Kryeministri i Kosovës, Albin Kurti ka udhëtuar për në Zagreb të Kroacisë ku do të zhvillojë një vizitë zyrtare.

Ai do të mirëpritet në takime bilaterale nga krerët e shtetit të Kroacisë. Pjesë e delegacionit të Qeverisë së Kosovës janë ministri i Punëve të Brendshme, Xhelal Sveçla, ministrja e Industrisë Rozeta Hajdari dhe ministri i Financave, Punës dhe Transfereve Hekuran Murati.

Gjatë kësaj vizite dy vendet do të nënshkruajnë marrëveshje në fushën e sigurimeve sociale, për njohje reciproke të patentë-shoferëve, për bashkëpunim në mbrojtje nga fatkeqësitë natyrore, teknike dhe teknologjike, dhe bashkëpunim në fushën e mjekësisë ligjore. Pas Kroacisë, kryeministri Kurti udhëton për në Slloveni – vend ky fqinj i Kroacisë.

Presidentja e Kosovës, Vjosa Osmani po qëndron në Uashington për takime në Senat dhe Dhomën e Përfaqësuesve, ndërsa do të mbajë fjalim në simpoziumin e 11-të vjetor të Kolegjit United States Naval War në Rhode Island.

Osmani gjatë ditës ka takuar senatorin republikan Thom Tillis me të cilin ka diskutuar mbi zhvillimet e fundit të sigurisë në Kosovë e Ballkanin Perëndimor, si dhe rëndësinë e bashkëpunimit për ruajtjen e paqes e sigurisë në rajon.

“Paqja dhe siguria e qëndrueshme janë parakusht për prosperitet e zhvillim. SHBA-ja ka qenë dhe mbetet e përkushtuar për të ndihmuar, ruajtur dhe avancuar ato në Kosovë”, ka shkruar Osmani në Facebook.

Subjektet politike shprehen optimiste për rezultate pozitive në zgjedhjet parlamentare të 9 shkurtit. Një ditë pasi shpallën listat e kandidatëve për deputetë, ato thonë se përbërja e tyre ofron përfaqësim gjithëpërfshirës dhe kualitativ. Ndërsa analistë politikë thonë se në listat e partive nuk ka ndonjë befasi, me përjashtim të mos përfshirjes së Liburn Aliut në listën e LVV-së dhe Agim Veliut në listën e LDK-së.

Anëtari i Vetëvendosjes, Adnan Rrustemi, thotë  se lista e partisë aktuale në pushtet përmban emra të dëshmuar në skenën politike kosovare, derisa nënvizon se e njëjta do të jetë fituese.

“Do të jetë një listë padyshim fituese. Një listë që unë do të thosha e një plebishiti të dytë pas 14 shkurtit 2021. Është një listë gjithëpërfshirëse në kuptimin edhe të përfaqësimit politik dhe institucional, por edhe të kategorive shoqërore sikurse edhe të komunave në kuptimin gjeografik të fjalës dhe profileve profesionale. Është një përpjekje për t’i dhënë përgjigje asaj çka pritet nga LVV-ja në kuptimin e përfaqësimit politik dhe qytetarëve në zgjedhjet e 9 shkurtit. Ne jemi të bindur se përmes kësaj liste do të dalim fitues të zgjedhjeve me rezultatin mbi 50 për qind, aq sa është e nevojshme për të krijuar institucionet”, tha ai.

Në superlativ për listën e PDK-së, flet edhe Hisen Berisha, deputet i kësaj partie. Ai thotë se përbërja e listës është kualitative dhe do të çojë përpara objektivat e programit qeverisës të kandidatit për kryeministër Bedri Hamza.

“Kriteret e vendosura për t’u përfshirë në listën e Partisë Demokratike garantojnë një përbërje, strukturë politike që do t’i çojë përpara objektivat e vendosura në programin qeverisës nga kandidati për kryeministër. Po ashtu, edhe objektivat që i ka PDK-ja për shtet-ndërtim, ashtu siç është dëshmuar që nga lufta e këndej”, thekson ai.

Në anën tjetër, anëtari i kryesisë së LDK-së, Armend Zemaj, thotë se lista e tyre është gjithëpërfshirëse sa i përket ideologjisë dhe filozofisë politike. Sipas tij, në listë ka njerëz të dëshmuar në aspektin profesional dhe intelektual.

“Lista është gjithëpërfshirëse edhe sa i përket ideologjisë dhe filozofisë politike të LDK-së, duke ruajtur pjesën përmbajtjesore që ka me identitetin tonë dhe karakterin që posedon LDK-ja. Në pjesën profesionale, njerëz të dëshmuar në aspektin intelektual, por edhe profesional dhe politik. Për mendimin tonë është një ndër listat më përfaqësuese që i ofrohen qytetarëve të Kosovës, jo vetëm elektoratit tonë”, deklaron Zemaj.

Besnik Tahiri nga AAK thotë se lista e tyre është “më e forta”, reprezentative dhe “magnetike” për të marrë votën e elektoratit në ditën e zgjedhjeve.

“Lista e Aleancës për Ardhmërinë e Kosovës, pa asnjë dyshim, është lista fituese e zgjedhjeve të 9 shkurtit. Tash ndonjë qytetar i Kosovës mund të thotë se çka po them? Aleanca me këtë listë, me këto koalicione dhe këta burra dhe gra që i ka në listë, e ka listën më të fortë, reprezentative dhe më magnetike për të marrë votë”, thekson Tahiri.

Analisti politik Albinot Maloku thotë se përbërja e listave zgjedhore është më shumë vazhdimësi e së kaluarës, pa emra kualitativë që mund të bëjnë diferencën. Megjithatë, sipas tij, në secilën parti politike ka dhjetë kandidatë të mirë që qytetarët mund t’i votojnë më 9 shkurt.

“Procesi aktual i rregullt ka pasur një dinamikë tjetër. S’ka pasur atë pjesën e aderimeve pompoze apo të ngjashme. Listat e prezantuara prej atyre që janë brengosëse janë disa që janë përmendur që kanë probleme me drejtësinë. Kjo lista e partisë në pushtet mban primatin e këtyre emrave. Ka larguar disa siç është parë me emrin e Liburn Aliut, i cili është efekt interesant mes mospërputhjes që ndodhi mes Kurtit e Aliut. Në anën tjetër, LDK-ja përjashtoi Agim Veliun, i cili është një faktor i rëndësishëm i vazhdimësisë së LDK-së. Subjektet të tjera politike, përgjithësisht, janë munduar të ruajnë një vijë të liderit se sa kualitetit në kuptimin e njerëzve që janë në skenën politike në Kosovë. Ka pasur aderime të panatyrshme…Befasi nuk shoh shumë. Secili subjekt në formën e re të votimit të dhjetë emrave që mund të votojnë, besoj se do të mund të gjejnë nëse ata janë gjykues të mirë”, thekson Maloku.

Partitë politike më 11 dhjetor kanë dorëzuar në Komisionin Qendror Zgjedhor listat e kandidatëve për deputetë që do të jenë pjesë e garës zgjedhore për Kuvendin e Kosovës më 9 shkurt.

Roli i Gjermanisë në 25 vitet e fundit në Kosovë ka qenë shumëdimensional. Prandaj, edhe prezenca e mediave gjermane në Kosovë, që nga viti 1998 e deri më sot, ka qenë e rëndësishme.

Gjatë Luftës së Kosovës, roli i Gjermanisë shënoi një moment kyç në marrëdhëniet Kosovë-Gjermani. Vendimi për të marrë pjesë në Operacionin e Forcave Aleate të NATO-s në vitin 1999 dhe më pas për të kontribuar në KFOR përfaqësoi një ndryshim historik për Gjermaninë, duke qenë dislokimi i parë ushtarak i vendit që nga Lufta e Dytë Botërore.

Ky vendim shkaktoi një debat të madh brenda Partisë së Gjelbër, e cila kishte një bazë pacifiste, dhe brenda qeverisë federale të kancelarit Gerhard Schröder dhe ministrit të Jashtëm Joschka Fischer. Pavarësisht këtyre debateve të brendshme, pjesëmarrja e Gjermanisë në operacion u bë një moment i rëndësishëm në politikën e jashtme dhe të sigurisë të saj, duke hapur rrugën për një angazhim afatgjatë për sigurinë e Kosovës.

Por, si e portretizoi media gjermane këtë angazhim? Për të kuptuar më mirë qasjen e mediave gjermane në Kosovë, si dhe kontributin e tyre përmes arkivave të Reporting House nga periudha e luftës 1998-1999, u mbajt një diskutim në zyret e këtij institucioni.

Pjesëmarrëse ishte gazetarja nga Kosova, Vjosa Çerkini, që punon në Deutsche Welle, e cila ndau përvojën e saj profesionale dhe pikëpamjet mbi ndikimin e mediave gjatë asaj periudhe dhe pas saj.

Ajo u shpreh: “Rrugëtimi im nuk ka qenë aspak i lehtë, si një 18-vjeçare udhëtova për në Gjermani për t’u bërë gazetare e pavarur. Ishte një rrugë e gjatë ku më është dashur të mësoj gjuhën, të krijoja kontakte të reja dhe të siguroja financa vetanake”. Vjosa, e emocionuar nga kujtimet e luftës, ndau me të pranishmit detaje të shumta që gjeneratat e reja nuk i kishin dëgjuar më parë.

Temat e trajtuara në këtë ngjarje, si dhe ndikimi i mediave gjermane gjatë periudhës së luftës dhe pas saj, u ndoqën me shumë interes, duke e ditur se shumë media, përfshirë ato gjermane, kanë luajtur një rol të rëndësishëm në zbardhjen e fakteve të asaj periudhe të dhimbshme për popullin shqiptar.

Artikull nga gazetarja Albina Zeneli. /UBT News/