Kandidati i LDK-së për kryeministër, Lumir Abdixhiku, ka thënë se sa më të mëdha që janë tubimet e LDK-së aq më të larta bëhen “britmat e piskamat”.

Ai ka shkruar se Kosova nuk ka kohë për të humbur në ndarje e përçarje.

“Kosova, megjithatë, kohë për të humbur në ndarje e përçarje nuk ka. Kësaj marrëzie duhet t’i dalim në ballë të gjithë! Kjo nuk është Kosova jonë. Kjo nuk është sjellja jonë. Kjo nuk është ëndrra jonë. Prandaj sot unë nuk jam para qytetarëve as për të nxitur urrejtje për tjetrin e as për t’ju mbushur plot helm e vrer për tjetrin. Unë nuk ju ndaj në tradhtarë e patriotë, me mua apo me Serbinë. Sot qëndroj para jush t’ju them se nuk ka Kosovë të partive”, ka theksuar Abdixhiku.

Abdixhiku gjithashtu ka theksuar se nuk ka Kosovë të individëve.

“Nuk ka Kosovë të epokave. Ka një Kosovë dhe një Kosovë të vetme, ka një ëndërr dhe një ëndërr të vetme, ka një adresë dhe një adresë të vetme, ka një atdhe dhe një atdhe të vetëm. Republika jonë është vetë ëndrra jonë! Ndryshimi sot, është misioni jonë!”, tha ai.

Kryetari i Partisë Demokratike të Kosovës (PDK), Memli Krasniqi ka komentuar angazhimin dhe mbështetjen që kanë marrë gjatë dy ditëve të fushatës zgjedhore, duke thënë se entuziazmi që po e gjejnë në mbarë vendin është inkurajimi kryesor për fitoren e 9 shkurtiti.

PDK hapjen zyrtare të fushatës e bëri më 11 janar, ku mijëra simpatizues u mblodhën në Prishtinë (Salla 1 Tetori), e një ditë më vonë tubimi i dytë u mbajt në Ferizaj (Salla Sportive “Bill Clinton”).

Krasniqi tregon se kanë besim te qytetarët dhe me hapje të fushatës, Partia Demokratike nuk do ndalë aktivitetet e tyre.

“Jam jashtëzakonisht i inkurajuar nga këto dy ditët e para të fushatës. Kishim një tubim të hapjes zyrtare të fushatës të jashtëzakonshme me një energji pozitive dhe me një vullnet të shtuar të cilin ka shumë vite që nuk e kam ndjerë në tubime të tilla. Vërtetë jam krenar për të gjithë aktivistët dhe anëtarët e Partisë Demokratike të Kosovës anë e mbanë vendit që janë çdo ditë në takime me qytetarët në tubime të ndryshme. Natyrisht kësaj gare kandidati ynë për kryeministër, Bedri Hamza po i prin me një energji të hatashme që besoj po reflekton pozitivisht gjithandej. Kemi një garë të rëndësishme dhe besoj që entuziazmi të cilin po e gjejmë anë e mbanë vendit, në qytete të ndryshme, në fshatra e në lagje, është inkurajimi kryesor për fitoren të cilën e presim me datë 9 shkurt”, tha ai.

Partia Demokratike e Kosovës do vazhdojë me tubime të tilla nëpër komuna të Kosovës deri në mbyllje të fushatës.

Gjykata Themelore e Shkupit vendosi më 13 janar që të lirojë nga akuzat Gordana Jankullovskan, për rastin “Fortesa”, që ka të bëjë me shkatërrimin e pajisjeve të përgjimit, të cilat konsiderohen të paligjshme dhe të paautorizuara.

Jankulloska, e cila shërbeu si ministre e Punëve të Brendshme (MPB), nga gushti 2006 deri në maj 2015, u lirua në mungesë të provave që “vërtetonin përfshirjen e saj në asgjësimin e pajisjeve”.

“E akuzuara Jankulloska lirohet nga akuza sepse prokurori publik nuk ka dëshmuar përtej dyshimit të arsyeshëm se e akuzuara e ka kryer veprën për të cilën akuzohet”, tha gjykatësi Ilija Trpkov.

Në të njëjtën lëndë, gjykata shpalli fajtor Toni Jakimovskin, duke e dënuar me tre vjet burgim – duke ia llogaritur periudhën që ka qëndruar në paraburgim – Valentina Simonovskan, e cila mori një dënim me kusht prej dy vjetësh, nëse gjatë pesë vjetëve të ardhshme nuk kryen ndonjë vepër tjetër penale.

Për veprat e njëjta, me 9 dhe 14 vjet burg, janë dënuar edhe Nikolla Boshkovski, ish punonjës në Drejtorinë për Siguri dhe Kundërzbulim (DSK), si dhe Goran Grujevskin, shefin e kabinetit të ish-drejtorit të DSK-së, Sasho Mijallkov.

Grujevskin dhe Boshkovskin u gjykuan në mungesë, pasi në qershor të vitit 2017 u arrestisën nga Maqedonia e Veriut në drejtim të Greqisë.

Të akuzuarit u shpallën fajtorë për shkatërrimin e pajisjeve të përgjimit të komunikimeve, me qëllim fshehjen e gjurmëve. Me këto veprime, ata sipas autoriteteve gjyqësore, i kanë shkaktuar dëme shtetit në vlerë prej 1 milion e 418 mijë euro.

Gjykatësi Trpkov, vendosi që Grujevski, Jakimovski dhe Boshkovski në afat prej tre muajsh ta kompensojnë dëmin e bërë në shumë prej 87.422.668 denarë.

Sipas aktakuzës, përmes tre sistemeve për ndjekjen e komunikimeve, në periudhën nga viti 2008 deri në vitin 2015, janë ndjekur në mënyrë të paligjshme 4.286 numra telefoni (politikanë, gazetarë, qytetarë) për të cilët nuk ishin lëshuar fare urdhra nga gjyqësori.

Çështja me përgjimet e paligjshme, “Fortesa” dhe “Target-Fortesa” filloi në qershor të vitit 2017. Në to ishte i përfshirë edhe Mijallkov.

Megjithatë, pas ndryshimeve në Kodin Penal të vitit 2023, që parashikojnë vjetërsimin e rasteve të korrupsionit të lartë, veprat për bashkim kriminal dhe keqpërdorim të pozitës zyrtare, për të cilat ishte akuzuar Mijalkov, u shpallën të vjetruara.

Trpkov i quajti këto ndryshime “një ndërhyrje në gjyqësor”.

Zëdhënësi i Partisë Demokratike të Kosovës, Blerand Stavileci i është kundërpërgjigjur kryeministrit Albin Kurti, në lidhje me gjuhën e ashpër të tij ndaj opozitës. Një ditë pasi Kurti në një tubim në Mitrovicë i quajti “zuzar” opozitarët, Stavileci tha se Kurti në mungesë të platformës konkrete për qytetarët po mallkon të kaluarën.

Ai në një konferencë për media të hënën, tha se gjuha e ashpër e Kurtit ndaj partive të tjera është si rezultat edhe dështimeve të shumta gjatë mandatit katërvjeçar.

“Në mungesë të platformave konkrete për qytetarët, pastaj me dështimet e shumta që kanë ndodhur gjatë kësaj kohe. Në një kohë kur qytetarët vuajnë nga mungesa e energjisë nga një arsimim i dobët dhe shumë sfera të tjera që kemi ngecur, kryeministri merret me të kaluarën. Mirëpo kjo nuk është për t’u çuditur sepse ju po e shihni se të njëjtën gjë po e bënë me mediat dhe debatet. Nëse s’ke çfarë për t’iu thënë qytetarëve tuaj që i keni premtuar shumë atëherë ke vetëm një zgjidhje për të ikur apo siç e ka stilin për të mallkuar të kaluarën”, tha ai.

Krahas kësaj, pas nisjes së fushatës zgjedhore, Stavileci tha se dy tubimet e PDK-së në Prishtinë dhe Ferizaj treguan se Kosova është gati për një të ardhme më të mirë.

“Kosova është gati për një të ardhme më të mirë. Kjo nuk është thjesht një fushatë ky është një mision dhe mbi të gjitha një rrugëtim i pandalshëm i atyre qytetarëve që besojnë se Kosova mundet më mirë. Qytetarëve të Prishtinës dhe Ferizajt i falënderojmë nga zemra. Përkrahja juaj e madhe, energjia dhe besimi juaj te Bedri Hamza kryeministër janë forca që na shtyjnë përpara. Kosova po flet dhe porosia është e qartë. Është koha për më mirë. Është koha për të rikthyer dinjitetin dhe çliruar potencialin e Kosovës sonë për më mirë”, theksoi zëdhënësi i PDK-së.

Fushata zgjedhore ka nisur me 11 janar, ku partitë politike kanë filluar mbajtjen e tubimeve elektorale me qytetarët.

Zgjedhjet parlamentare do të mbahen me 9 shkurt.