendrore, Daraj, në qytetin Gaza, sipas shërbimit emergjent të Ministrisë së Shëndetësisë në Gazë.

Një baba me tre fëmijë dhe gjyshja e fëmijëve ishin në mesin e trupave të nxjerrë nga rrënjat, sipas Associated Press.

Ushtria izraelite ende nuk e ka komentuar këtë sulm.

Lufta e Izraelit në Gazë i ka lënë të vdekur mbi 45.000 palestinezë, shumica e të cilëve gra dhe fëmijë, sipas Ministrisë së Shëndetësisë në Gazë.

Ushtria izraelite ka thënë se i ka vrarë mbi 17.000 militantë, pa dhënë dëshmi për këtë.

Lufta në Gazë filloi kur militantët e Hamasit e sulmuan Izraelin jugor më 7 tetor 2023, ku i vranë rreth 1.200 njerëz, kryesisht civilë, dhe i rrëmbyen afër 250 të tjerë.

Hamasi është i shpallur organizatë terroriste nga Shtetet e Bashkuara dhe Bashkimi Evropian./REL/

Zyrtarët gjermanë dhe francezë do të takohen të martën me përfaqësuesit e autoriteteve të reja qeverisëse të Sirisë në Damask, duke zgjeruar kontaktet perëndimore me administratën e re pasi diplomatët britanikë takuan liderin e saj Ahmed al-Sharaa vonë të hënën.

Nëntë ditë pasi Bashar al-Assad u rrëzua, shtetet perëndimore po hapin gradualisht kanale për autoritetet e reja në Damask të udhëhequra nga grupi islamik Hayat Tahrir al-Sham (HTS), megjithëse ata vazhdojnë ta konsiderojnë atë një grup terrorist.

Të hënën vonë, Sharaa, i njohur më parë me nofkën e luftës Abu Mohammed al-Xholani, u takua me një delegacion të ministrisë së jashtme britanike.

Ai theksoi nevojën për rivendosjen e lidhjeve dhe heqjen e sanksioneve ndaj Sirisë në mënyrë që refugjatët sirianë të mund të kthehen në shtëpi, njoftoi agjencia shtetërore siriane e lajmeve SANA.

Fotot e publikuara nga SANA treguan Sharaan- grupi i të cilit ishte pjesë e Al Qaidas derisa i prishi lidhjet në vitin 2016- të ulur me një kostum me një këmishë të hapur gjatë takimit.

Ky ishte takimi i tij i nivelit më të lartë deri tani me një zyrtar të qeverisë perëndimore që kur HTS-ja mori pushtetin.

Imazhet nënvizojnë ndryshimin gjeopolitik që kur Assad u rrëzua nga forcat e udhëhequra nga HTS, një goditje për aleatët rusë dhe iranianë të Assadit që mund të hapë rrugën për shtetet perëndimore për të rihapur kontaktet me Damaskun.

Por të paktën tani për tani, çdo hap perëndimor kërkon manovrim si rreth përcaktimit si organizatë terroriste të vendosur ndaj HTS-së gjatë kohës kur ishte degë e Al Qaidas dhe sanksioneve financiare të vendosura ndaj Damaskut nën Assadin.

Sharaa “foli për nevojën për të ndërtuar një shtet ligjor me institucione dhe vendosjen e sigurisë,” raportoi SANA.

Ai foli gjithashtu për rolin e rëndësishëm të Britanisë në nivel ndërkombëtar”.

Përpara takimit, ministri i jashtëm i Mbretërisë së Bashkuar, David Lammy tha se Britania kishte dërguar një delegacion zyrtarësh të lartë të Mbretërisë së Bashkuar “në Damask këtë javë për takime me autoritetet e reja të përkohshme siriane dhe anëtarët e grupeve të shoqërisë civile në Siri”.

Diplomatët gjermanë po planifikojnë gjithashtu bisedime me përfaqësuesit e HTS-së në Damask të martën, tha ministria e jashtme gjermane.

Një zëdhënës i ministrisë së jashtme gjermane tha se bisedimet do të fokusohen në një proces tranzicioni për Sirinë dhe mbrojtjen e pakicave.

“Mundësitë e një pranie diplomatike në Damask po eksplorohen gjithashtu atje,” shtoi zëdhënësi në një deklaratë, duke përsëritur se Berlini po monitoronte nga afër HTS-në në dritën e rrënjëve të saj në ideologjinë e Al Qaidas.

“Me sa mund të thuhet, ata kanë vepruar me maturi deri më tani,” tha zëdhënësi.

Konflikti sirian, i cili doli nga kryengritja e vitit 2011 kundër sundimit me grusht të hekurt të Assadit, çoi miliona sirianë jashtë vendit si refugjatë, duke përfshirë rreth 1 milion që shkuan në Gjermani.

Diplomatët francezë gjithashtu pritet të vizitojnë Damaskun më vonë të martën për të takuar përfaqësuesit e HTS-së, thanë zyrtarët francezë.

Departamenti Amerikan i Shtetit tha të hënën se qeveria amerikane ka pasur më shumë se një komunikim me Hayat Tahrir al-Sham (HTS) gjatë javës së kaluar.

Shefja e politikës së jashtme të BE-së Kaja Kallas tha të hënën se Bashkimi Evropian duhet të jetë i gatshëm të lehtësojë sanksionet ndaj Sirisë nëse udhëheqja e re e vendit ndërmerr “hapa pozitivë” për të krijuar një qeveri gjithëpërfshirëse dhe për të respektuar të drejtat e grave dhe të pakicave.

Administrata e re në Damask ka paraqitur pak detaje mbi të menduarit e saj për hapat e ardhshëm për Sirinë, e cila po del nga më shumë se pesë dekada sundimi nga familja Assad dhe gati 14 vjet luftë civile shkatërruese.

Kryeministri i sapoemëruar Mohammed al-Bashir, i cili më parë drejtoi një qeveri të lidhur me HTS-në në provincën Idlib, ka thënë se do të qëndrojë në detyrë deri në mars./REL/